නවතම පුවත්

කොරෝනා වෛරසය රට තුළ පැතිර යාම කඩිනමින් මර්දනයට අවශ්‍ය විශේෂඥ වෛද්‍ය අදහස් ලබාගැනීමේ අරමුණින් ජනාධිපති ගෝඨාභය රාජපක්ෂ මැතිතුමා සහ ක්ෂේත්‍ර කිහිපයක විශේෂඥ වෛද්‍යවරු අතර හමුවක් අද (09) දහවල් ජනාධිපති කාර්යාලයේදී පැවැත්විණ.

කොරෝනා වෛරසය පැතිර යාම වැළැක්වීමට රජය සහ ආරක්ෂක අංශ මෙන්ම සෞඛ්‍ය ක්ෂේත්‍රය ගත් ක්‍රියාමාර්ග සහ ඉදිරියට අනුගමනය කළ යුතු වැඩපිළිවෙළ මෙහිදී දීර්ඝ වශයෙන් සාකච්ඡාවට ලක් විය.

මේ වන විට වෛරසය ආසාධිත පුද්ගලයන් ලඟින් ඇසුරු කළ කණ්ඩායම් හා ඉන් අදියර දෙකක් ඉදිරියට සබඳතා පැවැත්වූ පුද්ගලයන් හඳුනාගනිමින් පරීක්ෂණකිරීමේ වැදගත්කම විශේෂඥ වෛද්‍යවරු පෙන්වා දුන්හ.

වෛරසය හඳුනාගැනීමට අවශ්‍ය පරීක්ෂණ කට්ටල (Test Kits)ප්‍රමාණවත් තරම් තිබුණද පැවතියත් ඕනෑම තත්ත්වයකට මුහුණ දිය හැකි වන පරිදි ඒවා ගෙන්වා ගැනීමට පියවර ගන්නා ලෙස ජනාධිපතිතුමා සෞඛ්‍ය බලධාරීන්ට උපදෙස් දුන්නේය.

ලෝකයේ සෙසු රටවල් අභිබවා යමින් වෛරසය පැතිර යාම වැළැක්වීමට ජනාධිපතිතුමා ගෙනගිය නිරෝධායන වැඩපිළිවෙළ විශේෂඥ වෛද්‍ය කණ්ඩායමේ පැසසුමටලක්විය. එම නිරෝධායන ක්‍රියාවලිය තවදුරටත් ශක්තිමත් කිරීම වෛරසය පැතිර යාම වැළැක්වීමට ඇති වැදගත්ම ප්‍රවේශය බව වෛද්‍යවරු පවසති.

වෛරසය පැතිර ගොස් නැති ප්‍රදේශ ආරක්ෂා කරගැනීමේ වැදගත්කම වෛද්‍යවරු දැඩිව අවධාරණය කළහ. එම ප්‍රදේශවලට වෛරසය පැතිරී ඇති ප්‍රදේශවලින් සංචරණය නවත්වාගත යුතු බව ඔවුනගේ මතය විය.

“පංචායුධ” ක්‍රමවේදයක් ලෙස සෑම අයෙකුම හැකි උපරිමයෙන් නිවසේ රැඳී සිටීම පළමු පියවර ලෙස ඉතා වැදගත් බව වෛද්‍යවරු පවසති. නිවසින් පිටව යාමේදී මුව ආවරණයන් පැළඳීම, මුහුණ ඇල්ලීමෙන් වැළකීම, සෑමවිටම මීටරයකදුරස්ථභාවය පවත්වාගනෙ යාම සහ අත හොඳින් සේදීම පංචායුධ ක්‍රමවේදයට අයත් වේ.

විශේෂඥයන්, විශ්වවිද්‍යාල, තාක්ෂණික ආයතන, පුද්ගල කණ්ඩායම් COVID – 19 ආශ්‍රිතව නව සොයාගැනීම් ගණනාවක් කර ඇත. ඒවායේ සොයාගැනීම් කඩිනමින් විශේෂඥ මට්ටමෙන් පර්යේෂණයට ලක්කිරීම පිළිබඳව ද සාකච්ඡාවට ලක් කෙරිණ.

කොරෝනා වෛරසය ඉක්මණින් ආසාදනය විය හැකි පුද්ගලයන් පිළිබඳවත්, ඔවුන් ඉන් මුදාගැනීමට අනුගමනය කළ යුතු ක්‍රමවේද කවරේද යන්නත් ජනාධිපතිතුමා විමසීය.

