භාෂණයේ නිදහසට හෝ ප්‍රකාශනයේ නිදහසට හෝ කිසිදු ලෙසකින්වත් බාධා කිරීමට රජය සූදානම් නැතැයි ජනමාධ්‍ය අමාත්‍ය ඩලස් අලහප්පෙරුම මහතා පවසයි. සමාජයක ප්‍රගමනයට විවේචන වැදගත් වන බව පෙන්වා දෙන ඇමතිවරයා එම විවේචන ආකල්ප මත නොව තොරතුරු සහ දත්ත මත පදනම් විය යුතු බව පෙන්වා දෙයි. ත්‍රිකුණාමල දිස්ත්‍රික් ප්‍රකාශන කාර්යාංශය විවෘත කිරීම සහ එම දිස්ත්‍රික්කයේ ප්‍රාදේශීය මාධ්‍යවේදීන් සමඟ පැවති සුහද හමුවකදී ඇමතිවරයා මේ බව කියා සිටියේ ය.
“වගකීම් රහිතව සිදුවන පුංචි දෙයකින් පවුලක්, ආයතනයක්, සමාජයක්, චරිතයක් මුළුමනින් විනාශ වෙන්න පුළුවන්. ඒ නිසා තොරතුරු උපකල්පන සහ ආකල්ප මත නොව දත්ත සහ තොරතුරු මත පදනම් වෙලා අපි අපේ මාධ්‍ය කලාවේ නිරත වෙමු. සම්භාවනීය මාධ්‍ය කලාවක් ගොඩනඟා ගන්න පුළුවන් එතෙන්දි. භාෂණයේ නිදහස, ප්‍රකාශනයේ නිදහස කිසිඳු ආකාරයකින් බාධා කරන්න ආණ්ඩුවක් හැටියට අපි සූදානම් නැහැ. මම විශේෂයෙන්ම ජනමාධ්‍ය ඇමතිවරයා විදිහට ඒ වෙනුවෙන් මුළු හදවතින්ම පෙනී ඉන්නවා. ඒක ගැන සැකයක් තියා ගන්න එපා. අපි ලෝකයේ දියුණු වෘත්තීයමයභාවය ලබා ගන්න කටයුතු කරමු. රටට ඇත්ත පෙන්නමු. විවේචන වැදගත්. විවේචන කරන්න එපා කියලා නෙවෙයි මම කියන්නේ. හැබැයි විවේචනය ආකල්ප මත පදනම් නොවී තොරතුරු මත පදනම් වූ විවේචනයක් අපි කරමු. එහෙමයි රටකට නිරෝගී ප්‍රජාතන්ත්‍රවාදයක් ළඟා කරගත හැක්කේ.. එවිට පමණක් බව මගේ විශ්වාසයයි. අපිට අපේ යුතුකම ඉෂ්ට කළා ය කියන සතුට විශ්‍රාම ජීවිතේදී ලබා ගන්න පුළුවන් මාර්ගය ඒක. ඒ වෙනුවෙන් අපි එකතු වෙමු.”
ප්‍රාදේශීය ප්‍රවෘත්ති ජාත්‍යන්තරයට රැගෙන යාමට ජනමාධ්‍ය අමාත්‍යාංශය ගෙන යන ක්‍රියාමාර්ගය පැහැදිලි කළ අමාත්‍යවරයා..............
“ප්‍රාදේශීය මට්ටමේ තොරතුරු ජාතික මට්ටමට ගලා නොයන බව මෙතනදි කියවුණා. ඒකේ ඇත්තක් තියෙනවා. හොඳ තොරතුරු අපේ අතේ තියෙනවා. ඒ නිසා අපි යෝජනා කළා දිස්ත්‍රික්කයේ ප්‍රාදේශීය මාධ්‍යවේදීන් එකතු කරගෙන යූටියබ් චැනල් එකක්, දිස්ත්‍රික්කයේ ෆේස්බුක් චැනල් එකක් පවත්වාගෙන යන්න. ඒ තොරතුරු ඔබට ගබඩා කරන්න පුළුවන්. රෑක නාලිකාවක විනාඩි 30 ක ප්‍රවෘත්ති අතර තියෙන තරඟයෙන් මිදිලා ජාතික තලයට ගෙනිහිල්ලා, ජාත්‍යන්තර තලයට ගෙනියන්න හොඳ මාවතක් ඒ හරහා විවෘත කරගන්න පුළුවන්. ඒ තාක්ෂණික මැදිහත්වීම අපි අමාත්‍යාංශයක් විදිහට මොහාන් සමරනායක මහතාගේ නායකත්වයෙන් ප්‍රවෘත්ති දෙපාර්තමේන්තුව ඔබට ලබා දෙයි. ප්‍රවෘත්ති කියන එකට ප්‍රාදේශීය සීමාවන් දැන් නැහැ. අපේ රටේ ජනගහණය මිලියන 22 ක්. එයින් මිලියන 18 ක් ලංකාවේ ඉන්නේ. ඔවුන් අතරේ තියෙනවා ජංගම දුරකතන මිලියන 22 ක්. ස්මාර්ට් දුරකතනයත් එක්ක ලෝකයේ හැම පුරවැසියෙක්ම අද මාධ්‍යවේදියෙක් බවට පත්වෙලා. ඔබත් සමඟ එකතුවෙලා ප්‍රාදේශීය මට්ටමේ ප්‍රවෘත්ති ජාත්‍යන්තරයට ගෙන යන්න වැඩපිළිවෙළක් සැලසුම් කරමින් සිටිනවා. එය නුදුරේදී ක්‍රියාත්මක කිරීමට අප බලාපොරොත්තු වනවා. ඒ සඳහා කිසිඳු බේදයකින් තොරව එකතු වෙන ලෙසට අප ඔබට ආරාධනා කරනවා. සංවර්ධන ප්‍රවෘත්ති කියල කීවම සමහරු හිතනවා ඒවා ආණ්ඩුවේ ප්‍රවෘත්ති කියලා. සංවර්ධනය ජනජීවිතයට අදාළයි. එහි ප්‍රතිලාභ හිමිවන්නේ ජනතාවටයි. ඔබ ප්‍රවෘත්ති තුළින් එය මතු කරගත යුතුයි. ප්‍රවෘත්තිය වියපත් වෙන්න ඉඩ දෙන්න එපා.”
