නවතම පුවත්

  • එන්නත් කිරීම හෙට සිටම ….
  • අකමැති අයට නොගෙන සිටීමට පිළිවන් ….

ඉන්දීය රජය ප්‍රදානය කළ කොවිඩ් මර්දන එන්නත් පළමු තොගය ඉන්දීය මහ කොමසාරිස් ගෝපාල් බග්ලේ මහතා විසින් අද (28) පෙරවරුවේ කොළඹ බණ්ඩාරනායක අන්තර් ජාතික ගුවන් තොටුපොළේ දී ජනාධිපති ගෝඨාභය රාජපක්ෂ මැතිතුමා වෙත නිල වශයෙන් භාරදෙනු ලැබීය.
ජනාධිපතිතුමා ඉන්දීය අග්‍රාමාත්‍ය නරේන්ද්‍ර මෝදි මැතිතුමාගෙන් කළ ඉල්ලීම අනුව එන්නත් තොගය ශ්‍රී ලංකාවට ප්‍රදානය කෙරිණ.

එංගලන්තයේ ඔක්ස්ෆර්ඩ් විශ්ව විද්‍යාලය සංවර්ධනය කළ ඇස්ට්‍රා සෙනිකා කොවිෂීල්ඩ් (AstraZeneca COVISHELD) කොවිඩ් මර්දන එන්නත මුම්බායි හි “සීරම් ඉන්ස්ටිටියුට්” ආයතනය විසින් නිෂ්පාදනය කර තිබේ.
එන්නත් මාත්‍රා ලක්ෂ 05ක් රැගත් ඉන්දීය ගුවන් සේවයට අයත් AI 281 දරණ ගුවන් යානය අද පෙ.ව 11.45 ට බණ්ඩාරනායක අන්තර් ජාතික ගුවන් තොටුපොලට ළගා විය.

ගුවන් යානයේ විශේෂ ශීතාගාරයක් තුල ගබඩාකර, රැගෙන ආ එන්නත් තොගයේ බර කිලෝ ග්‍රෑම් 1323 කි. එන්නත් තොගය ගුවන්තොටුපොළ ගුවන් ගැල් ගම්මානයේ ශීතාගාර තුල ගබඩා කර ශීතාගාර සහිත වාහනවලින් දිස්ත්‍රික්ක 25 ආවරණය වන පරිදි බෙදා හැරීමට සැලසුම් කර ඇත. සෙල්සියස් අංශක 2-8 අතර උෂ්ණත්වයක එන්නත් ගබඩා කර තැබේ.
එන්නත දීම බස්නාහිර පළාතේ ප්‍රධාන රෝහල් 06කදී හෙට (29) ආරම්භ කෙරේ. කොවිඩ් මර්දනය සඳහා ඉදිරිපෙල ක්‍රියාකරන එක්ලක්ෂ පනස්දහසක් (150,000) පමණ සෞඛ්‍ය කාර්ය මණ්ඩලය, එක්ලක්ෂ විසිදහසක් (120,000) පමණ ත්‍රිවිධ හමුදාව, පොලීසිය ඇතුළු ආරක්ෂක අංශවල පිරිස් වෙත එන්නත පළමුව දීමට සැලසුම් කර තිබේ.

ජනාධිපති රාජපක්ෂ මැතිතුමාගේ ඉල්ලීමට ප්‍රතිචාර දක්වමින් චීන රජය ද එන්නත් ලක්ෂ 03ක තොගයක් ප්‍රදානය කිරීමට නියමිත බව ජනාධිපති ප්‍රධාන උපදේශක සහ කොවිඩ් එන්නත ප්‍රසම්පාදනය සඳහා වන ජනාධිපති කාර්ය සාධක බලකායේ ප්‍රධානී ලලිත් වීරතුංග මහතා පවසයි. එන්නත ගැනීම පුද්ගලයන්ගේ ස්වාධීන තීරණයකි. අකමැති අයට නොගෙන සිටීමට හැකි බව ද වීරතුංග මහතා කියා සිටී.
මේ අවස්ථාව සනිටුහන් කරමින් ඉන්දීය මහ කොමසාරිස්වරයා ජනාධිපතිතුමා වෙත සමරු තිළිණයක් පිළිගැන්වීය.

අමාත්‍ය ප්‍රසන්න රණතුංග, රාජ්‍ය අමාත්‍යවරුන් වන සුදර්ශනී ප්‍රනාන්දුපුල්ලේ, චන්න ජයසුමන, ජනාධිපති ප්‍රධාන උපදේශක ලලිත් වීරතුංග, විදේශ ලේකම් අද්මිරාල් මහාචාර්ය ජයනාත් කොළඹගේ, යුද හමුදාපති හා ආරක්ෂක මාණ්ඩලික ප්‍රධානී ජෙනරාල් ශවේන්ද්‍ර සිල්වා, ඉන්දීය නියෝජ්‍ය මහ කොමසාරිස් විනෝද් කේ ජේකබ්, ගුවන් තොටුපොළ හා ගුවන් සේවා සමාගමේ සභාපති මේජර් ජනරාල් ජී.ඒ. චන්ද්‍රසිරි යන මහත්ම මහත්මීහු සහ අමාත්‍යාංශ ලේකම්වරු, සෞඛ්‍ය අංශ ප්‍රධානීහූ ඇතුළු පිරිසක් මේ අවස්ථාවට එක්ව සිටියහ.

ජනතාව හමුවේ පොරොන්දු වූ ආකාරයටම නව ව්‍යවස්ථා සංශෝධනයක් කෙටුම්පත් කිරීමේ කටයුතු දැනටමත් සිදුවෙමින් පවතින බව අග්‍රාමාත්‍ය මහින්ද රාජපක්ෂ මහතා ප්‍රකාශ කළේය.

ජනතා පරමාධිපත්‍ය, ජාතික ආරක්ෂාව, සියලු දෙනා ආවරණය වන ආර්ථික සංවර්ධනය, මානව හිමිකම් හා නීතියේ ආධිපත්‍ය, රටේ ස්වෛරීභාවය ආරක්ෂා වන ආකාරයට නව ව්‍යවස්ථා සංශෝධනය ගෙන ඒමට කටයුතු කරන බවත් අග්‍රාමාත්‍යවරයා පැවැසීය.