දියවැඩියාව, ඇදුම සහ හෘද රෝග ඇති පිරිස් දැඩි අවධානයෙන් සිටිය යුතු අතර, ඔවුන් නියම කර ඇති ඖෂධ නිසි පරිදි ගත යුතු බව වෛද්‍යවරු කියා සිටියහ. එමෙන්ම දුම් පානයෙන් සම්පූර්ණයෙන් වැළකී සිටිමේ වැදගත්කම ද ඔවුහු අවධාරණය කළහ.සෑම අයෙකුම නිරන්තරයෙන් උගුර ආශ්‍රිත ප්‍රදේශ තෙත්ව තබාගැනීමට දියර පාන ගැනීමේ වැදගත්කම ද පෙන්වා දෙනු ලැබිණ.

ජනාධිපති ලේකම් ආචාර්ය පී.බී. ජයසුන්දර, ජනාධිපති ප්‍රධාන උපදේශක ලලිත් වීරතුංග, ආරක්ෂක ලේකම් විශ්‍රාමික මේජර් ජෙනරාල් කමල් ගුණරත්න, ආරක්ෂක මාණ්ඩලික ප්‍රධානී සහ  යුද හමුදාපති ශවේන්ද්‍ර සිල්වා, වැඩබලන පොලිස්පති සී.ඩී. වික්‍රමරත්න, හිටපු ආණ්ඩුකාර වෛද්‍ය සීතා අරඹේපොළ, සෞඛ්‍ය අධ්‍යක්ෂ ජෙනරාල් වෛද්‍ය අනිල් ජාසිංහ, විශේෂඥ වෛද්‍යවරුන් වන වජිර සේනාරත්න, ආනන්ද විජේවික්‍රම, මහාචාර්ය සරත් ජයසිංහ, මහාචාර්ය අර්ජුන ද සිල්වා, වෛද්‍ය එම්.සී. වීරසිංහ, මහාචාර්ය නීලක මලවිගේ, ප්‍රසාද් කටුලන්ද, මහාචාර්ය වජිර දිසානායක, මහාචාර්ය රංජනී ගමගේ, කුමුදුනී රණතුංග, අමිත ප්‍රනාන්දු, ඉන්දික ලැනරෝල් සහ ජූඩ් සමන්ත යන මහත්ම මහත්මීහූ සාකච්ඡාවට එක්ව සිටියහ.

ජනමාධ්‍යවේදීන්‍‍‍ගේ වෘත්තීයභාවය ඉහළ නැංවීමට පහසුකම් වැඩිදියුණු කිරී‍මේ අරමුණින් රජය ලබා දුන් මාධ්‍ය අරුණ ණය සඳහා වාරික ගෙවීම මාස තුනක් දක්වා අත්හිටුවීමට තීරණය කළ බව මුදල් අමාත්‍යාංශ‍යේ ‍ලේකම් එස්.ආර්. ආටිගල මහතා ප්‍රකාශ ක‍ළේය.

ජනමාධ්‍ය අමාත්‍යාංශය හා මුදල් අමාත්‍යාංශය එක්ව මහජන බැංකුව සහ ප්‍ර‍දේශීය සංවර්ධන බැංකුව හරහා ‍මෙම ණය ‍යෝජනා ක්‍රමය ක්‍රියවට නැංවිණි. ඒ අනුව රුපියල් ලක්ෂ තුනක් පරිගණක උපකරණ ලබා ගැනීමට හා උපාංග මිලදී ගැනීමට ‍පොලී රහිත ණයක් ‍ලෙස ලබා‍දෙන ලදි. ඊට අමතරව ලක්ෂ එකහමාරක මුදලක් කැමරා උපකරණ අලුත්වැඩියා කිරීමට සහ පරිගණක අලුත්වැඩියා කිරීම සඳහා ණය මුදල් පිරිනමා තිබිණි.

ජනාධිපති ගෝඨාභය රාජපක්ෂ මහතා ඉන්දීය රජයට සිය ස්තූතිය පල කරයි.

ඒ කොරෝනා වසංගතය හමුවේ රට අසීරුතාවයට පත්ව ඇති අවස්ථාවක ශ්‍රී ලංකා රජය කළ ඉල්ලීමට අනුව ඉන්දිය රජය විසින් මෙරටට අත්‍යාවශ්‍ය බෙහෙත් ටොන් 10 ක ප්‍රමාණයක පරිත්‍යාග කිරීම සම්බන්ධයෙනි.

සිය ට්විටර් ගිණුමේ සටහනක් තබමින් ජනාධිපතිවරයා මෙලෙස ඉන්දීය අගමැති නරේන්ද්‍ර මෝඩි වෙත ස්තූතිය පල කර ඇත.

