නවතම පුවත්

ජනාධිපති ගෝඨාභය රාජපක්ෂ මැතිතුමා ලබන බදාදා ජාතිය ඇමතිමට නියමිත බව ජනාධිපති මාධ්‍ය අංශය පවසයි.

රටේ පවතින වත්මන් තත්ත්වය පිළිබඳව එතුමා එහිදි කරුණු දැක්විමට නියමිතයි.

''වාරණය'' වත්මන් රජයේ මාධ්‍ය ප්‍රතිපත්තිය නොවන බව ජනමාධ්‍ය අමාත්‍ය ඩලස් අලහප්පෙරුම මහතා අද(11) පාර්ලිමේන්තුවේ දී අවධාරණය කළේ ය.

''නියාමනය '' රජයේ මාධ්‍ය ප්‍රතිපත්තිය බවත් ලෝකයේ සෑම රටකම තිබෙන ප්‍රජාත්‍රන්තවාදී ආකෘතිය මෙය බව පෙන්වා දුන් අමාත්‍යවරයා, මාධ්‍ය සංවිධාන,සිවිල් සංවිධාන සහ ලෝකයේ දියුණු රාජ්‍ය සමඟ එක්ව නව මාධ්‍ය පිළිබඳ අධ්‍යනය කර මෙරට පුවත්පත් සංශෝධන පනත කෙටුම්පත නැවත අධ්‍යනය කිරීමට බලාපොරොත්තු වන බවද කීය.

සමාජ මාධ්‍ය පාලනය කිරීම සඳහා නව නීති පැනවීමට අදහස් කිරීම සම්බන්ධයෙන් පාර්ලිමේන්තු මන්ත්‍රී ගයන්ත කරුණාතිලක මහතා යොමුකළ වාචික පැනයකට පිළිතුරු දෙමින් අමාත්‍යරයා මේ අඳහස් පැවසීය.

වසර 1973,එනම් මීට වසර 49කට පෙර ආරම්භ කළ පුවත්පත් පනත සංශෝධනය සඳහා 2021 වසරේ අනුමැතිය ලැබී තිබේ.දීර්ග කාලයක් ජනමාධ්‍ය විෂයෙහි අමාත්‍යධූර දැරූ අමාත්‍යවරු මේ සඳහා මූලික පියවර ගෙනඇත. භාෂණායේ නිදහස ආරක්ෂා කර පුරවැසියාගේ පුද්ගලික සීමාව ආක්‍රමණය නොකර මෙම වැඩපිළිවෙළ කිරීමට කර්තෘ සංසදය, විද්‍යුත් ප්‍රකාශකයන්ගේ සංගමය ඇතුළු සියළු දෙනාම එක්ව කටයුතු ආරම්භ කිරීමට බලාපොරොත්තු වන බවද කීය.

වසර ගණනාවක් තුළ මාධ්‍ය ක්ෂේත්‍රය විශාල වශයෙන් ප්‍රසාරණය වී ඇති බව පෙන්වා දුන් අමාත්‍යවරයා,අද වන විට මුද්‍රිත මාධ්‍ය 20ක්,රූපවාහිනී නාලිකා 26ක් සහ ගුවන් විදුලි නාලිකා හා ප්‍රාදේශීය මාධ්‍ය ඇතුළුව සමාජ මාධ්‍ය නොවන මාධ්‍ය 140ක් පමණ මාධ්‍ය ප්‍රමාණයක් මෙරට අතැයිද කිය.

අද වන විට මාධ්‍යවේදියාට වෘත්තීය පුහුණුවක් ලබා ගැනීම සඳහා නිවැරදි ආයතනයක් නොමැති බව පෙන්වා දුන් අමාත්‍යවරයා වෘත්තීය මාධ්‍යවේදියෙක් බිහිකිරීමට අවශ්‍ය ආයතනයක් නොමැති බව පෙන්වා දුන්නේය.

වත්මන් රජය ඒ සඳහා කැපවෙමින් එළඹෙන සැප්තැම්බර් මාසය වන විට වරලත් ජනමාධය ආයතනය ආරම්භ කිරීමට බලාපොරොත්තු වන බවද අමාත්‍යවරයා සඳහන් කළේය.

 

නූතන තාක්ෂණික දැනුමෙන් සන්නද්ධ උසස් මාධ්‍ය කලාවක් මෙන්ම ගෞරවනීය මාධ්‍යවේදීන් බිහිකිරීමේ අරමුණින් ආරම්භ කිරීමට නියමිත ශ්‍රී ලංකාවේ ප්‍රථම වරලත් වෘත්තීය ජනමාධ්‍යවේදී ආයතනය පිහිටුවීම සඳහා සකස් කළ මූලික පනත් කෙටුම්පත ජනමාධ්‍ය අමාත්‍ය ඩලස් අලහප්පෙරුම මහතා වෙත පිළිගැන්වීම මාර්තු 09 වෙනිදා අමාත්‍යාංශ ශ්‍රවණාගාරයේ දී සිදු කෙරිණි.

