මෙරට ජ්‍යෙෂ්ඨතම සිනමා විචාරකයකු, මාධ්‍යවේදියකු, පරිසරවේදියකු මෙන්ම ගුරුවරයකු ලෙසින් සුවිශාල මෙහෙවරක යෙදෙන වියතෙක් ලෙස ආචාර්ය එඩ්වින් ආරියදාස මහතා හැඳින්විය හැක.
දෙස්විදෙස් අත්දැකීම් හා දැනුම් සම්බාරයකින් මෙරට මාධ්‍ය ක්ෂේත්‍රයට විශිෂ්ට සේවාවක් ඉටු කළ ආචාර්ය එව්ඩින් ආරියදාස මහතාගේ 95 වැනි උපන් දිනය පෙරේදා (03) දිනට තිබුණි.
එතුමාට සුබපැතුම් එක්කිරීමට පාර්ලිමේන්තු ප්‍රතිසංස්කරණ හා ජනමාධ්‍ය අමාත්‍ය ගයන්ත කරුණාතිලක මහතා ඊයේ එතුමාගේ නිවසට ගියේය.
1922 දෙසැම්බර් ගාල්ල උණවටුනේ වී.කේ.ඒබ්‍රහම් අප්පුහාමි සහ සිසිලියානා හාමිනේ යුවතිපති දෙපළට දාව උපන් විෙජ්තුංග කරුණාරත්න එඩිවින් ආරියදාස කුලකුමරු උණවටුනේ මිශ්‍ර බෞද්ධ පාසලකින් සිය ප්‍රාථමික අධ්‍යාපනය ලබා ගත් අතර ද්වීතියික අධ්‍යාපනය ලැබීම සඳහා ගාල්ලේ මහින්ද මහා විද්‍යාලයට පිවිසුණේය. එහිදී ඔහු සිය සහජ හැකියාවන් ඔප් නංවා ගනිමින් මහින්දයේ කැපී පෙනෙන සිසුවෙකු බවට පත්විය. සාර්ථකව සිය ද්වීතීයික අධ්‍යාපනය නිමා කළ එඩ්වින් ආරියදාස තරුණයා උසස් අධ්‍යාපනය ලැබීම ස`දහා 1945 වසරේදී කොළඹ විශ්ව විද්‍යාලයට ප්‍රවිශ්ට විය. එහිදී සිංහල ගෞරව උපාධිය හදාල එඩ්වින් ආරියදාස උපවිෂය ලෙස ඉංග්‍රීසි භාෂාවද හදාලේය. උප විෂය ලෙස ඉංග්‍රීසි භාෂාව හැදෑරීම ලංකා ඉතිහාසයේ ප්‍රථම වරට සිදුවූ ඓතිහාසික කරුණකි. වසර විස්ස වනවිට එඩ්වින් ආරියදාස විද්‍යාර්ථීයා ලෝක ප්‍රසිද්ධ සම්භාව්‍ය ඉංග්‍රීසිග්‍රන්ථ සියල්ලම පාහේ කියවා අවසන් කර තිබිණ.
ලාංකීය ජනසන්නිවේදන ක්ෂේත්‍රයේ කඩඉම් අවස්ථා රැසකට මංපෙත් හෙළි කරමින් එඩ්වින් ආරියදාසයන් 1949 මාර්තු 03 වැනිදා ලේක් හවුස් ආයතනයේ නව රැකියාවක් ඇරඹීය. දිනමිණ පුවත්පතේ උපකර්තෘ ධූරයක් හොබවමින් ජනමාධ්‍ය ඔස්සේ නව වෘත්තීය ජීවිතයක් ඇරඹි මාධ්‍යවේදී එඩිව්න් ආරියදාසයන් ලේක් හවුස් ආයතනයේ ස්වරණමය යුගය බබළවමින් ඩේලි නිව්ස්, සිළුමිණ, සන්ඩේ ඔබ්සර්වර්, සරසවිය, ජනතා ආදී වූ සෑම පුවත්පතක් පතකටම සිය දායකත්වය ලබා දුන්නේය. මාධ්‍යවේදියෙකු ලෙස ඉතා කෙටි කලක් තුළ එඩ්වින් ආරියදාස යන නාමය සමාජගත වීමට බලපෑ ප්‍රබල සාධකයක් වූයේ ඔහු සතුව සිංහල සහ ඉංග්‍රීසි යන භාෂා ද්විත්වයම මැනවින් හැසිරවීමේ ශක්‍යතාවය පැවතීමත් නිරන්තරව අලූත්වන ලෝක දැනුම පිළිබ`දව පැවති තියුණු සවිඥාණකත්වයත්ය. බටහිර දැනුම ලාංකීය දුදරුවන් වෙත සම්ප්‍රේෂණය කරවීමේලා මෙම ශක්‍යතාව උපයෝගීකරගත් එඩ්වින් ආරියදාසයන් නවයුගය පුවත්පතේ කතෘත්වයට පත්වෙමින් විද්‍යා තාක්ෂණ ක්ෂේත්‍රය පිළිබඳව සමාජය තුළ පුනරුදයක් ජනිත කළේය.
