ගෝලීය ආහාර සුරක්ෂිතතා දර්ශකය (GFSI) වැනි දර්ශකවලින් මෙරට ආහාර සුරක්ෂිතතාවෙහි සමස්ත තත්ත්වය නිවැරදිව නොවන සහ පවතින දත්ත මත පිහිටා නිසි ප්‍රතිපත්තිමය තීන්දු ගැනීම දුෂ්කර වී ඇති නිසා මෙරටට අනන්‍ය වූ ආහාර සුරක්ෂිතතා දර්ශකයක් ඉදිරි මාස තුනේදී නිර්මාණය කිරීමට රජයේ අවධානය යොමුව ඇත.
ඉදිරි වසර පහක කාලයේ මෙරට ආහාර සුරක්ෂිතතාවට අදාළ ප්‍රමුඛතා සහ ඉලක්ක හඳුනා ගනිමින් නිවැරදි ප්‍රතිපත්තිමය තීන්දු තීරණවලට එළැඹීම වෙනුවෙන් මේ නව ආහාර සුරක්ෂිතතා දර්ශකය නිර්මාණය කෙරේ.
එහි ආරම්භක පියවරක් ලෙස ‘ශ්‍රී ලංකාවට සුදුසු ආහාර සුරක්ෂිතතා දර්ශකයක් හඳුනා ගැනීම හා උපායමාර්ග සැලැස්මක් සම්පාදනය කිරීම’ පිළිබඳ වැඩමුළුවක් කොළඹ සිටි සෙන්ටර්හිදී ඊයේ (17) පැවැත්විණි.
ආහාර හා කෘෂිකර්ම සංවිධානය (FAO) සහ ලෝක ආහාර වැඩසටහන (WFP) සමඟ සහයෝගිතාවෙන් ආහාර සුරක්ෂිතතා විද්වත් කමිටුව විසින් මේ වැඩමුළුව සංවිධාන කර තිබිණි.
එම වැඩමුළුවේ ආරම්භක දේශනය කරමින් ජනාධිපති ජ්‍යෙෂ්ඨ අතිරේක ලේකම් කපිල ගුණරත්න මහතා පැවැසුවේ මෙරටට අනන්‍ය වූ නිවැරදි දර්ශකයක් නිර්මාණය වීම රටේ ආර්ථික ස්ථාවරත්වය සහ ආහාර සුරක්ෂිතතාව සඳහා අත්‍යවශ්‍ය පියවරක් බවයි.
ආහාර සුරක්ෂිතතාවෙහි මූලික සංරචක වන සුලභතාව, ප්‍රවේශය, භාවිතය සහ ස්ථාවරය යන අංශ ඔස්සේ ආහාර සුරක්ෂිතතාවෙහි දිශානතිය පිළිබඳ අවබෝධයක් ගැනීමට මේ වැඩමුළුවේදී අවධානය යොමු කෙරුණු අතර, එමඟින් ජාතික ආහාර සුරක්ෂිතතා දර්ශකයක් ගොඩනැංවීමට අවශ්‍ය මාර්ගෝපදේශ සකස් කිරීම මේ වැඩමුළුවේ අරමුණයි.
මේ අවස්ථාවට ජ්‍යෙෂ්ඨ මහාචාර්ය බුද්ධි මාරඹේ, ජ්‍යෙෂ්ඨ මහාචාර්ය ජීවිකා වීරහේවා, ආහාර සුරක්ෂිතතා විද්වත් කමිටු සාමාජිකයන්, රාජ්‍ය ආයතන, විශ්වවිද්‍යාල, ආහාර හා කෘෂිකර්ම සංවිධානය, ලෝක ආහාර වැඩසටහනෙහි සහ පෞද්ගලික අංශයෙහි නියෝජිතයන් ඇතුළු පිරිසක් එක්ව සිටියහ.