වෘත්තීය නිපුණත්වයෙන් හෙබි මාධ්‍යවේදීන් බිහිකිරීම කිරීම සඳහා මෙතෙක් අඩුවක්ව පැවති ප්‍රමිතිගත ආයතනයක අවශ්‍යතාව මෙම ආයතනය ආරම්භ කිරීමෙන් සම්පූර්ණ වන අතර ඒ වෙනුවෙන් ඉතා කෙටි කාලයක් තුළ මෙම කෙටුම්පත සකස් කිරීම පිළිබඳව අමාත්‍යවරයා විසින්  කමිටු සාමාජිකයින් වෙත සිය කෘතඥතාවය පළ අතර කඩිනමින් මෙම ආයතනය පිහිටුවීමට ගත හැකි සෑම පියවරක්ම ගන්නා බව අමාත්‍යවරයා වැඩිදුරටත් සඳහන් කළේය.

ඒ අනුව මෙම ආයතනය ආරම්භ කිරීමෙන් පසු ජනමාධ්‍ය ක්ෂේත්‍රයට පිවිසීමට බලාපොරොත්තුවෙන් සිටින තරුණ තරුණියන්ට විශ්වවිද්‍යාලයක මාධ්‍ය පාඨමාලාවකට එහා ගිය ප්‍රායෝගිකත්වයෙන් පූර්ණ වූ උපාධි පාඨමාලා, උසස් ඩිප්ලෝමා පාඨමාලා ඇතුළු පාඨමාලා ගණනාවක් මෙම ආයතනයෙන් හැදෑරීමේ අවකාශය හිමි වෙනු ඇති.

මෙම අවස්ථාවට පාර්ලිමේන්තු මන්ත්‍රී චරිත හේරත්, ජනමාධ්‍ය අමාත්‍යාංශ ලේකම් අනූෂ පැල්පිට, රජයේ ප්‍රවෘත්ති දෙපාර්තමේන්තුවේ අතිරේක ප්‍රවෘත්ති අධ්‍යක්ෂ ජනරාල් මිලින්ද රාජපක්ෂ යන මහත්වරු ඇතුළු සෙසු කමිටු සාමාජිකයින් ද සහභාගී වූහ.

 
දිවයින පුරා ක්‍රිකට් ක්‍රීඩා කරනු ලබන පාසල් අතර බෙදා හැරීම සඳහා ශ්‍රී ලංකා ක්‍රිකට් ආයතනය විසින් ලණු පැදුරු හෙවත් ‘මැටින්’ 200 ක් ශ්‍රී ලංකා පාසල් ක්‍රිකට් සංගමය වෙත ලබාදීමට පියවර ගනු ලැබීය. අවුරුදු 15 න් පහළ, 17 න් පහළ සහ 19 න් පහළ වයස් කාණ්ඩවලට ක්‍රීඩා කිරීම සඳහා හැකිවන පරිදි වූ අඩි 66 ක දිගකින් මෙම මැටින් සමන්විත වේ.
 
ඒ අනුව කොළඹ, ගම්පහ, කලුතර, ගාල්ල, මාතර, හම්බන්තොට, මහනුවර, කෑඝල්ල, නුවරඑළිය, මාතලේ, කුරුණෑගල, අනුරාධපුර,පොළොන්නරුව, පුත්තලම, බදුල්ල, මොණරාගල, රත්නපුර, යාපනය, ත්‍රිකුණාමලය, මඩකලපුව, අම්පාර, වවුනියාව, වුලතිව් මන්නාරම, කිලිනොච්චි යන ප්‍රදේශවල පාසල් සඳහා මෙම මැටින් බෙදාදීම සිදුවනු ඇත.
 
ශ්‍රී ලංකාව තුළ උපත ලබන සහජ දක්ෂතාවයන්ගෙන් යුතු සෑම ක්‍රීඩකයකුටම ජාතික කණ්ඩායම නියෝජනය කිරීමේ සමාන අවස්ථාව උදාකරලීමේ උදාරතර පරමාර්ථය ඇතිව ශ්‍රී ලංකා ක්‍රිකට් ආයතනය විසින් සිදුකරගෙන යනු ලබන ‘ජාතික සංවර්ධන ගමන් මඟ’ වැඩසටහන යටතේ සිදුකරන ලද තවත් කොටසක් ලෙසින් මෙම මැටින් පරිත්‍යාගය සඳහන් කළ හැක.
 
මෙම මැටින් බෙදාදීමේ වැඩසටහන යටතේ පළමුව කළුතර දිස්ත්‍රික්කය විසින් සිදුකළ අතර එහිදී කලුතර දිස්ත්‍රික් ක්‍රිකට් සංගමයේ සභාපති ප්‍රසන්න අමරසේකර මහතාගේ ප්‍රධානත්වයෙන් එම පරිත්‍යාගය සිදුවිය.
 
