‘ගොඩනඟමු ශ්රී ලංකා’ තේමාවෙන් කුලුනු 5ක් මත පදනම් වූ නව ගමනක් අරඹනවා - 78 වැනි නිදහස් දින සැමරුම් උලෙළේදී ජනපති කියයි
හැත්තෑ අට වැනි (78) ජාතික නිදහස් දින සැමරුම ඊයේ (04) නිදහස් චතුරස්රයේදී ජනාධිපති අනුර කුමාර දිසානායක මහතාගේ ප්රධානත්වයෙන් අභිමානවත්ව පැවැත්විණි. අවස්ථාවට සහභාගි වූ ජනාධිපතිවරයා ජාතික ධජය එසවූ අයුරු. උපාලි කරුණාරත්න
අධ්යාපන ක්ෂේත්රයේ විශාලතම පරිවර්තනීය යුගයක් ආරම්භ යුතු බවත්, එයට තමා සූදානම් බවත් ජනාධිපති අනුර කුමාර දිසානායක මහතා පවසයි.
නව පරිවර්තනීය යුගයක් කරා වත්මන් ආණ්ඩුව රට මෙහෙය වන බව ද ජනාධිපති අනුර කුමාර දිසානායක මහතා ප්රකාශ කළේය. ජනාධිපතිවරයා මේ බව පැවසුවේ 78 වැනි නිදහස් දින සැමරුම් උලෙළට ඊයේ (04) එක්වෙමිනි.
“අපේ මානව සම්පත ලෝකයේ ඕනෑම දියුණු ජාතියක් සමඟ උරින් උර ගැටී සෑම අතින්ම සම්පූර්ණ මානව සම්පතක් බවට පරිවර්තනය කළ යුතුයි. නොදැනුවත්කම වෙනුවට දැනුම, පැරණි අගතීන් වෙනුවට ප්රගතිය. බෙදීම වෙනුවට සමඟිය පෙරදැරි කරගත් නව මානව සම්පතක් අප නිර්මාණය කළ යුතුයි.
එහිදී කලාව, සාහිත්ය, ඉතිහාසය මෙන්ම නව තාක්ෂණය, අධ්යාපනය මේ මානව සම්පත දියුණු කිරීමේදී අතිශය වැදගත්. අපේ රටේ දියුණු මානව සම්පතක් ගොඩනැඟීමට දැනුමෙන්, සහකම්පනයෙන්, තෙතමනයෙන්, නූතන තාක්ෂණයෙන් යුත් මානව සම්පතක් අප නිර්මාණය කළ යුතුයි. ඒ සඳහා අපි අපේ අධ්යාපන ක්ෂේත්රයේ විශාලතම පරිවර්තනීය යුගයක් ආරම්භ කළ යුතුයි. අපි ඒ සඳහා සූදානම්. පැරණි අගතීන් මොනතරම් ප්රමාණයට එම නව මිනිසා ගොඩනැඟීමට දරන ප්රයත්නයට බාධා කරන්නේ නම්, ඒ සියල්ලට එරෙහිව පරිවර්තනීය කාර්යභාරය ඉටුකිරීමට අප සූදානම්. එයට මේ රටේ පොදු ජනයාගේ සහාය ලැබෙන බව මා විශ්වාස කරනවාÓ යැයි ද ජනාධිපතිවරයා එහිදී පැවසීය.
‘ගොඩනඟමු ශ්රී ලංකා‘ තේමාවෙන් මෙවර නිදහස් දින ජාතික උත්සවය කොළඹ නිදහස් චතුරස්රයේදී අභිමානවත්ව පැවැත්විණි.
එහිදී ජනාධිපතිවරයා පැවසුවේ යටත්විජිත පාලනයෙන් පසු ලබා ගත් නිදහස සහ ඒ වෙනුවෙන් රුධිරය, කඳුළු, දහඩිය පූජා කළ වීරයන්ගේ අභිමතාර්ථ ඉටු කිරීම වත්මන් පරම්පරාවේ වගකීම බවයි.
ශ්රී ලංකාව ගොඩනැඟීමේ කුලුනු පහ ගැන අවධාරණය කරමින් එහි පළමුවැන්න දැනුමෙන් සන්නද්ධ මානව සම්පත බව කී ජනාධිපතිවරයා, රටේ ප්රධානම ශක්තිය වන්නේ මානව සම්පත බව ද කීවේය. එය ලෝකයේ ඕනෑම දියුණු ජාතියක් සමඟ උරෙන් උර ගැටිය හැකි මට්ටමට දියුණු කළ යුතු බව ද අවධාරණය කර සිටියේය. පැරණි අගතීන් වෙනුවට දැනුම, සහකම්පනය සහ නූතන තාක්ෂණය ඒකාබද්ධ වූ නව මානව සම්පතක් නිර්මාණය කිරීමට අධ්යාපන ක්ෂේත්රයේ විශාල පරිවර්තනීය යුගයක් ආරම්භ කරන බව ජනාධිපතිවරයා පැවසීය.
