නවතම පුවත්

ජනාධිපති ගෝඨාභය රාජපක්ෂ මැතිතුමා අද (13) පෙරවරුවේ මහනුවර ඓතිහාසික දළදා මාළිගාවේදී දළදා සමිඳුන් වැඳ ආශිර්වාද ලබා ගත්තේය.

දළදා මාළිගාව වෙත ගිය ජනාධිපතිතුමා දියවඩන නිලමේ නිලංග දෑල මහතා විසින් පිළිගනු ලැබීය.

මල්වතු පාර්ශ්වයේ මහානායක අතිපූජ්‍ය තිබ්බටුවාවේ ශ්‍රී සුමංගල නා හිමිපාණන් වහන්සේ බැහැ දුටු ජනාධිපතිතුමා උන්වහන්සේගේ සුව දුක් විමසීය.

මල්වතු අනුනායක අතිපූජ්‍ය නියංගොඩ විජිතසිරි සහ අතිපූජ්‍ය දිඹුල්කුඹුරේ විමලධම්ම නා හිමිපාණන් වහන්සේලා බැහැ දුටු ජනාධිපතිතුමා සුහද පිළිසඳරක නිතර විය.

උන්වහන්සේ පිරිත් සජ්ජායනා කර ජනාධිපතිතුමාට සෙත් ප්‍රාර්ථනා කළහ.

ජනාධිපතිතුමා අස්ගිරි මහානායක අතිපූජ්‍ය වරකාගොඩ ශ්‍රි ඥානරතන නා හිමිපාණන් වහන්සේ ද බැහැ දැක ආශිර්වාද ලබා ගත්තේය.

අනුනායක අතිපූජ්‍ය ආණමඩුවේ ධම්මදස්සි සහ ලේඛකාධිකාරී අතිපූජ්‍ය මැදගම ධම්මානන්ද නා හිමිවරු ද එම අවස්ථාවට එක් වූහ.

 
 

ආයතනිකව හා පෞද්ගලිකව ලැබෙන පරිත්‍යාග හා සෘජු තැන්පතු සමග ඉටුකම COVID – 19 සෞඛ්‍ය හා සමාජ ආරක්ෂණ අරමුදලේ ශේෂය රුපියල් මිලියන 1450 ඉක්මවා තිබේ.

වෙන්නප්පුව ප්‍රාදේශීය සභාවේ සභාපති ප්‍රමුඛ සභිකයන් රුපියල් 166,000ක්, එච්. ප්‍රියන්ති ආර්. පීරිස් මහත්මිය රුපියල් 5,000ක්, ‘A’ Group Construction & Consults හි කළමනාකරණ අධ්‍යක්ෂ ඉංජිනේරු පී. ත්‍යාපරන් මහතා රුපියල් 200,000ක්, එළවළු, පළතුරු හා ධාන්‍ය තොග වෙළෙඳ හිමියන්ගේ සුභසාධක සංගමයේ සභාපති සුනිල් සෙනෙවිරත්න මහතා රුපියල් 200,000ක්, එච්.කේ. සිරිසේන මහතා රුපියල් 50,000ක්, පී.බී. සුමනාවතී මහත්මිය රුපියල් 6,500ක්, ඩබ්. මනෝජ් ලලිත් ප්‍රනාන්දු මහතා, රුපියල් 64,000ක් සහ එම්.ඒ. පීටර් විල්ප්‍රඩ් මහතා රුපියල් 5,000ක් අරමුදලට පරිත්‍යාග කර තිබේ. අදාළ චෙක්පත් ජනාධිපති ගෝඨාභය රාජපක්ෂ මැතිතුමා අනුරාධපුර සහ පුත්තලම දිස්ත්‍රික්කවල කළ චාරිකාවේදී භාරදෙනු ලැබීය.

ඩී.එම්. උදුලා විශ්වනී දියණිය රුපියල් 5,000ක්, ශ්‍රී ලංකා සුරැකුම්පත් හා විනිමය කොමිෂන් සභාව රුපියල් 263,628.56ක්, Weettasinghe Pharmaceutical Distributors (Pvt) Ltd රුපියල් 50,000ක්, උඩුනුවර ප්‍රාදේශීය ලේකම් කාර්යාලයේ සංවර්ධන නිලධාරී සුබසාධක සංගමය රුපියල් 189,625.34ක් සහ රාජ්‍ය නොවන සංවිධාන මහලේකම් කාර්යාලයේ අධ්‍යක්ෂ ජනරාල් රාජා ගුණරත්න මහතා රුපියල් 88,000ක් අරමුදලට පරිත්‍යාග කළහ.

දැන් ඉටුකම COVID – 19 සෞඛ්‍ය හා සමාජ ආරක්ෂණ අරමුදලේ ශේෂය රුපියල් 1,450,326,673.05 කි.

දෙස් විදෙස් පරිත්‍යාගශීලීහූ ගිණුමට දායක වී සිටිති. චෙක් පත් හෝ ටෙලි ග්‍රාෆ් සම්ප්‍රේෂණ මගින් මෙන්ම www. itukama.lk වෙබ් අඩවිය ඔස්සේ හෝ #207# අමතා අරමුදලට දායකවිය හැකිය. දුරකථන අංක 0760700700/ 0112320880/ 0112354340/ 0112424012 ඇමතීමෙන් වැඩි විස්තර දැනගැනීමට පිළිවන.

ශ්‍රී ලංකා අමරපුර මහා නිකායේ ආදිකර්තෘන් වහන්සේ ස්මරණය ජනාධිපති ගෝඨාභය රාජපක්ෂ මැතිතුමාගේ සහභාගිත්වයෙන් අද (08) කොළඹ බණ්ඩාරනායක  අනුස්මරණ ජාත්‍යන්තර සම්මන්ත්‍රණ ශාලාවේ දී පැවැත්විණි.