මූලික අදියර යටතේ පිරිනමනු ලබන මෙම මැටින් 200 ට අමතරව ඉදිරියේදී තවත් මැටින් 200 ක් පරිත්‍යාග කිරීම සඳහා ශ්‍රී ලංකා ක්‍රිකට් ආයතනය බලාපොරොත්තුවෙන් පසුවෙයි. මෙම පරිත්‍යාගයට පෙර ශ්‍රී ලංකා ක්‍රිකට් ආයතනය විසින් ශ්‍රී ලංකාව පුරා පාසල් 650 කට ක්‍රිකට් උපකරණ ලබාදීම සිදුකරන ලදී. මීට අමතරව  ග්‍රාමීය මට්ටමේ සිට ක්‍රිකට් ක්‍රීඩාව සිදුකරගෙන යනු ලබන සෑම පාසලටකම අවශ්‍ය යටිතල පහසුකම් සියල්ල ලබාදීමට පියවරගෙන තිබීම විශේෂත්වයකි. ඒ වෙනුවෙන් කොන්ක්‍රීට් විකට්ටු 200 ක්, පැති පුහුණු තණතීරු 50 ක්, ප්‍රධාන තණතීරු 25 ක් සහ තලන යන්ත්‍ර 300 ක් ලබාදීමටත් ශ්‍රී ලංකා ක්‍රිකට් ආයතනය මේ වන විටත් පියවර ගෙන තිබේ.
 
 

නව වැනි පාර්ලිමේන්තුවේ දෙවැනි සභා වාරයේ පොදු ව්‍යාපාර පිළිබඳ කාරක සභාවේ (කෝප් කමිටුවේ) පළමු වාර්තාව කමිටු සභාපති පාර්ලිමේන්තු මන්ත්‍රී මහාචාර්ය චරිත හේරත් මහතා විසින් ඊයේ (08) පාර්ලිමේන්තුවට ඉදිරිපත් කරන ලදී.

නව වැනි පාර්ලිමේන්තුවේ පළමුවැනි සභා වාරයේදී පොදු ව්‍යාපාර පිළිබඳ කාරක සභාව විසින් කැඳවනු ලැබූ සහ එමගින් විමර්ශනය සිදු කරනු ලැබූ රාජ්‍ය ව්‍යාපාර 12කට අදාළ විමර්ශන මෙම වාර්තාවට ඇතුළත්ව තිබේ.


ඒ අනුව, සීමා සහිත ස්වාධින රූපවාහිනී මාධ්‍යජාලය, ශ්‍රී ලංකා ඛණිජ තෙල් ගබඩා කිරිම හා බෙදා හැරීම පිළිබඳ විශේෂ විගණන වාර්තාව, පොල් සංවර්ධන අධිකාරිය, විදේශ රැකියා ක්ෂේත්‍රයේ වර්තමාන තත්වය අධ්‍යයනය කිරීම සඳහා වූ විශේෂ විගණන වාර්තාව, ශ්‍රී ලංකාවේ ළමා අපචාර සම්බන්ධයෙන් ජාතික ළමා ආරක්ෂණ අධිකාරියේ කාර්යභාරය පිළිබඳ විශේෂ විගණන වාර්තාව, සීමාසහිත රක්ෂණ සංස්ථාව, මධ්‍යම පළාතේ මහනුවර දිස්ත්‍රික්කයේ නායයෑම් අධි අවධානම් කලාපවල ජීවත්වන ලවුල් නැවත පදිංචි කිරීමේ ව්‍යාපෘතියේ කාර්ය සාධනය පිළිබඳ විගණන වාර්තාව , ශ්‍රී ලංකාවේ ප්ලාස්ටික් ආනයනය, භාවිතය සහ පසුභාවිත කළමනාකරණය සම්බන්ධයෙන් වූ පරිසර විගණන වාර්තාව, ලංකා මිනරල් සෑන්ඩ් ලිමිටඩ්, පේරාදෙනිය විශ්ව විද්‍යාලයට අනුබද්ධ පශ්චාත් විද්‍ය උපාධි ආයතනය, ශ්‍රී ලංකා ක්‍රිකට් ආයතනය සහ ජාතික පශු සම්පත් සංවර්ධන මණ්ඩලය යන ආයතන වලට අදාල විමර්ශන මෙම වාර්තාවට ඇතුළත් වේ.

නවවැනි පාර්ලිමේන්තුවේ පළමු සභා වාරය, වාර අවසාන කිරීම හේතුවෙන් සභාගත කිරීමට නොහැකි වූ මෙම වාර්තාව, දෙවැනි සභා වාරයේදී සභාගත කිරීමට කෝප් කමිටුවේ ගරු සාමාජික මන්ත්‍රීවරුන්ගේ එකඟතාවය හිමි විය.