රටේ වසංගතයක් පැතිර යන මෙවන් මොහොතක ජනතාවගේ ආරක්ෂාව ගැන සිතා ඔවුන්ගේ නිවෙස්වලටම ගොස් රාජකාරී ඉටු කරන රාජ්‍ය සේවකයන්ට බියෙන් සැකෙන් තොරව රාජකාරී කිරීමේ වතාවරණය රජය විසින් ඇති කරන බව උසස් අධ්‍යාපන, තාක්ෂණ හා නවෝත්පාදන, තොරතුරු හා සන්නිවේදන තාක්ෂණ අමාත්‍ය ආචාර්ය බන්දුල ගුණවර්ධන මහතා පවසයි.

අංශභාග රෝගියකුගේ විශ්‍රාම වැටුප ලබා දීමට ඔහුගේ නිවසට ගිය අවස්ථාවේ දී හම්බන්තොට, කටුවන රුක්මල්පිටිය තැපැල් ස්ථානාධිපතිවරයාට පුද්ගලයන් තිදෙනකු විසින් පෙරේදා (06) පහර දීම සම්බන්ධයෙන් ගනු ලබන ඉදිරි ක්‍රියාමාර්ග ගැන දැනුවත් කිරීමට රජයේ ප්‍රවෘත්ති දෙපාර්තමේන්තුවේ දී පැවැති මාධ්‍ය හමුවක දී ගුණවර්ධන මහතා ඊයේ (07) මේ බව පැවසුවේය.

පහර දීමෙන් තුවාල ලැබූ තැපැල් ස්ථානාධිපතිවරයා කටුවන රජයේ රෝහලට ඇතුළත්ව ප්‍රතිකාර ලබන බවත් මෙම පහර දීමට සම්බන්ධ පුද්ගලයන්ට අනුකම්පා නොකර දණ්ඩ නීති සංග්‍රහයට අනුව නඩු පවරා දඬුවම් ලබා දෙන ලෙස පොලිස් බලධාරීන්ගෙන් ඉල්ලා සිටින බවත් ඇමැතිවරයා මෙහිදී පැවසීය. මේ පිළිබඳ තමාත් තැපැල්පතිවරයාත් පොලිසියට පැමිණිලි කර තිබෙන බව කී ඇමැතිවරයා, මේ අයට නීතිය අකුරටම ක්‍රියාත්මක කොට රජයේ සේවකයන්ට බියෙන් හා සැකයෙන් තොරව රාජකාරි කරන්නට අවස්ථාව ලබා දීමට පියවර ගත යුතු බව ද කීවේය.

“මේ විශේෂ මිල කළ නොහැකි, වටිනා සේවයක් කරන ගම් මට්ටමෙන් බිම් මට්ටමෙන් ගෙවල්වලට යන මහජන සෞඛ්‍ය පරීක්ෂකවරු, සමෘද්ධි නිලධාරීවරු, කෘෂි සංවර්ධන හා පර්යේෂණ නිලධාරීවරු, සංවර්ධන නිලධාරීවරු, ග්‍රාමනිලධාරීවරු තමන්ගේ රාජකාරිය ජීවිතය ද පරදුවට තබා ඉටු කරන මොහොතක ඔවුන්ගේ ආරක්ෂාව සඳහා රජය මැදිහත් වෙනවා. අපි පොලිසියට ත් අදාළ බලධාරීන්ටත් පවසා සිටින්නේ අනුකම්පාවක් දක්වන්නේ නැතිව ඇප රහිත ව බන්ධනාගාර ගත කරලා මේ අයට දණ්ඩ නීති සංග්‍රහය යටතේ නඩු පවරා අවශ්‍ය නිසි දඬුවම් දෙන්න කියලා.” යැයි ද අමාත්‍යවරයා වැඩිදුරටත් පැවසීය.

COVID – 19 සෞඛ්‍ය හා සමාජ සංරක්ෂණ අරමුදලට අද (08)  රුපියල් මිලියන 97 ක පරිත්‍යාග සිදු කෙරිණ.

 අමාත්‍ය චමල් රාජපක්ෂ මහතා තම අමාත්‍යංශ යටතේ ඇති ආයතන ලබාදුන් රුපියල් මිලියන 29.5 ක්, අමාත්‍ය ජනක බණ්ඩාර තෙන්නකෝන් මහතා රෙජිස්ටාර් ජෙනරාල් දෙපාර්තමේන්තුවෙන් පරිත්‍යාග කළ රුපියල් මිලියන 2.8 ක් සහ අමාත්‍ය එස්.එම්. චන්ද්‍රසේන මහතා සිය කැබිනට් අමාත්‍ය ධුරයට අයත් අප්‍රේල් මස වැටුප ජනාධිපති ගෝඨාභය රාජපක්ෂ මැතිතුමා වෙත පිළිගැන්වූහ. යුනිලීවර් ශ්‍රී ලංකා ලිමිටඩ් රුපියල් මිලියන 10ක්, කළමනාකරණය පිළිබඳ පශ්චාත් උපාධි ආයතනය රුපියල් මිලියන 5ක් කිරම විමලජෝති හිමි බෞද්ධ සංස්කෘතික මධ්‍යස්ථානය රුපියල් මිලියන 2ක්, අත්තනගල්ල රජමහා විහාරය රුපියල් මිලියන 10ක් සහ මලලසේකර පදනම රුපියල් මිලියන 3ක් අද (08) සිදු කෙරුණු පරිත්‍යාගයන්ට ඇතුළත් වේ.