පූජ්‍ය වැලිතර, මහකරාවේ ඥානවිමලතිස්ස හිමියන් කළ සුවිශාල කැපකිරීමකින් පසු 1803 වර්ෂයේ දී අමරපුර මහා නිකාය ස්ථාපනය කෙරිණ. අතිපූජ්‍ය මඩිහේ පඤ්ඤාසීහ, අග්ගමහා  පණ්ඩිත අතිපූජ්‍ය බලංගොඩ ආනන්ද මෛත්‍රෙය, අතිපූජ්‍ය දවුල්දෙණ ඥාණීස්වර වැනි මහා නා හිමිවරු අමරපුර මහා නිකායට නායකත්වය දුන් අතර, පූජ්‍ය පොල්වත්තේ බුද්ධදත්ත  වාදීභසිංහ, පූජ්‍ය මිගෙට්ටුවත්තේ ගුණානන්ද වැනි සම්බුද්ධ ශාසනය උද්දීපනය කළ මහා යථිවරයාණන් වහන්සේ අමරපුර මහා නිකායෙන් බිහි වූහ.

වසර 218ක් පුරා සම්බුද්ධ ශාසනය වෙනුවෙන් සුවිශාල මෙහෙවරක් කළ සියලුම ආදිකර්තෘන් වහන්සේ සිහි කරමින් අමරපුර දිනය සමරනු ලැබීය.

අමරපුර මහා නිකායේ උත්තරීතර මහානායක අග්ගමහා පණ්ඩිත අතිපූජ්‍ය  කොටුගොඩ ධම්මාවාස මහා නා හිමියෝ උත්සවයේ මුලසුන හෙබවූහ.

ආදිකර්තෘන්වහන්සේට පුෂ්පෝපහාර පිළිගැන්වීම ජනාධිපතිතුමා විසින් සිදු කෙරිණ.

අතිපූජ්‍ය කොටුගොඩ ධම්මාවාස මහා නා හිමියන්ගේ චරිතාපදනය එළිදක්වනු ලැබූ අතර,  ග්‍රන්ථයේ පළමු පිටපත ජනාධිපති ගෝඨාභය රාජපක්ෂ මැතිතුමා විසින් ධම්මාවාස මහා නා හිමිපාණන් වෙත පිළිගන්වනු ලැබීය.

අමරපුර නිකායට අයත් සියලු විහාරස්ථානවල තොරතුරු ඒකරාශි කොට ලියැවුණු “අමරපුර විහාරස්ථාන නාමාවලිය” ග්‍රන්ථය ද එළිදැක්විණ.

අමරපුර දිනය සිහි ගන්වමින් අතිපූජ්‍ය කොටුගොඩ ධම්මාවාස නා හිමියෝ සහ ලේඛකාධිකාරී මහාචාර්ය පූජ්‍ය පල්ලේකන්දේ රතනසාර හිමියෝ ජනාධිපතිතුමා වෙත සිහිවටනයක් පිළිගැන්වූහ.

ත්‍රෛනිකායික මහා නායක, අනුනායක හිමිවරු ප්‍රමුඛ මහා සංඝරත්නය සහ ගිහි පැවිදි පිරිසක් සමරු උළෙලට  එක්ව සිටියහ.

 
 

ගම ගොඩනැගීමට නම් ග්‍රාමීය ආර්ථිකය සහ ජනතා අවශ්‍යතා හඳුනාගනිමින් බැංකු සේවා ක්‍රියාත්මක විය යුතු බව ජනාධිපති ගෝඨාභය රාජපක්ෂ මැතිතුමා අවධාරණය කරයි.

පිට රටවලින් පැමිණ කර්මාන්තශාලා අරඹන තෙක් නොසිට අපනයන කෘෂිකර්මාන්තය සංවර්ධනය කිරීම කාලීන අවශ්‍යතාවක් බව ජනාධිපතිතුමා කියා සිටී. කර්මාන්ත බිහි වීම පමණක් සංවර්ධනය නොවන බව පෙන්වා දෙන ජනාධිපතිතුමා කෘෂිකර්මාන්තය කේන්ද්‍ර කරගනිමින් ග්‍රාමීය ව්‍යවසායකත්වය වර්ධනය කළ යුතු බව පවසයි.

ප්‍රාදේශීය සංවර්ධන බැංකුවේ වත්මන් ක්‍රියාකාරීත්වය සහ ඉදිරි සැලසුම් පිළිබඳව ජනාධිපති කාර්යාලයේ පැවති සාකච්ඡාවේදී මේ අදහස් පළ කෙරිණ.

අවශ්‍යතා නිවැරදිව හඳුනාගෙන කෘෂිකර්මාන්තය දියුණු කිරීමෙන් ආර්ථික සංවර්ධනය අත් කරගැනීම රජයේ අරමුණකි. ඒ සඳහා ආර්ථිකය ගොඩනගන ආකාරය පහළ සිට බැලීමේ වැදගත්කම ද රාජපක්ෂ මැතිතුමා පෙන්වා දුන්නේය.

වාණිජ බැංකු ණය සම්පාදනයේදී නිෂ්පාදන ක්ෂේත්‍රයට වඩා වෙ‍ළෙඳ අංශ කෙරෙහි වැඩි අවධානයක් යොමු කරයි. සම්ප්‍රදායට සීමා නොවී ගොවීන් නිෂ්පාදනයට දිරිගන්වමින් ක්‍රියාකිරීම ප්‍රාදේශීය සංවර්ධන බැංකුවේ වගකීමකැයි ජනාධිපතිතුමා සඳහන් කළේය.

