නවතම පුවත්

සුළු හා මධ්‍ය පරිමාණ සහල් නිෂ්පාදකයන්ට අවශ්‍ය ණය පහසුකම් දීමට වහා පියවර ගන්නැයි අගමැති මහින්ද රාජපක්ෂ මහතා අදාළ බලධාරීන්ට උපදෙස් දුන්නේය.

සමස්ත ලංකා සුළු හා මධ්‍ය පරිමාණ සහල් නිෂ්පාදකයන්ගේ සංගමයේ නියෝජිතයන් සමඟ පාර්ලිමේන්තුවේදී කමිටු කාමර 02 පැවති සාකච්ඡාවකට එක්වෙමින් අගමැතිවරයා මෙසේ උපදෙස් දුන්නේය.

මහා පරිමාණ සහල් නිෂ්පාදකයන්ගේ ගැටලුවලට පෙර සුළු හා මධ්‍ය පරිමාණ සහල් නිෂ්පාදකයන්ගේ ගැටලු විසඳීමට පියවර ගන්නැයිද අගමැතිවරයා උපදෙස් දුන්නේය.

රටේ පවතින සහතික වී මිලට අනුව පෙබරවාරි 01 සිට මාස 06 කට යාවත්කාලීන වන ස්ථීර පාලන මිලක් ගැනීම ඇතුළු ඉල්ලීම් කිහිපයක් මුල් කර ගනිමින් මේ සාකච්ඡාව පැවැත්විණි.

මෙහිදී සුළු හා මධ්‍ය පරිමාණ වී මෝල් හිමියන්ට සහනදායී වශයෙන් ණය ගෙවා දැමීමට අවශ්‍ය පහසුකම් සැලසීම පිළිබඳ ද අවධානය යොමු කෙරිණි.

මේ අවස්ථාව සඳහා වෙළෙඳ ඇමැති ආචාර්ය බන්දුල ගුණවර්ධන, රාජ්‍ය ඇමැතිවරුන් වන ලසන්ත අලගියවන්න, ෂෙහාන් සේමසිංහ, ඉන්දික අනුරුද්ධ, අජිත් නිවාඩ් කබ්රාල්, ශෂීන්ද්‍ර රාජපක්ෂ, මුදල් අමාත්‍යාංශයේ ලේකම් එස්. ආර්. ආටිගල, අගමැති අතිරේක ලේකම් නීතිඥ චමින්ද කුලරත්න මහත්වරුන්, බැංකු, සතොස හා වී අලෙවි මණ්ඩලයේ නිලධාරීන් ඇතුළු රාජ්‍ය ආයතන ප්‍රධානීහු හා සුළු හා මධ්‍ය පරිමාණ සහල් නිෂ්පාදකයෝ ද එක්ව සිටියහ.

මහින්ද අලුත්ගෙදර

මහජන සුභ සිද්ධිය අරමුණු කර ගනිමින්, පවත්නා නීති හා රෙගුලාසි සරල කිරීමට සාමාජිකයන් 18 දෙනෙකුගෙන් සමන්විත කොමිසමක් පත්කිරීමට ජනාධිපති ගෝඨාභය රාජපක්ෂ මහතා තීරණය කරයි.

හිටපු ජනාධිපති ලේකම් සහ ජනාධිපති ප්‍රධාන උපදේශක ලලිත් වීරතුංග සහ ජෝන් කීල්ස් සමූහයේ සභාපති ක්‍රිෂාන් බාලේන්ද්‍ර මහත්වරුන් කොමිසමේ සම සභාපතිත්වය හොබවන අතර කොමිසමේ ලේකම් ධූරයට විශ්‍රාමික අමාත්‍යාංශ ලේකම් ජී.එස්. විතානගේ මහතා පත්කර තිබේ.

ඊට අමතරව ඉඩම් කළමනාකරණ, රාජ්‍ය ව්‍යවසාය, ඉඩම් හා දේපළ සංවර්ධන රාජ්‍ය අමාත්‍යාංශයේ ලේකම් එස්.ඩි.ඒ.බී. බොරලැස්ස, විදුලි බල අංශයේ විශ්‍රාමික අමාත්‍යාංශ ලේකම් එම්.එම්.සී. ෆර්ඩිනැන්ඩු, අපනයන සංවර්ධන මණ්ඩලයේ සභාපති සුරේෂ් ද මෙල්, රාජ්‍ය මූල්‍ය දෙපාර්තමේන්තුවේ අධ්‍යක්ෂ ජනරාල් සී. වැලිගමගේ, රාජ්‍ය සේවා, පළාත් සභා හා පළාත් පාලන අමාත්‍යාංශයේ ආයතන අධ්‍යක්ෂ ජනරාල් චන්දන කුමාරසිංහ, සමාගම් නීති විශේෂඥ ආචාර්ය හර්ෂ කබ්රාල්, ජනාධිපති නීතිඥ නිහාල් ජයවර්ධන, ශ්‍රී ලංකා වරලත් ගණකාධිකාරී තිෂාන් සුබසිංහ, සන්කෙන් කන්ස්ට්‍රක්ෂන්ස් (පුද්ගලික) සමාගමේ ප්‍රධාන විධායක නිලධාරී රංජිත් ගුණතිලක, ශ්‍රී ලංකා ආයෝජන මණ්ඩලයේ විධායක අධ්‍යක්ෂිකා රේණුකා වීරකෝන්, මර්කන්ටයිල් ඉන්වෙස්ට්මන්ට්ස් ඇන්ඩ් ෆයිනෑන්ස්, පීඑල්සී අධ්‍යක්ෂ මණ්ඩල සාමාජික ජෙරාඩ් ඔන්ඩට්ච්චි, නේෂන්ස් ට්‍රස්ට් බැංකුවේ අධ්‍යක්ෂ (විධායක නොවන) අර්ජුන් ප්‍රනාන්දු, සුළු හා මධ්‍ය පරිමාණ ඉදිකිරීමේ අංශය එස්.පී. ලියනාරච්චි, ම්ලෙස්නා තේ කළමනාකරණ අධ්‍යක්ෂ ඇන්සලම් පෙරේරා, කර්මාන්ත මණ්ඩලයේ මහ ලේකම්/ ප්‍රධාන විධායක නිලධාරී නිශ්ශංක විජේරත්න සහ තීම් රිසෝට්ස් ඇන්ඩ් ස්පාස් සභාපති හා අධ්‍යක්ෂ ජනරාල් චන්ද්‍රා වික්‍රමසිංහ මහත්ම මහත්මීහු මේ කොමිසමේ සෙසු සාමාජිකයෝ වෙති.

 
 

ආයෝජන හා ඉදිකිරීම් ක්ෂේත්‍ර ප්‍රමුඛ සියලු ක්ෂේත්‍රවලට අදාළව දැනට නිකුත් කර ඇති චක්‍රලේඛ උපදෙස්, අවසර පත්‍ර හා බලපත්‍ර නිකුත් කිරීමේ ක්‍රමවේද සහ අනුමත කිරීමේ පටිපාටි, රාජ්‍ය මූල්‍ය හා බදු ආදායම් සම්බන්ධ සියලු නීති, රෙගුලාසි සහ ඒවා ඇති කිරීමට බලපෑ කරුණු කෙරෙහි ද අවධානය යොමු කරමින් පූර්ණ සමාලෝචනයට ලක් කිරීම ඇතුළු කාර්යය රැසක් මේ කොමිසමට පැවරී තිබෙන අතර විශාල ප්‍රමාණයක් චක්‍රලේඛ උපදෙස් නිකුත් කිරීම හා වරින්වර විවිධ නීති රෙගුලාසි බලාත්මක කිරීම හේතුවෙන් අධි නියාමනයක් ඇති වීම නිසා මූලික අරමුණෙන් බැහැරවීමක් සිදු වී ඇත්දැයි අධ්‍යයනය කිරීම, වඩාත් ඵලදායී නව නියාමන ක්‍රමවේද හඳුනා ගැනීමට ගෝලීය ප්‍රමිතීන්වල උක්ත නීති රෙගුලාසිවල අදාළ බව සහ ශ්‍රී ලංකාව තුළ ඒවායේ යෝග්‍යතාව ඇගයීම ද ඊට අයත් වෙයි.

ඊට අමතරව දැනට පවතින සංකීර්ණ හා අධි නියාමන නීති පද්ධති තුළ ඒවා බලාත්මක කිරීමට රජයටත් ඒ සඳහා අනුගත වීමට ජනතාවටත් දැරිය යුතු වන වියදම සහ උක්ත නීති රෙගුලාසි හේතුවෙන් දූෂණ හා අවිධිමත් භාවිතයන් නිර්මාණය වීමට ඇති හැකියාව තක්සේරු කිරීම, දැනට පවතින චක්‍රලේඛ, උපදෙස්, නීති, රෙගුලාසි සරල කළ හැකි ක්ෂේත්‍ර හඳුනා ගැනීම හා එසේ සරල කිරීමට හා නවීකරණයට අවශ්‍ය උපදෙස් නිකුත් කිරීම, ජාතික මට්ටමෙන් පළාත් සභා හා පළාත් පාලන ආයතන මට්ටමෙන් විවිධ අනුමත කිරීම්, අවසර දීම් හා බලපත්‍ර නිකුත් කිරීම් ක්‍රියාවලිය හේතුවෙන් ක්‍රියාවලි ද්වීකරණය සිදු වී තිබේදැයි අධ්‍යයනය කොට එවැනි ක්‍රියාවලි සුදුසු පරිදි සංශෝධනය කිරීම ද එම කොමිසම වෙත පැවරේ.

මේ කාර්යයන් ඉටුකිරීමට කොමිසමට දින 90ක කාලයක් දී ඇති අතර සිය කාර්යභාරය ක්‍රියාත්මක කිරීම සඳහා අවශ්‍යතාව පරිදි අදාළ ආයතන වෙත උපදෙස් දීමේ බලය කොමිසම සතු බවද ජනාධිපති මාධ්‍ය අංශය පවසයි.

මහින්ද අලුත්ගෙදර

E

ශ්‍රී ලංකා රක්ෂණ සංස්ථාවේ නාගරාජ ශාක්‍ය පුත්‍ර ඥාති වෛද්‍ය රක්ෂණ ක්‍රමය හඳුන්වාදීම අද (08) දින ගරු අග්‍රාමාත්‍ය මහින්ද රාජපක්ෂ මහතාගේ ප්‍රධානත්වයෙන් අරලියගහ මන්දිරයේ දී පැවැත්විණි.නව රක්ෂණ ක්‍රමය හඳුන්වා දෙමින් ගරු අග්‍රාමාත්‍යතුමා මහා සංඝරත්නයට රක්ෂණ සහතික පත් පිළිගැන්නුවේය.
 