මියගිය නැදුන්ගමුවේ රාජා හස්තියාගේ සිරුර සංරක්‍ෂණය කිරීම දැනටමත් ආරම්භ කර ඇතැයි බුද්ශ ශාසන ආගමික හා සංස්කෘතික කටයුතු අමාත්‍යංශයේ ලේකම් මහාචාර්ය කපිල ගුණවර්ධන මහතා කියයි. එම කටයුතු කඩිනම් කරන්නැයි ජනාධිපතිතුමා සහ අගමැතිතුමා උපදෙස් දී තිබේ. ජාතික කෞතුකාගාර දෙපාර්තමේන්තුව සංරක්‍ෂණ කටයුතු සිදුකරයි. කෙසේ වෙතත් ඒ සඳහා කලක් ගතවනු ඇතැයි ලේකම්වරයා සඳහන් කළේය. නැදුන්ගමුවේ රාජා හස්තියාගේ සිරුර සංරක්‍ෂණය කිරීමෙන් අනතුරුව එය බොහොදුරට මහනුවර දළදා මාළිගා පරිශ්‍රයේ තැන්පත් කෙරෙනු ඇතැයි ඔහු විශ්වාසය පළ කරයි.

මෙරට ජනගහනයෙන් බහුතරය නියෝජනය කරන්නේ කාන්තා‍වන් සේම වර්තමානයේ මෙරට ආර්ථිකයට වැඩිම දායකත්වයක් ලබා දෙන්නේ ද කාන්තාව බැවින් සංකේතාත්මකව නොව අර්ථාන්විතව කාන්තාව සිහිපත් කිරීම වැදගත් බව ජනමාධ්‍ය අමාත්‍ය ඩලස් අලහප්පෙරුම මහතා පෙන්වා දෙයි.‍ මාර්තු 08 වෙනිදාට යෙදෙන ජාත්‍යන්තර කාන්තා දිනය වෙනුවෙන් අමාත්‍යවරයා මේ බව සඳහන් කළේ කොළඹ දී පැවති කැබිනට් තීරණ දැනුම් දීමේ මාධ්‍ය හමුවට එක්වෙමින්.

ඇය මිහි මවට ජීවය ‍ගෙන ආ මාතාවයි, බිරිඳයි, දියණියයි, සොයුරියයි, යෙහෙළියයි, ඇය පණ දුන් අපේ ලෝකයේ ඇයට හිමි තැන කුමක්විය යුතු ද ?දවස් තුන්සිය හැට පහක් ගෙවිලා නැවත අපි මාර්තු 08 වෙනිදාට ප්‍රවේශ වෙලා ඉන්නවා. අද ජාත්‍යන්තර කාන්තා දිනයයි. සංකේතාත්මක සැමරුමකට එහා ගිය අර්ථාන්විත සැමරුමක් වෙනුවෙන් මේ දිනය තුළ අධිෂ්ඨානයක් ඇති කරගැනීම වැදගත් කියල මම කියනවා. රටක් විදිහට ගත්තොත් අපේ රටේ පාර්ලිමේන්තුවේ කාන්තා නියෝජනය සියයට පහක් පමණ වනවා. ඒ කියන්නේ 225න් 13දෙනෙක් කාන්තාවන්. ඒ වගේම ලෝක ජනගහනයෙන් 49.5% ක් කාන්තාවන්. අපේ රටේ ජනගහනයෙන් 51% කට වඩා වැඩියෙන් ඉන්නෙ කාන්තාවන්. ඇඟලුම් ක්ෂේත්‍රය, අපනයන ක්ෂේත්‍රය, තේ කර්මාන්තය, විදෙස් ශ්‍රමය වැනි අපේ රටේ ආර්ථිකයට වැඩිම දායකත්වය දෙන්නෙත් ඉදිරියෙන්ම ඉන්නෙත් කාන්තාවන්. රට ජයග්‍රහණය කර තිබෙන අධ්‍යාපනය, සෞඛ්‍ය වැනි ‍දර්ශක අතරෙත් ඉදිරියෙන් ඉන්නෙ කාන්තාවන්. ස්ත්‍රී පුරුෂ වර්ගීකරණයේ සිට සංස්කෘතික, ආගමික, සමාජීය, දේශපාලනික ආර්ථික ආදී සාධක මත පක්ෂාග්‍රාහී නොවන සමාජ පසුබිමක් නිදහස් අවකාශයක් මානව පරිසරයක් ලෝක කාන්තා ප්‍රජාව වෙනුවෙන් නිරීමාණය කිරීම අප සැමගේ පරම යුතුකම හා වගකීමයි.

ප්‍රායෝගිකව කාන්තාව අපේ සමාජයේ දෙවැනි පන්තියේ, තුන්වෙනි පන්තියේ පුරවැසියන් නොකිරීමට වගේම සමාන අයිතිවාසිකම් සහිතව ජීවත්වීමට ඇයට ඉඩ ලබා දීමට අපි කටයුතු කරමු යැයි  මම යෝජනා කරන්න කැමතියි.

මෙම අවස්ථාවට රජයේ ප්‍රවෘත්ති අධ්‍යක්ෂ ජනරාල් මොහාන් සමරනායක, අතිරේක ප්‍රවෘත්ති අධ්‍යක්ෂ ජනරාල් මිලින්ද රාජපක්ෂ යන මහත්වරුන් ද එක්ව සිටියහ.