දෙවැනි කුලුන ගැන අදහස් දක්වමින් ජනාධිපතිවරයා ජාතික සමගිය ගැන කරුණු පැහැදිලි කළේය. බෙදීම සහ ජාතිවාදය ශක්තිය දුබල කරන බැවින්, ජාතිවාදය සහ අන්තවාදය ශ්රී ලංකාවේ ශබ්දකෝෂයෙන් බැහැර කළ යුතු අවලස්සනම වචන ලෙස ඔහු හඳුන්වා දුන්නේය. විවිධ ආගම්, භාෂා සහ සංස්කෘතීන්වල අනන්යතාවන්ට ගරු කරමින්, ‘ශ්රී ලාංකේය ජාතිය’ ලෙස සියලු දෙනා ඒකරාශී කිරීම රට ගොඩනැඟීමේ ප්රධානම ශක්තිය බව යැයිද හෙතෙම අවධාරණය කළේය. තෙවැනි කුලුන යටතේ නීතියේ ආධිපත්යය ගැන කරුණු කියමින් ජනාධිපතිවරයා පැවසුවේ සෑම පුරවැසියකුම නීතිය ඉදිරියේ සමාන විය යුතු බවයි. නීතිය සහ විධානය පිළිබඳ මහජන විශ්වාසය යළි තහවුරු කළ යුතු බව ද කීවේය. නීතිය බිඳ දමන ලද පිරිස් ඊට බිය වුව ද, නිවැරදි පුද්ගලයන් සැමවිටම නීතියේ ආධිපත්යය අපේක්ෂා කරන බවත්, නව ශ්රී ලංකාව තුළ යුක්තිය සහ සාධාරණත්වය ඉහළින්ම සුරකින බවත් ජනාධිපතිවරයා පැවසීය.
සිවුවෙනුව පාරිසරික සුරක්ෂිතතාව පිළිබඳව කතා කරමින් ජනාධිපතිවරයා කියා සිටියේ සංවර්ධනය යනු පරිසරය විනාශ කිරීම නොවන බවයි. විශේෂයෙන්ම රටේ ජීවය බඳු මධ්යම කඳුකරය සහ ගංගා පද්ධතිය ආරක්ෂා කිරීම අත්යවශ්ය බවත් ජනාධිපතිවරයා පැවසීය. අනාගත පරම්පරාව වෙනුවෙන් ගහකොළ සහ සෞන්දර්යය සුරක්ෂිත කර දීම ‘ගොඩනඟමු ශ්රී ලංකා’ වැඩපිළිවෙළේ ප්රමුඛ කාර්යයක් බවද ඔහු පෙන්වා දුන්නේය.
පස්වැනි කුලුන ලෙස ශක්තිමත් ජාත්යන්තර සහයෝගීතාව පිළිබඳවද අදහස් පළ කළ ජනාධිපතිවරයා ගෝලීය බල අරගල හමුවේ අපක්ෂපාතීව කටයුතු කරමින්, මාතෘභූමියට වැඩිම ජයග්රහණ සහ ආරක්ෂාව ගෙන දෙන ගෞරවනීය රාජ්ය සබඳතා ගොඩනඟාගත යුතු බව පැවසුවේය. ශ්රී ලංකාව ජාත්යන්තරය තුළ ශ්රේෂ්ඨ සහ ගෞරවනීය රාජ්යයක් බවට පරිවර්තනය කිරීම රජයේ අපේක්ෂාව බවද කීවේය.
2025 වසර ආර්ථික වශයෙන් විශාල ප්රගතියක් අත්පත් කරගෙන ඇත. අඩුම අය-වැය හිඟය සහ වැඩිම ආදායම් බදු ආදායම වැනි සාධක මඟින් එය තහවුරු වන බවත් මෙම ආර්ථික ජයග්රහණ සංඛ්යාලේඛනවලට පමණක් සීමා නොවී, ගමේ පහළම පුරවැසියාගේ ජීවිතය උසස් කිරීමට සහ ඔවුන්ගේ මානසික නිදහස තහවුරු කිරීමට යොමු කළ යුතු බවත් ජනාධිපතිවරයා ප්රකාශ කළේය.