සංඝයා වහන්සේලාගේ මව, පියා, සහෝදර සහෝදරියන් රජයේ රෝහලක හෝ පෞද්ගලික රෝහලක රෝහල්ගත වීමකදී දිනකට රුපියල් 1000  බැඟින් රු.15000 ක උපරිමයක් සහ රෝහල්ගතව සිදු කරනු ලබන වෛද්‍ය පරීක්ෂණයකදී හෝ ඖෂධ සඳහා රුපියල් 25000 ක උපරිමයක් දක්වා ගෙවීම මෙම රක්ෂණ ක්‍රමයට අයත්ය.
 
රුපියල් 2000 ක මුදලක් පමණක් මේ සඳහා වාර්ෂිකව ගෙවිය යුතු අතර, එය පුණ්‍ය කටයුත්තකදී සැදැහැවතුන්ට පූජා කිරීමේ  හැකියාව ඇත. මෙම රක්ෂණ අවස්ථාව ඉදිරියේදී අන්‍යාගමික පූජකතුමන්ලා වෙනුවෙන් ද ක්‍රියාත්මක කිරීමට බලාපොරොත්තු වන බව ද මෙහිදී අවධාරණය විය.
 
එමෙන්ම සසුනට දරුවන් පූජා කළ, නිවසක් නොමැති දෙමාපියන් සඳහා නිවසක් ලබා දීමේ “ මිහිඳු නිවාස” යෝජනා ක්‍රමයට  නිවාස අමාත්‍යවරයා වශයෙන් අග්‍රාමාත්‍යතුමා මේ වන විටත් මුදල් වෙන් කර ඇති බව ප්‍රකාශ කළ කොළඹ නව කෝරළයේ හා නව තොටමුණේ ප්‍රධාන සංඝනායක අතිපූජ්‍ය දිවියාගහ යසස්සී නාහිමියෝ  බුද්ධශාසනය වෙනුවෙන් ඉටුකරන මෙම සේවාව පිළිබඳව ගරු අග්‍රාමාත්‍යතුමාට ප්‍රණාමය පුද කළහ.
 
ඉඩමක් හිමි එහෙත් නිවසක් ඉදි කර ගැනීමට නොහැකි සංඝයා වහන්සේලාගේ දෙමාපියන් වෙනුවෙන් එක් නිවසක් සඳහා රුපියල් ලක්ෂ 06 බැඟින් නිවාස 2000 ඉදි කිරීම සඳහා අග්‍රාමාත්‍යතුමාගේ උපදෙස් පරිදි මේවනවිටත් මුදල් ප්‍රතිපාදන වෙන්කර තිබේ.
 
මෙම අවස්ථාව සඳහා කොළඹ නව කෝරළයේ හා නව තොටමුණේ ප්‍රධාන සංඝනායක අතිපූජ්‍ය දිවියාගහ යසස්සී නාහිමි, නාරාහේන්පිට අභයාරාමාධිපති, බස්නාහිර පළාත් ප්‍රධාන සංඝනායක පූජ්‍ය මුරුත්තෙට්ටුවේ ආනන්ද නාහිමි, බෙල්ලන්විල රජමහා විහාරයේ විහාරාධිපති අති පූජ්‍ය බෙල්ලන්විල ධම්මරතන නාහිමි, කැලණිය රජ මහා විහාරාධිපති මහාචාර්ය කොල්ලූපිටියේ මහින්ද සංඝරක්ඛිත නාහිමි, විද්‍යෝදය මහා පරිවේණාධිපති බලංගොඩ සෝභිත නාහිමි, මහාචාර්ය ඉදුරාගානේ ධම්මරතන නාහිමි ඇතුලු මහා සංඝ රත්නය වැඩම කළ වදාළහ.
 
රාජ්‍ය අමාත්‍ය විදුර වික්‍රමනායක, අග්‍රාමාත්‍ය ලේකම් ගාමිණී සෙනරත්, අග්‍රාමාත්‍ය කාර්යය මණ්ඩල ප්‍රධානී යෝෂිත රාජපක්ෂ, බුද්ධශාසන ආගමික කටයුතු හා සංස්කෘතික කටයුතු අමාත්‍යංශ ලේකම් මහාචාර්ය කපිල ගුණවර්ධන, බෞද්ධ කටයුතු කොමසාරිස් සුනන්ද කාරිප්පෙරුම, ශ්‍රී ලංකා රක්ෂණ සංස්ථාවේ සභාපති ජගත් වැල්ලවත්ත ඇතුලු මහත්වරු රැසක්  ද මෙම අවස්ථාව සඳහා එක්ව
සිටියහ.

2021 අයවැය යෝජනාවෙන් අපි විශාල මුදලක් රටේ දේශීය කර්මාන්ත සංවර්ධනයට වෙන් කරලා තිබෙනවා. මේ අයවැයෙන් පොදු ජනතාවට මොනවත් නෑ කියලා අපේ විවේචකයෝ බොරු චෝදනා කළා. නමුත් මතක තියාගන්න අපි කොයි වෙලාවෙවත් නිකන් සල්ලි බෙදන ව්‍යාපෘති පටන් ගත්තේ නැහැ. ඡන්ද බලාගෙන හදපු අකුරක්, කොමාවක් මේ අයවැයේ නැහැ. අපි ඒ ප්‍රෝඩාව ජනතාවට කරන්නේ නෑ කියලා හැමදාම කියලා තියෙනවා. මේ අයවැය වෙන් වෙන්නේ ගමේ ගොවියා, ධීවරයා, කර්මාන්තකරුවා ගොඩනඟන්න. ඒ නිසා මේ අයවැය යෝජනාවලිය ක්‍රියාත්මක කරන්න විදේශීය විශේෂඥයෝ අපිට අවශ්‍ය නැහැ. විදේශීය උපදේශකයෝ අපිට අවශ්‍ය නැහැ. විදේශීය මූල්‍ය විශේෂඥයෝ අපිට අවශ්‍ය නැහැ. ඒ නිසා මේ අයවැය යෝජනා ක්‍රියාත්මක කරන්න ඉන්නේ අපේම රජයේ නිලධාරීන්. මේ අයවැය යෝජනා පොළොවට ගෙනියන්න ඉන්නේ ඔබ.

මේක අමාරු වැඩක්. මේ අමාරු වැඩේ කරන්න වෙන්නේ ඔබට. ඔබ තමයි මෙතෙක් එය කළේ. ඒ අපේ රටේ ගමේ ජනතාවත් එක්ක. ඒ ජනතාව ව්‍යවසායකත්ව දැනුම ලබපු, විශාල පුහුණුවක් ලබපු, ආයතනවල වැඩ කරලා හුරුව තියෙන අය නොවෙයි. ඒ අයට උදව් කරන්න ඔබට සිදු වෙනවා. නිලධාරීන් සහ ජනතාව අතර තියෙන පරතරය අවම කරගන්න වෙනවා. රජයේ නිලධාරීන් වන ඔබත් ආණ්ඩුවේ අදහස තේරුම් ගන්න ඕන. 'ගම සමඟ පිළිසඳරක්' වැඩසටහන කරගෙන යනකොට අපිට තේරෙනවා ජනතාව ඉල්ලන දේ. පොතේ තියෙන දේවලුයි, පරිපාලන රෙගුලාසිවල මුදල් රෙගුලාසිවල තියෙන දේවලුයි ජනතාව ඉල්ලන දේවලුයි අතර විශාල පරතරයක් තිබෙනවා. ඒවා ජනතාවගේ අවශ්‍යතාවලට ගැළපෙන ආකාරයට හසුරුවාගෙන වැඩ කරන අභියෝගය තමයි ඔබට තිබෙන්නේ. දැනට පවතින නීති හා රෙගුලාසි බොහෝමයක් යල්පැන ගිහින්.

බොහොම දෙනෙක් හිතනවා අපි රූලෙන් පිට, නීතියෙන් පිට වැඩ කළොත් අමාරුවේ වැටෙනවා කියලා. යහපාලන ආණ්ඩුව මේ රටට කළ ලොකුම ද්‍රෝහිකම තමයි මේ රටේ රජයේ නිලධාරීන් ජනතාවට සේවය කරන නිසා බන්ධනාගාර ගත කරපු එක. මට මතකයි ජාතික ආපදා අවස්ථාවක ගංවතුර ආධාර බෙදුවා කියලා හිටපු හමුදාපතිවරයා එෆ්. සී. අයි. ඩී. එකට ගෙනල්ලා ප්‍රශ්න කළා. සිල් රෙදි බෙදා දුන්නා කියලා ජනාධිපති ලේකම්වත් විදුලි සංදේශ නියාමන කොමිසමේ අධ්‍යක්ෂ ජනරාල් අනූෂ පැල්පිටවත් බන්ධනාගාර ගත කළා. අපි මේ තත්ත්වය තේරුම් අරගෙන තියෙන්නේ. නමුත් ඔබ තේරුම් ගන්න සද්භාවයෙන් ක්‍රියා කරපු කිසිම නිලධාරියෙකුට දඬුවමක් දෙන්න බැරි බවත් ඒ සඳහා අවශ්‍ය ව්‍යවස්ථානුකූල ආරක්ෂාව අපි ලබාදෙන බවත්. සිල් රෙදි නඩුවෙන් නිදහස් වුණ ලලිත් වීරතුංග හිටපු ජනාධිපති ලේකම්වරයා ජනතාවට කිව්වේ මොකක්ද? සද්භාවයෙන් ජනතාවට සේවය කරන කිසිම වෙලාවක වරදින්නේ නැහැ කියන එක එතුමා ප්‍රකාශ කළා. ඒ නිසා පවතින නීති රීතිවලින් ඔබ්බට ගිහිල්ලා මේ මුදල් ජනතා සුබසිද්ධිය වෙනුවෙන් පරිහරණය කරන විදිහ ගැන, පළපුරුද්දක් තියෙන ඔබ දන්නවා ඇති.