යහපත් මාධ්‍ය කලාවක් රට තුළ ස්ථාපිත කිරීමට රජය ගෙන යන වැඩපිළිවෙල පිළිබඳව පැහැදිලි කළ අමාත්‍ය ඩලස් අලහප්පෙරුම මහතා ජනමාධ්‍යවේදියාගේ කාර්යභාරය රාජ්‍ය මට්ටමින් ඇගයීම සඳහා ජනාධිපති මාධ්‍ය සම්මාන උළෙලක් මේ වසරේ සිට පැවැත්වෙන බව කියා සිටියේය.
“ඔබේ වෘත්තීය මත විශිෂ්ටභාවයේ මුද්‍රාව තබන්න ජනාධිපති සම්මාන උළෙල තරම් හේතු පාදක වෙන වෙනත් උළෙලක් ඔබ හමුවට එන එකක් නැහැ. එම සම්මාන උළෙලේ විවිධ ඉසව් අතරේ ප්‍රාදේශීය මාධ්‍යවේදීන් වෙනුවෙන් වෙනම ඉසව්වක් වෙන් කරන්න පළමු සාකච්ඡාවේදීම අපි තීන්දු කළා.”
දිවයිනේ උසස් පෙළ විෂයයන් සහිත සියළු පාසැල් ඇතුළත් වන පරිදි මාධ්‍ය කව පිහිටුවීමට ද ජනමාධ්‍ය අමාත්‍යාංශය කටයුතු කරමින් සිටී. ඒ පිළිබඳව පැහැදිලි කළ අමාත්‍ය ඩලස් අහලප්පෙරුම මහතා.
“අපේ පාසැල් පද්ධතියේ උසස් පෙළ සහිත පාසැල් 3042 ක් තියෙනවා. ඒ සියල්ලකගේම ජනමාධ්‍ය කවයක් ආරම්භ කරන්න අපි බලාපොරොත්තු වෙනවා. මුළු රටම ආවරණය වන පරිදි, රාජ්‍ය භාෂා දෙක සහ ඉංග්‍රීසි භාෂාව භාවිත කරන සෑම දරුවෙකුටම මේ මාධ්‍ය කව ඇතුළේ තම හැකියාවන් වර්ධනය කරගන්න පුළුවන්. ඉදිරි මාස දෙක තුන ඇතුළත මේ වැඩපිළිවෙළ ක්‍රියාත්මක කරන්න අපි බලාපොරොත්තු වනවා.
ප්‍රාදේශීය මාධ්‍යවේදීන්ට තම උපකරණ ලබාගැනීම සඳහා නූතන ආර්ථිකයට ගැලපෙන අයුරින් ණය යෝජනා ක්‍රමයක් ක්‍රියාත්මක කිරීමට ද ජනමාධ්‍ය අමාත්‍යාංශය කටයුතු කරමින් සිටන බව ද අමාත්‍යවරයා පැවසීය.
විශේෂ අවශ්‍යතා සහිත ප්‍රජාව උදෙසා ජනමාධ්‍ය අමාත්‍යාංශය විසින් ආරම්භ කර ඇති වැඩපිළිවෙල පිළිබඳව පැහැදිලි කළ අමාත්‍යවරයා......
