චීනයේ පැවැති රාජ්ය පාලනය පිළිබඳ විශේෂ පාර්ලිමේන්තු වැඩමුළුවකට සහභාගී වීම සඳහා ශ්රී ලංකා පාර්ලිමේන්තු දූත පිරිසක් චීනය බලා පිටත්ව ගිය අතර, එම දූත පිරිසේ නිල නායකත්වය (Head of the Delegation) ජනමාධ්ය නියෝජ්ය අමාත්ය ආචාර්ය කෞෂල්යා ආරියරත්න විසින් දරනු ලැබී ය.
මෙම දූත පිරිස සඳහා නියෝජ්ය අමාත්ය ටී.බී. සරත් මහතා ඇතුළු විවිධ දේශපාලන පක්ෂ නියෝජනය කරන පාර්ලිමේන්තු මන්ත්රීවරුන් කණ්ඩායමක් ඇතුළත් විය.
*චීන රාජ්ය පාලන යාන්ත්රණය පිළිබඳ හැදෑරීමක්*
චීන වාණිජ දෙපාර්තමේන්තුව සහ ICC ආයතනය එක්ව සංවිධානය කරන ලද මෙම ඵලදායී වැඩමුළුවේදී, චීන ලක්ෂණ සහිත ප්රජාතන්ත්රවාදය පිළිබඳ ජනාධිපති ෂී ජින්පිංග් මහතාගේ චින්තනය, "සමස්ත ක්රියාවලි මහජන ප්රජාතන්ත්රවාදය" (Whole-Process People’s Democracy) මෙන් ම චීන මහජන දේශපාලන උපදේශක සම්මේලනයේ (CPPCC) සහ "සැසිවාර දෙකේ" (Two Sessions) ක්රියාකාරී යාන්ත්රණයන් පිළිබඳ ව දීර්ඝ වශයෙන් සාකච්ඡා කෙරිණි.
මීට අමතරව ශ්රී ලංකා දූත පිරිසට චීන ජාතික මහජන කොංග්රසය (National People's Congress) ඇතුළු එරට ප්රධාන රාජ්ය ආයතන වෙත ගොස් ඒවායේ ව්යුහය සහ ක්රියාකාරීත්වය සෘජුවම නිරීක්ෂණය කිරීමට ද සුවිශේෂී අවස්ථාවක් හිමිවිය.
*ජාත්යන්තර තේ දින සැමරුමටත් එක්වෙයි*
මෙම නිල සංචාරයට සමගාමීව, චීනයේ බීජිං නුවර පිහිටි ශ්රී ලංකා තානාපති කාර්යාලය විසින් සංවිධානය කරන ලද ජාත්යන්තර තේ දින (International Tea Day) නිල සැමරුම් උත්සවය ද පැවැත්වුණු අතර, එහි ප්රධාන ආරාධිත අමුත්තා (Chief Guest) ලෙස ද නියෝජ්ය අමාත්ය ආචාර්ය කෞෂල්යා ආරියරත්න සහභාගී විය.
එමෙන් ම, මෙම අතිශය සාර්ථක සහ ඵලදායී වැඩසටහන් මාලාව සංවිධානය කළ ICC ආයතනයට, චීන වාණිජ දෙපාර්තමේන්තුවට සහ ඒ සඳහා අවශ්ය රාජ්ය තාන්ත්රික සම්බන්ධීකරණ කටයුතු සපයන ලද ශ්රී ලංකාවේ චීන තානාපති කාර්යාලය වෙත නියෝජ්ය අමාත්යවරිය ඇතුළු දූත පිරිස සිය විශේෂ ස්තූතිය පිරිනමා සිටී.
