ලබන වසර සඳහා වන අයවැය යෝජනා අද පස්වරුවේ පාර්ලිමේන්තුවට ඉදිරිපත් කෙරේ. නිදහස් ශ්‍රි ලංකාවේ 76 වැනි අයවැය ලේඛණය වන එය වත්මන් රජයේ දෙවැනි අයවැය ලේඛණයයි. මුදල් ඇමතිවරයා ලෙස බැසිල් රාජපක්ෂ මහතා ඉදිරිපත් කරන පළමු අයවැය ලේඛණය එයයි.
අයවැය යෝජනා පාර්ලිමේන්තුවට ඉදිරිපත් කිරීම පස්වරු 2.00 ට ඇරඹෙයි. වෙළඳපල ආර්ථිකය නිෂ්පාදන ආර්ථිකයක් බවට පරිවර්තනය කරගැනිම සඳහා වන විධිමත් වැඩපිළිවෙලක් යටතේ එය සකස්කර තිබේ. ඒ සඳහා වන ක්ෂේත්‍ර හඳුනා ගනිමින් නව තාක්ෂණය හා මුසුකර රට සංවර්ධනය කරා රැගෙන යාම ඉලක්ක කරගත් යෝජනා මෙවර අයවැයට ඇතුලත් වනු ඇත. විදේශ විනිමය ගැටඑව අවම කිරීම සඳහා වන ක්‍රියාමාර්ග ද ඊට ඇතුලත්කර තිබේ.
කොරෝනා වෛරසයේ ව්‍යාප්තිය පාලනයෙන් පසු ආර්ථිකය යථාවත් කිරීමේ යෝජනා රැසක් ද ඊට ඇතුළත්ය. 2022 වසර සඳහා වන විසර්ජන පනත් කෙටුම්පත පසුගිය ඔක්තෝබර් මස 07 වැනිදා පාර්ලිමේන්තුවට ඉදිරිපත් කෙරිණ. ලබන වසරේ රජයේ සමස්ත වියදම රුපියල් කෝටි දෙලක්ෂ 50 දහස් 500 ක් ලෙස එහි සදහන් විය. එම වසරේ වියදම වන රුපියල් කෝටි දෙලක්ෂ 53 දහස් 800 ට සාපේක්ෂ්ව එම වසරේ රජයේ වියදම රුපියල් කෝටි 3300 කින් අඩුකර තිබිම විශේෂත්වයකි. රාජ්‍ය සේවයේ වැටුප්, සහනාධාර, සුබසාධන, ණයපොලී ආපසු ගෙවීම් සංවර්ධන යෝජනා සඳහා වන වියදම් ඊට ඇතුලත්ය.
අයවැය දෙවනවර කියවීමේ විවාදය හෙට ඇරඹෙයි. විවාදය පුරා දින හතක් පැවැත්වෙන අතර දෙවනවර කියවීමේ ඡන්ද විමසිම පැවැත්වෙන්නේ ලබන 22 වැනිදාය. කාරක සභා අවස්ථාවේ විවාදය ලබන 23 වැනිදා ඇරඹෙය්. සෙනසුරාදා දින ද ඇතුඵව ලබන මස 10 වැනිදා දක්වා දින 16 ක් එම විවාදය පැවැත්වෙයි. අයවැය තෙවන වර කියවීමේ ඡන්ද විමසිම පැවැත්වෙන්නේ ලබන මස 10 වැනිදා පස්වරු 5.00 ටයි.
ශ්‍රව්‍යාබාධිත ප්‍රජාව වෙනුවෙන් මෙවර අයවැය විවාදය සංඥා භාෂාවෙන් ඉදිරිපත් කිරීමට විධිවිධාන යොදා තිබේ. අයවැය විවාදය පැවැත්වෙන කාලසීමාව තුළ පාර්ලිමේන්තුවේ මහජන ගැලරිය ජනතාවට විවෘත නොවේ. රාජ්‍ය නිලධරින් සිමිත පිරිසකට පමණක් අයවැය කාරක සභා අවස්ථාවට සහභාගිවීමේ අවස්ථාව ලැබෙයි. ආරාධිත විදේශිය තානාපතිවරුන් හා මහ කොමසාරිස්වරුන් පමණක් අද පාර්ලිමේන්තුවේ විශේෂ ආරාධිතයන්ට ගැලරිය විවෘත කෙරේ.