අග්‍රාමාත්‍ය මහින්ද රාජපක්ෂ මහතා මෙසේ ප්‍රකාශ කළේ අධිකරණ පියස නව ගොඩනැගිලි සංකීර්ණයට මුල්ගල් තැබීමේ අවස්ථාවට ඊයේ(25) එක්වෙමිනි.

යටත් විජිත සමයේ ඉදිකෙරුණු අලුත්කඩේ අධිකරණ ගොඩනැගිල්ල වෙනුවට අලුතෙන් ඉදිකෙරෙන අධිකරණ පියස නව ගොඩනැගිලි සංකීර්ණය අක්කර 06ක බිමක ඉදිකිරීමට සැලසුම් කර ඇති අතර ඒ සඳහා වැය කෙරෙන මුදල රුපියල් කෝටි 1650කි.

ඉතිහාසයේ තමන් බලයට පත්වූ සෑම අවස්ථාවකම අධිකරණයේ ස්වාධීනත්වය ආරක්ෂා කරන්නට කටයුතු කළ බව මෙහිදී සිහිපත් කළ අග්‍රාමාත්‍යවරයා කිසිවිටෙකත් පෞද්ගලික මැදිහත්වීම්වලින් නීතිය නැමීමට තමන් කටයුතු නොකළ බවත් පැවැසීය.

අධිකරණයේ නඩු ප්‍රමාදවීම, නව අධිකරණ ශාලා ඉදිකිරීම, අධිකරණ පද්ධතිය ඩිජිටල්කරණය කිරීම යනාදී කරුණු සම්බන්ධයෙන්ද රජයේ අවධානය යොමුව ඇති බවත් අගමැති රාජපක්ෂ මහතා වැඩිදුරටත් පැවසීය.

අගවිනිසුරු ජනාධිපති නීතිඥ ජයන්ත ජයසූරිය, අධිකරණ අමාත්‍ය ජනාධිපති නීතිඥ අලි සබ්‍රි, අමාත්‍යවරුන් වන බන්දුල ගුණවර්ධන, ගාමිණි ලොකුගේ, රාජ්‍ය අමාත්‍ය ලොහාන් රත්වත්තේ මහත්වරු ඇතුළු පිරිසක්ද මේ අවස්ථාවට එක්ව සිටියහ.

ශ්‍රී ලංකා අමරපුර මහා නිකායේ උත්තරීතර මහ නායක අග්ගමහා පණ්ඩිත අතිපූජ්‍ය කොටුගොඩ ධම්මාවාස මහ නායක හිමිපාණන් වහන්සේට ජනාධිපති ගෝඨාභය රාජපක්ෂ මැතිතුමා ජන්ම දින සුබ පැතුම් පුද කරයි.

අදට (26) යෙදී ඇති උන්වහන්සේගේ ජන්ම දිනය නිමිත්තෙන් ගල්කිස්ස ධර්මපාලාරාම විහාරස්ථානයට අද පෙරවරුවේ ගිය ජනාධිපතිතුමා නායක හිමිපාණන් වහන්සේ බැහැ දැක උන්වහන්සේට නිදුක් නිරෝගී සුවය ප්‍රාර්ථනා කළේය.

මහ නා හිමියනට ආශිර්වාද පිණිස මහා සංඝරත්නය පනස් නමක් විෂයෙහි පැවති දානමය පුණ්‍ය කර්මයට ද සහභාගී වූ ජනාධිපතිතුමා මහ නායක හිමිවරුන්ට දානය පිළිගැන්වීය.

අග්ගමහා පණ්ඩිත අතිපූජ්‍ය කොටුගොඩ ධම්මාවාස මහ නායක හිමිපාණන් වහන්සේගේ 88 වන ජන්ම දිනය නිමිත්තෙන් නිකුත් කෙරුණු සමරු මුද්දරය ද ජනාධිපතිතුමා විසින් උන්වහන්සේ වෙත පිළිගැන්විණ.

ශ්‍රී ලංකා අමරපුර මහා නිකායේ වැඩබලන මහානායක අතිපූජ්‍ය ගංතුනේ අස්සජී, කෝට්ටේ ශ්‍රී කල්‍යානි සාමග්‍රී ධර්ම මහා සංඝ සභාවේ මහා නායක අතිපූජ්‍ය ඉත්තෑපානේ ධම්මාලංකාර,  ශ්‍රී ලංකා රාමඤ්ඤ මහා නිකායේ මහ නායක අතිපූජ්‍ය මකුලෑවේ විමල, අමරපුර ශ්‍රී ධර්මරක්ෂිත නිකායේ මහ නායක, බම්බලපිටිය වජිරාරාමාධිපති අතිපූජ්‍ය තිරිකුණාමලයේ ආනන්ද නායක ස්වාමීන් වහන්සේ ප්‍රමුඛ මහා සංඝරත්නය මේ අවස්ථාවට වැඩම කර සිටියහ.

නාරාහේන්පිට අභයාරාමාධිපති, බස්නාහිර පළාත් ප්‍රධාන සංඝනායක අති<strong>පූජ්‍ය මුරුත්තෙට්ටුවේ</strong> ආනන්ද නායක හිමිපාණන් වහන්සේගේ ජන්ම දිනය ද අදට යෙදී තිබේ.

අද (26) දහවල් එම විහාරස්ථානය වෙත ගිය ජනාධිපතිතුමා පූජ්‍ය මුරුත්තෙට්ටුවේ ආනන්ද නායක ස්වාමින් වහන්සේගේ සුව දුක් විමසමින් උන්වහන්සේට නිදුක් නිරෝගී චිර ජිවනය ප්‍රාර්ථනා කළේය.

උන්වහන්සේගේ ජනම දිනය නිමිත්තෙන් විහාරස්ථානයේ සංවිධාන කර තිබෙන ලේ දන්දීමේ වැඩසටහන සහ ප්‍රදේශවාසින්ට පරිත්‍යාග කිරීම සඳහා රැස් කර තිබූ  භාණ්ඩ තොගය ජනාධිපතිතුමාගේ නිරීක්ෂණයට ලක් විය.

