මෙරට ජීවත්වන පුරවැසියාගේ චින්තනය උසස් කිරීමකින් තොරව අප බලාපොරොත්තු වන රට ගොඩනැ‍ඟීමට නොහැකි බවත්, එය දේශපාලනඥයාගේ කාර්යයක් පමණක් නොවන බවත් සෞඛ්‍ය හා ජනමාධ්‍ය ඇමැති, වෛද්‍ය නලින්ද ජයතිස්ස මහතා පැවැසීය.
සෞඛ්‍ය හා ජනමාධ්‍ය අමාත්‍යාංශය සහ විද්‍යුත් විකාශකයන්ගේ සංගමය එක්ව සංවිධානය කළ විද්‍යුත් විකාශන සමුළුව 2025 (Broadcasting Symposium) ට පෙරේදා (25) එක්වෙමින් ඇමැතිවරයා මේ බව සඳහන් කළේය.
මෙරට ජීවත්වන පුරවැසියාගේ චින්තනය උසස් කිරීමේ කාර්ය සිදුකළ හැකි ඉහළම කණ්ඩායම විද්‍යුත් විකාශකයන් බව ඇමැති නලින්ද ජයතිස්ස මහතා පැවැසීය.
මෙම විද්‍යුත් විකාශන සමුළුව සඳහා ක්ෂේත්‍රයේ වෘත්තිකයන්, මාධ්‍ය විද්වතුන් ඇතුළු පිරිසක් සහභාගි වූ අතර මාධ්‍ය ක්ෂේත්‍රයේ වත්මන් අභියෝග, වගකීම්, සාදාචාරාත්මක මාධ්‍ය කලාවේ ගුණාත්මකභාවය සහ අනාගත අපේක්ෂාවන් ආදී කරුණු පිළිබඳ මෙම සමුළුවේ දී පුළුල් කතිකාවතක් සිදු විය.
විද්‍යුත් විකාශන සමුළුව සැසි 04 කින් සමන්විත එක්දින වැඩමුළුවක් වූ අතර ඉදිරි වසර 05 දී විකාශන කර්මාන්තයේ අනාගතය, පවතින ගැටලු නිරාකරණය, ප්‍රකාශන අයිතීන් පිළිබඳව ද මෙම සමුළුවේ දී වැඩිදුරටත් සාකච්ඡා පැවැත්විණි.
විද්‍යුත් විකාශකයන්ගේ සංගමය මෙරට පුරවැසියා සහ රටේ අභිවෘද්ධිය වෙනුවෙන් මැදිහත්වන සහ ශ්‍රී ලංකාව පහුගිය කාලයේ විවිධ අර්බුදවලට මුහුණ දුන් අවස්ථාවන්වල දී තම කාර්යභාරය ඉතාම ඉහළින් ඉටු කළ සංගමයක් බවත්, මෙරටට අවශ්‍ය වන්නේ එවැනි සංගම් වන අතර ඒ වෙනුවෙන් සිය ගෞරවය ද පිරිනමන බවත් ඇමැතිවරයා සඳහන් කළේය.
මාධ්‍ය ලෝකයේ තරගකාරීත්වය පිළිබඳ සහ එහි සමාජ වගකීම් පිළිබඳ ද ස්වේච්ඡාවෙන් ක්‍රියාත්මක වෙමින් මෙවන් කතිකාවක් සංවිධානය කළ කණ්ඩායමකට නායකත්වය ලබා දීමට හැකි වීම මාධ්‍ය ඇමැතිවරයා ලෙස තමන් ලැබූ භාග්‍යයක් බව ද හෙතෙම කීවේය.
දශක 5 කට අධික කාලයක් මෙරට ජනමාධ්‍ය ක්ෂේත්‍රය වෙනුවෙන් අපරිමිත සේවාවක් ඉටුකළ සහ මෙම සමුළුව සඳහා විශේෂ ආරාධිත අමුත්තකු වශයෙන් සහභාගි වූ ශාන් වික්‍රමසිංහ මහතාට විද්‍යුත් විකාශකයන්ගේ සංගමය මඟින් ගෞරව හරසර ප්‍රණාම මෙහි දී පුදකළ අතර ඒ වෙනුවෙන් ප්‍රණාම තිළිණයක් සෞඛ්‍ය හා ජනමාධ්‍ය ඇමැති වෛද්‍ය නලින්ද ජයතිස්ස මහතා විසින් ශාන් වික්‍රමසිංහ මහතාට මෙහිදී ප්‍රදානය කරන ලදි.
ඉන්දුනීසියාවේ ඉස්ලාමීය විශ්වවිද්‍යාලයේ සන්නිවේදන දෙපාර්තමේන්තුවේ මාධ්‍ය සහ පුවත්පත් කලාව පිළිබද මහාචාර්ය මස්ඩුකී මහතා (Professor Masduki) විසින් මෙහිදී ප්‍රධාන දේශනය පවත්වන ලදි.
මේ අවස්ථාවට සෞඛ්‍ය හා ජනමාධ්‍ය අමාත්‍යාංශයේ ලේකම් විශේෂඥ වෛද්‍ය අනිල් ජාසිංහ ඇතුළු අමාත්‍යංශ නිලධාරීන්, නාලිකා ප්‍රධානීන්, මාධ්‍ය ක්ෂේත්‍රයේ විද්වතුන්, මාධ්‍ය වෘත්තියන් ඇතුළු විශාල පිරිසක් සහභාගි වූහ.
