ගරු සේවාවක් වශයෙන් උප තැපැල් කාර්යාල 6ක් මුල්කර ගනිමින් ඇරැඹි උප තැපැල් ස්ථානාධිපති සේවාව මේ වන විට රට පුරා තැපැල් කාර්යාලය 3410ක් දක්වා ව්‍යාප්තව ඇතැයි සෞඛ්‍ය හා ජනමාධ්‍ය ඇමැති වෛද්‍ය නලින්ද ජයතිස්ස මහතා ප්‍රකාශ කළේය.
ඒ මහතා මේ බව පැවසුවේ ශ්‍රී ලංකා තැපැල් දෙපාර්තමේන්තුවේ මානව සම්පත ඉහළ නැංවීමට අවශ්‍ය උප තැපැල් ස්ථානාධිපතිවරු 378 දෙනකුට ස්ථිර පත්වීම් ලිපි පිරිනැමීම සඳහා කොළඹ දිස්ත්‍රික් ලේකම් කාර්යාලයේ පැවති උත්සවය අමතමිනි.
සම්මුඛ පරීක්ෂණ මඟින් තෝරාගත් වැඩ බලන උප තැපැල් ස්ථානාධිපතිවරුන් 378 දෙනකු සඳහා ස්ථිර විශ්‍රාම වැටුප් සහිත පත්වීම් දීමට විශේෂ අමාත්‍ය මණ්ඩල අනුමැතියක් ගැනීමෙන් අනතුරුව මෙම පත්වීම් පිරිනැමීමට කටයුතු යොදා තිබිණි.
එහිදී ඒ මහතා මෙසේ ද කීවේය.
උප තැපැල් කාර්යාල පවත්වාගෙන යෑම සඳහා ගොඩනැඟිල්ල උප තැපැල් ස්ථානාධිපතිවරුන් සොයාගත යුතු අතර, ඒ සඳහා දීර්ඝ කාලයක් රජයෙන් ගෙවනු ලැබූයේ රුපියල් 1500ක සුළු දීමනාවකි. 2025.04.01 වැනි දින සිට එම දීමනාව ඔවුන් උපයන ආදායම ද පදනම් කර ගනිමින් රු.7500 දක්වා වැඩි කිරීමට නව රජය කටයුතු කළ බව ද පැවසූ අමාත්‍යවරයා උප තැපැල් ස්ථානාධිපතිවරුන්ගේ බඳවා ගැනීම් පටිපාටියෙහි පැවති ගැටලු සහිත කරුණු සංශෝධනය කර යෝග්‍යතා ඇගැයීමේ සම්මුඛ පරීක්ෂණයකින් බඳවා ගැනීමට අවශ්‍ය සංශෝධන සිදු කර ඇති බව ද පැවසීය.
මෙම සම්මුඛ පරීක්ෂණ ක්‍රමය අනුමත වීමට පෙර වැඩ බැලීමට යොදවනු ලැබූ 196 දෙනාට ස්ථිර පත්වීම් දීම සඳහා අමාත්‍ය මණ්ඩල සංදේශයක් මේ වන විටත් ඉදිරිපත් කර ඇති බවත් ඒ සඳහා ලැබෙන අමාත්‍ය මණ්ඩල තීරණය අනුව ඔවුන්ට ස්ථිර පත්වීම් දීම නුදුරු කාලයේදී සිදු කිරීමට අදහස් කරන බව ද අමාත්‍යවරයා පෙන්වා දුන්නේය.
යමෙක් නොසලකා හැරීමට හෝ පළි ගැනීමට අවශ්‍ය නම්, තැපැල් අමාත්‍ය ධුරය දීමේ යුගයක් තිබුණු බවත් තැපැල් අමාත්‍ය ධුරය භාර ගැනීමට බොහෝ අය අකැමැති වුවත් තමන් තැපැල් අමාත්‍ය ධුරය භාරගෙන වැඩ කිරීමට ඉමහත් කැමැත්තක් දක්වන බවත් හෙතෙම පැවසීය.
තැපෑලට වටිනාකමක් දිය යුත්තේ විෂයභාර අමාත්‍යවරයාගේ සිට බව ද කී ඒ මහතා අනාගතයේ අමාත්‍ය ධුර ගැසට් කරන විට සෞඛ්‍ය, ජනමාධ්‍ය හා තැපැල් යනුවෙන් එක් කිරීම වඩාත් සුදුසු බවට තමා යෝජනා කරන බව ද පැවසීය.
තැපෑල සංවර්ධනය කිරීමේ ක්‍රියාවලිය ශක්තිමත් කිරීමට සියලු වෘත්තීය සමිතිවල දායකත්වය දෙන ලෙස මෙහිදී අමාත්‍යවරයා විවෘත ඉල්ලීමක් කරනු ලැබීය. වෘත්තීය සමිති අතර තිබෙන තරගය නිසා හෝ මීළඟ වසරේ තනතුරු ගැනීමේ අරමුණින් සාම්ප්‍රදායික ලෙස තැපැල් සේවා කඩාකප්පල් කිරීමට, ක්‍රියා කිරීම තේරුමක් නොමැති බවත් සේවාවේ විශ්වාස පළුදු කර ගැනීමකින් තොරව ක්‍රියා කරන ලෙසත් අමාත්‍යවරයා සඳහන් කළේය.
තැපැල් සේවාව නවීන තාක්ෂණික ක්‍රමවේද ඔස්සේ ව්‍යාප්ත කරමින් තැපෑල දියුණු කිරීමට සැමදෙනා එක්වන ලෙස ද මෙහිදී අමාත්‍යවරයා වැඩිදුරටත් ඉල්ලා සිටියේය.
තැපැල්පති රුවන් සත්කුමාර, සෞඛ්‍ය හා ජනමාධ්‍ය අමාත්‍යාංශයේ ලේකම් විශේෂඥ වෛද්‍ය අනිල් ජාසිංහ මහත්වරු ද අදහස් පළ කළහ.
මේ අවස්ථාවට නියෝජ්‍ය තැපැල්පති (පාලන) චමීෂා ද සිල්වා, කොළඹ දිස්ත්‍රික් අතිරේක ලේකම් එම්.ඒ.එස්. කාංචනා ගුණවර්ධන, උප තැපැල් කාර්යාල අධිකාරි එච්.එම්.ඒ.ජේ බණ්ඩාර යන මහත්ම මහත්මීන් මූලස්ථාන නියෝජ්‍ය තැපැල්පතිවරුන්, තැපැල් දෙපාර්තමේන්තු මාණ්ඩලික නිලධාරීන් ඇතුළු පත්වීම්ලාභීහු එක්ව සිටියහ.
