දේශපාලන පක්ෂ පාට නොබලා පත්වීම් දුන්නා - ජනමාධ්ය නියෝජ්ය ඇමැතිනි ආචාර්ය කෞශල්යා ආරියරත්න
ආයතනයක සේවක ගුණාත්මකභාවය වැඩි කර ගැනීමට නම් රැකියා සුරක්ෂිතතාව පවත්වා ගෙන යා යුතු බව ජනමාධ්ය නියෝජ්ය ඇමැතිනි ආචාර්ය කෞශල්යා ආරියරත්න මෙණෙවිය පැවසුවාය.
කොන්ත්රාත් පදනම මත ලේක්හවුස් ආයතනයේ සේවය කළ සේවකයන් 66 දෙනකුට ස්ථිර පත්වීම් ලිපි ප්රදානය කිරීමේ අවස්ථාවට එක් වෙමින් නියෝජ්ය ඇමැතිනිය මේ බව ප්රකාශ කළාය. ජනමාධ්ය අමාත්යාංශයේ දී ඊයේ (17) මේ පත්වීම් ලිපි ප්රදානෝත්සවය පැවැති අතර වසර 3-19ත් අතර කාලයේ සේවය ස්ථිර නොකර කොන්ත්රාත් පදනමේ සිටි සේවකයන් වෙනුවෙන් මේ පත්වීම් ප්රදානය කෙරිණි.
එහිදී වැඩිදුරටත් නියෝජ්ය ඇමැතිනිය මෙසේද පැවසුවාය.
අපි හැමදාමත් සේවක අයිතිවාසිකම් ගැන කතා කළ, වැඩ කරන පන්තියේ ආණ්ඩුවක් කියන කාරණය නැවත වතාවක් තහවුරු කිරීමක් තමයි අද සිදුවෙන්නේ. සාමාන්යයෙන් රජයක් පත්වුණාම වෘත්තීය සමිති ඉල්ලීම් අහක දාලා, සේවක අයිතිවාසිකම් කප්පාදු කරමින්, තමන්ට ඕනෑ දේ කළා. හැමදාමත් ඉල්ලීමක් වුණු වැටුප් වැඩිකිරීම අරගලයකින් තොරව, ප්රතිපත්තිමය තීරණයකට අනුව අයවැයෙන් කළේ ජාතික ජන බලවේග අපේ රජයයි. පෞද්ගලික අංශයේ රුපියල් 19000ක් වූ අවම වැටුප රුපියල් 30000ක් කරමින් සේවක අයිතිවාසිකම් ගැන සේවකයන්ටත් වඩා ඉදිරියෙන් කටයුතු කළ සක්රිය රජයක්. අවශ්යතාවක් තිබුණා නම් ලේක්හවුස් ආයතනයේ කොන්ත්රාත් පදනමින් සේවය කළ අය, තවත් කාලයක් ඒ පදනමින්ම තියාගෙන ඉන්න බැරිකමක් තිබුණේ නැහැ. නමුත් ඔවුන්ගේ සේවයේ ගුණාත්මකභාවය වැඩි කරගන්න නම් රැකියා සුරක්ෂිතතාව පවත්වා ගෙන යා යුතුයි.
කොන්ත්රාත් පදනම මත සිටි ඔවුන්ගේ රැකියා සුරක්ෂිතතාව ඇති කළේ අපේ ආණ්ඩුවයි. සේවකයන් මේ ආයතනයේ අත්යවශ්ය කොටසක් වශයෙන් අපි සලකනවා. සභාපති ඇතුළු අධ්යක්ෂ මණ්ඩලය නිතරම ඇවිත් ඔබ ස්ථිර කළයුතු බවට ඉල්ලීම් කළා. ඔබව ස්ථිර කර ගැනීමට පාලන අධිකාරිය කළ කැපකිරීම හා උනන්දුව සම්බන්ධයෙන් ඔබ ඔවුන්ට ස්තූතිවන්ත විය යුතුයි.