මවක, දියණියක, සොහොයුරියක මෙන් ම මිත්තණියක ලෙස මුළු මහත් සමාජයට මග පෙන්වන ධෛර්ය සම්පන්න කාන්තාවන්ගේ කැපවීම සිහිපත් කෙරෙන ජාත්යන්තර කාන්තා දින ජාතික සැමරුමට ශුභාශිංසන පළ කරනුයේ ඉමහත් සතුටිනි.
තිරසාර සමාජයක් වෙනුවෙන් සිය ජීවිත කාලය පුරා දයාව කරුණාව හා පෞරුෂත්වය බෙදා දෙන කාන්තාවගේ මහ මෙහෙවර අගය කිරීම එක් දිනකට සීමා කළ නොහැකි ය. ඔවුන් ඉටු කරන අනගිභවනීය මෙහෙවර මෙතෙකැයි කියා නිම කළ නොහැකි බව මාගේ විශ්වාසයයි.
මානව වංශය වෙනස් කළ සියලු ශාස්තෘවරුන් බිහි කිරීමේ පටන් මානව පැවැත්ම සාක්ෂාත් වන සියලු දෑ සඳහා කාන්තාව මුල් වන බව නොරහසකි. ලොව සියල්ල නිර්මාණය වී ඇත්තේ හිරු කිරණින් හා මවු කිරෙන් බව ප්රකට රුසියානු ගත්කතුවර මැක්සිම් ගෝර්කි පෙන්වා දෙන්නේ මේ නිසා ය.
ඉතිහාසය ඔප කළ වීර කාන්තා පරපුර අනුව යමින් ශ්රී ලාංකික කාන්තාව අද වන විට සමාජයීය වගකීම් දරමින් නොපසුබටව ඉදිරියට පැමිණෙමින් සිටී. මෙසේ ඉදිරියට පැමිණෙන ධෛර්ය සම්පන්න කාන්තාවන්ට ශක්තියක් වීමට අප රජය ඉදිරියටත් ක්රියා කරන බව විශ්වාසයෙන් යුතුව ප්රකාශ කරමි.
කොවිඩ් වසංගත තත්ත්වය සමඟ පැමිණි විවිධ දුෂ්කරතා හමුවේ දුර දක්නා නුවණින්, අරපිරිමැස්මෙන් සහ ඉවසීමෙන් කටයුතු කරන මෙරට සියලු කාන්තාවන් රට හමුවේ පවතින අභියෝග ජය ගැනීම සඳහා ලබා දෙන විශිෂ්ට දායකත්වය මෙහි දී විශේෂයෙන් සිහිපත් කළ යුතුය.
"තිරසාර හෙටක් සඳහා අද ස්ත්රී පුරුෂ සමානාත්මතාව" තේමාවෙන් මෙවර සමරනු ලබන ජාත්යන්තර කාන්තා දිනයේ දී අපගේ අපේක්ෂාව වන්නේ ද ඔබට එරෙහි ප්රචණ්ඩත්වය සහ වෙනස් කොට සැලකීම ශ්රී ලාංකික ජන සමාජයෙන් තුරන් වන දිනයක් උදාකිරීමයි.
"රටකි, දැයකි, ලොවකි ඇය" දේශීය තේමාවෙන් පවත්වන ජාත්යන්තර කාන්තා දින ජාතික උත්සව මාලාව ඔස්සේ රටේ ජීවනාලිය බඳු කාන්තාවගේ භූමිකාව අපේක්ෂිත ආකාරයට නිසි ලෙස ඇගයීමට ලක්වනු ඇතැයි මම විශ්වාස කරමි.
ඔබ "ඇය"ට හිමි අභිමානය පුද දෙන්න දෙවරක් නොසිතන්න. සියලු කාන්තාවන්ට සම අයිතිවාසිකම් ලබමින් සමාජය තුළ අභිමානවත්ව නැගී සිටීමට ශක්තිය ධෛර්ය උදාවේවා යැයි ප්රාර්ථනා කරමි.