අමාත්‍යංශවල ඇමැතිවරයාත්, ලේකම්වරුත්, නිලධාරිනුත් අතර හොඳ සම්බන්ධයක් තියාගන්න ඕන. අපි විශාල තරුණ මන්ත්‍රීවරු පිරිසකට අවස්ථාව ලබාදීලා තිබෙනවා. රාජ්‍ය ඇමතිවරුන් වශයෙන් කටයුතු කරන්න. අපේ ඇමැතිවරු වැඩ කරන විට අමාත්‍යංශ ලේකම්වරු, දිස්ත්‍රික් ලේකම්වරුත් එක්ක සුහද සම්බන්ධතාවයක් පවත්වාගෙන යන්න ඕන. මේ අය ජනතාවගෙන් වගේම අමාත්‍යංශ නිලධාරීන්ගෙනුත් ඉගෙන ගන්න ඕන.

මට මතකයි 1978 ළාබාලතම මන්ත්‍රීවරයා වශයෙන් තේරුණ වෙලාවේ සිරිමාවෝ බණ්ඩාරනායක මැතිනිය දිස්ත්‍රික් සම්බන්ධිකරණ සංවර්ධන කමිටුවේ නියෝජිතයා හැටියට මාව යවනකොට කරපු දේ. එදා එතුමිය දුරකථනය අරගෙන හම්බන්තොට දිසාපතිවරයාට කතා කරලා කිව්වා මහින්දව එවනවා, අපේ ඉන්න ළාබාලතම මන්ත්‍රීවරයා, එතුමා බලාගෙන එතුමා එක්ක වැඩ කරන්න කියලා. ළාබාලතම මන්ත්‍රීවරයා වුණාට, පාර්ලිමේන්තුව නියෝජනය කරාට සිරිමාවෝ මැතිනිය කිව්වේ නිලධාරීන්ගෙන් ඉගෙන ගන්න කියලා. මම මේ තරුණ මන්ත්‍රීවරුන්ටත් ඇමැතිවරු වෙච්ච තරුණ මන්ත්‍රීවරුන්ටත් කියන්නේ ඒ කාරණයයි. ඒ වගේම අපි ආණ්ඩුවක් කරගෙන යන විට රජයේ නිලධාරීන්ම පමණක් නොවෙයි විශේෂඥ දැනුම තියෙන, කාර්යක්ෂමතාව තියෙන, තරුණකම තියෙන නොයෙක් පාර්ශ්ව සම්බන්ධ කරගන්න ඕන. අපි කවුරුත් සාමූහිකව වැඩකරන්න ඕන. මතක තියාගන්න ආණ්ඩු යනවා එනවා. නමුත් රාජ්‍ය පවතිනවා. ඒක තමයි සත්‍යය.

කොරෝනා වසංගතය එක්තරා ආකාරයකට රාජ්‍ය සේවයේ ශක්තිය පරීක්ෂා කළ අවස්ථාවක් බව මම කියන්න ඕන. කොරෝනා වසංගතයට මුහුණ දෙන විට අපිට සිද්ධ වුණා උපරිම වශයෙන් නවීන තාක්ෂණය භාවිතා කරමින් වැඩ කරන්න. ඒ තාක්ෂණය භාවිතා කරලා ජනතාවට සේවය කරන්න. විශාලම අභියෝගය වුණේ අධ්‍යාපනයට. ගුරුවරයාට ගෙදර ඉඳන් තමන්ගේ දූ දරුවන්ට උගන්වන්න සිදු වුණා. මම කියන්න සතුටුයි මොන දුෂ්කරතාවය ආවත් මේ රටේ ගුරුවරු ඒ අභියෝගය භාරගත්තා. ගෙදර ඉඳගෙන දරුවන්ව ගෙවල්වල තියාගෙන ඉගැන්වූවා. ඒක රජයේ සේවයේ අය කරපු විශාල මෙහෙවරක්. පෞද්ගලික අංශයේ අය වගේම රජයේ සේවකයිනුත් ඔන්ලයින් ක්‍රමය යටතේ හොඳින් වැඩ කළා. අපේ රටේ රාජ්‍ය සේවය ජනතාව වෙනුවෙන් සිය යුතුකම නිවැරදිව ඉටුකළා.

මේකෙන් පේනවා රජයේ නිලධාරීන්ට ඕනම මොහොතක අලුත් දෙයක් වැලඳගන්න, නම්‍යශීලිව වැඩ කරන්න පුළුවන් කියලා. සමස්ත රාජ්‍ය සේවයම මේකෙන් පාඩමක් ඉගෙන ගන්න ඕනෑ. නූතන තාක්ෂණය රජයේ ආයතනවලට වේගයෙන් අනුගත කරන්න අවශ්‍යයි. ඒක අමාත්‍යංශ ලේකම්වරුන් වන ඔබගේ වගකීමක්. මේ ලැබුණු අවස්ථාවෙන් ප්‍රයෝජනය ගන්න ඕනෑ. සෑමවිටම නූතන තාක්ෂණය යොදාගෙන ජනතාව අතරට යන්න තමුන්නාන්සේලා උත්සාහ කරන්න ඕනෑ. අපිට ඕනෑ කාර්යක්ෂම රටක්. දශක ගණනාවක් මඟහැරුණු වැඩ රාශියක් අපිට තියෙනවා ඉටු කරන්න. ඔබ දන්නවා ශ්‍රේෂ්ඨාධිකරණයට අලුතෙන්ම විනිසුරුවරුන් විසිදෙනෙක් පසුගියදා ජනාධිපතිතුමා පත් කළා. ඒ පත්කළේ මේ රටේ අධිකරණයේ ගොඩගැහිලා තියෙන විශාල නඩු ප්‍රමාණයක් ඉක්මනින් විසඳන්න. රටට යුක්තිය ඉටු කරන්න. ඒ යුක්තිය සියලු රාජ්‍ය ආයතනවලින් ඉටු කරන්න ඕන කියන කාරණය මම මතක් කරනවා. අපිට ඕනෑ බැනුම් අහන්නේ නැති රාජ්‍ය සේවයක්. අපිට ඕනෑ රාජ්‍ය වගේම ආණ්ඩුවත් ආණ්ඩුව වගේම රාජ්‍යයත් වගකීමක් ඇතුව ජනතාවට සේවය කරන තැනට ගේන්න. අපි බලයට පත් වුණ සෑම අවස්ථාවකම ජනතාව අපේක්ෂා කළ වගකීම් අපි ඉටුකළා. අපි යුද්ධය අවසන් කළා. ආපස්සට ගියපු ආර්ථිකය හා සංවර්ධනය ගොඩනැඟීම වෙනුවෙන් කටයුතු කළා. ඒ සෑම අවස්ථාවකදීම රාජ්‍ය සේවය අපිට උදව් කළා. ඉදිරියටත් මේ රට ගොඩනැඟීමේදී තමුන්නාන්සේලාගේ උපරිම සහය අපි බලාපොරොත්තු වෙනවා.

ආර්ථික පුනර්ජීවනය සහ දරිද්‍රතාව තුරන් කිරීම සඳහා වන ජනාධිපති කාර්ය සාධක බළකායේ සභාපති බැසිල් රාජපක්ෂ, මුදල් අමාත්‍යාංශ ලේකම් එස්. ආර්. ආටිගල මහත්වරු ද මෙහිදී අදහස් දැක්වූහ. කැබිනට් ඇමැතිවරු, රාජ්‍ය සහ නියෝජ්‍ය ඇමැතිවරු, අමාත්‍යාංශ ලේකම්වරු, දිස්ත්‍රික් ලේකම්වරුන්, ප්‍රාදේශීය ලේකම්වරු ඇතුළු පිරිසක් ද මේ අවස්ථාවට එක්ව සිටියහ.

සද් භාවයෙන් ජනතාවට සේවය කරපු කිසිම රාජ්‍ය නිලධාරියෙකුට දඬුවමක් දෙන්න බැරි ව්‍යවස්ථානුකූල ආරක්ෂාව ලබාදීමට බලාපොරොත්තුවන බව අග්‍රාමාත්‍ය මහින්ද රාජපක්ෂ මහතා අද (07) අරලියගහ මන්දිරයේ ප්‍රධාන ශාලාවේ දී පැවැසීය.
 
ගම සමඟ පිළිසඳර - වැඩ සමඟ යළි ගමට ජාතික වැඩසටහනේ රාජ්‍ය නිලධාරින් දැනුවත් කිරීමේ වැඩසටහනට එක්වෙමින් අග්‍රාමාත්‍ය මහින්ද රාජපක්ෂ මහතා මේ බව අවධාරණය කළේය.
 
අග්‍රාමාත්‍යතුමා කළ සම්පූර්ණ කතාව මෙසේය,
 
2021 අයවැය යෝජනාවලියෙන් අපි විශාල මුදලක් රටේ දේශීය කර්මාන්ත සංවර්ධනයට වෙන් කරලා තිබෙනවා. මේ අයවැයෙන් පොදු ජනතාවට මොනවත් නෑ කියලා අපේ විවේචකයෝ අපිට චෝදනා කළා. නමුත් මතක තියාගන්න අපි කොයි වෙලාවකවත් නිකන් සල්ලි බෙදන ව්‍යාපෘති පටන්ගත්තේ නෑ ඉතිහාසයේ. ඡන්ද බලාගෙන හදපු අකුරක්, කොමාවක් මේ අයවැය ලේඛනයේ නෑ. අපි ඒ ප්‍රෝඩාව ජනතාවට කරන්නේ නෑ කියලා අපි හැමදාම කියලා තියෙනවා. අපි කරන්නෙත් නෑ. මේ අයවැය වෙන් වෙන්නේ ගමේ ගොවියා, ධීවරයා, කර්මාන්තකරුවා ගොඩනගන්න. ඒ නිසා  මේ අයවැය යෝජනාවලිය ක්‍රියාත්මක කරන්න විදේශීය විශේෂඥයෝ අපට අවශ්‍ය නැහැ, විදේශීය උපදේශකයෝ අපිට අවශ්‍ය නැහැ, විදේශීය මූල්‍ය විශේෂඥයෝ අපිට අවශ්‍ය නැහැ. ඒ නිසා මේ අයවැය යෝජනා ක්‍රියාත්මක කරන්න ඉන්නේ අපේම රජයේ නිලධාරීන්. මේ අයවැය යෝජනා පොළොවට ගේන්න ඉන්නේ තමුන්නාන්සේලා. ගෙනියන්න ඉන්නේ.
 