අද පස්වරු වන විට COVID – 19 සෞඛ්‍ය හා සමාජ සංරක්ෂණ අරමුදලේ තැන්පතු ශේෂය රුපියල් මිලියන 517 ඉක්මවා ගොස් තිබිණ.

ලංකා බැංකුවේ ආයතන ශාඛාවේ  අංක 85737373 දරණ  විශේෂ ගිණුමට පරිත්‍යාග බැර කෙරේ. දෙස් විදෙස් පරිත්‍යාගශිලීහූ ගිණුමට දායක වී සිටිති. නීත්‍යානුකූල ගිණුම් මගින් අරමුදලට කෙරෙන පරිත්‍යාග මුදල් බදු සහ විදේශ විනිමය රෙගුලාසිවලින් නිදහස් කර ඇත. චෙක්පත් හෝ ටෙලි ග්‍රාෆ් සම්ප්‍රේෂණ මගින් මුදල් තැන්පත් කිරීමට පිළිවන.

දුරකථන අංක 011 – 2354479 / 011 – 2354354 ඔස්සේ අධ්‍යක්ෂ ජනරාල් (පරිපාලන) කේ.බී. එගොඩවෙලේ මහතා අමතා වැඩි විස්තර දැන ගැනීමට  පිළිවන.

දෙදිනක් තුළ COVID 19 සෞඛ්‍ය හා සමාජ සංරක්ෂණ අරමුදලට රුපියල් මිලියන 66ක මුදලක් පරිත්‍යාග කර තිබේ. ඒ අනුව රුපියල් මිලියන 314ක්ව තිබූ ශේෂය දැන් රුපියල් මිලියන 380 දක්වා ඉහළ ගොස් ඇති අතර ඇමැති ඩලස් අලහප්පෙරුම මහතා සිය කැබිනට් අමාත්‍ය ධූරයට හිමි අප්‍රේල් මස වැටුප සහ හිටපු රාජ්‍ය ඇමැති ගාමිණි ලොකුගේ මහතා රුපියල් මිලියන 10 ක් ඊයේ (06) ජනාධිපති ගෝඨාභය රාජපක්ෂ මහතා වෙත පරිත්‍යාග කර තිබේ. ජාතික ලොතරැයි මණ්ඩලය රුපියල් මිලියන 25ක්, ජාතික ඉතිරි කිරීමේ බැංකුව සහ ලංකා විදුලිබල මණ්ඩල ඉංජිනේරු සංගමය රුපියල් මිලියන 2.5 බැගින් ද, ඉඩම් ප්‍රතිසංස්කරණ කොමිසන් සභාව රුපියල් මිලියන 02ක්, මැලිබන් බිස්කට් මැනුෆැක්චරීස් ආයතනය රුපියල් මිලියන 10ක්, මාතර බෝධි ආරක්ෂක සභාව රුපියල් මිලියනයක් සහ නේචර්ස් බියුටි ක්‍රියේෂන්ස් ආයතනය රුපියල් මිලියන 05ක් අරමුදලට පරිත්‍යාග කර ඇත.

ලංකා බැංකුවේ ආයතන ශාඛාවේ අංක 85737373 දරණ විශේෂ ගිණුමට පරිත්‍යාග බැර කරන අතර දෙස් විදෙස් පරිත්‍යාගශිලීහූ ගිණුමට දායක වී සිටින බව ජනාධිපති මාධ්‍ය අංශය පවසයි.

නීත්‍යානුකූල ගිණුම් මඟින් අරමුදලට කෙරෙන පරිත්‍යාග මුදල් බදු සහ විදේශ විනිමය රෙගුලාසිවලින් නිදහස් කර ඇති බවත් චෙක්පත් හෝ ටෙලි ග්‍රැෆ් සම්ප්‍රේෂණ මඟින් මුදල් තැන්පත් කිරීමට හැකියාව පවතී.