ඉතිහාසය පුරා මානව ප්රයත්නයන්හි සෑම ක්ෂේත්රයක ම, විශේෂයෙන් සමාජ සංවර්ධනයේ ගමන් මඟ තුළ කාන්තාව විසින් ලබා දුන් විශේෂ දායකත්වය අතිමහත් ය. කාන්තා සවිබලගැන්වීමේ වැදගත්කම තහවුරු කරමින් භෞතික මෙන් ම මානව සංවර්ධන ඉලක්කයන් ද සාක්ෂාත් කර ගැනීම පිණිස කැප වන ලෙස, ජාත්යන්තර කාන්තා දිනය අප සැමට ආරාධනා කරන බව මම විශ්වාස කරමි.
නවෝත්පාදනය, තාක්ෂණය හා මාධ්ය විසින් මෙහෙයවනු ලබන ගෝලීයකරණය හමුවේ සියලු අංශයන්හි කාන්තාවගේ භූමිකාව පුළුල් වෙමින් පවතී. කාන්තාව විසින් ඉටු කරන කාර්යභාරය ජාතික ආර්ථිකය, ප්රජාවන් හා පවුල ශක්තිමත් කිරීමට අත්යවශ්ය වේ. කෙසේ වෙතත්, අප සමාජයේ බහුතරය කාන්තාවන් වුව ද, ආර්ථික හා දේශපාලන ක්ෂේත්රවල කාන්තාවගේ පූර්ණ සහභාගිත්වය සාපේක්ෂව අඩු බව පෙනී යයි.
ශ්රී ලංකාව යනු සත්යය, සාධාරණත්වය හා සමානාත්මතාවය යන ගුණාංග මත පදනම් ව කාන්තාවන්ට ගරු කිරීමට ඇරයුම් කරන උතුම් බෞද්ධ සංස්කෘතියෙන් පෝෂණය වූ රටකි.
කාන්තාවන්ගේ නිදහස සහ අයිතිවාසිකම් තහවුරු කිරීමට ජාතියක් වශයෙන් කැප වී සිටීම අතිශයින් වැදගත් වේ.
සියලු අවකාශයන්හි කාන්තාව මුහුණ දෙන අභියෝග සැලකිල්ලට ගනිමින්, අප රට තුළ ස්ත්රී-පුරුෂ සමාජභාවය මත පදනම් වී කරනු ලබන වෙනස්කම් සහ කාන්තාවගේ අයිතිවාසිකම් කඩවීම් පිළිබඳව විශේෂ අවධානය යොමු කරමින්, ස්ත්රී-පුරුෂ සමතාව සහ සමානාත්මතාවය තහවුරු කිරීමට සහ ඒ පිළිබඳව සොයා බලා සිය නිර්දේශ වාර්තා කිරීම සඳහා වූ පාර්ලිමේන්තු විශේෂ කාරක සභාවක් පත් කිරීමට අප රජය විසින් පියවර ගෙන තිබීම පිළිබඳ මම බෙහෙවින් සතුටු වෙමි.
“සෞභාග්යයේ දැක්ම” ජාතික ප්රතිපත්ති ප්රකාශනයේ සඳහන් අභිමතාර්ථ සාධනය කර ගැනීම වෙනුවෙන් රජය කාන්තාවන් සවිබලගැන්වීම සඳහා තවදුරටත් කැප වෙමින් සිටියි.
“රටකි, දැයකි, ලොවකි, ඇය” යන්න තේමාව කරගනිමින් පවත්වනු ලබන මෙවර කාන්තා දින සැමරුම වෙනුවෙන්, ජාතියේ අභිමතාර්ථ සාක්ෂාත් කර ගැනීමට සියලු කාන්තාවන්හට තම උපරිමයෙන් දායක විය හැකි අනාගතයක් නිර්මාණය කිරීම වෙනුවෙන් එක් වන ලෙස සියලු දෙනාහට ආරාධනා කරමි.