කෘෂි භෝග ආනයනයට ඉඩ නොතබා උඳු, කුරක්කන්, මුං ඇතුළු ධාන්‍ය වගා දිරිගැන්වීමේ අවශ්‍යතාවද අවධාරණය කෙරිණ. ඒ ඒ ප්‍රදේශයට ඉලක්ක නියම කරමින් ගොවියා දිරිගැන්වීමට අවශ්‍ය සහාය, බැංකුව ගමට ගෙනයාමෙන් තමා අපේක්ෂා කරන ඉලක්කය බව ද ජනාධිපතිතුමා පැවසීය.

දීර්ඝ කාලීනව ගෙවීමේ පදනම මත මහා පරිමාණ වශයෙන් ණය ගෙන ගෙවීම පැහැර හරින අයට එරෙහිව තදින් ක්‍රියාකළ යුතු බව සඳහන් කළ ජනාධිපතිතුමා රාජ්‍ය බැංකුවලට අයවිය යුතු ණය අයකරගැනීමේ ක්‍රමවේදයක් සැකසීමේ අවශ්‍යතාව ද අවධාරණය කළේය.

ජනාධිපති ලේකම් පී.බී. ජයසුන්දර, මුදල් ලේකම් එස්.ආර්. ආටිගල, මහ බැංකුවේ අධිපති මහාචාර්ය ඩබ්.ඩී. ලක්ෂ්මන්, ප්‍රාදේශීය සංවර්ධන බැංකුවේ සභාපති මහින්ද සාලිය, සමාන්‍යාධිකාරී ටී. කූහන් යන මහත්වරු සහ අධ්‍යක්ෂ මණ්ඩල සාමාජිකයෝ සාකච්ඡාවට එක්ව සිටියහ.

ජනාධිපති ගෝඨාභය රාජපක්ෂ මැතිතුමා අනුරාධපුර වෙහෙරබැන්ද කුටිය සහ තන්තිරිමලේ රජමහා විහාරස්ථානවල ආගමික වතාවත්හි නිරත වෙයි.

ශිලා ලේඛන සංග්‍රහයට අනුව ක්‍රි.ව 5 වැනි සහ 6 වැනි ශතවර්ෂවල පළමුවැනි භාතිය රජතුමා විසින් වෙහෙරබැන්ද කුටිය රජමහා විහාරය ඉදිකර තිබේ.

අද (04) පෙරවරුවේ විහාරස්ථානය වෙත ගිය ජනාධිපතිතුමා විහාරාධිපති පූජ්‍ය වැලිසර සිරි ජිනවංස තිස්ස හිමි බැහැ දැක ආශිර්වාද ලබා ගත්තේය.

සිල් සමාදන්ව සිටි උපාසක උපාසිකාවන් සහ ප්‍රදේශවාසීන් සමග ද ජනාධිපතිතුමා සුහද පිළිසඳරක නිරත විය.

ජනාධිපතිතුමා අද පස්වරුවේ අනුරාධපුරය ඓතිහාසික තන්තිරිමලය පුදබිමේ ආගමික වතාවත්වල නිරත විය.

අෂ්ඨඵල බෝධීන් වහන්සේ උදෙසා  ඖෂධ පූජාව ද ජනාධිපතිතුමා අතින් සිදු කෙරිණ.

ජනාධිපතිතුමාගේ පදවි ප්‍රාප්තියට ආශිර්වාද  කළ විහාරාධිපති පූජ්‍ය තන්තිරිමලේ චන්දරතන හිමියෝ කොවිඩ් 19 පාලනයට රාජපක්ෂ මැතිතුමා කළ විශිෂ්ට මෙහෙවර ගැන ප්‍රසාදය පළ කළහ.

පොළොන්නරුව ගල් විහාරයේ සැතපෙන බුද්ධ ප්‍රතිමාවට සමාන තන්තිරිමලේ ඓතිහාසික ශෛලමය සැතපෙන බුද්ධ ප්‍රතිමාව ජනාධිපතිතුමාගේ නිරීක්ෂණයට ලක් විය.

විහාරස්ථානයේ තැන්පත් කර ඇති සර්වඥ ධාතුන්වහන්සේ ජනතා වන්දනා මානයට විවෘත කළ ජනාධිපතිතුමා ධාතුන් වහන්සේ වැඳ ආශිර්වාද ලබා ගත්තේය.

දිවයිනේ විවිධ ප්‍රදේශවලින් පැමිණි සැදැහැවතුන් සහ ප්‍රදේශවාසීන් සමග ද  ජනාධිපතිතුමා සුහද කතා බහක නිරත විය.

ජනාධිපති ගෝඨාභය රාජපක්ෂ මැතිතුමා අනුරාධපුර, මිහින්තලයේ ඓතිහාසික මිහිඳු ආරණ්‍ය සේනාසනය වැඳ ආශිර්වාද ලබා ගනී.

ක්‍රි.ව 5 -6 සිය වස්වලට අයත් මිහිදු ආරණ්‍ය සේනාසනය සියම් මහා නිකායේ ශ්‍රී රෝහණ පාර්ශ්වයේ වනවාසී සංඝ සභාවේ මූලස්ථානය වේ.

අද (04) පෙරවරුවේ මිහිදු ආරණ්‍ය සේනාසනය වෙත පැමිණි ජනාධිපතිතුමා සේනාසනාධිපති,  සියම් මහා නිකායේ ශ්‍රී රෝහණ පාර්ශ්වයේ වනවාසී සංඝ සභාවේ ප්‍රධාන සංඝනායක පූජ්‍ය ගල්පාත සුමන හිමියන් බැහැ දැක සුවදුක් විමසමින් කෙටි පිළිසඳරක නිරත විය.

