කොවිඩ් වසංගතය හමුවේ ආර්ථික ගැටඵවලින් පීඩා විදින ජනතාවට සහන ලබාදීම සදහා විශේෂ වැඩපිළිවෙලක් ක්‍රියාත්මක කරන බව මුදල් අමාත්‍ය බැසිල් රාජපක්‍ෂ මහතා ඊයේ රාත්‍රියේ කොළඹදී පැවැති මාධ්‍ය හමුවකදී පැවසීිය. ඒ අනුව සියලුම ඖෂධ හා අත්‍යවශ්‍ය ආහාර ද්‍රව්‍යවල බදු ඉවත් කෙරේ. ජනවාරී මාසයේ සිට ක්‍රියාත්මක වනපරිදි රජයේ සේවකයන්ට ,විශ්‍රාමකයන්ට සහ ආබාධිත සෙබලුන්ට මාසිකව රුපියල් පන්දහසක විශේෂ දීමනාවක් ලබාදීමට කටයුතු කරන බවද මුදල් අමාත්‍යවරයා සදහන් කරයි. සමෘද්ධි ලාභින්ට දැනට ලබාදෙන රුපියල් 3500 ක මාසික දීමනාව රුපියල් දහසකින් ඉහළ නැංවෙයි.
පවතින පොහොර ගැටඵව හේතුවෙන් වී අස්වැන්න සියයට 20 ත් 30 ත් අතර ප්‍රමාණයකින් අඩුවිය හැකි බැවින් එම පාඩුව පියවීම සදහා ගොවීන්ට වී කිලෝවකට රුපියල් 25ක අමතර මිලක් ලබාදීමටද රජය තීරණය කර ඇත. ඒ අනුව වී කිලෝවක් සදහා රුපියල් 75ක සහතික මිලක් නියම කෙරේ. දිවිනැගුම වැඩපිළීවෙල නැවත ක්‍රියාවට නංවන අතර වගා කරන ගෙවතු සදහා දිරිදීමනාවක් ලබාදෙයි. පර්චස් 20 ට අඩු ගෙවත්තකට රුපියල් පන්දහසක් ලබාදෙන අතර පර්චස් 20 ට වැඩි අක්කරයකට අඩු ගෙවත්තකට රුපියල් දසදහසක දිරිදීමනාවක් ලබාදෙන බවද මුදල් අමාත්‍යවරයා සදහන් කරයි. වගාව සාර්ථක වු බව පෙන්නුම් කළහොත් එම දීමනාව නැවත ලබාදෙන බවද හෙතෙම පවසයි.
සෑම වතු කම්කරු පවුලකටම මසකට තිරිගු පිටි කිලෝග්‍රූම් 15ක් සහන මිලකට ලබාදීමට කටයුතු කෙරේ. එම තිරිගු පිටි කිලෝග්‍රුමයක මිල රුපියල් 80 නොඉක්මවයි. සේවක අර්ථසාධක අරමුදලේ ලියාපදිංචි සෑම වතු කම්කරුවෙකුටම එම තිරිගුපිටි සහනය හිමිවෙයි. එම සහන පැකේජය සදහා වසරකට වැයවන මුදල රුපියල් මිලියන 229 කි.
රාජ්‍ය සේවකයන්ට රුපියල් පන්දහසක දීමනාව ගෙවීමට වසරකට රුපියල් බිලියන 87 ක් වැයවේ. විශ්‍රාමිකයන් සදහා රුපියල් බිලියන 40 ක්ද ගෙවතු සහනාධාරය සදහා රුපියල් බිලියන 31ක්ද වැයවන බව මුදල් අමාත්‍ය බැසිල් රාජපක්‍ෂ මහතා පෙන්වා දෙයි. සහන ලබාදීමට වැයවන මුදල් සොයාගැනීම වෙනුවෙන් බදු ඉහළ නැංවීමක් සිදු නොවන අතර ඒ සදහා වෙනත් ක්‍රම උපයෝගී කර ගන්නා බවද හෙතෙම අවධාරණය කරයි.
