ජනපති, අගමැති ඇතුළු සමාජයේ කැපීපෙනෙන පුද්ගලයන්ගේ රුව භාවිත කරමින් AI තාක්ෂණය ඔස්සේ සකස් කරන ලද ව්යාජ වීඩියෝ අන්තර්ජාලයට යොමුකර මුදල් වංචා කිරීමේ ක්රියාවලියක් සම්බන්ධයෙන් පැමිණිලි රැසක් ශ්රී ලංකා පරිගණක හදිසි ප්රතිචාර සංසදයට (Sri Lanka CERT) ලැබී ඇත.
ජනාධිපති අනුර කුමාර දිසානායක මහතා, අගමැති ආචාර්ය හරිනි අමරසූරිය මෙණෙවිය, ප්රසිද්ධ ක්රීඩකයන්ගේ සහ විශේෂ පුද්ගලයන්ගේ රුව වංචනිකව යොදාගෙන මේ ව්යාජ වීඩියෝ සකස්කර තිබේ. Deep fake තාක්ෂණය යොදා ගනිමින් ව්යාජ ලෙස සකස් කළ මෙම වීඩියෝ හරහා මුදල් වංචා කිරීමේ උත්සාහයක් ක්රියාත්මක බව ද එම පැමිණිලිවල සඳහන් කර තිබේ.
මුදල් ආයෝජනය කර මාසිකව ප්රතිලාභ ලබාගන්නැයි ජනාධිපතිවරයා හා අගමැතිනිය ඇතුළු විශේෂ පුද්ගලයන් ඉල්ලීම් කරන ආකාරයෙන් සකස් කර ඇති එම ව්යාජ වීඩියෝ ගැන අවධානයෙන් සිටින්නැයි ශ්රී ලංකා පරිගණක හදිසි ප්රතිචාර සංසදය ජනතාවට දැනුම් දෙයි. විවිධ ආයෝජන අවස්ථා, රැකියා අවස්ථා මෙන්ම රටේ ආර්ථිකය සහ බදු ප්රතිපත්ති සම්බන්ධ ව්යාජ පුවත් ලෙස ද මෙම නිර්මාණ සිදුකර ඇතැයි ද සංසදය සඳහන් කරයි.
මෙම ව්යාජ වීඩියෝ අන්තර්ජාලය ඔස්සේ බෙදාහැරෙමින් තිබේ. එහි පළවන සබැඳියට (link) ගොස් මුදල් ආයෝජනය කර ප්රතිලාභ ලබාගන්නා ලෙස ද එම පණිවිඩයෙන් ඉල්ලා සිටින බවත් සර්ට් ආයතනය පවසයි. එසේ link එකක් හරහා අන්තර්ජාල පරිශීලකයන් ව්යාජ වෙබ් අඩවි වෙත යොමුකරවා පෞද්ගලික තොරතුරු සහ මුදල් ද සොරාගෙන ඇති අවස්ථා පවතින බව ද කියා සිටියි.
එවන් තත්ත්වයක් මත අන්තර්ජාලයේ පවතින මෙවන් ව්යාජ වීඩියෝ පිළිබඳව සැලකිලිමත් වන ලෙස සර්ට් ආයතනය මහජනතාවගෙන් ඉල්ලා සිටී. එම link වෙත යොමු වී ඔබගේ වටිනා දත්ත වංචනිකයන් අතට පත් නොකරන ලෙසත් මෙවැනි අසත්ය පුවත් සහ වංචාවන්ට ගොදුරු නොවන ලෙසත් ශ්රී ලංකා CERT ආයතනය ජනතාවට වැඩිදුරටත් දැනුම් දෙයි.
