මෙරට විදත් මාධ්ය සන්නිවේදනයේ පුරෝගාමියා ලෙස සැලකෙන ශ්රී ලංකා ගුවන් විදුලි සංස්ථාවේ සියවස් සැමරුම අදට (16) යෙදී තිබේ.
ඒ වෙනුවෙන් ශ්රී ලංකා ගුවන් විදුලි සංස්ථා පරිශ්රයේ සර්ව රාත්රික පරිත්රාණ ධර්ම දේශනයක් හා සියක් නමක් විෂයෙහි සපිරිකර සංඝගත දක්ෂිණාවක් පැවැත්වීමට කටයුතු කර ඇත.
සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා ඇතුළු මැති ඇමැතිවරුන් පිරිසක් මෙන්ම සංස්ථාවේ ප්රගමනයට දායක වූ සම්භාවනීය මාධ්යවේදීන්, ඉංජිනේරු අංශය, ප්රවීණයන් විද්වතුන් මෙන්ම සංස්ථා කාර්ය මණ්ඩලයද සහභාගි වෙති.
ශ්රී ලංකා පදනම් ආයතනයේ සිට ගරුතර ස්වාමීන් වහන්සේ පා ගමනින් මුතුකුඩ යටින් ශ්රී ලංකා ගුවන්විදුලි සංස්ථාවට වැඩම කිරීමට ද නියමිතය.
බ්රිතාන්ය ආණ්ඩුකාර හියු ක්ලිෆර්ඩ් මහතාගේ මුලිකත්වයෙන් 1925 දෙසැම්බර් 16 වැනිදා මෙරට ගුවන්විදුලි සේවා නිල වශයෙන් ආරම්භ කෙරිණි. ආරම්භයේ දී විදුලි සන්දේශ දෙපාර්තමේන්තුව යටතේ පැවැති ගුවන්විදුලි සේවය 1949 ඔක්තෝබර් 01 වැනිදා රේඩියෝ සිලෝන් යන නමින් නව දෙපාර්තමේන්තුවක් ලෙස ප්රතිස්ථාපනය කෙරිණි. ජෝන් ඒ. ලැම්ප්සන් මහතා ගුවන්විදුලි දෙපාර්තමේන්තුවේ ප්රථම අධ්යක්ෂවරයායි. 1967 ජනවාරි 05 වැනිදා ලංකා ගුවන්විදුලි දෙපාර්තමේන්තුව සංස්ථාවක් ලෙස යළි ප්රතිස්ථාපනය කෙරුණු අතර, නෙවිල් ඩී. ජයවීර මහතා එහි ප්රථම සභාපති හා අධ්යක්ෂ ජනරාල්වරයා විය. මේ වනවිට ශ්රී ලංකා ගුවන්විදුලි සංස්ථාව දේශීය වශයෙන් සිංහල සේවා තුනක් දෙමළ සේවා දෙකක් සහ ඉංග්රීසි සේවයක් ප්රචාරය කරයි. විදේශීය සේවා පහක් ප්රචාරය කෙරේ. රජරට රුහුණ, කඳුරට, වයඹ හඬ, යාපනය, ඌව ගුවන්විදුලිය හා පිරෙයි එෆ්.එම්. සංස්ථාව සතු ප්රාදේශීය සේවා වෙයි. දඹාන රේඩියෝව ප්රජා ගුවන්විදුලියක් ලෙස ක්රියාත්මකයි. ආසියාවේ ප්රධානතම ගී තැටි පුස්තකාලය ජාතික ගුවන්විදුලිය සතුව ඇත. ඉන්දියාවේ ද සොයාගත නොහැකි ඉතාමත් දුර්ලභ හින්දි ගී තැටි ජාතික ගුවන්විදුලිය සතුය. ලෝකයේ විවිධ ජන නායකයන්ගේ හඬ කොටස් ඇති එකම පුස්තකාලයටද ජාතික ගුවන්විදුලිය හිමිකම් කියයි.
ආසියාවේ පළමු ගුවන් විදුලි සේවය වශයෙන් ආරම්භ වූ ජාතික ගුවන් විදුලිය ශ්රී ලාංකේය සංස්කෘතියේ ජාතික අනන්යතාව රැකගැනීම උදෙසා කළ මෙහෙවර අද්විතීයය. මෙරට භාෂාව සාහිත්යය නාට්ය ආධ්යාත්මික ගුණ වගා, සෞඛ්යය, කෘෂිකර්මය, ජාතික සංවර්ධනය, ජාතික සමඟිය හා සංහිඳියාව උදෙසා සිංහල, දෙමළ හා ඉංග්රීසි භාෂාත්රයෙන්ම වැඩසටහන් ප්රචාරය කරමින් ජාතිය පෝෂණය කිරීමට ජාතික ගුවන්විදුලිය සමත් විය.