මිත්‍රවරුනි ,
 
මේක අමාරු වැඩක් බව අපි දන්නවා. හැබැයි ඒ අමාරු වැඩේ කරන්න වෙන්නේ ඔබට. ඔබ තමයි මෙතෙක් කරෙත්. ඒ අපේ රටේ ගමේ ජනතාවත් එක්ක එකතු වෙලා. ඒ ජනතාව ව්‍යවසායකත්ව දැනුම ලබපු, විශාල පුහුණුවක් ලබපු, ආයතන වල වැඩ කරලා හුරුව තියෙන අය නොවෙයි. ඒ අයට තමුන්නාන්සේලාට උදව් කරන්න සිදු වෙනවා. නිලධාරීන් සහ ජනතාව අතර තියෙන පරතරය අවම කරගන්න වෙනවා. රජයේ නිලධාරීන් වන තමුන්නාන්සේලා ආණ්ඩුවේ අදහස තේරුම් ගන්න ඕන.
 
"ගම සමඟ පිළිසඳරක්" වැඩසටහන කරගෙන යනකොට අපිට තේරෙනවා ජනතාව ඉල්ලන දේ. පොතේ තියෙන දේවලුයි, පරිපාලන රෙගුලාසිවල (AR), මුදල් රෙගුලාසිවල (FR) තියෙන දේවලුයි ජනතාව ඉල්ලන දේවලුයි අතර විශාල පරතරයක් තිබෙනවා. ඒවා ජනතාවගේ අවශ්‍යතා වලට ගැළපෙන ආකාරයට හසුරුවාගෙන වැඩ කරන අභියෝගය තමයි ඔබට තිබෙන්නේ. දැනට පවතින නීති හා රෙගුලාසි බොහොමයක් යල් පැන ගිහින්.
 
මිත්‍රවරුනි,
 
බොහොම දෙනෙක් හිතනවා අපි රූලෙන් පිට, නීතියෙන් පිට වැඩ කළොත් අමාරුවේ වැටෙනවා කියලා.මොකද යහපාලන ආණ්ඩුව මේ රටට කළ ලොකුම ද්‍රෝහිකම තමයි මේ රටේ රජයේ නිලධාරීන් ජනතාවට සේවය කරපු නිසා බන්ධනාගාර ගත කරපු එක. මට මතකයි ජාතික ආපදා අවස්ථාවක ගංවතුර ආධාර බෙදුවා කියලා හිටපු හමුදාපතිවරයාව එෆ්.සී.අයි.ඩී එකට ගෙනල්ලා ප්‍රශ්න කළා. සිල් රෙදි බෙදා දුන්නා කියලා ජනාධිපති ලේකම්වත්, විදුලි සංදේශ නියාමන කොමිසමේ අධ්‍යක්ෂ ජනරාල් අනූෂ පැල්පිටවත් බන්ධනාගාර ගත කළා කියලා ඔබ දන්නවා. අපි මේ තත්ත්වය තේරුම් අරගෙන තියෙන්නේ. හැබැයි අපි මේකට පිළියමකුත් යොදනවා. සද්භාවයෙන් ක්‍රියා කරපු කිසිම නිලධාරියෙකුට දඬුවමක් දෙන්න බැරි බවත් ඒ සඳහා අවශ්‍ය ව්‍යවස්ථානුකූල ආරක්ෂාව ලබා දෙන්න අපි බලාපොරොත්තු වෙනවා. සිල් රෙදි නඩුවෙන් නිදහස් වුණ ලලිත් වීරතුංග, හිටපු ජනාධිපති ලේකම්වරයා ජනතාවට කිව්වේ මොකක්ද? සද්භාවයෙන් ජනතාවට සේවය කරන කිසිම වෙලාවක වරදින්නේ නැහැ කියන එක. ඒ නිසා පවතින නීති රීති වලින් ඔබ්බට ගිහිල්ලා මේ මුදල් ජනතා සුබසිද්ධිය වෙනුවෙන් පරිහරණය කරන විදිහ ගැන, පළපුරුද්දක් තියෙන තමුන්නාන්සේලා දන්නවා ඇති.
 
අමාත්‍යංශවල ඇමතිවරයාත්, ලේකම්වරුත්, නිලධාරිනුත් අතර හොඳ සම්බන්ධයක් තියාගන්න ඕන. අපි විශාල තරුණ මන්ත්‍රීවරු පිරිසකට අවස්ථාව ලබාදීලා තිබෙනවා රාජ්‍ය ඇමතිවරුන් වශයෙන් කටයුතු කරන්න. අපේ ඇමතිවරු වැඩකරන විට අමාත්‍යංශ ලේකම්වරු, දිස්ත්‍රික් ලේකම්වරුත් එක්ක සුහඳ සම්බන්ධතාවයක් පවත්වාගෙන යන්න ඕන බව ඔවුන් දන්නවා. මේ අය ජනතාවගෙන් වගේම අමාත්‍යංශ නිලධාරින්ගෙනුත් ඉගෙන ගන්න ඕන.
 
මට මතකයි 1970 එදා මන්ත්‍රීවරයෙක් වශයෙන් තේරුණ වෙලාවේ සිරිමාවෝ බණ්ඩාරනායක මැතිණිය දිස්ත්‍රික් සම්බන්ධීකරණ සංවර්ධන කමිටුවේ නියෝජිතයා හැටියට මාව පත් කොට යැව්වා. එදා එතුමිය හම්බන්තොට දිසාපතිවරයාට කතා කරලා කිව්වා මහින්දව එවනවා, මහින්දව බලා ගන්න. දිසාපතිට කියනවා මන්ත්‍රීවරයව බලා ගන්න කියලා. ඒ එදා බණ්ඩාරනායක මැතිණිය වැඩ කරපු හැටි.  ලාබාලතම මන්ත්‍රීවරයා වුණාට පාර්ලිමේන්තුව නියෝජනය කරාට සිරිමාවෝ මැතිණිය කිව්වේ ගිහිල්ලා නිලධාරීන්ගෙන් ඉගෙන ගන්න කියලා. මේ තරුණ මන්ත්‍රීවරුන්ටත්, ඇමතිවරු වෙච්ච තරුණ මන්ත්‍රීවරුන්ටත් මම කියන්නේ ඒ කාරණයයි. හොඳට මතක තියා ගන්න.
 
ඒ වගේම අපි ආණ්ඩුවක් කරගෙන යන විට රජයේ නිලධාරීන්ම පමණක් නොවෙයි, විශේෂඥ දැනුම තියෙන, කාර්යක්ෂමතාව තියෙන, තරුණකම තියෙන නොයෙක් පාර්ශව සම්බන්ධ කරගන්න ඕන. අපි කවුරුත් සාමූහිකව වැඩකරන්න ඕන. මතක තියාගන්න ආණ්ඩු යනවා එනවා. එනවා යනවා. නමුත් රාජ්‍ය පවතිනවා. ඒක තමයි සත්‍යය.
 
කොරෝනා වසංගතය එක්තරා ආකාරයකට රාජ්‍ය සේවයේ ශක්තිය පරීක්ෂා කළ අවස්ථාවක් බව මම කියන්න ඕන. කොරෝනා වසංගතයට මුහුණ දෙන විට අපිට සිද්ධ වුණා උපරිම වශයෙන් නවීන තාක්ෂණය භාවිතා කරමින් වැඩ කරන්න. කරමින් වැඩ කරන්න. ඒ තාක්ෂණය භාවිතා කරලා ජනතාවට සේවය කරන්න. විශාලම අභියෝගය වුණේ අපිට අධ්‍යාපනයට. ගුරුවරයාට ගෙදර ඉඳන් තමන්ගේ  දූ දරුවන්ට උගන්වන්න සිදු වුණා කියාලා ඔබ දන්නවා. මම කියන්න සතුටුයි මොන දුෂ්කරතාවය ආවත් මේ රටේ ගුරුවරු  ඒ අභියෝගය භාර ගත්තා. ගෙදර ඉඳගෙන දරුවන්ව ගෙවල් වල තියාගෙන  ඉගැන්වූවා. උගන්වනවා. එක අතකින් ඒක රජයේ සේවයේ අය කරපු විශාල මෙහෙවරක්. පෞද්ගලික අංශයේ අය වගේම රජයේ සේවකයිනුත් ඔන්ලයින් ක්‍රමය යටතේ හොඳින් වැඩ කළා. අපේ රටේ රාජ්‍ය සේවය ජනතාව වෙනුවෙන් සිය යුතුකම නිවැරදිව ඉටුකළා. ඉටු කරලා තියෙනවා.
 
මේකෙන් පේනවා රජයේ නිලධාරීන්ට ඕනම මොහොතක අලුත් දෙයක් වැළඳගන්න නම්‍යශීලිව වැඩ කරන්න පුළුවන් කියලා. සමස්ත රාජ්‍ය සේවයම මේකෙන් පාඩමක් ඉගෙන ගන්න ඕනෑ. නූතන තාක්ෂණය රජයේ ආයතනවලට වේගයෙන් අනුගත කරගන්න ඕනෑ. ඒක අවශ්‍යයි කළ යුතුයි. ඒක අමාත්‍යංශ ලේකම්වරුන් වන ඔබගේ වගකීමක්. මේ ලැබුණු අවස්ථාවෙන් ප්‍රයෝජනය ගන්න ඕනෑ. සෑම විටම නූතන තාක්ෂණය  යොදාගෙන ජනතාව අතරට යන්න තමුන්නාන්සේලා උත්සහ කරන්න ඕනෑ. අපිට ඕනෑ කාර්යක්ෂම රටක්. දශක ගණනාවක් මඟහැරුණු වැඩ  රාශියක් අපිට තියෙනවා ඉටු කරන්න.
 
තමුන්නාන්සේලා දන්නවා ශ්‍රේෂ්ඨාධිකරණයට අලුතෙන්ම විනිසුරුවරුන් විසිදෙනෙක් ජනාධිපතිතුමා පත් කළා. ඒ පත් කළේ මේ රටේ අධිකරණයේ ගොඩගැහිලා තියෙන නඩු විශාල නඩු ප්‍රමාණයක් ඉක්මණින් විසඳන්න. රටට යුක්තිය ඉටු කරන්න. ඒ යුක්තිය සියලු රාජ්‍ය ආයතන වලින් ඉටු කරන්න ඕන කියන කාරණය මම මතක් කරනවා. අපිට ඕනෑ බැනුම් අහන්නේ නැති රාජ්‍ය සේවයක්. අපිට ඕනෑ රාජ්‍ය වගේම ආණ්ඩුවත්, ආණ්ඩුව වගේම රාජ්‍යත් වගකීමක් ඇතුව ජනතාවට සේවය කරන තැනට ගේන්න.
 