ජනාධිපතිතුමා විහාර මන්දිරය ද වැඳ පුදාගත්තේය.

ජනාධිපතිතුමාට සහ ඇසළ පොහෝ දිනය නිමිත්තෙන් සිල් සමාදන්ව සිටි උපාසික උපාසිකාවන්ට සෙත් පතා ජය පරිත් සජ්ජායනාවක් ද සිදු කෙරිණි.

සුරාබදු දෙපාර්තමේන්තුව දීර්ඝ කාලයක සිට මුහුණ පා සිටින වෘත්තීය ගැටළුවලට කඩිනම් විසඳුම් දීමට ජනාධිපති ගෝඨාභය රාජපක්ෂ මැතිතුමාගේ අවධානය යොමු වෙයි.

සේවා ව්‍යවස්ථාව කඩිනම් කිරීමට, බඳවා ගැනීම් සහ උසස්විම් සම්බන්ධ ගැටළුවලට ආයතන මට්ටමින් විසඳුම් සෙවීමට ජනාධිපතිතුමා උපදෙස් දුන්නේය.

ශ්‍රී ලංකා සුරාබදු දෙපාර්තමේන්තුවේ වෘත්තීය සමිති එකමුතුව සමග (29) ජනාධිපති කාර්යාලයේ පැවති සාකච්ඡාවේදී ගැටළු විමර්ශනය කොට පිළියම් හඳුනා ගැනීම සිදු විය.

උපාධිධාරී රැකියා වැඩසටහන යටතේ තෝරාගනු ලබන අභ්‍යාසලාභීන් දෙපාර්තමේන්තුවේ පවතින පුරප්පාඩු සඳහා යොමු කිරීම කෙරෙහි ද ජනාධිපතිතුමා අවධානය යොමු කළේ ය.

දීර්ඝ කාලයක සිට එකම තනතුරේ සේවය කරන නිලධාරීන් සඳහා උසස්වීම් පටිපාටියක් හඳුන්වාදීම සහ රාජකාරී ඉටු කිරීමේදී භෞතික සම්පත්වල ඌනතාවට පිළියම් සෙවීම ගැනද සාකච්ඡා කෙරිණ.
පහළ තනතුරු සදහා බඳවා ගැනීමේ දී නිපුණතාවක් නැති අඩු ආදායම්ලාභී පිරිසට අවස්ථාව හිමිවන අයුරින් ප්‍රතිපාදන සැකසීමට පියවර ගන්නැයි ද ජනාධිපතිතුමා අවධාරණය කළේය.

අමාත්‍ය ප්‍රසන්න රණතුංග, ජනාධිපති ලේකම් පී බී ජයසුන්දර, මුදල් අමාත්‍යාංශයේ ලේකම් එස්. ආර් ආටිගල, සුරා බදු කොමසාරිස් ඒ. බෝදරගම යන මහත්වරු ඇතුළු නිලධාරීහූ හා වෘත්තීය සමිති නියෝජිතයෝ සාකච්ඡාවට එක් ව සිටියහ.

රටේ සංවර්ධනයට සහ ජන ජීවිතය නැංවීමට ව්‍යාපෘති ක්‍රියාත්මක කිරීමේදි උතුර සහ දකුණ කියා වෙනසක් නැතැයි අග්‍රාමාත්‍ය මහින්ද රාජපක්ෂ මහතා පවසයි.

අග්‍රාමාත්‍යවරයා මේ බව සඳහන් කර සිටියේ අද ( 01) පෙරවරුවේ අරලියගහ මන්දිරයේදි දමිළ මාධ්‍යවේදින් හමු වූ අවස්ථාවේදිය.

උතුරු -නැගෙනහිර පළාත්වල 1977 වසරෙන් පසුව, 2005-2010 තම රජය පැවති සමයේදි දැවැන්ත සංවර්ධන ව්‍යාපෘති රැසක් ක්‍රියාත්මක කළ බවද සිහිපත් කළ අග්‍රාමාත්‍යවරයා එම පළාත්වල ජන ජීවිතය යහපත් තත්ත්වයට පත් කිරීමට සැලැස්මකින් යුතුව සිය ආණ්ඩුව කටයුතු කළ බවද සඳහන් කළේය. තම රජය සමයේ සිදු කළ සංවර්ධන ව්‍යාපෘති හැරුණුකොට පසුගිය යහපාලන රජය උතුරු-නැගෙනහිර ජනතාව වෙනුවෙන් කිසිදු සංවර්ධන ව්‍යාපෘතියක් ක්‍රියාත්මක කර නොමැති බවත් උතුරේ ජනතාව වෙනුවෙන් පෙනි සිටිනවා යැයි කියන දෙමළ ජාතික සන්ධානය පවා එම ජනතාවගේ සැබෑ ප්‍රශ්න වෙනුවට දේශපාලන වාසි ලබාගැනිමේ අරමුණින් පමණක් කටයුතු කළ බවත් මෙහිදී අග්‍රාමාත්‍යවරයා අවධාරණය කළේය.

එම ජනතාව මුහුණදෙන ප්‍රධාන ගැටළුවක් වන පානීය ජල ගැටළුව විසඳිම සඳහා තම රජය ප්‍රමුඛතාවය ලබාදෙන බවද සදහන් කළ අග්‍රාමාත්‍යවරයා වැඩිදුරටත් කියා සිටියේ මේ වන විටත් ඒ සඳහා සැලසුම් සකස් කර ඇති බවයි.

එමෙන්ම උතුරේ ජනතාවගේ සැබෑ ගැටළු පිළිබඳව රජය දැනුවත් කිරීම මාධ්‍යවේදින්ගේ වගකීමක් බවද අග්‍රාමාත්‍යවරයා මෙම හමුවේදි පෙන්වා දුන්නේය.