මෙරට විශිෂ්ට ගණයේ මාධ්‍යෙව්දියෙකු ,මාධ්‍ය ආචාර්යවරයෙක් වූ කලාශුරී කලාකීර්ති ආචාර්ය එඩ්වින් ආරියදාස මහතාගේ දේහයට ජනමාධ්‍ය අමාත්‍ය කැබිනට් ප්‍රකාශක කෙහෙලිය රඹුක්වැල්ල මහතා අද (25) අවසන් ගෞරව දක්වනු ලැබීය

කලාකීර්තී ආචාර්ය එඩ්වින් ආරියදාස ශූරීන් වෙනුවෙන් ශෝක පණිවිඩය නිකුත් කරමින්  අගමැති කියයි

“ඇවිදින පුස්තකාලය” ලෙස ලොව දැනුම ශ්‍රී ලාංකේයන්ට යාවත්කාලීන කිරීමට උරදුන් කලාකීර්ති ආචාර්ය එඩ්වින් ආරියදාස මහතාගේ නික්ම යෑම මුළු මහත් ශ්‍රී ලාංකේයන්ටම පිරිමැසිය නොහැකි පාඩුවක් බව අගමැති මහින්ද රාජපක්ෂ මහතා ප්‍රකාශ කරයි.

අභාවප්‍රාප්ත ජ්‍යෙෂ්ඨ පුවත්පත් කලාවේදියෙකු, සිනමා විචාරකයෙකු, මාධ්‍යවේදියෙකු වන ආචාර්ය එඩ්වින් ආරියදාස මහතාගේ අභාවය පිළිබඳ ශෝක පණිවිඩයක් නිකුත් කරමින් අගමැති මහින්ද රාජපක්ෂ මහතා මෙසේ ප්‍රකාශ කළේය.

අගමැතිවරයා නිකුත් කළ ශෝක පණිවිඩයේ වැඩි දුරටත් මෙසේ සඳහන් වේ.

ශ්‍රී ලංකාවේ ජ්‍යෙෂ්ඨ පුවත්පත් කලාවේදියකු, සිනමා විචාරකයකු, මාධ්‍යවේදියකු, පරිසරවේදියකු, ගුරුවරයකු මෙන්ම වියතකු ලෙස ජනාදරයට පත් වූ කලාකීර්තී ආචාර්ය එඩ්වින් ආරියදාස මහතා අභාවප්‍රාප්ත වූ පුවත සැලවීමෙන් මම බලවත් සංවේගයට පත් වුණෙමි.

1922 දෙසැම්බර් 03 වන දින ගාල්ලේ, උණවටුන ප්‍රදේශයේ දී උපත ලැබූ ආචාර්ය එඩ්වින් ආරියදාස මහතා මූලික අධ්‍යාපනය හැදෑරුවේ උණවටුන බොනවිස්ටා පාසලෙන් හා ගාල්ල මහින්ද විද්‍යාලයෙන්ය. පාසල් අධ්‍යාපනය හමාර කරමින් එවකට යුනිවසිටි ඔප් සිලෝන් යනුවෙන් හැඳින් වූ කොළඹ විශ්වවිද්‍යාලයට ඇතුළත් වූ එතුමා 1945 වසරේ දී සිංහල හා ඉංග්‍රීසී භාෂා පිළිබඳ උපාධි හිමි කරගත්තේය. මහින්ද විද්‍යාලයේ හා මොරටු මහ විද්‍යාලයේ කලක් ගුරුවරයෙකු ලෙස සේවය කළ එතුමා සමස්ත ලංකා බෞද්ධ ශිෂ්‍ය සම්මේලනයේ ක්‍රියාකාරී සාමාජිකයෙක් ද විය.

1949 මාර්තු 8 වැනිදා මාධ්‍යවේදියකු ලෙස ලේක්හවුස් ආයතනයට සම්බන්ධ වූ එතුමා දිනමිණ, ඩේලිනිවුස්, සන්ඩේ ඔබ්සවර්, සිළුමිණ හා ජනතා පුවත්පත්වල කතෘ මණ්ඩලයේ සේවය කළේය. මිහිකත, දෙසතිය සගරා සඳහා ලිපි සැපයූ එතුමා ලේක්හවුස් ආයතනයේ උපදේශක මණ්ඩල සාමාජිකයෙකි. 1978-1982 වකවානුවේ නවයුගය පුවත්පතේ ප්‍රධාන කතෘවරයා ලෙස ද කටයුතු කළ ආරියදාස මහතා එම පුවත්පත පෙර අපරදිග දැනුමෙන් පෝෂණය කළේය. චරිත හමුව, දුක දිනා ජයගත් හපන්නු, අතීතයට ලියුමක් ඔහු ආරම්භ කළ විශේෂාංග ජනාදරයට පත් විය.

 
 

ආචාර්ය එඩ්වින් ආරියදාස මහතා ජනසන්නිවේදන හා ජනමාධ්‍ය ක්ෂේත්‍රයේ පෘථුල අත්දැකීම් මෙන්ම සුවිශේෂී විෂය දැනුමක් සමාජයට දායාද කළ කෘතහස්ථ හා ජ්‍යෙෂ්ඨ ජනමාධ්‍යවේදියෙකි. ශ්‍රී ලංකාවේ මාධ්‍ය අධ්‍යාපනය ඇරඹීමට පුරෝගාමී වු එඩ්වින් ආරියදාස මහතා ජන විඥාපනය ලෙස සන්නිවේදන විෂය හැඳින්වු 1960 දශකයේ එම විෂය ඉගැන්වූ මෙරට ප්‍රථම ආචාර්යවරයාය. කැලණිය, කොළඹ, ජයවර්ධනපුර හා විවෘත විශ්වවිද්‍යාලවල ජනමාධ්‍ය පාඨමාලා ආරම්භ කිරීමේ පුරෝගාමියා වුයේ ද ආචාර්ය එඩ්වින් ආරියදාස මහතාය. එම විශ්ව විද්‍යාලවල උපාධි පාඨමාලා සැකසීමට එතුමාගෙන් ලැබුණු දායකත්වය ඉමහත්ය.

