ජනමතය මෙහෙයවීමෙහිලා මාධ්‍ය ආයතන සතු බලය දේශපාලන ආයතන සතු බලයට සාපේක්ෂව පුළුල් පරාසයක විහිදී ඇති බවත් , එකී විසල් බලයත් සමඟ විශාල වගකීමක් මාධ්‍ය වෙත පැවරෙන බවත් ජනමාධ්‍ය අමාත්‍ය ඩලස් අලහප්පෙරුම මහතා පෙන්වා දෙයි ...
ජනමාධ්‍ය අමාත්‍යවරයා මේ බව සඳහන් කළේ පෙබරවාරි දෙවෙනිදා ජනමාධ්‍ය නීති සංසදයේ සාමාජිකයින් සමඟ පැවති සාකච්ඡාවේදී ය ....
ජනමාධ්‍ය නීති සංසදයේ සාමාජිකයින්ගේ ද අදහස් හා යෝජනා මෙම සාකච්ඡාවේදී ඉදිරිපත් වූ අතර එහිදී වැඩිදුරටත් අදහස් දක්වමින් අමාත්‍යවරයා මෙලෙස කියා සිටියේය ...
ජනමාධ්‍ය අමාත්‍ය ඩලස් අලහප්පෙරුම මහතා ..
" මාධ්‍යයට අදාලව ඉතිහාසයේ ඉතා විශ්වසනීයත්වයක් සහ ගෞරවයක් තිබුණ බව අපි කවුරුත් දන්නවා. හැබැයි අද දවසේ ඒ ගෞරවය විශ්වසනීයභාවය තියෙනවා ද... මාධ්‍යයට තියෙන ගෞරවයේ ක්ෂයවීමක් එවගේම විශ්වසනීයභාවයේ පලුද්දක් තියෙන බව මම ජනමාධ්‍ය අමාත්‍යවරයා විදිහටත්, මාධ්‍ය ක්‍ෂේත්‍රයේ ඉන්න අපි කවුරත් අවිවාදයෙන් පිළිගන්නට ඕනෙ කරුණක්..එහෙම සිද්ධ වුනේ කොහොමද , ඇයි එහෙම සිද්ධ වෙලා තියෙන්නෙ..එහෙමනම් එයට තියෙන විසඳුම් මොනවාද ....මේ සාකච්ඡාවේ පදනම තමයි ඒ විසඳුම් සඳහා හරවත් කථිකාවතක් ගොඩනඟන එක..
මම විශ්වාස කරන විදිහට ප්‍රධාන කරුණු පහක් යටතේ මාධ්‍ය ක්ෂේත්‍රය පිළිබඳව අපේ විශ්වසනීයභාවය පලුඳු වෙලා තියෙනවා.. පළවෙනි කාරණය තමයි ස්වාමියාගේ අවශ්‍යතාවයට ප්‍රමුඛත්වය දීම , පොදු මහජන උන්නතිය වෙනුවෙන් නෙමෙයි, රාජ්‍ය මාධ්‍ය නම් ආණ්ඩුව කියන ස්වාමියාට , ඒ තුළින් සමබරතාවය ගිලිහිලා තියෙනවා, එය මගේ විනිශ්චයන්ට අනුව එක් කාරණාවක් , දෙවැනි කාරණාව තමයි දැඩිලෙස දේශපාලනීකරණය වීම, අපි එය අත්විඳිනවා ...ඇතැම් වෙලාවට ප්‍රකාශිතව පමණක් නෙමෙයි අප්‍රකාශිතවත් එය සිදුවෙනවා. එවගේම ඊ ළඟ බරපතල කාරණය තමයි පුද්ගලිකත්වයේ සීමාවන් ඉතාම බරපතල විදිහට ආක්‍රමණය වෙනවා.. වින්දිතයින් රාශියක් ඉන්නවා ..
ඊළඟ කාරණය තමයි තොරතුරු මත පදනම් වෙන්නේ නැතිව ආකල්ප මත පදනම් වෙලා කරන ව්‍යාජ පුවත් මගින් මහජනයා මුලාවට පත්වෙන එක .. ඒ වගේම අපි බොහෝ වෙලාවට දකින දෙයක් අත්විඳින දෙයක් ජාතිකත්වය ආගමිකත්වය මත පදනම් වෙච්ච වෛරී ප්‍රකාශන, මම අඳුනගත්ත කරුණු අතරේ එය තවත් එක් කාරණාවක් , මෙන්න මේ නිසා ඉතිහාසයේ අත්පත් කරගත්ත ඉතිහාසය ගෞරවය පිළිබඳ ප්‍රශ්නාර්ථ ලකුණක් ඇතිවෙලා තියෙනවා.. කොහොමද අපි මේක නැති කරගන්නේ .. සමහරු යෝජනා කරන්නේ වාරණය මෙයට සුදුසු විසඳුම කියලයි ..එවැනි සාකච්ඡා තියෙන්න පුළුවන්.. හැබැයි අපි කලබල වෙන්න ඕන නැහැ..මම ජනමාධ්‍ය අමාත්‍යවරයා විදිහට විශ්වාස කරන්නේ ඒක සුදුසු විසඳුම නෙමෙයි කියලයි .. මම එය ප්‍රතික්ෂේප කරනවා.. හැබැයි අපිට යම්කිසි ආකාරයක නියාමනයක් අවශ්‍ය වෙලා තියෙනවා ..ඒක මම හිතන් නැහැ කාටවත් ප්‍රතික්ෂේප කරන්න පුළුවන් කියලා... “
මෙම අවස්ථාවට ජනමාධ්‍ය සංසදයේ සභාපති රංජන හේරත්,හිටපු ජනමාධ්‍ය රාජ්‍ය අමාත්‍ය කරුණාරත්න පරණවිතාන ,ජනාධිපති නීතීඥ ජගත් වික්‍රමනායක , ආචාර්ය රංග කලන්සූරිය , මාධ්‍යවේදී සහ පර්යේෂක නාලක ගුණවර්ධන විද්‍යුත් විකාශකයින්ගේ සංවිධානයේ සභාපති අසංග ජයසුන්දර , ජනමාධ්‍ය සංසදයේ සාමාජිකයින් මෙන්ම ශ්‍රී ලංකාවේ ප්‍රමුඛ සමාජ මාධ්‍ය ක්‍රියාකාරීන් එක්ව සිටියහ ..