මෙම අවස්ථාවට අමාත්‍ය ධීවර හා ජලජ සම්පත් අමාත්‍ය ඩග්ලස් දේවානන්දා, උසස් අධ්‍යාපන,තාක්ෂණ සහ නවොත්පාදන අමාත්‍ය බන්දුල ගුණවර්ධන යන මහත්වරුන්ද සහභාගී වූහ.

 

ඉඩම් ලියාපදිංචියේ දි සිදුවන වංචා නතර කිරීමට සහ ලියාපදිංචි ක්‍රමවේදය වේගවත් කිරීමට ඉ-ඉඩම්  (විද්‍යුත් ක්‍රමය) ලියාපදිංචිය කඩිනම් කරන්නැයි ජනාධිපති ගෝඨාභය රාජපක්ෂ මැතිතුමා නිලධාරීන්ට උපදෙස් දෙයි.

වංචනික ඉඩම් ලියාපදිංචිය සහ ප්‍රමාදය හේතුවෙන් ජනතාව ගැටළු රැසකට මුහුණ පා සිටිති. ඉඩම් කොමසාරිස් දෙපාර්තමේන්තුව, ඉඩම් නිරවුල් කිරීමේ ආයතනය, මිනින්දෝරු දෙපාර්තමේන්තුව සහ රෙජිස්ට්‍රාර් ජෙනරාල් දෙපාර්තමේන්තුව ඒකාබද්ධව ඉ-ඉඩම් (විද්‍යුත් ක්‍රමය) ලියාපදිංචි වැඩසටහන  වේගවත් කිරීමේ අවශ්‍යතාව ජනාධිපතිතුමා පෙන්වා දෙයි.

ඉ-ඉඩම් (විද්‍යුත් ක්‍රමයට) ලියාපදිංචි කිරීමේ වැඩසටහන පිළිබඳව අද (30) පස්වරුවේ ජනාධිපති කාර්යාලයේ පැවති හමුවේ දී මේ බව සඳහන් කෙරිණ.

ඉඩම් ලියාපදිංචිය ආශ්‍රිත ආයතන අතර ඒකාබද්ධතාවක අවශ්‍යතාව ජනාධිපතිතුමා අවධාරණය කළේය. වනජීවි, වන සංරක්ෂණ සහ පරිසර අමාත්‍යාංශ ද ඒකාබද්ධව කමිටුවක් පත්කර වැඩසටහන කඩිනම් කරන්නැයි ජනාධිපතිතුමා උපදෙස් දුන්නේය.

ඉ-ඉඩම් (විද්‍යුත් ක්‍රමය) ලියාපදිංචිය යටතේ ඔප්පුව, පත්ඉරුව, පරිගණකගත කෙරේ. පත්ඉරු ලබාගැනීමේදී පරිගණක මුද්‍රණයක් නිකුත් කිරීමටත්, නීතිඥවරුන්ට,  නොතාරිස්වරුන්ට සහ ඕනෑම පුද්ගලයෙකුට හෝ රාජ්‍ය ආයතනයකට හෝ  online ක්‍රමයට ඉඩම් තොරතුරු ලබා ගැනීමටත් අවස්ථාව සැලසේ. එමගින් ඉඩම් වංචාවන්ට තිත තැබීමට හැකිවන බව නිලධාරීහු පෙන්වා දුන්හ.

ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනය (ICTA) සමග එක්ව අගෝස්තු මාසය වන විට වැඩසටහන ජනගත කිරීමට  අපේක්ෂා කෙරේ. මෙලෙස ඉ-ඉඩම් (විද්‍යුත් ක්‍රමය) යටතේ ලියාපදිංචි කෙරෙන ඉඩම් වෙනුවෙන් ඉලෙක්ට්‍රොනික පාස් පොතක් නිකුත් කිරීමට ද සැලසුම් කර තිබේ.

රාජ්‍ය පරිපාලන අමාත්‍යාංශයේ ලේකම් ජේ.ජේ.රත්නසිරි, ඉඩම් අමාත්‍යාංශයේ ලේකම් ආර්.ඒ.ඒ.කේ. රණවක, රෙජිස්ට්‍රාර් ජනරාල් එන්.සී. විතාන, ඉඩම් කොමසාරිස් ජනරාල් ආර්.එම්. සී.එම්. හේරත්, ඉඩම් හිමිකම් නිරවුල් කිරීමේ කොමසාරිස් ජෙනරාල් පී.එම්.එච්. ප්‍රියදර්ශනී, මැණුම්පති ඒ.එල්.එස්.සී. පෙරේරා, ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනය (ICTA) සභාපති ජයන්ත ද සිල්වා යන මහත්ම මහත්මීහු ඇතුළු නිලධාරීහු සාකච්ඡාවට එක්ව සිටියහ.

2018 වසරේ සිට පාඩු ලබන ලංකා ලුණු පෞද්ගලික සමාගමට ලාභ පෙන්වීම සඳහා ජනාධිපති ගෝඨාභය රාජපක්ෂ මැතිතුමා වසරක කාලයක් දෙයි.

ලංකා ලුණු පෞද්ගලික සමාගමේ 2016 වසරේ ලාභය රුපියල් කෝටි 70කි. 2017 වසර වන විට ලාභය රුපියල් කෝටි 32 දක්වා අඩු විය. 2018 වසරේ ලක්ෂ 28ක් සහ 2019 වසරේ එක්කෝටි අනූ එක් ලක්ෂයක ලෙස ආයතනය පාඩු ලැබීය.

තෙවසරක් ඇතුළත වූ පාඩුවට හේතු සොයා ලාභ ඉපැයීම වත්මන් සභාපතිවරයා ඇතුළු අධ්‍යක්ෂ මණ්ඩලය සතු වගකීමක් බව ජනාධිපතිතුමා අවධාරණය කරයි.