නිරෝධායන මධ්‍යස්ථානවලදී පුද්ගලයන් නිරෝධායනයට කෙරෙන කාල සීමාව දින 14 සිට 21 දක්වා වැඩි කෙරෙන බව යුද හමුදාපති ලුතිනන් ජෙනරාල් ශවේන්ද්‍ර සිල්වා මහතා පවසයි.
 
යුද හමුදාපතිවරයා මේ බව පැවසුවේ මාධ්‍ය වෙත අදහස් දක්වමිනි.
 
අද(07) පෙරවරුවේත් කන්දකාඩු නිරෝධායන මධ්‍යස්ථානයේ සිටි පුද්ගලයින් 5 දෙනෙකු නිරෝධායන කටයුතු අවසන් කර සිය නිවෙස් බලා පිටත්ව ගොස් ඇති අතර, මේ වනවිට නිරෝධායනය අවසන් කර ඇති මුළු සංඛ්‍යාව 3415 කි.
 
මේ අතර බණ්ඩාරගම , අටලූගම සහ මහනුවර , අකුරණ යන ප්‍රදේශ තවදුරටත් හුදකලා නගර ලෙස පවත්වාගෙන යන බවද යුද හමුදාපතිවරයා පැවසීය.
 
එමෙන්ම, එම ප්‍රදේශවල ජනතාවට අවශ්‍ය සියලූ කටයුතු සම්පාදනය කිරීමට ද රජය කටයුතු කරමින් සිටින බවද යුධ හමුදාපතිවරයා සඳහන් කළේය.

ශ්‍රී ලංකා තොරතුරු හා සන්නිවේදන තාක්‍ෂණ නියෝජිතායතනය විසින් රාජ්‍ය අංශය සදහා හදුන්වා දුන් වීඩියෝ සම්මන්ත්‍රණ විසදුම ( https://meet.gov.lk) වෙත පිවිසීමටත් එම දත්ත වැය වීමකින් තොරව නොමිලේ භාවිත කිරීමටත් පහසුකම් ලබා දීමට ටෙලිකොම් ,ඩයලොග් , මොබිටෙල් සහ හච් එකතුවේ.
 
කොවිඩ් වෛරසය පැතිරීමේ අවදානම පලනයකිරීමේ ප්‍රධාන උපක්‍රමයක් ලෙස නිවෙස්තුලම සිටින ලෙසත් රාජ්‍ය සහ අනෙකුත් අංශවල රාජකාරී නිවෙස්තුලම සිට කිරීමට අවශ්‍ය පහසුකම් සලසන ලෙසත් රජය විසින් දැනුම් දී තිබුනි. 
 
මේ අනුව ශ්‍රී ලංකා තොරතුරු හා සන්නිවේදන තාක්‍ෂණ නියෝජිතායතනය විසින් රාජ්‍ය අංශය සදහා හදුන්වා දුන් මෙම වීඩියෝ සම්මන්ත්‍රණ විසදුම තුළින් එකම අවස්ථාවේ විශාල පිරිසක් අන්තර් ජාලය ඔස්සේ සම්බන්ධ කර ගනිමින් සජීව සම්මන්ත්‍රණ පැවැත්විය හැකිය.
 
මේවන විට ප්‍රධාන පෙලේ රාජ්‍ය ආයතන 120ක් මෙහි ප්‍රතිලාභ ලබයි. 

කොරෝනා වෛරසයෙන් රෝගාතුරව දැඩි සත්කාර ඒකකයේ ප්‍රතිකාර ලබන බ්‍රිතාන්‍ය අග්‍රාමාත්‍ය බොරිස් ජෝන්සන්ට ඉක්මන් සුවය පතන බව ජනාධිපති ගෝඨාභය රාජපක්ෂ මැතිතුමා ට්විටර් සටහනක් තබමින් ප්‍රකාශ කර ඇත.
 
මේ අතර බ්‍රිතාන්‍ය අගමැතිවරයාට ඉක්මන් සුවය පතමින් අමෙරිකානු ජනාධිපති ඩොනල්ඩ් ට්‍රම්ප්, ඉන්දිය අගමැති නරේන්ද්‍ර මෝදී ඇතුළු රාජ්‍ය නායකයින් රැසක් පණිවිඩ යොමු කොට තිබේ. 