එඩ්වින් ආරියදාසයන්ගේ මාධ්‍ය ජීවිතය ලාංකීය ජනසන්නිවේදන ක්ෂේත්‍රයේ කඩඉමක් බවට පත්වීමට 1969 වසරේදී වූ සිදුවීමක් ප්‍රබලව බලපෑවේය. එනම් ශ්‍රී ලංකාවේ කණිෂ්ඨ විශ්ව විද්‍යාල පද්ධතිය ස`දහා ජනසන්නිවේදන විෂය මාලාවක් සම්පාදනය කිරීමට මේ අසහාය ජනමාධ්‍යවේදියාට ආරාධනා ලැබීමයි. 1977 දී ශ්‍රී ලංකාවේ ඉංග්‍රීසි අධ්‍යාපනය ඉගැන්වීම පිළිබ`දව පත්කළ කොමිසමේ ආරම්භක සාමාජිකයෙකු ලෙස කටයුතු කිරීමේ අවස්ථාවද ආරියදාසයන්ට හිමි විය.
අසූව දශකයේ සිදුවූ රූපවාහිනියේ ආගමනයත් සමග එහි විකාශය කිරීම සඳහා වැඩසටහන් සැකසීමේදී ඒවායේ අන්තර්ගතය කෙසේ සකස්විය යුතුද යන්න පිළිබඳව ආදර්ශන සැපයීමේ පුරෝගාමියා වූයේද එඩ්වින් ආරියදාසයන්ය.
වර්තමානයේදී තොරතුරු තාක්ෂණ ක්ෂේත්‍රයෙහි ප්‍රමුඛතම වචනය බවට පත්ව තිඛෙන අන්තර්ජාලය සිනමා සහ රූපවාහිනී මාධ්‍යයන්හි භාවිත කෙරෙන මාධ්‍ය රූප සහ සජීවීකරණ යන වචන පාරිභාෂිත ශබ්ද කෝෂයට එකතු කරනු ලැබුවේ මේ ශ්‍රේෂ්ඨ භාෂා විශාරදයානන් විසිනි. මහාචාර්ය සරච්චන්ග්‍රයන්ගේ මළගිය ඇත්තෝ කේ ජයතිලකයන්ගේ චරිත තුනක් කරුණාසේන ජයලත් ශූරීන්ගේ ගොළු හදවත බඳු නවකතා ඉංග්‍රීසියට පරිවර්තනය කළ එඩ්වින් ආරියදාසයන් සිංහල සාහිත්‍ය ඉංග්‍රීසි සාහිත්‍ය හා මුසු කිරීම ස ඳහා නිරන්තර උත්සාහයක නියුතු වූ උගතෙකි. ධම්ම පදය ඉංග්‍රීසියට පරිවර්තනය කිරීමේ ඓතිහාසික කාර්යභාරයක නිරතවූ එඩිව්න් ආරියදාසයෝ බෞද්ධ සාහිත්‍ය ඉංග්‍රීසිය වෙත රැගෙන යාමට සුවිශේෂ මෙහෙවරක් සිදු කළෝය. ඇමෙරිකානු ඉතිහාසයේ ජීවමාන වාර්තා, හුදෙකලා කලාකරු, නිවැරදිව සිතීමේ මග, ඇමෙරිකානු විප්ලවයේ අරුත, වීර චරිත ආදී වශයෙන් වූ ග්‍රන්ථ ගණනාවක් සිංහලයට පරිවර්තනය කිරීමද එඩ්වින් ආරියදාසයන්ගේ සාහිත්‍යය මෙහෙවරේ සුවිශේෂ මං සලකුණු ලෙස හැඳින්විය හැකිය. කලාකීර්ති, ආර්ය කීර්ති ශ්‍රී ජනතා ප්‍රබෝධනී වැනි වූ ගෞරව නාම රැසකින්ද ගෝල්ඩන් ලයන් පීස් අවෝර්ඩ් වැනි ජාත්‍යන්තර සම්මාන රැසකින්ද මෙම ශ්‍රේෂ්ඨ සාහිත්‍යධරයා පිදුම් ලැබීය.
සියවසකට ආසන්න ස්වකීය දිවිමගේ අනූ පස්වැනි කඩඉම පසුකරමින් සිටින කලාකීර්ති එඩ්වින් ආරියදාසයන් මේ මිහිමත සිටින අත්දැකීම්වලින් පරිපූර්ණ කෘතහස්ත මාධ්‍යවේදියෙකු ලෙසද දේශයේ සාහිත්‍ය උන්නතිය උදෙසා අමිල මෙහෙවරක් ඉටුකළ සාහිත්‍යධරයෙකු ලෙසද හැදින්විය යුතුය.