අපි බලයට පත් වුණ සෑම අවස්ථාවකම ජනතාව අපේක්ෂා කළ වගකීම් අපි ඉටුකළා. අපි යුද්ධය අවසන් කළා. ආපස්සට ගියපු ආර්ථිකය හා සංවර්ධනය ගොඩනැගීම වෙනුවෙන් අපි කටයුතු කළා. ඒ සෑම අවස්ථාවකදීම රාජ්‍ය සේවය අපිට උදව් කළා. ඉදිරියටත් මේ රට ගොඩනැගීමේදි තමුන්නාන්සේලාගේ උපරිම සහය අපි බලාපොරොත්තු වෙනවා.
 
ඔබ සැමට තෙරුවන් සරණයි !
 
ජනපති-අගමැති ප්‍රධානත්වයෙන් පැවැති මෙම වැඩසටහනට ආර්ථික පුනර්ජීවනය හා දරිද්‍රතාවය තුරන් කිරීම සඳහා වන ජනාධිපති කාර්ය සාධක බලකායේ සභාපති බැසිල් රාජපක්ෂ මහතා ඇතුලු ආණ්ඩුවේ සියලුම කැබිනට් ඇමැතිවරුන් රාජ්‍ය අමාත්‍යවරුන් හා මන්ත්‍රීවරුන් සහ ජනාධිපති ලේකම්, අග්‍රාමාත්‍ය ලේකම් ඇතුළු අමාත්‍යංශ ලේකම්වරුන්, දිස්ත්‍රික් ලේකම්වරුන් ඇතුළු රජ්‍ය නිලධාරීන් රැසක් එක්ව සිටියහ.

පුවත්පත් මණ්ඩල පනත සංශෝධනය කිරීමේදී රජය ඒකපාර්ශ්වික ලෙස කටයුතු නොකර මාධ්‍ය ක්ෂේත්‍රයද සම්බන්ධ කර ගනිමින් පුළුල් සංවාදයක් සහිතව කටයුතු කරන බව ජනමාධ්‍ය ඇමැති කෙහෙලිය රඹුක්වැල්ල මහතා පාර්ලිමේන්තුවේදී ඊයේ (06) පැවසීය.

පුවත්පත් මණ්ඩල පනත ගෙන ආවේ 1973 දී වන අතර එදා සිට මේ දක්වා මාධ්‍ය ක්ෂේත‍්‍රය තුළ විශාල වෙනස්කම් සිදුව ඇති බවද ඇමැතිවරයා කීවේය.

එබැවින් පුවත්පත් මණ්ඩල පනත සංශෝධනය කළ යුතු අතර එහිදී මාධ්‍ය ක්ෂේත්‍රයද සම්බන්ධ කර ගනිමින් විනිවිද ලෙස කටයුතු කරන බවද ඇමැතිවරයා පැවසීය. ඇමැති කෙහෙළිය රඹුක්වැල්ල මහතා මේ බව සඳහන් කළේ පාර්ලිමේන්තු මන්ත්‍රී මනූෂ නානායක්කාර මහතා මතු කරන ලද ප්‍රශ්නයකට පිළිතුරු දෙමිනි.

 
 

ඕනෑම අයකුට ඕනෑම දෙයක් අශීලාචාර ලෙස ලිවීමට සහ ඊට එරෙහිව කරුණු ඉදිරිපත් කළ විට එය සිවිල් අධිකරණයට නියම කිරීමටත් සිවිල් උසාවිය ගන්නා කාලය මත ගනුදෙනු කිරීමේ හැකියාව නොමැති නිසා පුරවැසියාගේ අයිතිවාසිකම් ආරක්ෂා කළ යුතු බවත් ඇමැතිවරයා සඳහන් කළේය.

එමෙන්ම ඊටීඅයි අධ්‍යක්ෂ මණ්ඩලය අත්අඩංගුවට ගත්තේ නීතිපතිවරයාගේ උපදෙස් අනුව බව කී ඇමැතිවරයා ඊට ආණ්ඩුවේ මැදිහත්වීමක් නැතැයිද පැවසුවේය.

2014 වසරේදී රුපියල් මිලියන 847කට අධික ලාභයක් ලැබූ ස්වාධීන රූපවාහිනි ආයතනය පසුගිය රජය යටතේ 2016 වසර වනවිට පාඩු ලබන ආයතනයක් බවට පත්වූ බව ජනමාධ්‍ය ඇමැති කෙහෙළිය රඹුක්වැල්ල මහතා පාර්ලිමේන්තුවේදී ඊයේ (06) පැවසීය.

විශාල මුදලක් සහිත ස්ථාවර තැන්පතු පවා ස්වාධීන රූපවාහිනි ආයතනය සතුව තිබූ බවත් එම සියල්ල පසුගිය වසර පහ තුළ විනාශ කිරීමට කටයුතු කර ඇති බවත් ඇමැතිවරයා පැවසීය.

ඇමැති කෙහෙළිය රඹුක්වැල්ල මහතා මේ බව සඳහන් කළේ පාර්ලිමේන්තු මන්ත්‍රී හේෂා විතානගේ මහතා මතු කරන ලද ප්‍රශ්නයකට පිළිතුරු දෙමිනි.

එහිදී වැඩිදුරටත් අදහස් දැක්වූ ඇමැති කෙහෙළිය රඹුක්වැල්ල මහතා සඳහන් කළේ ස්වාධීන රූපවාහිනි සේවයේ 2010 වසරේ සමස්ත ලාභය මිලියන 495.32ක් වූ බවයි. එමෙන්ම 2011 වසරේදී සමස්ත ලාභය 682ක් වූ අතර 2012 වසරේ ලාභය මිලියන 789ක් බවද සඳහන් කළේය. එමෙන් 2014 වසරේදී එහි ලාභය මිලියන 847.224ක් වූ අතර 2015දී ලාභය මිලියන 638ක් වූ අතර 2016 සිට පාඩුව මිලියන 69ක් වී ඇති බවයි. 2017 පාඩුව මිලියන 287.25ක්ද 2018 වසරේ පාඩුව මිලියන 622ක් සහ 2019 වසරේ සමස්ත පාඩුව මිලියන 597ක් ලෙසද සිදුවී ඇති බව ඇමැතිවරයා පැවසීය. 2020 වසරේ පාඩුව මිලියන 320කි.

 
 

2015 සිට මේ දක්වා ස්වාධීන රූපවාහිනි සේවය සඳහා සේවක සංඛ්‍යාව 139 දෙනකු බඳවාගෙන ඇති බවත් ඔවුන්ගේ නම්, සභාගත කරන බවද ඇමැතිවරයා පැවසීය.

එමෙන්ම ස්වාධීන රූපවාහිනි සේවයේ සේවයේ යෙදී සිටියදී විවිධ අක්‍රමිකතා සඳහා චෝදනාවන්ට ලක්වූවන්ට රටේ පවතින නීතිය අනුව නීත්‍යනුකූලව කටයුතු කරන බවද ඇමැතිවරයා පැවසීය.

ස්වාධීන රූපවාහිනි සේවය 2015 අග වන විට මිලියන 800ක ලාභයක් ලැබූ ආයතනයක්වූ අතර එහි ස්ථිර තැන්පතු බිලියන 2.7ක් තිබූ බවත් සඳහන් කළ ඇමැතිවරයා මිලියන 800ක වියදමින් මැදිරි සංකීර්ණ 02ක් ඉදිකර ඇති අතර 2014 අග වන විට ලක්ෂයකට ආසන්න පාරිතෝෂික දීමනාවන් 694 දෙනකුට ලබාදීමට හැකිවූ බවද සඳහන් කළේය. මේ වන විට ස්වාධීන රූපවාහිනි සේවයේ ණය ප්‍රමාණය පමණක් මිලියනය 500ක් වේ. පසුගිය අවුරුදු 05 තුළම එහි කටයුතු පවත්වා ගැනීමට භාණ්ඩාගාරයෙන් මුදල් ගැනීමට සිදුව තිබේ. එම කාලය තුළ උපදේශකවරුන් 13 දෙනකු හා සභාපතිවරු 07 දෙනකු පත්කොට ඇති බවද ඇමැතිවරයා පැවසීය.

කොවිඩ් 19 වසංගතය ද සාර්ථකව පාලනය කරමින් 2020 වසරේ තුන්වැනි කාර්තුවේ දී සියයට 1.5 ක ධනාත්මක වර්ධනයක් අත්පත් කර ගැනීමට තම ආණ්ඩුවට හැකි වූ බව අගමැති මහින්ද රාජපක්ෂ මහතා පාර්ලිමේන්තුවේ දී ඊයේ (6) පැවසීය.

තවදුරටත් අගමැති මහින්ද රාජපක්ෂ මහතා මෙසේද පැවසීය.

පසුගිය වසර ආරම්භයේදී මෙරට ආර්ථිකය සියයට 4.5 ක් ඉක්මවා යන වර්ධනයක් වාර්තා වෙයි කියා අපේක්ෂා කළ ද 2015 වසරේ සිට 2019 වසර දක්වා ඇති වූ මන්දගාමී ආර්ථික වර්ධන තත්ත්වයත් , කොවිඩ් 19 වසංගත තත්ත්වයත් යටතේ ඇති වූ බලපෑම, හේතුවෙන් තෙවැනි කාර්තුවේ සිට සියයට 1.5ක ධනාත්මක වර්ධනයක් අත් පත් කර ගැනීමට හැකිවීම සුවිශේෂි තත්ත්වයක්.

මෙම කොවිඩ් 19 තත්ත්වය, දෙවැනි ලෝක සංග්‍රාමයෙන් පසු මෙතෙක් පැවති දරුණු තම ආර්ථික අවපාතයට හේතුවන බවට අපේක්ෂා කරනවා. 2020 වසරේ සමස්ත ලෝක ආර්ථිකය 4.4%කින් කඩා වැටෙනු ඇති බවට ජාත්‍යන්තර මූල්‍ය අරමුදල 2020 ඔක්තෝම්බර් මස “ලෝක ආර්ථික ඉදිරි දැක්ම” මඟින් පෙන්වා දී තිබෙනවා.

අගමැති මහින්ද රාජපක්ෂ මහතා මේ බව සඳහන් කෙළේ අගමැතිවරයාගෙන් විමසන ලද ප්‍රශ්න වටය යටතේ පාර්ලිමේන්තු මන්ත්‍රී පාඨලී චම්පික රණවකස්වර්ණා විජේකෝන්,

සන්ධ්‍යා කරුණාරත්නමහතා මතුකරන ලද ප්‍රශ්නයකට පිළිතුරු දෙමිනි.