සිය අභිමානවත් වෘත්තීය ජීවිතය තුළ ආරියදාස මහතා ජනමාධ්‍ය ක්ෂේත්‍රයේ බිහිකළ සිසුන් ප්‍රමාණය අති විශාලය. ඔහු ශ්‍රී ලංකාවේ සිටි සුවිශේෂී වූ මාධ්‍ය විෂයෙහි විද්වතෙකි. එසේම ගුරුවරයෙකි. ජනමාධ්‍ය පමණක් නොව, විද්‍යාව හා පාරිසරික ක්ෂේ‍ත්‍රවලට ද වැදගත් දායකත්වයක් ලබාදුන් එතුමා ද්විභාෂා වියතෙකි. එඩ්වින් ආරියදාස මහතා ‘ලෝක ඉතිහාසය’, අමෙරිකානු ජනපති දේශන ඇතුළත් ‘විමුක්ති ප්‍රකාශ’ ඇතුළු කෘති කිහිපයක් ම පළ කළේය. එතුමා ද්විභාෂාවෙන්ම රචිත ලිපි ගණන දහස් ගණනකි.

මෙරට ප්‍රථම විදෙස් විත්ති විචාරකයා ලෙස ද ආරියදාස මහතා ඉතිහාසයට එක් වෙයි. කලාකීර්ති ඇතුළු ගෞරව සම්මාන රැසකින් පිදුම් ලැබූ ආචාර්ය එඩ්වින් ආරියදාස මහතා ජනතා සම්මාන, මාධ්‍ය සම්මාන, ජාතික සම්මාන ඇතුළු සම්මාන 300කට වැඩි සංඛ්‍යාවකට හිමිකම් කීවේය. ජාත්‍යන්තර දේශපාලනය පිළිබඳ විද්වතකු වූ එතුමා, 1985 වසරේ රචනා කළ “සිනමා ලිපි” කෘතිය සිංහල සිනමා ඉතිහාසය සහ විචාරය පිළිබඳ රචනා වූ වැදගත්ම කෘතියකි. ආරියදාස මහතා අතින් මෙරට ජනමාධ්‍ය විෂය ක්ෂේත්‍රයේ උන්නතිය වෙනුවෙන් ලියැවුණු ග්‍රන්ථ ගණනාවකි.

බටහිර රටවල ආභාෂයෙන් බිහි වු සන්නිවේදන විෂයට පාරිභාෂිත වදන් එක් කිරීමට ද එඩ්වින් ආරියදාස මහතා පුරෝගාමී විය. සිංහල භාෂාවට අන්තර්ජාලය (Internet), සමීප රූප (Closeup) මාධ්‍ය රූප (Graphics) උස්තල මුද්‍රණය (Letter Press) සමතල මුද්‍රණය (Offset Press) සහ සජීවිකරණය (Animation) යන වචන එසේ නව අරුත් දෙමින් එතුමා නිර්මාණය කළ වදන්ය. දශක හතක කාලයක් ජනමාධ්‍ය වෘත්තියේ නියැලීමට තරම් ආචාර්ය එඩ්වින් ආරියදාස මහතා නිරෝගිමත් වූවා සේම, එතරම් කාලයක් මෙරට ජනමාධ්‍ය හදාරන්නන්ට හා වෘත්තිකයන්ට එතුමාගේ සේවය ලබන්නට වාසනාව උදාවිය.

පුවත්පත් කලාවේදියකු ලෙස සිය ජනමාධ්‍ය මෙහෙවර ආරම්භ කළ ආචාර්ය එඩ්වින් ආරියදාස මහතා, රූපවාහිනිය සහ ගුවන් විදුලිය මෙන්ම සමාජ මාධ්‍ය ඔස්සේ ද සිය දැනුමබෙදා දීමේ ජනතා මෙහෙවරහි නිරත වූයේය. “ඇවිදින පුස්තකාලය” ලෙස ලොව දැනුම ශ්‍රී ලාංකේයන්ට යාවත්කාලීන කරන්නට උරදුන් කලාකීර්ති ආචාර්ය එඩ්වින් ආරියදාස මහතාගේ නික්ම යාම මුළු මහත් ශ්‍රී ලාංකිකයන්ම පිරිමැසිය නොහැකි පාඩුවකි.

වසර 98ක කාලයක් ආයු වළඳා, අභාවප්‍රාප්ත වූ කලාකීර්ති ආචාර්ය එඩ්වින් ආරියදාස මහතාට නිවන් සුව අත්වේවා! යි මම ප්‍රාර්ථනා කරමි. සංවේගයට පත් එතුමාගේ පවුලේ සැමටත්, ඥාතී හිතමිත්‍රාදීන්ටත්, ප්‍රදේශවාසී සැමටත්, රටවැසියාටත් මාගේ බලවත් සංවේගය මෙයින් පළ කර සිටිමි.

ශෝක පණිවිඩය

ජේෂ්ඨ මාධ්‍යවේදියෙකු ලෙස යහපත් මාධ්‍ය කලාවක් ගොඩනැගීමට සහප්‍රාමාණික වියතෙකු ලෙස කලා සහ මානව ශාස්ත්‍ර විෂයය ගණනාවක ප්‍රගමනයට දායක වූ කලාකීර්ති ආචාර්ය එඩ්වින් ආරියදාස මහතාගේ අභාවය පිළිබඳ පුවත බලවත් සංවේගය දනවන්නකි. බහුවිධ ක්ෂේත්‍රයන්හි තමන් සතුව තිබූ පැතිරි දැනුමෙන් ජන මනස පෝෂණය කිරීමට එතුමන් කළ මෙහෙවර සිහිපත් කරන්නේ ඉමහත් ගෞරවයෙන් යුතුවය.

බහුතර ජනතාව ආචාර්ය එඩ්වින් ආරියදාස මහතා හඳුනාගෙන සිටියේ මාධ්‍ය ක්ෂේත්‍රයේ දැවැන්තයෙකු ලෙසිනි. ලේක්හවුස් ආයතනයෙන් සිය මාධ්‍ය ජීවිතය ආරම්භ කළ ඔහු කර්තෘ මණ්ඩල සාමාජිකයෙකු ලෙස සහභාගි වෙමින් ජාතික පුවත්පත් රැසක ප්‍රවර්ධනයට දායක විය. සිංහල, ඉංග්‍රීසි භාෂා දෙකෙහිම හසල දැනුමක් ඇතිව සිටි ඔහු ඉංග්‍රීසි බසින් තමා උගත් දේ සිංහල පාඨකයාට සහ ශ්‍රාවකයාට නොමසුරුව බෙදා දුන්නේය. ආරියදාසයන් “ඇවිදින පුස්තකාලය” යන අන්වර්ථ නාමයෙන් අගයනු ලැබූයේ ඔහු රැස්කරගත් දැනුම් සම්භාරය නිසාය.