දේශීය වෛද්‍ය ක්‍රම උපයෝගී කරගෙන COVID - 19 මැඩපවත්වීම සදහා ගත හැකි ක්‍රියාමාර්ග පිළිබඳව සොයා බැලීමට ආයුර්වේද වෛද්‍යවරුන්, දේශීය හෙළ වෛද්‍යවරුන්, නිල වෙදකම් සහ හෝමියෝපති ප්‍රතිකාර යන අංශයන්ගෙන් සමන්විත වූ 50 දෙනකුගෙන් යුතු කණ්ඩායමක් කැඳවා ජනාධිපතිතුමාගේ සහ අග්‍රාමාත්‍යතුමාගේ උපදෙස් මත, සෞඛ්‍ය අමාත්‍යතුමියගේ සහභාගිත්වයෙන් ඊයේ (05) දිනයේ දී COVID - 19 පැතිරීම වැළැක්වීමේ ජාතික ක්‍රියාන්විත මධ්‍යස්ථනයේ දී සාකච්ඡා කළ බව යුද්ධ හමුදාපති ලුතිනල් ජෙනරාල් ශවේන්ද්‍ර සිල්වා මහතා (06) COVID - 19 පැතිරීම වැළැක්වීමේ ජාතික ක්‍රියාන්විත මධ්‍යස්ථනයේ දී ප්‍රකාශ කර සිටියේය.

මේ වන විට දේශීය වෛද්‍ය ක්‍රම භාවිතා කරමින් සිටින බවත්, සැළසුම් සහගත ව එය ඉදිරියට පවත්වාගෙන යාම පිළිබඳවත් මෙහි දී සාකච්ඡා කළ බව ශවේන්ද්‍ර සිල්වා මහතා වැඩිදුරටත් සඳහන් කළේය.

ත්‍රිවිධ හමුදාව විසින් පවත්වාගෙන යනු ලබන නිරෝධායන මධ්‍යස්ථාන වලින් එනම්, කුණ්ඩසාලේ මධ්‍යස්ථානයෙන් තිදෙනෙක්, බූස්ස මධ්‍යස්ථානයෙන් 11 ක්, මුලතිව් මධ්‍යස්ථානයෙන් 203 ක් වශයෙන් 217 දෙනකු දින 14 ක නිරෝධායන කාලය නිම කිරීමෙන් අනතුරුව තවත් දින 14 ක ස්වයං නිරෝධායනයට උපදෙස් දෙමින්  (06) දින ඔවුන්ගේ නිවෙස් කරා මුදා හැරීමට කටයුතු කළ අතර ත්‍රිවිධ හමුදාව විසින් පවත්වාගෙන යනු ලබන නිරෝධායන මධ්‍යස්ථාන වලින් 3,386 දෙනකු මේ වන විට නිවෙස් කරා මුදා හැරීමට කටයුතු කර ඇති බවත් මෙහි දී සදහන් විය.

ත්‍රිවිධ හමුදාව මඟින් පවත්වාගෙන යනු ලබන මෙම නිරෝධායන මධ්‍යස්ථාන 40 අතරින් තුනක් ගුවන් හමුදාව විසින් ද, එක් මධ්‍යස්ථානයක් නාවික හමුදාව සතු වන අතර ඉතිරි 36 යුධ හමුදාව ව ඉසින් පවත්වාගෙන යනු ලබයි.
මෙම නිරෝධායන මධ්‍යස්ථාන 40 හි 1,287 දෙනකු තවදුරටත් නිරෝධායනය වෙමින් සිටි. 07 දිනයේ දී ද කණ්ඩායමක් දින 14 නිම වී තවත් දින 14 ක ස්වයං නිරෝධායනයට වෛද්‍ය උපදෙස් ලබා දෙමින් නිවෙස් කරා මුදා හැරීමට නියමිතයි.

වෙනත් රෝගීන් සිටින්නේ ද යන්න සෙවීම සඳහා රසායන පරීක්ෂණ සංඛ්‍යාත්මකව තවදුරටත් වැඩි කිරීමට කටයුතු කරන බවත්, ඒ සඳහා වැඩපිළිවෙලක් සකස් කර ඇති බවත් සෞඛ්‍ය සේවා අධ්‍යක්ෂ
ජනරාල් විශේෂඥ වෛද්‍ය අනිල් ජාසිංහ මහතා පවසයි.

සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය අනිල් ජාසිංහ මහතා COVID - 19 පැතිරීම වැළැක්වීමේ ජාතික ක්‍රියාන්විත මධ්‍යස්ථනයේ දී ඊයේ (06) විශේෂ ප්‍රකාශයක් නිකුත් කරමින් මේ බව පැවසීය.

වෙනත් රෝගීන් සිටින්නේ ද යන්න සෙවීම සඳහා රසායන පරීක්ෂණ සංඛ්‍යාත්මක ව තවදුරටත් වැඩි කිරීමට කටයුතු කරන බවත්, ඒ සඳහා වැඩපිළිවෙලක් සකස් කර ඇති අතර මෙහි දී සිදු කරනු ලබන්නේ වෛරසය හඳුනාගනු ලබන්නේ PCR පරීක්ෂණය වන අතර Rappid Test පරීක්ෂණය ඉදිරියට (Validate) වලංගු කරන බවත්, ගුණාත්මකභාවයෙන් යුතු Rappid Test Kit ලැබෙන අවස්ථාවක එම පරීක්ෂණයත් සුදුසු පරිදි කිරීමට බලාපොරොත්තු වෙන බවත් මෙහි දී සඳහන් කෙරිණි.