අමාත්යාංශය ලෙස අපි ජනමාධ්ය අයිතිවාසිකම් වෙනුවෙන් කරන්නේ මොනවාද කියා ප්රශ්න කරනවා. පහුගිය වසර ඇතුළත ප්රසිද්ධ, නම් දරා හිටපු, හොඳයි කියපු පත්තර ගණනාවක් වැහුණා. තමන්ගේ සේවකයන්ගේ වැටුප්, සේවක අර්ථසාධක අරමුදල් ගෙවලා තිබුණේ නැහැ. ඒ අතරේ අද තීරණය කර හෙට වහපු පත්තරත් තිබුණා. ප්රවෘත්ති අධ්යක්ෂ ජනරාල්වරයා කම්කරු කොමසාරිස්වරයා සමඟ මේ සම්බන්ධයෙන් පෞද්ගලිකව කතා කළා. ජනමාධ්ය ක්ෂේත්රයට සැලකුවේ ඒ විදියට.
ජනමාධ්ය කියන විෂය වෘත්තියක් කරන්න කියා කාලයක් තිස්සේ පුවත්පත් හා ජනමාධ්යවේදීන් අතර ඉල්ලීමක් තිබුණා. ජනමාධ්ය වෘත්තිකභාවය කියා දෙයක් අපේ රටේ තිබුණේ නැහැ. ජනමාධ්යවේදය ගෞරවනීය වෘත්තියක් කළයුතු බව අපේ ප්රතිපත්ති ප්රකාශනයේත් සඳහන් වූවක්. ඒ අනුවයි ශ්රී ලංකා වරලත් මාධ්ය වෘත්තිකයන්ගේ ආයතනය ඇති කරන යෝජනාව එන්නේ. මේ ආයතනය ජනමාධ්යවේදීන්ගේ වෘත්තීය අයිතිවාසිකම් හඳුනාගනිමින්, ඒ වෙනුවෙන් පෙනී සිටින වෘත්තිකයන් සඳහා වන හා වෘත්තිකයන් විසින් පවත්වා ගෙනයන ආයතනයක්. නමුත් ආණ්ඩුව මැදහත්ව මාධ්ය නියාමනය කරන්න හදන බවට මතවාදයක් සමාජගත කරන්න සමහරු උත්සාහ කරනවා වුවත් ඇත්ත එය නොවෙයි. මෙයින් කෙරෙන්නේ ජනමාධ්යවේදීන්ගේ අයිතිවාසිකම් සුරක්ෂිත කර, හොඳ පුහුණුවකින් පසු සුදුසුකම් සහිත පිළිගන්නා වෘත්තිකයකු ලෙස පෙනී සිටින්න අවස්ථාව ලබාදීමයි.
මේ වන විට ජාතික මාධ්ය ප්රතිපත්තිය සකස් කර අවසන්. දැන් පරිවර්තන හා සංස්කරණ අවධියේ තිබෙන්නේ. එයත් කඩිනමින් ඇමැති මණ්ඩලයට ඉදිරිපත් කරනවා. මෙයටත් විරුද්ධ වන ජනමාධ්යවේදීන්ගේ සංවිධාන ලංකාවේ තිබෙනවා. ජනමාධ්යවේදින්ගේ යහපත සඳහා වන මාධ්ය ප්රතිපත්තියක්, මාධ්ය නිදහස සඳහා වන දැක්මක් රටකට අවශ්යයි. මාධ්ය සමාජය දශක දෙකකට වැඩි කාලයක් ජාතික මාධ්ය ප්රතිපත්තියක් ඉල්ලා සිටියේ ඒ සඳහායි. ජනමාධ්ය විෂය ප්රතිපත්තියක් හා කර්මාන්තයක් ලෙස වැඩිදියුණු කිරීමෙන් ඔබේ රැකියා අයිතිවාසිකම් තහවුරු කර ගත හැකියි.
මේ වනවිට ඔබේ උසස් අධ්යාපනය වෙනුවෙන් අමාත්යාංශය ගෙවීමක් කරනවා. භාෂාවක් ඉගෙන ගන්න හෝ විශ්වවිද්යාලයකින් හෝ වෙනත් ආයතනයකින් උසස් අධ්යාපන පාඨමාලාවක් හැදෑරීම වෙනුවෙන් ඔබට මුදල් ලබා ගන්න පුළුවන්. මේ වසරේ ජනමාධ්යවේදීන්ගේ ශක්යතා වර්ධනයට ජනාධිපතිවරයා විසින් මිලියන 101ක මුදලක් දී තිබෙනවා. එයටත් ශක්යතා වර්ධන වැඩසටහනක් සකස් කරනවා. එයත් ඉදිරියේදී දැක ගන්න පුළුවන්.