එඩ්වින් ආරියදාසයන්ගේ ආකර්ශණීය ලේඛන ශෛලිය සහ සංකීර්ණ විෂයයන් සරල බසින් පැහැදිලි කිරීමේ හැකියාව දහස් සංඛ්‍යාත මුද්‍රිත හා විද්‍යුත් මාධ්‍ය ග්‍රාහකයන් ඔහු වටා ඇද බැඳ ගැනීමට හේතු විය. ලෝකආර්ථික, දේශපාලන සහ සමාජ ප්‍රවණතා පිළිබඳව නිරතුරු අවදියෙන් පසු වූ ලේඛකයෙකු සහ විචාරකයෙකු ලෙස ද ඔහු නමක් දිනාගෙන තිබිණ. ඔහු අපේ රටේ විශ්වවිද්‍යාල පද්ධතියෙහි ජනමාධ්යර විෂයය ස්ථාපනය කොට වර්ධනය කිරීමට කළ කාර්යභාරය පැසසුම් කටයුතුය.

භාෂා විශේෂඥයෙකු වූ එඩ්වින් ආරියදාසයන් මාධ්‍ය ශබ්දකෝෂයට එක්කළ පාරිභාෂිත වචන රැසකි. අසූව දශකයේ රූපවාහිනිය ආගමනයේදී වැඩසටහන් සම්පාදනයට ඔහු සක්රීිය ලෙස දායක විය. විද්‍යා ලේඛකයෙකු, සිනමා විචාරකයෙකු, පරිසරවේදියෙකු ලෙස ද එඩ්වින් ආරියදාසයන් කීර්තියට පත්ව සිටියේය. බහුවිධ විෂයයක්ෂේත්‍රයන්හී ප්‍රදර්ශනය කළ විෂධ බව නිසාම එතුමා “කලාකීර්ති” ඇතුළු දෙස් විදෙස් සම්මාන රැසකින් පිදුම් ලැබීය.
ආචාර්ය එඩ්වින් ආරියදාසයන්ගේ අභාවය අපේ සමාජයේ විශාල රික්තයක් නිර්මාණය කරයි.
ජේෂ්ඨ මාධ්‍යවේදි එඩ්වින් ආරියදාසයන්ට අජරාමර නිවන් සැප ලැබේවායි ප්රාමර්ථනය කරමි.

 
 

ජ්‍යේෂ්ඨ මාධ්‍යවේදී කලාශූරී එඩ්වින් ආරියදාස මහතාගේ අභාවය මෙරට මාධ්‍ය ක්ෂේත්‍රයට දැරිය නොහැකි ඉමහත් පාඩුවක්- ජනමාධ්‍ය අමාත්‍ය

 ප් රවෘත්ති නිවේදනය 2020.12.22 page 001

 

අමෙරිකා එක්සත් ජනපදයේ නව ජනාධිපති ජෝ බයිඩ්න්ට සහ උප ජනාධිපතිනි කමලා හැරිස්ට ජනාධිපති ගෝඨාභය රාජපක්ෂ මහතා සුබපැතුම් එක් කර තිබේ.
 
ශක්තිමත් සහ අන්‍යෝන්‍ය වශයෙන් වැදගත් ද්විපාර්ශ්වික සම්බන්ධතාවයක් සඳහා ශ්‍රී ලංකා රජය සහ තමන් එක්ව කටයුතු කිරීමට බලාපොරොත්තුවන බව නව ජනාධිපතිවරයාට සුබ පතමින් ගෝඨාභය රාජපක්ෂ මහතා සිය නිල ට්විටර් ගිණුමේ සටහනක් තබා ඇත. 
 
ජෝ බයිඩ්න්ට තැබූ සුබ පැතුම් සටහන, 
 
Congratulations & best wishes to President @JoeBiden  on assumption of office as 46th President of the #USA.  My government and I look forward to working together towards a stronger  & mutually beneficial bilateral relationship.
 
කමලා හැරිස්ට තැබූ සුබ පැතුම් සටහන, 
 
Congratulations & best wishes to  Vice President  @KamalaHarris  on assumption of office as Vice President of the #USA. We look forward to working together towards a strengthened bilateral relationship.

අමෙරිකා එක්සත් ජනපදයේ නව ජනාධිපති ජෝ බයිඩන් මහතාට සහ උප ජනාධිපතිනී කමලා හැරිස් මහත්මියට සියලු ශ්‍රී ලාංකිකයින් වෙනුවෙන් තමන් සුබපැතුම් එක් කරන බව අග්‍රාමාත්‍ය මහින්ද රාජපක්‍ෂ මහතා ට්විටර් පණිවිඩයක් මගින් දැනුම් දී තිබේ.
 
දෙරට අතර පවතින සබඳතාව තවදුරටත් ශක්තිමත් කිරීම සදහා එක්ව කටයුතු කිරීමට සූදානම් බව එහි වැඩිදුරටත් සදහන් ය.  
 
අගමැතිවරයාගේ ට්විටර් පණිවිඩය පහත සදහන්වේ,
 
On behalf of the #GoSL & people of #SriLanka, I congratulate President @JoeBiden & @VP @KamalaHarris on the assumption of office. I look forward to working together with you to further strengthen the relationship between both our nations. I wish you the very best for your tenure.

ඉසුරුමත් හෙට දිනක් සෞභාග්‍යමත් මව්බිමක් යන තේමාව යටතේ 73වන නිදහස් දින සැමරුම 2021 පෙබරවාරි මස 04වැනි දින නිදහස් චතුරස්‍රයේදී අභිමානවත්ව පැවැත්වීමට රජය තීරණය කර ඇත. ඒ පිළිබඳ මාධ්‍ය අයතන ප්‍රධානීන් සමග රැස්වීමක් ගරු ජනමාධ්‍ය අමාත්‍ය කෙහෙළිය රඹුක්වැල්ල මැතිතුමාගේ ප්‍රධානත්වයෙන් සහ අමාත්‍යංශ ලේකම් ජගත් පී. විජේවීර සහ රාජ්‍ය ආරක්ෂක, ස්වදේශ කටයුතු හා ආපදා කළමනානරණ රාජ්‍ය අමාත්‍යාංශයේ ලේකම් විශ්‍රාමික මේජර් ජනරාල් කමල් ගුණරත්න මහතාගේ සහභාගීත්වයෙන් අද ජනමාධ්‍ය අමාත්‍යංශ ශ්‍රවණාගාරයේදී පැවැත්විණ.