1390 හා 1399 ට අමතා ජනතාවට නිවසේ සිටම දුරකතනයෙන් ඇමතුම් ලබා ගෙන තමන්ට තිබෙන රෝග ලක්ෂණ අනුව නිසි උපදෙස් ලබා දීමක් ද සිදු කෙරේ. ඉදිරියටත් සමාජ දුරස්ථභාවය ඇති කර ගෙන කටයුතු කිරීම සැමගේ වගකීමක් ලෙස සිතා කටයුතු කළ යුතු බව ද මෙහි දී අවධාරණය කර සිටි අතර කරුණු වසං කිරීමෙන් වළකින ලෙසත් මහජනතාවට දැනුම් දී සිටියේය.

 

රාජ්‍ය සේවකයින් හැරුණු කොට අනෙකුත් සමස්ත ජනතාව ආවරණය වන පරිදි ලක්‍ෂ 40 කටත් වැඩි පිරිසකට මෙම අවස්ථාවේ දී මුල්‍යමය වශයෙන් උපරිම සහනය ලබා දීමට විශේෂ කැබිනට් පත්‍රිකාව පිළිබඳ ජනාධිපතිතුමා සමඟ සාකච්ඡා කර ඇති බව සම කැබිනට් ප්‍රකාශක,අමාත්‍ය බන්දුල ගුණවර්ධන මහතා පවසයි.

අමාත්‍ය ආචාර්ය බන්දුල ගුණවර්ධන මහතා අද (02) රජයේ ප්‍රවෘත්ති දෙපාර්තමේන්තු ශ්‍රවණාගාරයේ දී පැවති කැබිනට් තීරණ දැනුම් දීමේ මාධ්‍ය හමුවේ දී මේ බව ප්‍රකාශ කර සිටියේය.

මෙරට පවත්නා කොරෝනා වෛරස වසංගත තත්ත්වය ඉදිරි සති දෙකක කාලය තුළ භයානක මට්ටමකට ළඟා විය හැකි බවට මෙරට සෞඛ්‍ය විශේෂඥයින් අනතුරු අඟවා ඇති බව ද අමාත්‍යවරයා පැවසීය.

ලෝක සෞඛ්‍ය සංවිධානයේ ප්‍රධානින් හරහා අප වැනි රටවල් වලට මුහුණ දීමට සිදු ව ඇති තත්ත්වයන් මත ණය වාරික ගෙවීම කල් දැමීමට හෝ ප්‍රතිසැකසුම් කිරීමට ලෝකයේ බලවත් මුල්‍ය ආයතන වලින් ඉල්ලා සිටීමේ යෝජනාව ජනාධිපති ගෝඨාභය රාජපක්ෂ මහතා මේ වන විට ඉදිරිපත් කර ඇති බවත්, දෙවන ලෝක සංග්‍රාමයෙන් පසුව ඇති වූ මෙම තත්ත්වය හමුවේ උද්ගතව ඇති දැවැන්තම ආර්ථික අර්බුදය හමුවේ තනිව විසඳුම් සොයා ගැනීමට නොහැකි හෙයින් ඒ සඳහා ලෝක ආර්ථික විශේෂඥයින්ගෙන් සමන්විත සමුළුවක් කැඳවීමට ද කැබිනට් මණ්ඩලයේ දී ජනාධිපතිතුමා වෙත යෝජනා කළ බව ද මෙහි දී සඳහන් කෙරිණි.

ඒ අනුව, රාජ්‍ය සේවකයින් හැරුණු කොට අනෙකුත් සමස්ත ජනතාව ආවරණය වන පරිදි ව්‍යාපාරික ප්‍රජාවට, විශ්‍රාමිකයින්ට, වැඩිහිටියන්ට, අබාධිත පුද්ගලයින්ට, ළමා ආරක්ෂක අංශ යටතේ පසුවෙන දරුවන්ට, විශේෂ අවශ්‍යතා ඇති අයවලුන්ට, ස්වයං රැකියා වල නියුතු වූවන්ට, සමෘද්ධි ලාභීන්ට, සමෘද්ධි ව්‍යාපාරයට සම්බන්ධ සියලු පාර්ශ්වයන්ට, වැනි ලක්‍ෂ 40 කටත් වැඩි පිරිසකට මෙම අවස්ථාවේ දී මුල්‍යමය වශයෙන් උපරිම සහනය ලබා දීම සඳහා අවම වශයෙන් ජීවත් වීමට අවශ්‍ය වන සේ අවම රුපියල් 5,000 ක දීමනාවක් ලබා දීම සඳහා වන විශේෂ කැබිනට් පත්‍රිකාව පිලිබඳ ජනාධිපතිතුමා සමඟ සාකච්ඡා කර ඇති බවත් මෙහි දී සඳහන් විය.

