“දෙපාර්ශ්වය අතර සංවර්ධන සහාය තවදුරටත් පිළිබිඹු කරමින් කිරි නිෂ්පාදන අංශයේ ඵලදායිතාව ඉහළ නැංවීමේ ව්යාපෘතිය සහ නිල ආරක්ෂක ආධාර ලබා දීමේ වැඩසටහන පිළිබඳ හුවමාරු පත්ර අත්සන් තැබීම සිදු කළ අයුරු.”
ඉන්දියානු සාගර කලාපයේ පිහිටි ශ්රී ලංකාවේ ස්ථාවරත්වය සහ සංවර්ධනය ඉතා තීරණාත්මක බව ජපාන අගමැති ෂිගෙරු ඉෂිබා (Shigeru ISHIBA) මහතා පැවසීය.
ජපාන රජයේ ආරාධනයකට අනුව ජපානයේ නිල සංචාරයක නිරත ජනාධිපති අනුර කුමාර දිසානායක මහතා පිළිගැනීමේ නිල උත්සවය ජපාන අගමැති කාර්යාල පරිශ්රයේදී ඊයේ (29) පෙරවරුවේ පැවැත්වූ අතර එහි පැවැති ඒකාබද්ධ මාධ්ය හමුව අමතමින් ජපාන අගමැතිවරයා මේ බව කියා සිටියේය. ජාත්යන්තර මූල්ය අරමුදලේ ණය ප්රතිව්යුහගතකරණ වැඩසටහන සාර්ථක කර ගැනීමට ජපන් රජය ලබා දුන් දායකත්වය වෙනුවෙන් මෙහිදී ජනාධිපති අනුර කුමාර දිසානායක මහතා ස්තුතිය පුද කළේය.
සංවර්ධනය සහ ස්ථාවරත්වය වෙනුවෙන් ජපානය සමඟ එක්ව කටයුතු කිරීමට කැපවන බවද ජනාධිපතිවරයා පැවසීය.
ජපාන අගමැති කාර්යාලය වෙත පැමිණි ජනාධිපතිවරයාව ජපාන අග්රමාත්ය ෂිගෙරු ඉෂිබා (Shigeru ISHIBA) මහතා විසින් මහත් හරසරින් යුතුව පිළිගනු ලැබීය. ජනාධිපතිවරයා වෙනුවෙන් ජපාන ස්වයං ආරක්ෂක බළකායේ උත්තමාචාරද එහිදී පිළිගැන්විණි. එම පෙළපාළිය නිරීක්ෂණය සඳහාද ජනාධිපතිවරයා එක් විය.
දෙරටේ නියෝජිත පිරිස හඳුන්වා දීමෙන් අනතුරුව, ජනාධිපති අනුර කුමාර දිසානායක මහතා සහ ජපාන අග්රමාත්ය ෂිගෙරු ඉෂිබා (Shigeru ISHIBA) මහතා අතර නිල සාකච්ඡා ආරම්භ විය.
ජපානය සහ ශ්රී ලංකාව අතර පවතීන දීර්ඝකාලීන සමීප මිත්රත්වය තවදුරටත් ශක්තිමත් කර ගනිමින්, දෙරට අතර වෙළෙඳ, ආයෝජන, ආර්ථික, සංවර්ධන ආධාර සහ කලාපීය ආරක්ෂාව ආදී කරුණු ආවරණය කෙරෙන පරිදි විවිධ ක්ෂේත්රයන්හි සහයෝගිතාව තවදුරටත් පුළුල් කර ගැනීම පිළිබඳව එහිදී අවධානය යොමු කෙරිණි.
දෙපාර්ශ්වය අතර සංවර්ධන සහාය (Official Development Assistance) තවදුරටත් පිළිබිඹු කරමින් කිරි නිෂ්පාදන අංශයේ ඵලදායිතාව ඉහළ නැංවීමේ ව්යාපෘතිය (Project for the Enhancement of Productivity in the Dairy Sector) සහ නිල ආරක්ෂක ආධාර ලබා දීමේ වැඩසටහන (Official Security Assistance- OSA) පිළිබඳ හුවමාරු පත්ර අත්සන් තැබීමද එහිදී සිදු කෙරිණි.