මෙහිදී අදහස් දැක්වූ ගරු ජනමාධ්‍ය අමාත්‍ය කෙහෙළිය රඹුක්වැල්ල මහතා පැවැසුවේ සෞඛ්‍ය නීති රීතිවලට අනුගත වෙමින් ජාතියේ අභිමානවත් බව, ගාම්භීරත්වය රැකගනිමින් මෙවර ද නිදහස් දින උත්සවය පැවැත්විය යුතු බවයි.

පවතින තත්ත්වය යටතේ covid-19 සෞඛ්‍ය මාර්ගෝපදේශවලට අනුකූලව නිදහස් දින සැමරුම පැවැත්වෙන බව එම අවස්ථාවට සහභාගි වූ රාජ්‍ය ආරක්ෂක, ස්වදේශ කටයුතු හා ආපදා කළමනානරණ රාජ්‍ය අමාත්‍යාංශයේ ලේකම් විශ්‍රාමික මේජර් ජනරාල් කමල් ගුණරත්න මහතා පැවසීය. සියලු ජාතීන් නියෝජනය කරමින් සාම්ප්‍රදායික සංස්කෘතික අංගවලට මුල්තැන දෙමින් ජාතික නිදහස් දින සැමරුම අතිගරු ජනාධිපති ගෝඨාභය රාජපක්ෂ මැතිතුමාගේ ප්‍රධානත්වයෙන් පැවැත්වීට කටයුතු කරන බවත් ඒ මහතා වැඩිදුරටත් සඳහන් කළේය.
‍මෙම සැමරුම් දින පෙළපාලිය සඳහා යුද හමුදා නිලධාරීන් 4,325ක්, නාවික හමුදා නිලධාරීන් 868ක්, ගුවන් හමුදා නිලධාරීන් 945ක්, පොලිස් නිලධාරීන් 1,382ක්, සහ සිවිල් ආරක්ෂක බලකායේ නිළධාරීන් 515ක් මෙන්ම ශිෂ්‍ය භටයින් 355 දෙනෙකු එක්වනු ඇත.

73වැනි නිදහස් දිනයට සමගාමීව දිවයින පුරා රුක්රෝපණ වැඩසටහනක් ද ක්‍රියාත්මක කිරීමට තීරණය කර තිබේ.

රාජ්‍ය ආරක්ෂක හා ස්වදේශ කටයුතු සහ ආපදා කළමනානරණ රාජ්‍ය අමාත්‍ය අමාත්‍ය චමල් රාජපක්ෂ මහතාගේ උපදෙස් පරිදි පැවති මෙම 73වන නිදහස් දින සැමරුම් උළෙල පිළිබඳ රැස්වීම සඳහා ජනමාධ්‍ය අමාත්‍යංශයේ අතිරේක ලේකම් (පාලන) රුවන් සත්කුමාර මහතා, රජයේ ප්‍රවෘත්ති අධ්‍යක්ෂ ජනරාල් නාලක කලුවැව මහතා ඇතුළු ජ්‍යෙෂ්ඨ නිලධාරීන් රැසක් සහභාගි විය.

ගැටළු නිරාකරණය වන තෙක් පාරම්පරික වගාවන්හි නිරතවීමට ගොවීනට පූර්ණ අනුමැතිය .. වන අලි තර්ජනයට ස්ථිර විසඳුම් …
දිවයිනේ පාසල්වල ඇණ හිට ඇති සියලු සංවර්ධන වැඩ වහාම අරඹන්න …

  • වෙඩිකච්චිය ග්‍රාමයට නිවාස ව්‍යාපෘතියක් …
  • මැදිරිගිරිය වගාවන්ට මුවන්ගෙන් වන හානි වළක්වන්න වැටක් ඉදි කෙරේ …
  • කන්න දෙකම වගා කිරීමට ජලය …
  • දිස්ත්‍රික්කයේ වෘත්තීය පුහුණු අවස්ථා පුළුල් කිරීමට අවධානය ..