 
 

2015 වසරේ සිට ශ්‍රී ලංකාවේ ආර්ථික වර්ධන වේගයේ අඛණ්ඩ අඩු වීමක් පෙන්වීම හේතුවෙන් ආර්ථීකයෙහි සමස්ත ඉල්ලුම ඉහළ නැංවීම තුළින් සිය ආණ්ඩුව ආර්ථිකය පුනර්ජීවනය කිරීම සඳහා ආර්ථීක සේවා ගාස්තු, ජාතිය ගොඩනැගීමේ බද්ද සහ ණය ආපසු ගෙවීමේ අය බද්ද ඉවත් කිරීමෙන් බදු ව්‍යුහය සරල කර තිබෙනවා.

එසේම, ආර්ථිකය නගාසිටුවීම සඳහා තම ආණ්ඩුව විසින් 2019 වසරේ අග භාගයේදී සහ 2020 වසර ආරම්භයේදී සරල, විනිවිදභාවයකින් යුතු සහ කාර්යක්ෂම බදු පද්ධතියක් රටට හඳුන්වා දී තිබෙනවා.

ඒ සඳහා පුද්ගල සහ සංස්ථාපිත ආදායම් බදු ව්‍යුහයන් සංශෝධනය කර ඇති බවද එකතු කළ අගය මත (වැට්) බදු අනුපාතිකය 15% සිට 8% දක්වා පහත දැමූවා.

2020 මාර්තු මස ඇතිවූ කොවිඩ් 19 වසංගතය හමුවේ බලපෑමට ලක් වූ ජීවනෝපාය හා ව්‍යාපාර සඳහා සහාය දෙමින් ඒවා අඛණ්ඩව පවත්වා ගැනීමට මෙන්ම සැපයුම් ජාල ක්‍රියාකාරිත්වය මනාව පවත්වා ගැනීම තහවුරු කරමින් වෛද්‍ය හා සෞඛ්‍ය අංශ ආවරණය වන පරිදි බහුවිධ ප්‍රවේශයකින් යුක්තව ඒ සඳහා පූර්ව ප්‍රතිචාර දක්වා තිබෙනවා.

මෙවැනි බහුවිධ හේතු නිසා රාජ්‍ය මූල්‍ය මෙහෙයුම් 2020 වසරේ ජනවාරි මස සිට සැප්තැම්බර් මස දක්වා කාලපරිච්ඡේදය තුළදී මිශ්‍ර කාර්ය සාධනයක් පෙන්නුම් කර තිබෙනවා.

එමෙන්ම, 2019 දෙසැම්බර් 20 සිට 2020 සැප්තැම්බර් දක්වා කාලය තුළ ආදායම් වියදම් ප්‍රධාන සංවර්ධන ක්ෂේත්‍ර වල ප්‍රතිපත්ති හා උපාය මාර්ග ක්‍රියාත්මක කිරීමටත්, තාක්ෂණික උපකරණ හා විශේෂිත අවශ්‍යතාවයන් මත පමණක් විදේශ ණය ලබා ගැනීමේ රජයේ ප්‍රතිපත්තිය සාක්ෂාත් කරමින් මෙම අයවැය හිඟය මූලිකව දේශීය වශයෙන් සිදු කරනවා.

දෙදින නිල සංචාරයක් සඳහා මෙරටට පැමිණ සිටින ඉන්දීය විදේශ සබඳතා ඇමැති ආචාර්ය එස්. ජයශංකර් මහතා, ජනාධිපති ගෝඨාභය රාජපක්ෂ මහතා ජනාධිපති ලේකම් කාර්යාලයේදී ඊයේ (06) හමු වූ අවස්ථාව.

 

ජාතික සංවර්ධන මාධ්‍ය මධ්‍යස්ථානය නමින් නව ඒකකයක් ස්ථාපිත කිරිමට රජය සූදානම් වෙයි. ජනමාධ්‍ය අමාත්‍ය කෙහෙලිය රඹුක්වැල්ල මහතා ඒ සදහා කැබිනට් මණ්ඩලයට ඉදිරිපත් කළ යෝජනාවට අනුමැතිය ලැබී තිබේ. රජයේ ප්‍රතිපත්ති ප්‍රකාශනය වන රට හදන සෞභාග්‍යයේ දැක්ම තුළ අන්තර්ගත රාජ්‍ය ප්‍රතිපත්ති හා සංවර්ධන ප්‍රයත්නයන් පිළිබඳව නිවැරදි තොරතුරු මහජනතාවට ලබාදිම මෙම ඒකකයෙන් අපේක්ෂා කෙරේ.

- තවත් අධ්‍යාපන ප්‍රකාශන 13ක් ඉංග්‍රීසි සහ සිංහල මාධ්‍යයෙන් ප්‍රකාශයට පත් කරනවා
- ව්‍යාපාරික කටයුතු සම්පූර්ණයෙන් අඩාළ වූ ආයතන කිහිපය අතරට අප ආයතනයත් එක් වුණා
- සෑම සේවක මහත්ම මහත්මියක්ම දුෂ්කර කාලපරිච්ඡේදයේදී රැකබලා ගත්තා
- කළමනාකාරිත්වය ලෙස අපට කළ හැකි හැම දෙයක්ම සිදු කළා

ලෝකයම පීඩාවට පත් කළ කොවිඩ් අභියෝග මධ්‍යයේ පත්තර මහගෙදර නව වසරේ ආර්ථික ඉලක්ක සපුරා ගැනීම අරමුණ බව සීමාසහිත එක්සත් ප්‍රවෘත්ති පත්‍ර සමාගමේ සභාපති ජනාධිපති නීතිඥ ඩබ්ලිව් දයාරත්න මහතා ඊයේ (04) පැවැසීය. 

2021 වසර ආරම්භයේදීම පසුගිය වසරේ ආරම්භ කරන ලද අධ්‍යාපන ප්‍රකාශනවලට අමතරව 3 වන පියවර වශයෙන් තවත් අධ්‍යාපන ප්‍රකාශන 13ක් ඉංග්‍රිසි හා සිංහල මාධ්‍යයෙන් ප්‍රකාශයට පත් කරන බව කියා සිටි සභාපතිවරයා හෙට (06) පෙරවරුවේ ජනමාධ්‍ය ඇමැති කෙහෙලිය රඹුක්වැල්ල මහතාගේ ප්‍රධානත්වයෙන් ඒවා එළි දක්වන බවද කියා සිටියේය.

මේ කාර්යයන් ඉටුකර ගැනීම සඳහා සියලු දෙනා අත්වැල් බැඳගත යුතු වන බවත් ඒ කාර්යය සාර්ථක කර ගැනීමට වෙහෙසී කටයුතු කරන ලෙස සභාපතිවරයා ලෙක්හවුස් සියලු සේවකයන්ගෙන් ඉල්ලා සිටියේය.

එමෙන්ම කොවිඩ් වසංගය සමඟ ගෙවුණු අවුරුද්ද කැප වී සේවය කළ සියලුම සේවක මහත්ම මහත්මීන්ට අධ්‍යක්ෂ මණ්ඩලය සහ කළමනාකාරිත්වයේ ස්තූතිය පුද කරන බවද කියා සිටියේය.

සභාපතිවරයා මේ බව කියා සිටියේ නව වසරේ ලෙක්හවුස් ආයතනයේ වැඩ ආරම්භ කිරීමෙනි.

එහිදි අදහස් දැක්වූ සභාපතිවරයා මෙසේද කියා සිටියේය.

“2019 දෙසැම්බර් 16 වැනි දින මා සභාපතිධූරය සඳහාත් තවත් අධ්‍යක්ෂවරුන් තිදෙනෙක්ද වැඩ බාරගන්නා ලදී. එම අවස්ථාව වන විට 2018 හා 2019 වසරවල ආයතනයේ ණය බර මිලියන 400කට අධික වූ අතර බැංකු වෙත ගෙවිය යුතු ණය මුදල මිලියන 600කට අධික විය. අප වැඩභාර ගැනීමෙන් පසු එම ණය බර අඩුකර ගැනීම සඳහා අනෙකුත් රාජ්‍ය ආයතන වෙත, අධ්‍යක්ෂ මණ්ඩලය කළමනාකාරිත්වයද සම්බන්ධ කොටගෙන එම ආයතන වෙත ගොස් අපවෙත වෙළද හා අනෙකුත් දැන්වීම් ලබාදෙන ලෙස ඉල්ලා සිටින ලද අතර එම ආයතන යහපත් ලෙස ප්‍රතිචාර දක්වමින් ඒ සඳහා එකඟතාවය පලකරන ලදී.

එහෙත් 2020 මාර්තු මස මුළු ලොවටම බලපෑ කොවිඩි වසංගතය, එම මාසයේ 16 වැනි දින සිට අප රටටද බලපෑ නිසා රාජ්‍ය හා පෞද්ගලික අංශ කඩාවැටීම ආරම්භ වූ අතර දින 52ක කාලයක් මුළු දිවයිනටම නොකඩවා ඇදිරිනීතිය ක්‍රියාත්මක වූ නිසා වසර 100කට අධික මුද්‍රණ ඉතිහාසයක් ඇති ලේක්හවුස් ආයතනයේ පුවත් පත් මුද්‍රණය ප්‍රථම වතාවට සම්පූර්ණයෙන් මාසයකට වැඩි කාලයක් නතර කරන ලදි. ඊ පුවත්පත පමණක් ජනතාව අතට පත් කරන ලද නමුත් ඉන් කිසිදු ආදායමක් ආයතනය වෙත නොලැබුණි. එමගින් ආයතනයට රුපියල් මිලියන 200 ආසන්න පාඩුවක් විද දරාගැනීමට සිදුවිය. එහෙත් ආයතනයේ සේවකයන් වෙනුවෙන් ගෙවිය යුතු වැටුප් හා දීමනා වලට අමතරව මාර්තු මස ගෙවිය යුතු බෝනස් මුදලද ගෙවන ලදී. 2020 අප්‍රේල් මස සිට මේ දක්වාම අධ්‍යක්ෂ මණ්ඩලයටද කළමනාකාරීත්වයටද ගෙවිය යුතු වැටුප් හා දීමනා සියයට 50 පමණක් සීමාකොට ගෙවන ලද අතර අප්‍රේල් මස වනවිට තිබූ දැඩි ආර්ථික දුෂ්කරතාවය සැලකිල්ලට ගෙන එම මාසය සඳහා අධ්‍යක්ෂ මණ්ඩලය වැටුප් ලබා නොගන්නා ලදී.