නවතම පුවත්

මහින්ද රාජපක්ෂ අභිනව රජයේ නව අගමැති ලෙස දිවුරුම් දෙයි

අගෝ 09, 2020
මහමැතිවරණයෙන් වාර්තා ගත මනාප ඡන්ද සංඛ්‍යාවක් හිමිකර ගත් අග්‍රාමාත්‍ය මහින්ද රාජපක්ෂ මහතා…

ජනපති ජනතාවට ස්තූති පුදකරයි

අගෝ 06, 2020
කොවිඩ් -19 අවදානම ලෝකයෙන් පහව ගොස් නොමැති අවස්ථාවක මහ මැතිවරණයක් පැවැත්වූ දකුණු ආසියාවේ…

පෙරහර සමාප්ති සන්දේශය ජනපතිට බාර දෙයි

අගෝ 05, 2020
හෙළයේ විචිත්‍රවත් මහා කලා මංගල්‍යය ලෙසින් දෙස් විදෙස් ජනතාව අතර ප්‍රචලිත මහනුවර ඇසළ පෙරහර…

අගමැති දළදා සමිඳු වැඳ පුදා ගනී

අගෝ 04, 2020
අගමැති මහින්ද රාජපක්ෂ මහතා ඊයේ (03) පෙරවරුවේ මහනුවර ඓතිහාසික ශ්‍රී දළදා මාලිගාවට පැමිණ…

ජනපති මැදිහත්වීමෙන් මැදිරිගිරිය සිරිමාවෝ බණ්ඩාරනායක ප්‍රාථමික විද්‍යාලයට ජංගම පුස්තකාලයක්

අගෝ 03, 2020
ශිෂ්‍යාවක කළ ඉල්ලීම ඉටු කරමින් මැදිරිගිරිය සිරිමාවෝ බණ්ඩාරනායක ප්‍රාථමික විද්‍යාලයට ජංගම…

නවෝත්පාදන නිපැයුම්වලට වෙළෙඳපොළ සකස් කරනවා

ජූලි 28, 2020
නවෝත්පාදන හා තාක්ෂණ විෂයේ දියුණුවට අවශ්‍ය අධ්‍යයන අවස්ථා මෙන්ම එම නිපැයුම්වලට වෙළෙඳපොළ…

කිලෝග්‍රෑමයකට රුපියල් 50 ක සහතික මිල යටතේ මෙවර යල කන්නයේ වී අස්වනු මිලදී ගැනේ...

ජූලි 27, 2020
2020 යල කන්නයේ වී මිල දී ගැනීමේ රජයේ වැඩසටහන යටයේ වී කිලෝ ග්‍රෑම් එකක් රුපියල් 50 ක රජයේ…

ඇසළ පෙරහරට සමගාමීව සමරු මුද්දර සහ මුල්දින කවරයක් නිකුත් කෙරේ..

ජූලි 25, 2020
කන්ද උඩරට ඇසළ මහා පෙරහරට සමගාමීව ශ්‍රී ලංකා තැපැල් දෙපාර්තමේතුව විසින් අද(25) සමරු මුද්දර…

මාතලේ අධිතාක්ෂණික සරසවිය කඩිනමින් ඉදි කරනවා

ජූලි 22, 2020
ජාතික විශ්වවිද්‍යාල නොමැති දිස්ත්‍රික්ක සඳහා ඉදි කෙරෙන අධිතාක්ෂණික විශ්වවිද්‍යාල දහයෙන්…

කොවිඩ් වසංගතයෙන් ජනතාව රැක ගැනීමේ අභියෝගය ජයගන්නා බවට ජනපතිගෙන් සහතිකයක්

ජූලි 14, 2020
වත්මන් ව්‍යාප්තිය පාලනයට විධිමත් සැලසුම් … ආසාදිතයන් සොයන පරීක්ෂණ අඛණ්ඩව … මත්ද්‍රව්‍ය…

logo20190228 1

163, ඇසිදිසි මැඳුර, කිරුළපන මාවත, පොල්හේන්ගොඩ, කොළඹ 05

011-2513 459, 011-2513 460,
011-2512 321, 011-2513 498

info@media.gov.lk
facebook
twitter

OPEN
logo