“ගම සමඟ පිළිසඳර” දී ජනපතිගෙන් තීරණ
ගැටළු නිරාකරණය වන තෙක් කිසිදු බාධාවකින් තොරව සහ අඛණ්ඩව වගා කටයුතුවල නිරත වීමට සියලු ගොවීනට පූර්ණ අනුමැතිය දෙන බව ජනාධිපති ගෝඨාභය රාජපක්ෂ මැතිතුමා පවසයි.
“ගම සමග පිළිසඳර” 06 වැනි වැඩසටහනට පැමිණ සිටි ගොවි ජනතාව නිරතුරුව මතු කළ ගැටළුව වෙත අවධානය යොමු කරමින් ජනාධිපතිතුමා විසින් මේ තීරණය ගනු ලැබීය.
පාරම්පරික වගා වැඩට බාධා නොකරන්නැයි වනජීවි, වන සංරක්ෂණ, පරිසර, පොලීසිය ඇතුළු සියලු ආයතනවල නිලධාරීන්ට ජනාධිපතිතුමා නියෝග කළේය. එසේ වුවද කිසිවෙකුට අලුතින් කැලෑ එළි කොට වගා කිරීමට කිසිදු අවසරයක් නැති බව ජනාධිපතිතුමා විසින් අවධාරණය කරනු ලැබිණ.
පොළොන්නරුව වන අලි තර්ජනයට මුහුණදෙන ප්‍රධානතම දිස්ත්‍රික්කයකි. ජනතාව දීර්ඝ කාලයක සිට මුහුණ පා සිටින මේ ගැටළුව නිසි ලෙස අවබෝධ කොට ගෙන ස්ථීර විසඳුමක් ලෙස අගල් සහ විදුලි වැට ඉදිකිරීම යන ක්‍රම දෙකම ක්‍රියාත්මක කරන්නැයි ජනාධිපතිතුමා උපදෙස් දුන්නේය.
දිස්ත්‍රික්කයේ පාසල් රැසක සංවර්ධන වැඩ ඇණ හිට තිබීම නිසා සිසුන්ගේ අධ්‍යාපනයට සිදුව ඇති හානිය ජනතාව පෙන්වා දුන්හ. ඒ පිළිබඳ අවධානය යොමු කළ ජනාධිපතිතුමා දිවයිනේ සියලු පාසල්වල අතරමග නතර කර ඇති සියලු සංවර්ධන වැඩ කඩිනමින් නිම කරන්නැයි බලධාරීන්ට උපදෙස් දුන්නේය.
අද (16) පෙරවරුවේ පොළොන්නරුව, මැදිරිගිරිය, වෙඩිකච්චිය ග්‍රාමයේ පැවති “ගම සමග පිළිසඳර” වැඩසටහනට සහභාගීවෙමින් ජනාධිපතිතුමා විසින් මේ තීරණ ගන්නා ලදී. ජනාධිපති රාජපක්ෂ මැතිතුමා හඳුන්වා දුන් “ගම සමග පිළිසඳර” වැඩසටහනේ හය වැන්න මෙයයි.
2020 සැප්තැම්බර් මස 25 වැනි දින බදුල්ල දිස්ත්‍රික්කයෙන් වැඩසටහන ආරම්භ විය. මාතලේ, රත්නපුර, අනුරාධපුර සහ අම්පාර දිස්ත්‍රික්ක ආවරණය වන පරිදි වැඩසටහන් 05ක් සංවිධාන කෙරිණ.
මෙතෙක් නිසි අවධානයට ලක් නොවූ නගරයෙන් බැහැර දුෂ්කර ගම්මානවල ජනතාව හමුවූ ජනාධිපතිතුමා ඔවුන්ගේ ගැටළු විමසා විසඳුම් පිණිස ඒ මොහොතේම නිලධාරීන්ගේ අවධානයට යොමු කළේය. කඩිනම් විසඳුම් දිය හැකි ගැටළු වහාම නිරාකරණය කළ අතර, විසඳීමට කල්ගතවන ගැටළු පසුව ආමන්ත්‍රණය කරනු පිණිස සටහන් කර ගනු ලැබීය.
පොළොන්නරුව නගරයේ සිට කි.මි 45ක පමණ දුරින් පිහිටි මැදිරිගිරිය ප්‍රාදේශීය ලේකම් බල ප්‍රදේශයට අයත් වෙඩිකච්චිය ග්‍රාමය මහවැලි සංවර්ධන යෝජනා ක්‍රමයේ “ඩී” කලාපයට අයත් වේ. සමගිපුර, දර්ශනපුර, දහම්වැව සහ පේරමඩුව යන ගම්මානවලින් සමන්විත මෙහි විශාලත්වය වර්ග කි.මි. 79කි. පවුල් 723කින් යුත් ගම්මානයේ ජනගහණය 2561කි. කෘෂිකර්මාන්තයේ සහ ස්වයං රැකියාවල නිරතවීම වෙඩිකච්චිය ඇතුළු අවට ගම්මාන රැසක ජනතාවගේ ප්‍රධාන ජීවනෝපාය වේ. වගා ජල හිඟය නිසා වී වගාව මහ කන්නයට පමණක් සීමා කිරීමට සිදුව තිබීම ගැමියන් මුහුණ පාන ගැටළු අතර ප්‍රධාන ස්ථානයක් ගනී. එබැවින් යල කන්නයේදී ගමින් පිටව ගොස් කුමන හෝ කුලී වැඩක නිරතවීමට ඔවුන්ට සිදුව තිබේ.
අත්‍යාවශ්‍ය පහසුකම් පවා රහිත වෙඩිකච්චිය ග්‍රාමයේ දැන් තිබෙන නිවාස වෙනුවට නව නිවාස ඉදිකර දෙන බව ජනාධිපතිතුමා ප්‍රකාශ කළේය. ගැමියන් දීර්ඝ කාලයක සිට මුහුණ දුන් වගා ගැටළුවට විසඳුමක් ලෙස ඇල වේලි සහ වැව් කඩිනමින් පිළිසකර කොට කන්න දෙකටම වගා ජලය සැපයීමට පියවර ගන්නැයි දිස්ත්‍රික්කයේ දේශපාලන අධිකාරියට හා නිලධාරීන්ට උපදෙස් දෙනු ලැබීය.
මැදිරිගිරිය – වටදාගෙය ප්‍රදේශයේ වගාවන්ට මුවන්ගෙන් වන හානිය පිළිබඳවද ජනතාව පෙන්වා දුන්හ. ඊට පිළියම් ලෙස මුවන් වෙසෙන කැලෑ ප්‍රදේශය කොටුකර දැල් වැටක් ඉදිකිරීමට තිරීණය කෙරිණ. ඒ සඳහා ප්‍රතිපාදන සැලසීමට උතුරු මැද පළාත් ආණ්ඩුකාර මහීපාල හේරත් මහතා එකඟ විය.
අ.පො.ස (උ.පෙ) විභාගය අවසන් කරන දරුවන් වෙනුවෙන් වෘත්තීය පුහුණු අවස්ථා උදා කිරීමේ අවශ්‍යතාව ජනාධිපතිතුමා අවධාරණය කළේය. විෂය භාර රාජ්‍ය අමාත්‍යවරිය මේ පිළිබඳ දැනුවත් කොට වෘත්තීය පුහුණු අවස්ථා ඇති කරන බව රාජපක්ෂ මැතිතුමා පැවසීය.
ප්‍රදේශයේ පානීය ජල අවශ්‍යතාව ජනාධිපතිතුමාගේ විශේෂ අවධානයට ලක් විය. කවුඩුල්ල වැව ආශ්‍රිතව ජල පවිත්‍රාගාරයක් ඉදිකර, ජල නල එලා පවුල් දස දහසකට ජලය සැපයීමට ආරම්භ කර ඇති ව්‍යාපෘතිය 2021 වසර අවසන්වීමට පෙර නිම කරන්නැයි ජනාධිපතිතුමා උපදෙස් දුන්නේය.
විදුලි බිල්පත් ගෙවීමට නොහැකි පාසල් සහ අඩු ආදායම්ලාභී පවුල් සඳහා “සූර්ය බල විදුලි පද්ධති” සම්පාදනය කොට නොමිලේ සපයන්නැයි ජනාධිපතිතුමා විසින් විදුලිබල නිලධාරීන්ට උපදෙස් දෙනු ලැබිණ.
ප්‍රදේශයේ පාසල්වල සහ රෝහල්වල පවතින අඩු පාඩු සම්පූර්ණ කිරීමටත්, ප්‍රධාන සහ අතුරු මාර්ග රැසක සංවර්ධන කටයුතු කඩිනම් කිරීමටත් නියම කෙරිණ.
ජනාධිපතිතුමා “ගම සමග පිළිසඳර” වැඩසටහනට සමගාමීව මැදිරිගිරිය, බිසෝපුර මහවැලි ප්‍රාථමික විද්‍යාලය විවෘත කිරීමටද එක් විය. විද්‍යාලය ඉදිකිරීමට මුලිකත්වය ගෙන කටයුතු කළ හිටපු ජනාධිපති මෛත්‍රීපාල සිරිසේන මහතාට එය විවෘත කරන ලෙස ජනාධිපතිතුමා ඇරයුම් කළේය.
ශ්‍රී ලංකා ටෙලිකොම්, මොබිටෙල් ආයතනය පරිත්‍යාග කළ පරිගණක යන්ත්‍ර 02ක් සහ ඩයලොග් ආයතනය ප්‍රදානය කළ රූපවාහිනි යන්ත්‍රයක් ජනාධිපතිතුමා අතින් විදුහල්පතිවරයාට භාර දෙනු ලැබිණ.
හිටපු ජනාධිපති මෛත්‍රීපාල සිරිසේන, රාජ්‍ය අමාත්‍යවරුන් වන රොෂාන් රණසිංහ, සිරිපාල ගම්ලත්, පාර්ලිමේන්තු මන්ත්‍රී අමරකීර්ති අතුකෝරළ, උතුරු මැද පළාත් ආණ්ඩුකාර මහීපාල හේරත්, ජනාධිපති ප්‍රධාන උපදේශක ලලිත් වීරතුංග යන මහත්වරු සහ ජනතා නියෝජිතයෝ, අමාත්‍යාංශ ලේකම්වරු, රාජ්‍ය ආයතන ප්‍රධානීහු ඇතුළු පිරිසක් වෙඩිකච්චිය “ගම සමග පිළිසඳර” වැඩසටහනට එක්ව සිටියහ.

