දිවයින පුරා පිහිටි පාසල්වල සිසුන් ඉලක්ක කර පාසල් මාධ්‍ය සාක්ෂරතාව ප්‍රවර්ධනය කිරීම සඳහා ස්වාධීන රූපවාහිනී මාධ්‍ය ජාලය සහ රජයේ ප්‍රවෘත්ති දෙපාර්තමේන්තුව අවබෝධතා ගිවිසුමකට අත්සන් තබා ඇත.
ශ්‍රී ලාංකික පාසල් දරුවන්ගේ සන්නිවේදන සහ මාධ්‍ය අධ්‍යයන විෂය සංවර්ධනය සහ ඊට අදාළ වෘත්තීයමය වටිනාකම ලබාදීම/ දියුණු පාසල් මාධ්‍ය සාක්ෂරතාවක් ගොඩනැඟීම මෙහි අරමුණයි. මෙම ව්‍යාපෘතිය මුළු දිවයිනම ආවරණය වන ලෙස සමස්ත පාසල් පද්ධතියම ආවරණය කරමින් ක්‍රියාත්මක වීමට නියමිතය.
අධ්‍යාපන අමාත්‍යාංශය, ජනමාධ්‍ය අමාත්‍යාංශය, ප්‍රවෘත්ති දෙපාර්තමේන්තුව සහ ස්වාධීන රූපවාහිනී මාධ්‍ය ජාලය මෙම දැවැන්ත ව්‍යාපෘතිය ක්‍රියාත්මක කරනු ලබයි.
මානව හිතවාදී, ගුණාත්මක මාධ්‍ය සංස්කෘතියක් උදෙසා, පාසල් ජනමාධ්‍ය සමාජ ප්‍රවර්ධන ජාතික වැඩසටහන යටතේ පාසල් ශිෂ්‍ය ශිෂ්‍යාවන්ගේ මාධ්‍ය සාක්ෂරතාව වර්ධනය කිරීම සඳහා ජනමාධ්‍ය අමාත්‍යාංශය, අධ්‍යාපන අමාත්‍යාංශය, රජයේ ප්‍රවෘත්ති දෙපාර්තමේන්තුව සහ ITN මාධ්‍ය ජාලය එක්ව සංවිධානය කරන මෙම වැඩසටහන යටතේ දිවයින පුරා විසිරී සිටින පාසල් මාධ්‍ය සමාජවල සාමාජික සිසුන්ට සිය නිර්මාණ ඉදිරිපත් කිරීමේ අවස්ථාවක් ද උදාවනු ඇත. එම නිර්මාණ වෙනුවෙන් පවත්වන ජාතික රාජ්‍ය සම්මාන උලෙළක් Contents Colombo 2025 – Kids Version නමින් ලබන වසර අවසානයේදී පැවැත්වීමට නියමිතය.
මෙම අවස්ථාව සඳහා ජනමාධ්‍ය අමාත්‍ය විජිත හේරත්, එම අමාත්‍යාංශයේ ලේකම්, ප්‍රවෘත්ති අධ්‍යක්ෂ ජනරාල්, ස්වාධීන රූපවාහිනී මාධ්‍ය ජාලයේ සභාපති ප්‍රියන්ත වෙදමුල්ල ඇතුළු විශාල පිරිසක් මෙම අවස්ථාවට සහභාගි වූහ.