ජාත්‍යන්තර කාන්තා දිනය අදයි. 1857 ඇමරිකාවේ නිව්යෝක් නගරයේ ඇගලුම් කම්හලක සේවිකාවන් එහි පාලනාධිකාරියට එරෙහිව ගෙන ගිය උද්ඝෝෂණයක් එම දිනය ප්‍රකාශයට පත් කිරීමට මුල් විය. ආයතනයේ පැවති වැඩ කිරීමට නුසුදුසු වාතාවරණය හා අඩු වැටුප් ගෙවීමට එරෙහිව එම උද්ඝෝෂණය පැවැත්විණි. සෑම වසරකම මාර්තු 8 වැනිදා ජාත්‍යන්තර කාන්තා දිනය ලෙස ප්‍රකාශයට පත් කිරීමට ජර්මන් ජාතික ක්ලාරා සෙට්කින් මහත්මිය 1910 ඩෙන්මාර්ගයේ කෝපන්හේගන් නගරයේ පැවති ලෝක කාන්තා සම්මේලන සමුඵවට ඉදිරිපත් කළ යෝජනාවක් ඒකමතිකව සම්මත විය. රටවල් 17 ක් නියෝජනය කරමින් කාන්තාවෝ 100 කට අධික පිරිසක් සමුඵවට එක්ව සිටියහ. 1911 මාර්තු 8 වැනිදා සිට එම යෝජනාව ක්‍රියාත්මක කෙරිණි. ජාත්‍යනතර කාන්තා දිනය සැමරීම මුලින්ම ආරම්භ කළේ ජර්මනියයි. 1978 මාර්තු 8 වැනිදා සිට ශ්‍රිී ලංකාව නිල වශයෙන් ජාත්‍යන්තර කාන්තා දිනය සමරයි.
තිරසර හෙටක් සඳහා අද දිනයේ ස්ත්‍රී පුරුෂ සමානාත්මතාව යන්න මෙවර කාන්තා දින අන්තර්ජාතික තේමාවයි. ශ්‍රිී ලංකාව තෝරා ගෙන ඇති තේමාව රටකි-දැයකි-ලොවකි ඇය යන්නයි. ජාත්‍යන්තර කාන්තා දින සැමරුම් ජාතික උත්සවය කොළඹ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලා පරිශ්‍රයේ පිහිටි සිරිමාවෝ බණ්ඩාරනායක අනුස්මරණ ප්‍රදර්ශන මධ්‍යස්ථානයේදී පැවැත්වෙයි. ජනාධිපති ගෝඨාභය රාජපක්ෂ මැතිතුමා හා අගමැති මහින්ද රාජපක්ෂ මහතා එහි ප්‍රධාන ආරාධිතයෝ වෙති. ව්‍යාපාරික කාන්තාවන් 25 දෙනෙකු ඇගයීම හා කාන්තා ව්‍යවසායකයන් වෙනුවෙන් ඊ පොල ක්‍රියාත්මක කිරීම එහිදී සිදු වෙයි. කාන්තා නිෂ්පාදන ඇතුළත් ප්‍රදර්ශනයක් හා අලෙවි පොලක් ද එහිදී විවෘත කෙරේ. අලෙවි කුටි 80 කින් එය සමන්විතයි.
ජාත්‍යන්තර කාන්තා දිනයට සමගාමීව අද සිට පුරා මාසයක් දීපව්‍යාප්ත මට්ටමින් විවිධ වැඩසටහන් ක්‍රියාත්මක කිරිීමට සැලසුම් කර ඇතැයි රාජ්‍ය ඇමති පියල් නිශාන්ත මහතා පවසයි.
තාක්ෂණික ක්‍ෂේත්‍රයට යොමු වන කාන්තාවන් වෙනුවෙන් යුනෙස්කෝ සංවිධානය සමග එක්ව විශේෂ වැඩසටහනක් ක්‍රියාත්මක කිරීමට සැලසුම් කර ඇතැයි ප්‍රංශයේ ශ්‍රීී ලංකා තානාපති මහාචාර්ය ක්ෂණිකා හිරිඹුරේගම මහත්මිය පවසයි. ජාත්‍යන්තර කාන්තා දිනයට සමගාමිව එය ක්‍රියාත්මක කෙරෙනු ඇත.
දේශපාලනයේ කාන්තා නියෝජනය ඉහල නැංවීමේ අවශ්‍යතාව පාර්ලිමේන්තු මන්ත්‍රී කෝකිලා ගුණවර්ධන මහත්මිය පෙන්වා දෙයි.
වත්මන් සමාජයේ පිරිමින් මෙන්ම කාන්තාවන් ද රැකියාවල නිරත වන බැවින් අතීතයේ කාන්තාවට පැවරී තිබු කාර්ය භාරයන් වර්තමානයේ කාන්තා හා පිරිමි දෙපාර්ශ්වයටම ඉටු කිරීමට සිදුවී ඇතැයි අන්තරායකර ඖෂධ පාලක ජාතික මණ්ඩලයේ හිටපු අධ්‍යක්ෂ ජනරාල් කේ ගමගේ මහතා පෙන්වා දෙයි.

රජයේ සහ රජයේ අනුමත පෞද්ගලික පාසල්වල අධ්‍යපන කටයුතු අද සිට යළි ඇරඹෙයි. කොවිඩ් අවදානම සැලකිල්ලට ගනිමින් සිසුන් කොටස් වශයෙන් පාසල් වෙත කැදවිමට සැලසුම් කර ඇතැයි අධ්‍යාපන අමාත්‍යංශය පවසයි. අමාත්‍යාංශයේ ලේකම් මහාචාර්ය කපිල පෙරේරා මහතා පෙන්වා දෙන්නේ රටේ පවතින අර්බුදකාරී තත්ත්වය මත අධ්‍යාපන ක්ෂේත්‍රයේ කටයුතු නතර කළ නොහැකි බවයි. අභියෝග මධ්‍යයේ පවා විභාග රැසක් පවත්වා අවසන් කිරීමට හැකි විය. නව පාසල් වාරය ආරම්භ කළ පසු කටයුතු කළ යුතු ආකාරය පිළිබඳව ද දැනටමත් සාකච්ඡා කර තිබේ.