නවතම පුවත්

මත්තල ගුවන් තොටුපළ භාණ්ඩ ප්‍රවාහන කේන්ද්‍රස්ථානයක් ලෙස සංවර්ධනය කරයි

අප්‍රේ 07, 2021
මත්තල ජාත්‍යන්තර ගුවන් තොටුපළ සංචාරකයන් සදහා ආකර්ෂණීය ගුවන් තොටුපළ වශයෙන් මෙන්ම භාණ්ඩ…

අවුරුදු නැකැත් සීට්ටුව ජනපතිට

අප්‍රේ 07, 2021
සිංහල හා දෙමළ අලුත් අවුරුදු නැකැත් සීට්ටුව සාම්ප්‍රදායික, චාරිත්‍රානුකූලව ජනාධිපති ගෝඨාභය…

වහාම ක්‍රියාත්මක වන පරිදි පාම් ඔයිල් ආනයනය තහනම් කෙරේ

අප්‍රේ 06, 2021
වහාම ක්‍රියාත්මක වන පරිදි පාම් ඔයිල් ආනයනය සම්පූර්ණයෙන් තහනම් කිරීමට ජනාධිපති ගෝඨාභය…

පාස්කු දින ප්‍රහාරයේ වින්දිතයන්ට සාධාරණය ඉටු වන තෙක් කිතුනු ජනතා ඉවසීම විශිෂ්ටයි - අගමැති

අප්‍රේ 05, 2021
පාස්කු දින ප්‍රහාරයේ වින්දිතයන් වූ සැමට සාධාරණය ඉටුවන තෙක් වූ කිතුනු ජනතා ඉවස ීම විශිෂ්ට…

අතිගරු ජනාධිපතිතුමාගේ පාස්කු දින පණිවිඩය

අප්‍රේ 04, 2021
පාස්කුව ලෝකවාසී කිතුනු ජනතාවගේ උතුම්ම මංගල්‍යයයි. පාස්කු මංගල්‍යයේ අර්ථය පාපයෙන්…

“ගම සමග පිළිසඳරට” ජනපති උතුරට යයි

අප්‍රේ 03, 2021
වවුනියාවේ ජල ගැටළුවට වසරකදී විසඳුම් … ප්‍රදේශයේ පාසල්වල ගැටළු රැසක් විසඳේ … ශාසනයට දරුවන්…

“ගම සමග පිළිසඳර” හෙට උතුරට

අප්‍රේ 03, 2021
උතුරු පළාතේ “ගම සමග පිළිසඳර” ප්‍රථම වැඩසටහන වව්නියාව දිස්ත්‍රික්කයේ, වව්නියාව උතුර…

කොළඹ ව්‍යාපාරික සංගමයෙන් මාධ්‍යවේදින්ට වට්ටම් කාඩ්පතක්

මාර් 31, 2021
ජනමාධ්‍යවේදීන් සඳහා වට්ටම් සහිත කාඩ්පතක් හදුන්වාදීමේ උත්සවය ජනමාධ්‍ය අමාත්‍ය කෙහෙළිය…

ඝණ අපද්‍රව්‍ය කළමනාකරණය පිළිබඳ විශේෂඥ කමිටු වාර්තාව ජනපතිට භාරදෙයි

මාර් 31, 2021
ඝණ අපද්‍රව්‍ය කළමනාකරණය පිළිබඳ විශේෂඥ කමිටු වාර්තාව අද (31) පස්වරුවේ ජනාධිපති කාර්යාලයේදී…

logo20190228 1

163, ඇසිදිසි මැඳුර, කිරුළපන මාවත, පොල්හේන්ගොඩ, කොළඹ 05

011-2513 459, 011-2513 460,
011-2512 321, 011-2513 498

info@media.gov.lk
facebook
twitter