මේ පත්වීම් ස්ථීර කිරීමේදී කිසිම දේශපාලන මැදිහත්වීමක් කර නැහැ. දේශපාලන වශයෙන් අපට වැඩ කළාද කියන දේ කිසිවිට සලකා බැලුවේ නැහැ. නමුත් ඔබේ වගකීම තේරුම් ගන්න. ඔබේ අයිතිවාසිකම් ආරක්ෂා කර ගැනීමට නම් පෙළ ගැසෙන්න ඕනෑ කවුරු සමඟද කියන දේත් හරියට තීරණය කරන්න. වෘත්තීය සමිතිවලින්, වැඩ කරන ජනතාවගෙන් අපි බලයට පත්වුණේ ඔවුන් වෙනුවෙන් සේවය කරන්න. දේශපාලන පත්වීම් දුන්න ඉතිහාසයේ ඇතැම් අවස්ථා තිබුණා රාජ්ය සේවයේ රැකියාව ස්ථීර නිසා රැකියාව කළත් නොකළත් එකයි කියලා. ඒ සියල්ල අවසන් කරමින් කොන්ද පණ ඇතිව රාජ්ය සේවයට වැඩ කරන්න භූමිකාවක් අපි සකසා දී තිබෙනවා. ඒ නිසා ඔබේ වගකීම ඉටු කරන්න. ලේක්හවුස් ආයතනය පුනර්ජීවනයට පත්කරන වැඩපිළිවෙළක් ක්රියාත්මකයි. අවුරුදු ගණනාවක් පාඩු ලැබූ ආයතනය දැන් ලාභ ලබනවා. ඒ සම්බන්ධයෙන් සතුටුයි. ඒ වගේම තානාපති කාර්යාල හා ජාත්යන්තරයේ ස්වාධීන වාර්තාකරණ ආයතනයක් කියන ගෞරවයත් ලේක්හවුස් ආයතනය දිනාගනිමින් තිබෙනවා.
කර්තෘ මණ්ඩල අධ්යක්ෂ සිසිර යාපා මහතා-
ලේක්හවුස් ආයතනයේ සමහරු අවුරුදු 19, 16, 15 වගේ කාලයක් අනියම් සේවකයන් විදියට කොන්ත්රාත් පදනමින් සේවය කර තිබුණා. ඔවුන් ස්ථිර කිරීම සම්බන්ධයෙන් කිසිවෙක් අවධානය යොමු කර තිබුණේ නැහැ. නමුත් වත්මන් ජනමාධ්ය ඇමැතිවරයා හා නියෝජ්ය ඇමැතිවරියගේත්, ආණ්ඩුවේත් යෝජනාව වුණේ ස්ථිර කළයුතු සේවකයන් වහා ස්ථිර කළ යුතු බවටයි. මොවුන් ස්ථිර කිරීමෙන් පසු ආයතනයක් ලෙස එය දරාගන්න හැකි වෙයිද කියන ගැටලුව ඇති වුණා. සේවකයන් පිරිසක් ස්ථිර කිරීමත් සමඟ වැඩි මුදලක් වැය කරන්නත් වාර්ෂික ලාභය ඇතුළේ එය දරාගන්නත් හැකි වෙයිද කියන අභියෝගයට අපි මුහුණ දුන්නා. අධ්යක්ෂ මණ්ඩලය කිව්වේ මොවුන් ස්ථීර කිරීම සාධාරණ බවයි. ස්ථිර කරන අවස්ථාවේ දැනට ලබන වැටුපට වඩා වැටුප අඩු නොවිය යුතු බවත් තීරණය වුණා. ආයතනයේ වැටුප් පරතරය අරන් බැලුවාම සමහරුන් ස්ථිර කරන්න ගියාම වැටුප රුපියල් 25000කින් පමණ වැඩි වෙනවා. තවත් අයට වැටුප රුපියල් 5000කින් පමණ අඩු වෙනවා. නමුත් කළමනාකාරිත්වය ඒ අභියෝගයත් ලිහා දුන්නා.
සම්මුඛ පරීක්ෂණයේදී අපට මුණ ගැහුණා. අවුරුදු 15ට වඩා වැඩි කාලයක් සේවය කරලත් වැටුප රුපියල් 15000ක් වුණු අය. ඒකෙන් ජීවත් වෙන්නේ කොහොමද ඇහුවාම ජනමාධ්යවේදියෙක් ලෙස සේවය කරන අයෙක් දෑත පෙන්වමින් සඳහන් කළේ වැඩ අවසන්ව ගිහින් දවස් කුලියට සිමෙන්ති අනපු බවයි. ඒ වුණාට අපි මාධ්ය නිදහස, මාධ්ය සාක්ෂරතාව,මාධ්ය සම්බන්ධයෙන් ඇති වෙනත් දේ ගැන උජාරුවට කතා කරනවා.