ශ්රී ලංකාව සහ ජපානය අතර පවතින දිගුකාලීන මිත්රත්වය, අන්යෝන්ය විශ්වාසය, ගෞරවය ශක්තිමත් පුද්ගල සබඳතා මත පදනම් වී තිබෙන බව ජනාධිපති අනුර කුමාර දිසානායක මහතා පැවසීය.
ජපාන අග්රාමාත්යවරයා සමඟ පැවති සාකච්ඡා ශ්රී ලංකා-ජපාන සබඳතාවල වැදගත් සන්ධිස්ථානයක් සනිටුහන් කරන බවද ජනාධිපතිවරයා කීය. එම එකඟතාවල සැබෑ ප්රතිලාභ අත්කර ගනිමින් සංවර්ධනය සහ ස්ථාවරත්වය වෙනුවෙන් යන ගමනේදී ජපානය සමඟ එක්ව කටයුතු කිරීමට ශ්රී ලංකාව කැපවන බවත් ජනාධිපතිවරයා එහිදී අවධාරණය කළේය.
ජපාන රජයේ සහාය ඇතිව ශ්රී ලංකාවේ ආරම්භ කරන ලද, පසුගිය ආර්ථික අර්බුදය හමුවේ අතරමඟ නැවතුණු සංවර්ධන ව්යාපෘති 11ක් නැවත ආරම්භ කරමින් එහි ප්රතිලාභ ජනතාවට ලබා දීම වෙනුවෙන් ජපන් රජය දැක් වූ සහාය මෙන්ම, ජාත්යන්තර මූල්ය අරමුදලේ ණය ප්රතිව්යුහගතකරණ වැඩසටහන සාර්ථක කර ගැනීමට ලබා දුන් දායකත්වය වෙනුවෙන්ද ජපාන රජය වෙත ස්තූතිය පළ කිරීමට ජනාධිපතිවරයා මෙහිදී කටයුතු කළේය.
ජනාධිපති අනුර කුමාර දිසානායක මහතා සහ ජපාන අග්රාමාත්ය ෂිගෙරු ඉෂිබා මහතා අතර පැවති නිල සාකච්ඡාවලින් පසු දෙපාර්ශ්වය විසින් ඒකාබද්ධ ප්රකාශයක්ද මාධ්ය වෙත නිකුත් කෙරිණි (Joint Statement).
මින් අනතුරුව ජපාන අග්රාමාත්යවරයා විසින් ශ්රී ලංකා ජනාධිපතිවරයා ප්රමුඛ දූත පිරිස වෙත පිරිනමන ලද භෝජන සංග්රහයටද ජනාධිපතිවරයා ඇතුළු පිරිස සහභාගි වූහ.
මෙම අවස්ථාව සඳහා ශ්රී ලංකාව නියෝජනය කරමින් විදේශ කටයුතු, විදේශ රැකියා සහ සංචාරක ඇමැති විජිත හේරත්, බස්නාහිර පළාත් ආණ්ඩුකාර හනිෆ් යුසූෆ්, ජපානයේ ශ්රී ලංකා තානාපති මහාචාර්ය පිවිතුරු ජනක් කුමාරසිංහ, ඩිජිටල් ආර්ථිකය පිළිබඳ ජනාධිපති ප්රධාන උපදේශක ආචාර්ය හාන්ස් විජයසූරිය, ආර්ථික කටයුතු පිළිබඳ ජනාධිපති ජ්යෙෂ්ඨ උපදේශක දුමින්ද හුලංගමුව මහත්වරු සහ විදේශ කටයුතු අමාත්යාංශයේ ජ්යෙෂ්ඨ නිලධාරීහු පිරිසක් සහභාගි වූ අතර, ජපාන රජය නියෝජනය කරමින් ඉහළ පෙළේ දූත පිරිසක් එක් වූහ.