ලංකා ලුණු පෞද්ගලික සමාගමේ වත්මන් තත්වය විමසුමට (24) පස්වරුවේ ජනාධිපති කාර්යාලයේ පැවති සාකච්ඡාවේදී ජනාධිපතිතුමා මේ බව සඳහන් කළේය.

1998 වසරේදි පෞද්ගලීකරණයට සැලසුම් කර තිබූ ලුණු සංස්ථාව මහින්ද රාජපක්ෂ මැතිතුමා කම්කරු අමාත්‍යවරයා ලෙස මැදිහත්වී සේවා නියුක්තයන්ගේ භාර අරමුදල (ETF ආයතනය) යටතට ගනු ලැබීය. පසුව සමාගමේ ප්‍රාග්ධනයෙන් 90% ක් ETF ආයතනය ද, 10% ක් සේවකයන් ද හිමි කරගත් ලංකා ලුණු පෞද්ගලික සමාගම ඉතා ඉහළ ලාභ ලබන ආයතනයක් බවට පත් විය.

ETF ආයතනය යටතේ ඇති සමාගමක් පාඩු ලැබීම කිසිසේත්ම සිදු නොවිය යුතු බව අවධාරණය කළ ජනාධිපතිතුමා ඉදිරි මාස 06ට සහ වසරකට සැලසුම් වෙන වෙනම සකස් කර ලාභ ඉපැයීමට පියවර ගන්නැයි පැවසීය.

ලුණු ආනයනය මින් ඉදිරියට සම්පූර්ණයෙන්ම නතර කළයුතුය. 2015ට පෙර මෙන් සිය නිෂ්පාදන අපනයනය කරන ආයතනයක් බවට ලංකා ලුණු සමාගම පත්කළ යුතු බව ජනාධිපතිතුමා අවධාරණය කළේය. පාඩු ලැබීම ගැන නිදහසට කරුණු දක්වනවා වෙනුවට ලාභ ඉපැයීමට ඇති උපායමාර්ග තමාට අවශ්‍ය බව ජනාධිපතිතුමා කියා සිටියේය.

ජනාධිපති ලේකම් පි.බී. ජයසුන්දර, සේවා නියුක්තයන්ගේ භාර අරමුදලේ සභාපති ශ්‍රියාන් ද සිල්වා විජයරත්න, ලංකා ලුණු පෞද්ගලික සමාගමේ සභාපති නිශාන්ත සඳබරණ යන මහත්වරු සහ අධ්‍යක්ෂ මණ්ඩල සාමාජිකයෝ සාකච්ඡාවට එක්ව සිටියහ.

කොරෝනා නිවාඩුව අවසන, යළි රට සාමාන්‍යකරණය වෙමින් පවතී. එහෙත් නතරවූ සාහිත්‍ය උත්සව පොත් ජනගත කිරීම් ගී ජනගත කිරීම් චිත්‍රපට ප්‍රදර්ශනය කිරීම් ආදියට තවමත් විරාමයකි. ඒ විරාමය අවසන් කෙරුණේ ඉකුත් අඟහරුවාදා පස්වරුවේ කොළඹ පදනම් ආයතනයේදීය. ඒ පත්තරේ සිංදුව ජනගත කරමිනි.

ද නිව්ස්පේපර් චිත්‍රපටය නිෂ්පාදනය කළේ ඇමැති ආචාර්ය බන්දුල ගුණවර්ධන එච්.ඩී. පේමසිරි සහ රවින්ද්‍ර ගුරුගේ එකතුවෙනි.

පත්තරේ යනු ‘ද නිව්ස්පේපර්ස්’ය. සරත් කොතලාවල සහ කුමාර තිරිමාදුර අධ්‍යක්ෂණය කළ ද නිව්ස්පේපර් චිත්‍රපටයෙහි තිබෙන එකම ගීතය ගායනා කළේ ආචාර්ය නන්දා මාලිනියයි. මහාචාර්ය සුනිල් ආරියරත්න පද රචනා කළ මේ ගීතයේ සංගීත නිර්මාණය ගයාත්‍රි කේමදාසගෙනි.

පත්තරේ සිංදුව ඇතුළත් ඩී.වී.ඩී. තැටි මහැදුරු සුනිලුන්ට, නන්දා මාලිනියට, ගයාත්‍රිට සරත්ට කුමාරට පිළිගැන්වූ මොහොතට බන්දුල ගුණවර්ධන මෙන්ම එච්. ඩී. පේමසිරිද එක්වුහ.

දොලේ දියත් නැති විය නුඹ නාවන්නට

තනේ කිරිත් හිඟ විය තොල් පොඟවන්නට

කටු සර බෝග තිබුණේ බඩ පුරවන්නට

සමාවෙන්න පුතුනේ නුඹ වැදුවාට

ඉනික්බිති නන්දා මාලිනියගේ හඬ නැගුණේ ශ්‍රාවකයා කඳුලක තනිකරමිනි.

ඡායාරූපය: නිලාන් මලිගැස්පර්

පිරිවෙන් සහ දහම් පාසල් අධ්‍යාපනයේ උන්නතිය සඳහා රාජ්‍ය අනුග්‍රාහකත්වය දීමට කටයුතු සම්පාදනය කරන බව ජනාධිපති ගෝඨාභය රාජපක්ෂ මැතිතුමා පවසයි.

ඉංග්‍රීසි භාෂාව සහ තොරතුරු තාක්ෂණ දැනුම පිරිවෙන් විෂය මාලාව තුළ සෙසු විෂයන්ට සමගාමීව හැදෑරීමේ අවස්ථාව සලසා දිය යුතු බවද ජනාධිපතිතුමා කියා සිටී.