මෙතැන බොහෝ දෙනෙක් භද්ර යෞවනයේ ආයතනයේ සේවයට එක්වුණු අය. ඒ අයගෙන් ඇතැම් අය ස්ථිර වෙයි කියන විශ්වාසයක් නොතිබුණු නිසා, රැකියාවේ සුරක්ෂිතභාවයක් නොවූ නිසා තවමත් විවාහ වෙලා නැහැ. ලේක්හවුස් ඉතිහාසයේ කවදාවත් කොන්ත්රාත් සේවකයන්ට බෝනස් දීලා තිබුණේ නැහැ. අපි 2024 දෙසැම්බර් සියලු දෙනාට සමාන දීමනාවක් ගෙවන්න තීරණය කළා. සමහර වෘත්තීය සමිති ‘සර්ලා ගත්ත තීරණය හොඳයි නමුත් එය භයානකයි. සර්ලා ගියාම කවුද මේක දෙන්නේ ‘ කියලා ඇහුවා. මං කිව්වා බය වෙන්න එපා, අපි යන්නේ නැහැ කියලා. අද අවුරුදු දෙකකට පස්සේ අපි ගියෙත් නැහැ. යන්නෙත් නැහැ. ඔබව ස්ථිර කර තියෙනවා. ස්ථිර සේවකයන්ට ලැබෙන සියල්ලක්ම ඔබේ කොන්ත්රාත් කාලයේදීත් අපි දුන්නා.
ස්ථිර පත්වීම් ලබන කිසිවෙක් ජාතික ජන බලවේගය බලයට ආවට පස්සේ රැකියාවට ආපු අය නොවෙයි. අමාත්යංශයෙන් එහෙම රස්සාවට ගන්න අවස්ථාව දුන්නේ නැහැ. රස්සා දුන්නේ ඇයි කියලාත් පුදුම හිතෙනවා. කිසිම බලාපොරොත්තුවක් වරප්රසාදයක් නැතිව රුපියල් 15000ක් දීලා වසර ගණනාවක් සේවකයන් තියා ගත්තා.
අපි සේවකයන් ස්ථිර කරන්න තීරණය කළේ ලෝකයේම පත්තර කන්තෝරු කඩා වැටෙන අනතුරුදායක කාලයක. කඩදාසි මිල, ඉන්ධන මිල ඇතුළු සියල්ලක්ම ඉහළ යන අවස්ථාවක. අපේ ආණ්ඩුවේ ප්රතිපත්තිය සේවකයෙක් නම් කම්කරුවෙක් නම් ඒ අය සතුටින් සිටිය යුතුයි. පොහොසත් රටක් හදන්න නම් ජීවිත ලස්සන වෙන්න ඕනෑ. ලේක්හවුස් සේවකයන්ගේ මුහුණේ සිනාව නැත්නම්, ජීවිත ලස්සන නැතිනම් ආයතනය ලාභ ලබලා වැඩක් නැහැ.
සේවය ස්ථිර කළාට පසුවත් අපටත් ආණ්ඩුවටත් බනිණ කිහිප දෙනෙක් මෙතැන ඉන්නවා. ඒක තමයි අපි දිනාගත් ප්රජාතන්ත්රවාදය. මීට පෙර පවතින ආණ්ඩුවට මොනවා හරි කියා ලේක්හවුස් ආයතනයේ වැඩ කරන එක ලේසි නැහැ. අපට බනිණ අයට ස්තූතියි. බැණලා අවලාද නඟලා කරන්නේ අපි දිනාගත් ප්රජාතන්ත්රවාදය තහවුරු කරන එකයි. නොතිබුණු දෙයක් අපි දිනාගත් බවට පේන්න තියෙන හොඳම සාක්ෂියක් ඒක.