2020 මැයි මස නැවතත් පුවත්පත් මුද්‍රණය ආරම්භ කරන ලද අතර බලාපොරොත්තුවූ පුවත්පත් අලෙවිය හා අනෙකුත් දැන්වීම් ලැබීම් ශීඝ්‍රයෙන් පහත වැටුණේය.

2020 මාර්තු මාසයේදී අප විසින් අධ්‍යාපන ප්‍රකාශන පියවර කිහිපයකින් මුද්‍රණය කිරීම සදහා කටයුතු කරන ලද අතර එහි පළමු පියවර වශයෙන් මුතු අහුර 1,2,3,4 ද ඉන් පසුව O/L සිසුන් සඳහා සිත්මිණ පුවත්පතද , ශිෂ්‍යත්ව සිසුන් සඳහා විදුණැන පුවත් පතද දෙමළ පෙර පාසල් සිසුන් සඳහා කුට්ටි චුට්ටි පුවත් පතද එළි දක්වන ලද අතර ඒවා ඉතාමත්ම සාර්ථක ලෙස අලෙවි වෙද්දී නැවතත් ඔක්තෝම්බර් මාසයේ සිට බස්නාහිර පළාත ඇතුළු දිවයිනේ බොහෝ පළාත්වල පාසල් වසා දැමීම නිසා එම අලෙවියද දැනට පහත වැටි ඇත.

එමෙන්ම අප වැඩ භාර ගැනීමෙන් පසු මේ ආයතනයේ ඉන් පෙර වසර 4ක කාලයක්ම අවධානයට ලක් නොවූ වාණිජ මුද්‍රණ කටයුතු දෙපාර්තමේන්තුවෙහි කටයුතු නැවත ආරම්භ කරන ලද අතර ඉන් ප්‍රමාණවත් ආදායමක් උපයා ගැනීමට හැකිවිය. 2020 ජූනි මාසයේ පැවැති රාජ්‍ය පොසොන් උත්සවය සඳහා වැය වූ මුදල රුපියල් ලක්ෂ 21 වූ අතර අප විසින් ඒ සඳහා ආයතනයෙන් කිසිම මුදලක් වැය නොකොට අනුග්‍රාහයකයන් ගෙන් රුපියල් ලක්ෂ 25 ලබාගෙන ආයතනය වෙත රුපියල් ලක්ෂ 4 ක ලාභයක්ද ලබාදෙන ලදී. එමෙන්ම ඔක්තෝබර් මාසයේදී යාපනයේදී පවත්වන ලද තිනකරන් හා වාරමන්ජරී පුවත්පත් නැවත එළිදැක්වීමද කුට්ටි චුට්ටි පුවත් පත එළිදැක්වීමේ උත්සවයට වැයවූ මුදලට වඩා වැඩි මුදලක් අනුග්‍රාහකයන් ගෙන් ලබාගෙන ආයතනයට මුදලක් ඉතිරි කර දෙන ලදී. 2020 අප්‍රේල් මාසයේ සිටම කළමනාකාරීත්වයේ වැටුප් හා දීමනා සියයට 50 ට සිමාවුවද සේවකයන් වෙනුවෙන් ගෙවිය යුතු මූලික වැටුප, ජීවන වියදම් දීමනා, අතිකාල දීමනා, ආහාර දීමනා හා අවදානම් දීමනා අපවිසින් දෙසැම්බර් මස දක්වාම ගෙවන ලදී. 2020 ඔක්තෝම්බර් මාසයේ මේ වසංගතය ඉතාමත්ම දරුණු ලෙස බස්නාහිර පළාතට තදින්මද බොහෝ ප්‍රදේශ වලටද පැතිර යෑම නිසා අප පුවත් පත් අලෙවිය හා දැන්වීම් ආදායම ශී්‍ඝ්‍ර ලෙස නැවත පහත වැටුණු අතර එම තත්වය මේ දක්වාම පවතී. තවද ඔක්තෝබර් මාසයේ සිට මේ වසංගත තත්වය බරපතළ ලෙසම සෞඛ්‍යයට තර්ජනයක් වීම නිසා ආයතන සේවකයන්ගේ පැමිණිම උපරිම වශයෙන් සීමා කර ඔවුන්ට නිවෙස්වල සිට කටයුතු කිරීමට මෙන්ම අත්‍යවශ්‍ය අයව ගෙන්වා ගැනීමටද ඔවුනට අවශ්‍ය ප්‍රවාහන පහසුකම් මෙන්ම ආයතනයේ රදවා ගැනීමට සිදුවු සේවකයන්ගේ අවශ්‍යතාවයන් සොයා බැලීමටද සියලු සේවකයන් සඳහා මාස්ක් හා විෂබීජ හරණ දියර ලබාදීමද අපවිසින් සිදුකරන ලදී. තවද එම කොවිඩ් අවදානමට ලක්වූ අප ආයතනයේ සේවක සේවිකාවන් වෙත අවශ්‍ය පීසීආර් හා ඇන්ටිජන් පරීක්ෂණ ආයතනයේ වියදමින්ම සිදුකරන ලද අතර ඉදිරියේදී ඒ අයුරින්ම සිදුකරනු ලැබේ.

2020 අප්‍රේල් මස සිට ජූනි මාසය දක්වා සේවකයන් වෙත ගෙවිය යුතුව තිබූ ජීවන වියදම් දීමනාව ඇතුළු දැනට හිඟ දීමනා ගෙවීමට ආයතනයේ මුදල් නොමැති වීම නිසා ජනමාධ්‍ය ඇමැතිවරයා හමුවී අපවෙත නොවැම්බර් මස සිට පෙබරවාරි මාසය දක්වා මාස 4 රුපියල් මිලියන 50 බැගින් රජයේ දීමනාවත් වශයෙන් ලබාදෙන ලෙස ඉල්ලා සිටින ලද අතර එතුමා විසින් ඒ පිළිබඳව කැබිනට් පත්‍රිකාවක්ද ඉදිරිපත් කොට එම ඉල්ලීම කරන ලද නමුත් ඒ සම්බන්ධයෙන් කැබිනට් අනුමැතිය නොලැබුණද නැවත අප විසින් අග්‍රාමාත්‍යවරයා හමුවී කරුණු ඉදිරිපත් කිරීමෙන් පසුව ඒ සම්බන්ධයෙන් නැවතත් කැබිනට් පත්‍රිකාවක් මේ මස ඉදිරිපත් කර ඇති අතර එම දීමනාව ලබාගැනීම සඳහා අවශ්‍ය කටයුතු කරගෙන යනු ලැබේ.

එහෙත් ඉහතකී අප්‍රේල් මස සිට ජූනි මාසය දක්වා සේවකයන් වෙත ගෙවිය යුතු ජීවන වියදම් දීමනාව කෙසේ හෝ ඔවුන් වෙත ගෙවීම අත්‍යවශ්‍ය බව අධ්‍යක්ෂ මණ්ඩලය හා කළමනාකාරීත්වය අවධානයද එමෙන්ම ආයතනයේ වෘත්තීය සංගම් වලින්ද එකී මුදල කෙසේ හෝ ගෙවන මෙන් කරන ලද ඉල්ලීම් ද සලකා බලා එකී ජීවන වියදම් දීමනාව සදහා අවශ්‍ය මුදල් ප්‍රමාණය සේවක පාරිතෝෂික භාර අරමුදලෙන් ලබාගෙන ඔබලා වෙත මේ සතියේ සිකුරාදා වන විට ගෙවීමට කටයුතු යොදා ඇත.

එහෙත් එකී පාරිතෝෂික භාර අරමුදලින් ලබාගන්නා මුදල් රජයෙන් ප්‍රදානයන් ලැබුණු විගස නැවතත් එම අරමුදලට බැර කිරීමට අප කටයුතු කරනු ඇත. කොයි කරදර බාධක මැද්දේ වුවද සේවකයන් වෙත ගෙවීමට තිබූ සියලුම අත්‍යාවශ්‍ය ගෙවීම් මේ වන විට ගෙවීමට කටයුතු සිදුකර ඇත. අප රටේ මාධ්‍ය ආයතන ඇතුළු විවිධ ආයතන වලට සිදුවූ මරු පහරත් සමඟ බොහෝ ආයතන පවත්වා යා නොහැකි තැනට පත්වුණා. ඇතැම් ආයතන වසා දැමුවා. තවත් ආයතන ණය ගෙවා ගත නොහැකිව අසරණ භාවයට පත්වුණා ඇතැම් ආයතන සේවකයන් ඉවත් කරනු ලැබුවා. තවත් ආයතනවල සේවක අයිතීන් වැටුප් සියල්ල කපා හැරුණු ලැබුවා.බුරුතු පිටින් සේවකයන් රැකියා නොමැතිව අන්ත අසරණ තැනට පත්වුණා.එවැනි තත්වයක් තුළ කොරෝනා වසංගතයේ බලපෑම සෘජුවම එල්ලවුණු සහ එමගින් ව්‍යාපාරික කටයුතු සම්පූර්ණයෙන් අඩාල වූ ආයතන කිහිපය අතරට අප ආයතනයත් එක් වුණා. නමුත් අප සෑම සේවක මහත්ම මහත්මියක්ම එම දුෂ්කර කාලපරිච්ජේදයේදී රැකබලා ගත්තා. සෑම සේවකයකුටම හැකි පමණින් සිය පවුල, දූ දරුවන් රැක බලාගැනීමට ධෛර්යය ලබා දුන්නා. 