සෑම මසකම තෙවන සතියේ පැවැත්වෙන බෞද්ධ උපදේශක සභාව තෙවන වරටත් (18) පස්වරුවේ ජනාධිපති කාර්යාලයේ දී රැස් වූ අවස්ථාවේ දී ජනාධිපතිතුමා මේ බව සඳහන් කළේය.

බෞද්ධ උපදේශක සභාව දුන් උපදෙස් ක්‍රියාත්මක කෙරෙමින් පවතින බව සඳහන් කළ මල්වතු පාර්ශ්වයේ අනුනායක අතිපූජ්‍ය නියංගොඩ විජිතසිරි නා හිමියෝ සුරක්ෂිත රටක්, නීතිගරුක සහ විනයගරු සමාජයක් උදෙසා සහ පුරාවිද්‍යා ස්ථාන සුරැකීමට කාර්ය සාධක බලකා දෙකක් පත් කිරීම සම්බන්ධව මහා සංඝරත්නයේ ප්‍රසංසාව පළ කළහ.

එම බලකා අර්ථදායී ලෙස අපේක්ෂිත අරමුණු ඉටුකරනු ඇතැයි විශ්වාස කරන බවද උන්වහන්සේ පැවසූහ. රටේ සමස්ත කාර්යභාරය අතට ගෙන ජනාධිපතිතුමා ගෙනයන වැඩපිළිවෙළට ජන සමාජයෙන් ලැබෙන ප්‍රසාදය බෞද්ධ උපදේශක සභාවට ද ගෞරවයක් බව මහා සංඝරත්නය පැවසූහ.

පිරිවෙන් සහ දහම් පාසල් අධ්‍යාපනය ක්ෂේත්‍රයේ පවතින ගැටලු සහ වත්මන් තත්වය බෞද්ධ උපදේශක සභාව ජනාධිපතිතුමාට සහ අධ්‍යාපන බලධාරීන්ට පෙන්වා දුන්හ.

පිරිවෙන් විෂය නිර්දේශයේ සහ විෂය මාලාවේ සංශෝධනයක් විය යුතු බවද උන්වහන්සේ අවධාරණය කළහ. සිංහල, පාලි, සංස්කෘත, දෙමළ සහ ඉංග්‍රීසි භාෂා මෙන්ම තොරතුරු තාක්ෂණය පිරිවෙන් විෂය නිර්දේශය තුළ සමගාමී විෂයන් ලෙස ඉගැන්වීමේ අවශ්‍යතාව දීර්ඝ වශයෙන් සාකච්ඡාවට ලක් කෙරිණ.

දහම් පාසල් අධ්‍යාපනයට, සිසු පරපුර වැඩි වශයෙන් යොමු කළ යුතු බවත්, දහම් පාසල් ගුරුවරුන්ට විධිමත් පුහුණුවක් දිය යුතු බවත් සංඝරත්නය පැවසූහ.

ඉරිදා දිනවල පෙ.ව 6.00 සිට ප.ව 2.00 දක්වාත්, පොහොය දිනයන්හි උපකාරක පංති පැවැත්වීම සම්පූර්ණයෙන්ම නතර කර ආගමික පසුබිම කෙරෙහි දරුවන් යොමු කිරීම යහපත් සමාජයක් උදෙසා කළයුතු මහගු කාර්යයක් බව උන්වහන්සේ පෙන්වා දුන්හ.

තරුණ දරුවන් මත්ද්‍රව්‍ය භාවිතය ඇතුළු අපචාරවලට නැඹුරුවීමේ ප්‍රවනතාවක් පවතින බව පෙන්වා දුන් මහා සංඝරත්නය ප.ව 5.00 න් පසු උපකාරක පංති පැවැත්වීම නතර කර දෙමාපියන් ඇසුරෙහි දරුවන් රඳවා ගැනීමට අවස්ථාව සැලසිය යුතු බව පැවසූහ.

පිරිවෙන් කටයුතු පිළිබඳ ජනාධිපති කාර්ය සාධක බලකායක් පිහිටුවීමේ වැදගත්කම ද සාකච්ඡාවට ලක් කෙරිණ. උපාධිධාරී භික්ෂුන් වහන්සේ සහ ධර්මාචාර්ය විභාගය සමත් සිල් මාතාවන් පාසල්වල බුද්ධධර්මය විෂය ඉගැන්වීමට යොදාගතයුතු බව ද මහා සංඝරත්නය පෙන්වා දුන්හ.

පිරිවෙන් සදහා ධර්මාචාර්ය අධ්‍යක්ෂ තනතුරක් ඇති කිරීම, පිරිවෙන් ශිෂ්‍යාධාරය ඉහළ නැංවීම, දහම් පාසල් ඉහළ ශ්‍රේණිවල පෙළ පොත්වල ඇති බෞද්ධ සංස්කෘතිය, පාලි සහ අභිධර්ම ගැඹුරු කොටස් ඉවත් කර සිසුන් දහම් දැනුම ලබාගැනීමට පොළඹවන කොටස් ඇතුළත් කිරීම යන කරුණු දීර්ඝ ලෙස සාකච්ඡාවට ලක් විය.