හම්බන්තොට මිරිජ්ජවිල ඉදිකෙරෙනු අතිනවීන පහසුකම්වලින් සමන්විත සිමෙන්ති කර්මාන්ත ශාලාව ජනාධිපති ගෝඨාභය රාජපක්ෂ සහ අග්‍රාමාත්‍ය මහින්ද රාජපක්ෂ යන මහත්වරුන්ගේ ප්‍රධානත්වයෙන් අද විවෘත වෙයි. මාගම්පුර ලංවා කර්මාන්තපුරයේ අක්කර 63 ක භුමි භාගයක ඉදිකර ඇති මෙම කර්මාන්ත ශාලාව කලාපයේ විශාලතම සිමෙන්ති කර්මාන්ත ශාලා අතරින් එකකි. ශ්‍රී ලංකා අපනයන මණ්ඩලයේ අනුමැතිය හිමි ව්‍යාපෘතියක් වන ලංවා සංස්ථා සිමෙන්ට් කොපරේෂන් සමාගමේ සම්පුර්ණ වාර්ෂික නිෂ්පාදන ධාරිතාව මෙට්‍රික් ටොන් මිලියන හතරකි. මුල් අදියරේ එහි වාර්ෂික ධාරිතාව මෙට්‍රික් ටොන් මිලියන 2 යි දශම 8 ක් වනු ඇත. යුරෝපයේ නිෂ්පාදිත නවීන යන්ත්‍රෝපකරණ භාවිත වන බැවින් අපතේයාම අවම වනු ඇතැයි සමාගම පෙන්වා දෙයි. නිෂ්පාදන කටයුතු ආරම්භ වීමෙන් පසු කොළඹ වරාය නගරය සහ අධිවේගි මාර්ග ඇතුඵව ප්‍රධාන පෙලේ ඉදිකිරීම් ව්‍යාපෘති සදහා අවශ්‍ය සිමෙන්ති සැපයීමට නව කර්මාන්ත ශාලාවට හැකිවනු ඇතැයි සමාගමේ සභාපති නන්දන ලොකුවිතාන මහතා පවසයි.

නවතම පුවත්

ධම්මික පෙරේරා ආයෝජන ප්‍රවර්ධන අමාත්‍ය ධුරයේ දිවුරුම් දෙයි

ජූනි 24, 2022
පාර්ලිමේන්තු මන්ත්‍රී ධම්මික පෙරේරා මහතා ආයෝජන ප්‍රවර්ධන අමාත්‍ය ධුරයේ දිවුරුම් දෙයි.…

වාකරේ ගොවි බිම් නිරීක්ෂණයට

ජූනි 22, 2022
කෘෂිකර්ම අමාත්‍යංශය යටතේ ක්‍රියාත්මක කෘෂි ක්ෂේත්‍ර නව්‍යකරණ ව්‍යාපෘතිය මගින් ක්‍රියාවට…

අගමැති සහ චීනයේ නියෝජ්‍ය තානාපති අතර සාකච්ඡාවක්

ජූනි 22, 2022
අග්‍රාමාත්‍ය රනිල් වික්‍රමසිංහ මහතා සහා චීනයේ නියෝජ්‍ය තානාපති Hu Wei මහතා අතර 21 උදෑසන…

ඉන්ධන හිගය හේතුවෙන් අද සිට පොදු ප්‍රවාහන සැලැස්මක්

ජූනි 15, 2022
ඉන්ධන හිගය හමුවේ ආර්ථිකය සහ ජනජීවිතය අඩාල නොවී පවත්වාගෙන යාම අරමුණු කර අද සිට පොදු…

පොසොන් පොහෝය දින පණිවිඩය -  ජනපති

ජූනි 15, 2022
නව අරුත් සහිත අනන්‍යතාවක් සේ ම සංස්කෘතික ප්‍රබෝධයක් ඇති කළ, මහින්දාගමනය සිදු වූ පොසොන්…

පොසොන් පොහෝය දින පණිවිඩය -  අග්‍රාමාත්‍ය 

ජූනි 14, 2022
පොසොන් පොහෝ දිනය ශ්‍රී ලාංකික ජාතික සංස්කෘතියේ සමාරම්භක දිනය ලෙස චිරාගතව ශ්‍රී ලාංකික…

රාජ්‍ය මාධ්‍ය ආයතන සදහා නව ප්‍රධානීන් පත් කරයි...

ජූනි 13, 2022
රාජ්‍ය මාධ්‍ය ආයතන සදහා නව සභාපතිවරුන් පුමුඛ අධ්‍යක්ෂ මණ්ඩල සමාජිකයන් පත්කර තිබේ .…

වරාය නගර ව්‍යාපෘතියට විදේශ ආයෝජන ආකර්ෂණය සඳහා සුවිශේෂී බදු සහන

ජූනි 07, 2022
වරාය නගර ව්‍යාපෘතිය සඳහා විදේශ ආයෝජන ආකර්ෂණය කරගැනීම සඳහා සුවිශේෂී බදු සහන වර්ෂ 40ක…

පාර්ලිමේන්තු ලේඛන මෘදු පිටපත් ලෙස පමණක් ප්‍රකාශයට පත් කිරීමට තීරණයක්

ජූනි 07, 2022
පාර්ලිමේන්තුවට ඉදිරිපත් කරනු ලබන මුද්‍රිත වාර්ෂික වාර්තා ඇතුළු ලේඛන මෘදු පිටපත් ලෙස පමණක්…

අමාත්‍ය මණ්ඩල තීරණ- 2022-06-06

ජූනි 07, 2022
අමාත්‍ය මණ්ඩල තීරණ- 2022-06-06

logo20190228 1

163, ඇසිදිසි මැඳුර, කිරුළපන මාවත, පොල්හේන්ගොඩ, කොළඹ 05

011-2513 459, 011-2513 460,
011-2512 321, 011-2513 498

info@media.gov.lk
facebook
twitter