දැන් ඔබ මේ ආයතනයේ ස්ථිර සේවකයන්. ඔබේ ගෙදර දරුවන්ට, මවුපියන්ට, බිරියට සැමියාට සත්කාර කරන්නේ මේ වැටුපෙන්. ඒ නිසා මේ වැටුප පොඩි නැහැ. ඉලක්කමෙන් වැටුප පොඩි වුණත් ඒක ගෞරවනීය පූජනීය වැටුපක්. ලේක්හවුස් එක මෙතැනින් අඟලක් ඉදිරියට ගෙනියන්න ඔබ උත්සාහ කළොත් ආයතනය ඉදිරියට යන්නේ ගව් ගණනින්. ලේක්හවුස් එකට හිතාමතා හෝ නොහිතා කළ අපරාධ තියෙන බව හෘද සාක්ෂිය දන්නවා. දැන් අපි එකතුවෙලා ලේක්හවුස් ආයතනයට ආදරය කරමු. මූල්ය පැත්තෙන්, දේශපාලනිකව ශක්තිමත් ආයතනයක් අපි ගොඩනඟමු. මේ වෙද්දි රාජ්ය ආයතන අතරින් ලාභ ලබන ආයතන අතරට දැන් අපි ඇවිත් සිටිනවා.
අපි ලාභ ලබනවා නම් අපට තව සේවකයෝ ගන්න පුළුවන්. ඒ නිසා තවත් කිහිප දෙනෙකුට ලේක්හවුස් එකේ දොර ඇරලා දෙමු. අපේ රාජකාරිය හරියට කළොත් අලුත් පරම්පරාවක් ආයතනයට ගේන්න පුළුවන්. ආයතනයට සේවයක් නොකර වැටුප් ගන්න අයත් ලේක්හවුස් එකේ ඉන්නවා. නමුත් අද පත්වීම් ලැබූ 66 දෙනාටම රාජකාරියක්, වගකීමක් තියෙනවා. තවත් පිරිසක් ස්ථිර වෙන්න තියෙනවා. ඔබේ වගකීම නිවැරදිව ඉටු කළොත් තමයි ඔවුන් ස්ථිර කරන්න අමාත්යංශය පැත්තෙන් අවස්ථාව ගන්න පුළුවන් වෙන්නේ. ජිවිත ගණනාවක වගකීම ඔබ අතේ තිබෙනවා. තමන් කැමැති දේශපාලනයක්, මතවාදයක් දරන්න. විවේචනය කරන්න. නමුත් හීනෙන්වත්, අල්පෙනෙති තුඩක තරම්වත් ආයතනයට හානියක් කරන්න එපා. ලේක්හවුස් කියන්නේ සියවසක් පැරණි කීර්තිමත් නාමයක් ඇති තැනක්.
ජ්යෙෂ්ඨ කළමනාකරු (මානව සම්පත්) ලක්මාල් රත්නායක මහතා-
මෙය ගිය වසරේ මාර්තු මාසයේ සිට ආරම්භ කළ ක්රියාවලියක්. සම්මුඛ පරීක්ෂණ ගණනාවක් තිබ්බා. විධිමත්, පාරදෘශ්යභාවයෙන් යුතුව සාධාරණව පැවැත්වූ ඒ සම්මුඛ පරීක්ෂණ සඳහා නිර්ණායක භාවිතා කළා. ඒ නිර්ණායක සඳහා අදාළ ශක්යතාවන් සම්පූර්ණ කළ අයයි අද පත්වීම් ලබන්නේ. සමහර අවස්ථාවල අපිත් මේ වැටුපෙන් ජීවත් වෙන්නේ කොහොමද කියා සංවේගයට පත්වුණා. සම්මුඛ පරීක්ෂණ නිර්ණායකවල ඔබේ වෘත්තීය සමිතිය හෝ දේශපාලන පක්ෂය සම්බන්ධයෙන් විමසීමක් වුණේ නැහැ. රාජකාරිය සම්බන්ධයෙන් ප්රශ්න කළේ. මෙය ඔබේ ජීවිතයටත් ආයතනයටත් වැදගත් අවස්ථාවක්. ලේක්හවුස් ආයතන ඉතිහාසයේ වැඩිම සේවකයන් පිරිසක් බඳවා ගන්න අවස්ථාවත් වෙනවා. මෙතැන ඇතැම් අය වසර ගණනාවක් කොන්ත්රාත් පදනමේ හිටියත් වැටුප් වැඩි වී නැහැ. ප්රතිපත්තියක් ලෙස වසර තුනකට වැඩි කාලයක් කොන්ත්රාත් පදනමේ හිටි අය කැඳවලා සම්මුඛ පරීක්ෂණ කරන්න තීරණය වුණා. මෙතැනට එනතෙක් පැවැති ක්රියාවලිය සාර්ථක කරගන්න සභාපතිතුමා, සාමාන්යාධිකාරිතුමා, අධ්යක්ෂ මණ්ඩලය, කර්තෘවරු වගේම බොහෝ දෙනෙක් සහාය වුණා.