මල්වතු පාර්ශ්වයේ අනුනායක හිමිවරුන් වන අතිපූජ්‍ය නියංගොඩ විජිතසිරි, අතිපූජ්‍ය දිඹුල්කුඹුරේ විමලධම්ම, අස්ගිරි පාර්ශ්වයේ අනුනායක හිමිවරුන් වන අතිපූජ්‍ය වෙඩරුවේ උපාලි, අතිපූජ්‍ය ආණමඩුවේ ධම්මදස්සි , ශ්‍රී ලංකා අමරපුර මහා සංඝ සභාවේ සභාපති අතිපූජ්‍ය ගංතුනේ අස්සජි, ශ්‍රී ලංකා රාමඤ්ඤ මහානිකායේ අනුනායක අතිපූජ්‍ය වරාගොඩ ප්‍රේමරතන, ශ්‍රී ලංකා අමරපුර මහනිකායේ ශ්‍රී ධර්ම රක්ෂිත පාර්ශ්වයේ මහානායක අතිපූජ්‍ය තිරිකුණාමලයේ ආනන්ද යන නා හිමිවරු ඇතුළු ත්‍රෛනිකායික මහානායක, අනුනායක ස්වාමින් වහන්සේ ප්‍රධාන බෞද්ධ උපදේශක සභාව නියෝජනය කරන මහා සංඝරත්නය, ජනාධිපති ලේකම් පී.බී. ජයසුන්දර, ජනාධිපති ප්‍රධාන උපදේශක ලලිත් වීරතුංග, බුද්ධශාසන අමාත්‍යාංශයේ ලේකම් එම්.කේ.බී. හරිස්චන්ද්‍ර, උසස් අධ්‍යාපන අමාත්‍යාංශයේ ලේකම් අනුර දිසානායක, අධ්‍යාපන අමාත්‍යාංශයේ ලේකම් එන්.එච්.එම්. චිත්‍රානන්ද යන මහත්වරු ඇතුළු නිලධාරීහු සාකච්ඡාවට එක්ව සිටියහ.

නවතම පුවත්

මහින්ද රාජපක්ෂ අභිනව රජයේ නව අගමැති ලෙස දිවුරුම් දෙයි

අගෝ 09, 2020
මහමැතිවරණයෙන් වාර්තා ගත මනාප ඡන්ද සංඛ්‍යාවක් හිමිකර ගත් අග්‍රාමාත්‍ය මහින්ද රාජපක්ෂ මහතා…

ජනපති ජනතාවට ස්තූති පුදකරයි

අගෝ 06, 2020
කොවිඩ් -19 අවදානම ලෝකයෙන් පහව ගොස් නොමැති අවස්ථාවක මහ මැතිවරණයක් පැවැත්වූ දකුණු ආසියාවේ…

පෙරහර සමාප්ති සන්දේශය ජනපතිට බාර දෙයි

අගෝ 05, 2020
හෙළයේ විචිත්‍රවත් මහා කලා මංගල්‍යය ලෙසින් දෙස් විදෙස් ජනතාව අතර ප්‍රචලිත මහනුවර ඇසළ පෙරහර…

අගමැති දළදා සමිඳු වැඳ පුදා ගනී

අගෝ 04, 2020
අගමැති මහින්ද රාජපක්ෂ මහතා ඊයේ (03) පෙරවරුවේ මහනුවර ඓතිහාසික ශ්‍රී දළදා මාලිගාවට පැමිණ…

ජනපති මැදිහත්වීමෙන් මැදිරිගිරිය සිරිමාවෝ බණ්ඩාරනායක ප්‍රාථමික විද්‍යාලයට ජංගම පුස්තකාලයක්

අගෝ 03, 2020
ශිෂ්‍යාවක කළ ඉල්ලීම ඉටු කරමින් මැදිරිගිරිය සිරිමාවෝ බණ්ඩාරනායක ප්‍රාථමික විද්‍යාලයට ජංගම…

නවෝත්පාදන නිපැයුම්වලට වෙළෙඳපොළ සකස් කරනවා

ජූලි 28, 2020
නවෝත්පාදන හා තාක්ෂණ විෂයේ දියුණුවට අවශ්‍ය අධ්‍යයන අවස්ථා මෙන්ම එම නිපැයුම්වලට වෙළෙඳපොළ…

කිලෝග්‍රෑමයකට රුපියල් 50 ක සහතික මිල යටතේ මෙවර යල කන්නයේ වී අස්වනු මිලදී ගැනේ...

ජූලි 27, 2020
2020 යල කන්නයේ වී මිල දී ගැනීමේ රජයේ වැඩසටහන යටයේ වී කිලෝ ග්‍රෑම් එකක් රුපියල් 50 ක රජයේ…

ඇසළ පෙරහරට සමගාමීව සමරු මුද්දර සහ මුල්දින කවරයක් නිකුත් කෙරේ..

ජූලි 25, 2020
කන්ද උඩරට ඇසළ මහා පෙරහරට සමගාමීව ශ්‍රී ලංකා තැපැල් දෙපාර්තමේතුව විසින් අද(25) සමරු මුද්දර…

මාතලේ අධිතාක්ෂණික සරසවිය කඩිනමින් ඉදි කරනවා

ජූලි 22, 2020
ජාතික විශ්වවිද්‍යාල නොමැති දිස්ත්‍රික්ක සඳහා ඉදි කෙරෙන අධිතාක්ෂණික විශ්වවිද්‍යාල දහයෙන්…

කොවිඩ් වසංගතයෙන් ජනතාව රැක ගැනීමේ අභියෝගය ජයගන්නා බවට ජනපතිගෙන් සහතිකයක්

ජූලි 14, 2020
වත්මන් ව්‍යාප්තිය පාලනයට විධිමත් සැලසුම් … ආසාදිතයන් සොයන පරීක්ෂණ අඛණ්ඩව … මත්ද්‍රව්‍ය…

logo20190228 1

163, ඇසිදිසි මැඳුර, කිරුළපන මාවත, පොල්හේන්ගොඩ, කොළඹ 05

011-2513 459, 011-2513 460,
011-2512 321, 011-2513 498

info@media.gov.lk
facebook
twitter

OPEN
logo