නුවරඑළිය තැපැල් කාර්යාල ගොඩනැඟිල්ල සහ එම පරිශ්රයේ ප්රතිසංස්කරණ කටයුතුවලට අදාළ මූලික සැලසුම් සකස් කරමින් ඉතා කඩිනමින් ප්රතිසංස්කරණ කටයුතු සිදු කරන්නැයි සෞඛ්ය හා ජනමාධ්ය ඇමැති, වෛද්ය නලින්ද ජයතිස්ස මහතා නිලධාරීන්ට උපදෙස් දුන්නේය.
වසර 130ක් පැරණි නුවරඑළිය තැපැල් කාර්යාල ගොඩනැඟිල්ල විදේශීය සංචාරකයන්ගේ ආකර්ෂණය ලබාගත හැකි ස්ථානයක් ලෙස සංවර්ධනය කිරීමේ ව්යාපෘතියේ ප්රගතිය සමාලෝචනය කෙරිණි. ඊට අදාළව පෞරාණික වටිනාකමක් සහිත තැපැල් කාර්යාල ගොඩනැඟිල්ලේ ප්රතිසංස්කරණ කටයුතු පිළිබඳ විශේෂ සාකච්ඡාවක් පසුගියදා සෞඛ්ය හා ජනමාධ්ය ඇමැති, වෛද්ය නලින්ද ජයතිස්ස මහතාගේ ප්රධානත්වයෙන් සෞඛ්ය හා ජනමාධ්ය අමාත්යාංශයේදී පැවැත්වුණු අතර එහිදී ඇමැතිවරයා මෙම උපදෙස් දුන්නේය.
නුවරඑළිය තැපැල් කාර්යාල ගොඩනැඟිල්ල සහ එහි පරිශ්රය තැපැල් දෙපාර්තමේන්තුවේ කටයුතු සඳහා පමණක් භාවිත කිරීමටත්, සංචාරක ප්රවර්ධන ස්ථානයක් ලෙස පවත්වා ගෙන යෑමටත් මෙහිදී තීරණය කෙරිණි.
තැපැල් දෙපාර්තමේන්තුව, ශ්රී ලංකා සංචාරක සංවර්ධන අධිකාරිය, පුරාවිද්යා දෙපාර්තමේන්තුව, ගොඩනැඟිලි දෙපාර්තමේන්තුව, ශ්රී ලංකා නාවික හමුදාව සහ සෞඛ්ය හා ජනමාධ්ය අමාත්යාංශය යන අමාත්යාංශ සහ දෙපාර්තමේන්තු නියෝජනය කරමින් නිලධාරීන් මෙම විශේෂ සාකච්ඡාවට එක්ව සිටියහ.
පෞරාණික වටිනාකමකින් යුතු නුවරඑළිය තැපැල් කාර්යාලය පෞද්ගලික සමාගමක් වෙත පැවරීමට පසුගිය රජය අරමුණු කර තිබිණි.
ඒ අනුව දැනට අබලන් තත්ත්වයේ පවතින නුවරඑළිය තැපැල් කාර්යාල ගොඩනැඟිල්ලේ වහලය කඩිනමින් ප්රතිසංස්කරණය කිරීම පිළිබඳව මෙම සාකච්ඡාවේදී පුළුල්ව සලකා බලන ලදී. දැනට වැස්සට තෙමෙමින් පැවතීම පිළිබඳවත්, මේ හේතුවෙන් තැපැල් සේවකයන්, පාරිභෝගිකයන් මෙන්ම තැපැල් කාර්යාලය නැරඹීමට පැමිණෙන දෙස් විදෙස් සංචාරකයන් අපහසුතාවට පත්වීම මඟහැරවීම සඳහා ප්රථමයෙන් වහලය ප්රතිසංස්කරණයට තීරණය විය.
එමෙන්ම පෞරාණිකත්වය ආරක්ෂා වන පරිදි ඉතා කඩිනමින් අනෙකුත් ප්රතිසංස්කරණ කටයුතු සිදු කිරීම පිළිබඳව මෙහි දී සාකච්ඡාවට ලක්කෙරිණි. අදාළ ප්රතිසංස්කරණ කටයුතු ඇරඹීමේ මූලික පියවරක් ලෙස එම කාර්යයට සුදුසුම සැලසුම් ශිල්පීන් තෝරාගැනීම පිළිබඳව මෙහිදී අවධානය යොමු විය.
සෞඛ්ය හා ජනමාධ්ය අමාත්යාංශයේ අතිරේක ලේකම්වරුන් වන සාලින්ද බණ්ඩාර, එස්.ඩී. පාඩිකෝරාල, ජ්යෙෂ්ඨ සහකාර ලේකම් ඩබ්. ඩී.එන්.එම්. අබේසේකර, තැපැල්පති රුවන් සත්කුමාර, නියෝජ්ය තැපැල්පති තුසිත හුලංගමුව ඇතුළු මහත්ම මහත්මීහු මේ අවස්ථාවට එක්වූහ. ශ්රී ලංකා සංචාරක සංවර්ධන අධිකාරිය, පුරාවිද්යා දෙපාර්තමේන්තුව, ගොඩනැඟිලි දෙපාර්තමේන්තුව සහ ශ්රී ලංකා නාවික හමුදාව නියෝජනය කරමින් නිලධාරීහු පිරිසක් ද එක්ව සිටියහ.