ස්ථිර පත්වීම්ලාභීන් වෙනුවෙන් දිනමිණ කර්තෘ මණ්ඩලයේ චාමිකා මුණසිංහ මහත්මිය –
අද දවස අපේ වෘත්තීය ජිවිතයේ වැදගත් සන්ධිස්ථානයක්. ස්ථිර පත්වීම් ලබන මේ මොහොත අපි හැමදෙනාටම සතුටු මොහොතක්. ලේක්හවුස් ඉතිහාසයේ කවදාවත් මෙතරම් සේවක සංඛ්යාවක් එකවර ස්ථිර සේවකයන් ලෙස බඳවා ගත්තේ නැහැ. ඒ නිසා මෙය අපි ලබපු ජයග්රහණයක් වගේම ලේක්හවුස් ආයතනය ලැබූ ජයග්රහණයක්.මේ ජයග්රාහී මාවතේ අපව කැඳවා ගන්න සභාපතිතුමා කළ මැදහත්වීමට පළමුව ස්තූතිවන්ත වෙනවා. සභාපතිතුමා ලේක්හවුස් ආයතනයට පැමිණි පළමු අවස්ථාවේ සිට කොන්ත්රාත් සේවකයන් ගැන වඩාත් විමසිලිමත් වූ බව ස්ථීර පත්වීම් ලැබූ අපි තරම් දන්න කෙනෙක් තවත් නැහැ. ලේක්හවුස් ස්ථීර සේවකයන්ට ලැබුණු ඇතැම් වරප්රසාද කොන්ත්රාත් සේවකයන්ට ලබාදෙන්න සභාපති ප්රමුඛ අධ්යක්ෂ මණ්ඩලය ගත් වෙහෙසට ස්තූතියි. අධ්යක්ෂ මණ්ඩලය හැම මෙහොතේම කොන්ත්රාත් පදනමේ සේවකයන් සම්බන්ධයෙන් යහපත් වූ මානසිකත්වය පදනම් කරගෙන කටයුතු කිරීම නිසයි අපි මෙතැන ඉන්නේ. ඒ නිසා අධ්යක්ෂ මණ්ඩලයටත් ස්තූතියි.
සේවකයන් ස්ථිර කරන්න තීරණය කළ අවස්ථාවේ සිට මේ දක්වා මොන බාධක ආවත් අප සමඟ සිටි අන්තර් සමාගම් සේවක සංගමය අපට ලොකු ශක්තියක් වුණා. ඒ සේවයට පක්ෂ පාට කිසිවක් අදාළ වුණේ නැහැ. කිසිම දේශපාලන පක්ෂයක ඡායාවක්වත් සැලකිල්ලට නොගෙන ලේක්හවුස් ආයතනයට නව සංස්කෘතියක් හඳුන්වාදෙමින් තමයි අපට පත්වීම් දුන්නේ. මේ කාර්ය කිරීම වෙනුවෙන් සංගමයේ සහෝදර සහෝදරියන්ට විශේෂයෙන් ස්තූතියි. අපි වැඩ කළොත් ආයතනය රැකෙනවා වගේම ආයතනය රැකුණොත් අපේ රැකියා රැකෙනවා. අපිත් වැඩ කරමු. ආයතනය රැක ගන්න හොඳින් වැඩ කරමු.
ලේක්හවුස් ආයතනයේ සභාපති සහ කළමනාකාර අධ්යක්ෂ ගාමිණී වරුෂමාන, පුවත්පත් මණ්ඩලයේ සභාපති ප්රියාන් ආර්. විජේබණ්ඩාර, සාමාන්යාධිකාරි සුමිත් කොතලාවල, මූල්ය අධ්යක්ෂ චන්න කෙවිටියගල, මෙහෙයුම් අධ්යක්ෂ චාමර පීරිස්, නීති අධ්යක්ෂ චාමර නානායක්කාරවසම් මහත්වරු සහ ලේක්හවුස් ආයතනයේ පුවත්පත් කර්තෘවරු ඇතුළු පිරිසක් මේ අවස්ථාවට සහභාගි වූහ.