“අපේ රටේ ආබාධ සහිත ප්‍රජාව මාධ්‍ය භාවිතයේ ඉතිහාසය තුළ කොන් වුණා. රටේ ජනගහණයෙන් සියයට 8.7 ක් ආබාධයක් සහිතයි. හැබැයි මාධ්‍ය භාවිතයේ දී කවමදාකවත් මේ පුරවැසියන් ගැන හිතුවේ නැහැ. නාලිකා දෙකක් පමණක් සංඥා භාෂාව භාවිත කළා. අපි අමාත්‍යාංශය තුළ ඔවුන් සඳහා වෙනම ඒකකයක් හැදුවා. අපි අළුතින් නාලිකා දෙකක සංඥා භාෂා ආරම්භ කළා. සංඥා භාෂා හැකියාව සහිත පුහුණුකරුවන් හිඟයි. අපි රාජ්‍ය භාෂා දෙපාර්තමේන්තුව සමඟ එක්ව ඒ සදහා සුදුසු පුද්ගලයින් පුහුණු කිරීමේ කටයුතු සිදු කෙරෙමින් පවතිනවා. මම විශ්වාස කරනවා ඉතාම කෙටි කාලයකදී සියළුම මාධ්‍ය ඇතුළේ සංඥා භාෂාව යොදා ගැනීම ඉතිහාසයේ පළවෙනි වතාවට ක්‍රියාත්මක කරන්නට හැකිවේවි කියලා”.
ජනමාධ්‍යවේදීන් සඳහා රජයේ ප්‍රවෘත්ති දෙපාර්තමේන්තුව විසින් නිකුත් කෙරන හැඳුනුම්පත වසරක් පාසා නිකුත් කිරීම වෙනුවට සෑම වසර තුනකට වරක් නිකුත් කිරීමට ද අමාත්‍යාංශය පියවර ගෙන ඇතැයි ද අමාත්‍ය ඩලස් අලහප්පෙරුම මහතා කියා සිටියේ ය. එම හැඳුනුම්පත ඔන්ලයින් ක්‍රමයට අයදුම් කිරීමේ හැකියාව පවතින බව ද අමාත්‍යවරයා පැවසීය.
ජනමාධ්‍යවේදීන් පුහුණු කිරීම සඳහා පිහිටුවීමට යෝජිත වරලත් ජනමාධ්‍ය ආයතනය පිළිබඳව පැහැදිලි කළ අමාත්‍ය ඩලස් අලහප්පෙරුම මහතා..........
“අපේ රටේ විශ්වවිද්‍යාල පද්ධතියේ තියෙනවා ප්‍රධාන විශ්වවිද්‍යාල 14 ක්. එයින් 8 කම ජනමාධ්‍ය සහ සන්නිවේදන විෂය උපාධි විෂයයක් විදිහට ඉගැන්වෙනවා. පසුගිය උසස් පෙළ විභාගයේ දී දරුවෝ 23 දාහක් ජනමාධ්‍ය විෂයයට පෙනී සිටියා. න්‍යායාත්මකව ජනමාධ්‍ය විෂය සඳහා පුළුල් ඉඩකඩක් වෙන් කොට තිබෙනවා. නමුත් ජනමාධ්‍ය වෘත්තියට අදාළ පුහුණුව, පර්යේෂණ, නූතන දැනුම ලබාගැනීම හා සම්බන්ධ ගැටළු රාශියක් තිබෙනවා. මහා බ්‍රිතාන්‍යය වැනි දියුණු රටවල ජනමාධ්‍යවේදීන් පුහුණු කිරීමට වරලත් ජනමාධ්‍ය ආයතන තිබෙනවා. අපි මීට මාස 2 කට පෙර ජනාධිපතිතුමාගේ, අගමැතිතුමාගේ, කැබිනට් මණ්ඩලයේ අනුමැතිය ගත්තා ශ්‍රී ලංකාවේ වරලත් ජනමාධ්‍ය ආයතනයක් පිහිටුවන්න. ජනමාධ්‍ය වෘත්තිය හා සම්බන්ධව එතෙක් මෙතෙක් අප ලබාගත් වැදගත්ම ජයග්‍රහණයක් හැටියට මෙය අවිවාදයෙන්ම හැඳින්විය හැකියි. ආණ්ඩුවක් විදිහට අප ඒ පිළිබඳව සතුටු වන අතරේ මම විෂය භාර ඇමතිවරයා විදිහට සහ මේ රටේ ඉතාම අඳුරුතම යුගයක පෑන අතට ගත්ත පත්තරකාරයෙක් විදිහට විශේෂයෙන්ම ඒ ගැන සතුටු වනවා.
නැගෙනහිර පළාත් ආණ්ඩුකාර අනුරාධා යහම්පත් ත්‍රීකුණාමල දිස්ත්‍රික් පාර්ලිමේන්තු මන්ත්‍රී කපිල අතුකෝරාල, හිටපු පළාත් සභා මන්ත්‍රිණී ආරියවතී ගලප්පත්ති, ත්‍රිකුණාමල දිස්ත්‍රික් ලේකම් සමන් දර්ශන පාඬිකෝරාළ හා රජයේ ප්‍රවෘත්ති අධ්‍යක්ෂ මොහාන් සමරනායක යන මහත්ම මහත්මීන් ඇතුළු රාජ්‍ය නිලධාරීන් පිරිසක් මේ අවස්ථාවට එක්ව සිටියහ.