අපට මේ සදහා රජයෙන් හෝ බැංකු වලින් හෝ ආධාර උපකාරයක් එම අවස්ථාවේදී ලබාගැනීමට නොහැකි වුණා. නමුත් අප ආයතනයක් විදිහට කෙසේ හෝ ඉදිරියට යෑමට අධිෂ්ඨාන කරගත්තා. කළමානාකාරීත්වය ලෙස අපට කළහැකි හැම දෙයන්ම කළා. එහිදී ඔබ සියලු දෙනා දැක්වූ ඉවසිලිවන්ත සහයෝගය අප අගය කරනවා. මෙම වසර ආරම්භයේදීම පසුගිය වසරේ සිදුකරන ලද අධ්‍යාපන ප්‍රකාශනවලට අමතරව 3 වන පියවර වශයෙන් තවත් අධ්‍යාපන ප්‍රකාශන 13ක් ඉංග්‍රිසි හා සිංහල මාධ්‍යයන් ප්‍රකාශ කිරීමට කටයුතු සිදුකොට ඇති අතර මේ මස 6 වැනි දින පෙරවරුවේ ජනමාධ්‍ය අමැති කෙහෙලිය රඹුක්වැල්ල මහතා විසින් ආයතන පරිශ්‍රෙය්දී ඒවා එළිදක්වනු ලැබේ. මෙම වසරේ අපගේ ප්‍රධාන අරමුණ වන්නේ ඉහත කී ණය බර අඩුකරගෙන ආයතනය වෙත ලබාගත හැකි උපරිම ආදායම් ලබා ගැනීම සදහා අධ්‍යක්ෂ මණ්ඩලය හා කළමනාකාරීත්වය කටයුතු කිරීමයි. එම නිසා ඔබලාගේ යහපත සදහා එම කාර්යය සාර්ථක කරගැනීම සදහා සියලුම සේවක මහත්ම මහත්මීන් ගේ සහාය මා බලාපොරොත්තුවන අතර අප අධ්‍යක්ෂ මණ්ඩලය හා කළමනාකාරීත්වය ගැන විශ්වාසය තබා සහාය දෙන මෙන් ඉල්ලා සිටිමි.

එමෙන්ම මම මේ අවස්ථාවේ ඔබ සියලු දෙනා වෙත දන්වා සිටිනුයේ කෙතරම් ආර්ථික අපහසුකම් මැද වුවද සාමුහික ගිවිසුම් ප්‍රකාරව 2021 වසර සදහා සේවකයන් වෙත ලැබිය යුතු රුපියල්.2000 මුදල ජනවාරි මස සිට මූලික වැටුපට ලබා දෙබන ෙවයි. ගෙවීගිය වසර තුළ අප වෙත පැමිණි ඉතාමත් දුෂ්කර බාධක මැද්දේ නොසැලී එක්සත්ව හා එක් සිත්ව ආයතනයේ යහපත වෙනුවෙන් නිරන්තරයෙන්ම කැපවී කටයුතු කරන ලද අධ්‍යක්ෂ මණ්ඩලයටද කළමනාකාරීත්වයටද අප වෙනුවෙන් උපරිම සහාය ලබාදුන් වෘත්තීය සමිති සභාපතිතුමන්ලා අතුළු සාමාජිකයන්ටද ජනමාධ්‍ය ඇමතිතුමා, ලේකම් තුමා හා අනෙකුත් නිලධාරන්ටද මගේ තෘතඥතාවය පුද කර සිටිමි. ර‍ෙට් වර්තමාන ජාතික ප්‍රතිපත්තිය වන ජනාධිපතිතුමාගේ සෞභාග්‍යයේ දැක්ම සංවර්ධන ප්‍රතිපත්තිය සාර්ථක කරගැනීම සඳහා අපගේ උපරිම සහයෝගය ලබාදෙන බව අවසාන වශයෙන් සඳහන් කරමි.

ලැබුවා වූ 2021 වසර ඔබ සියලු දෙනාටම වාසනාවන්ත වසරක් වේවායි මම ප්‍රාර්ථනා කරමි.!’’

කර්තෘ මණ්ඩල අධ්‍යක්ෂ ධර්ම ශ්‍රී කාරියවසම්, මෙහෙයුම් අධ්‍යක්ෂ නීතිඥ කණිෂ්ක විතාරණ, නීති හා පරිපාලන අධ්‍යක්ෂ නීතිඥ රඛිත අබේගුණවර්ධන, මූල්‍ය අධ්‍යක්ෂ නීතිඥ ජනක රණතුංග යන මහත්වරු මේ අවස්ථාවට එක්ව සිටියහ.

පත්තර මහගෙදර අපේ රටේ ආගම භාෂාව සහ උරුමය ආරක්ෂා කිරීමට හැම විටම කැප වුණා
- මහාචාර්ය ඉත්තදෙමළියේ ඉන්දසර හිමි

සියවසකටත් අධික කාලයක් මුළුල්ලේ පත්තර මහගෙදර අප රටේ ජාතිය ආගම සංස්කෘතිය සභ්‍යත්වය භාෂාව සහ උරුමයන් වෙනුවෙන් පෙනී සිටිමින් ඒවා සංරක්ෂණය කරන්න පෝෂණය කරන්න කැප වී කටයුතු කළ බව කොළඹ සම්බුද්ධාලෝක විහාරාධිපති මහාචාර්ය ඉත්තදෙමළියේ ඉන්දසර හිමියෝ පැවසූහ. උන් වහන්සේ මේ බව කියා සිටියේ උදා වූ 2021 වසරට ආශිර්වාද කිරමින් සෙත් පිරිත් සජ්ඣ­ායනා කිරීමෙන් අනතුරුව අනුශාසනාවක් කරමිනි.

අභාවප්‍රාප්ත ලේකහවුස් නිර්මාතෘ ඩී. ආර්. විජයවර්ධන මහතා බෞද්ධ පරිසරයක හැදි වැඩෙමින් ජාතිය ආගම වෙනුවෙන් රට වෙනුවෙන් කැපවීම් කරමින් මේ ආයතනය කටයුතු කළායැයිද උන්වහන්සේ කියා සිටියහ.

එය ආරක්ෂා කරන්න පරපුරෙන් පරපුරට මේවා දායාද කරන්න අවශ්‍ය කරන සහයෝගය කැප කිරීම් පරිත්‍යාග අදත් මේ ආයතනයෙන් දැකගත හැකි වෙන බව කියා සිටි උන්වහන්සේ කොයි බාධක තිබුණත් ඒ මෙහෙවර සභාපති දයාරත්න මහතා ඇතුළු කාර්ය මණ්ඩලය සිදු කරන බවද උන්වහන්සේ පැවසූහ.

ඒ මෙහෙවර නව වර්ෂයක් ලැබූ අවස්ථාවේ බොහොම සුරක්ෂිතව සිදු කරන්න සියලු කාර්ය මණ්ඩලයට නිදුක් නිරෝගී සුවය ආශිර්වාදය රැකවරණ උදාවේවා කියා සෙත් පතන බවද උන්වහන්සේ නව වසරට ආශීර්වාද එක් කරමින් කීහ.

දමිළ කතෝලික මෙන්ම ඉස්ලාම් පූජකවරුන්ද නව වසරට ආශිර්වාද කිරීමට ආගමික වතාවත් සිදු කළ අතර අනුශාසනාවන්ද සිදු කළහ. මහා සංඝරත්නය,අන්‍යාගමික පූජකවරුන්, ලේක්හවුස් සභාපති ජනාධිපති නීතිඥ ඩබ්ලිව්. දයාරත්න මහතා ඇතුළු අධ්‍යක්ෂ මණ්ඩලය, කළමනාකාරිත්වය හා කර්තෘවරුද මේ අවස්ථාවට එක්වූහ.

නවතම පුවත්

මත්තල ගුවන් තොටුපළ භාණ්ඩ ප්‍රවාහන කේන්ද්‍රස්ථානයක් ලෙස සංවර්ධනය කරයි

අප්‍රේ 07, 2021
මත්තල ජාත්‍යන්තර ගුවන් තොටුපළ සංචාරකයන් සදහා ආකර්ෂණීය ගුවන් තොටුපළ වශයෙන් මෙන්ම භාණ්ඩ…

අවුරුදු නැකැත් සීට්ටුව ජනපතිට

අප්‍රේ 07, 2021
සිංහල හා දෙමළ අලුත් අවුරුදු නැකැත් සීට්ටුව සාම්ප්‍රදායික, චාරිත්‍රානුකූලව ජනාධිපති ගෝඨාභය…

වහාම ක්‍රියාත්මක වන පරිදි පාම් ඔයිල් ආනයනය තහනම් කෙරේ

අප්‍රේ 06, 2021
වහාම ක්‍රියාත්මක වන පරිදි පාම් ඔයිල් ආනයනය සම්පූර්ණයෙන් තහනම් කිරීමට ජනාධිපති ගෝඨාභය…

පාස්කු දින ප්‍රහාරයේ වින්දිතයන්ට සාධාරණය ඉටු වන තෙක් කිතුනු ජනතා ඉවසීම විශිෂ්ටයි - අගමැති

අප්‍රේ 05, 2021
පාස්කු දින ප්‍රහාරයේ වින්දිතයන් වූ සැමට සාධාරණය ඉටුවන තෙක් වූ කිතුනු ජනතා ඉවස ීම විශිෂ්ට…

අතිගරු ජනාධිපතිතුමාගේ පාස්කු දින පණිවිඩය

අප්‍රේ 04, 2021
පාස්කුව ලෝකවාසී කිතුනු ජනතාවගේ උතුම්ම මංගල්‍යයයි. පාස්කු මංගල්‍යයේ අර්ථය පාපයෙන්…

“ගම සමග පිළිසඳරට” ජනපති උතුරට යයි

අප්‍රේ 03, 2021
වවුනියාවේ ජල ගැටළුවට වසරකදී විසඳුම් … ප්‍රදේශයේ පාසල්වල ගැටළු රැසක් විසඳේ … ශාසනයට දරුවන්…

“ගම සමග පිළිසඳර” හෙට උතුරට

අප්‍රේ 03, 2021
උතුරු පළාතේ “ගම සමග පිළිසඳර” ප්‍රථම වැඩසටහන වව්නියාව දිස්ත්‍රික්කයේ, වව්නියාව උතුර…

කොළඹ ව්‍යාපාරික සංගමයෙන් මාධ්‍යවේදින්ට වට්ටම් කාඩ්පතක්

මාර් 31, 2021
ජනමාධ්‍යවේදීන් සඳහා වට්ටම් සහිත කාඩ්පතක් හදුන්වාදීමේ උත්සවය ජනමාධ්‍ය අමාත්‍ය කෙහෙළිය…

ඝණ අපද්‍රව්‍ය කළමනාකරණය පිළිබඳ විශේෂඥ කමිටු වාර්තාව ජනපතිට භාරදෙයි

මාර් 31, 2021
ඝණ අපද්‍රව්‍ය කළමනාකරණය පිළිබඳ විශේෂඥ කමිටු වාර්තාව අද (31) පස්වරුවේ ජනාධිපති කාර්යාලයේදී…

logo20190228 1

163, ඇසිදිසි මැඳුර, කිරුළපන මාවත, පොල්හේන්ගොඩ, කොළඹ 05

011-2513 459, 011-2513 460,
011-2512 321, 011-2513 498

info@media.gov.lk
facebook
twitter