ජනාධිපති මෛත්‍රීපාල සිරිසේන මැතිතුමා විසින් ලබන 15 වැනි දා සිට 17 දින දක්වා සිදු කිරීමට නියමිත මැලේසියාවේ නිල සංචාරය තුළ ද්විපාර්ශවීය ගිවිසුම් කිහිපයක් ම අත්සන් කිරීමට නියමිත බව පාර්ලිමේන්තු ප්‍රතිසංස්කරණ හා ජනමාධ්‍ය අමාත්‍ය ගයන්ත කරුණාතිලක මහතා පැවසීය.
පාර්ලිමේන්තු සංකීරණයේ අද (07) පැවැති අමාත්‍ය මණ්ඩල තීරණ දැනුම් දීමේ මාධ්‍ය හමුවේදී අමාත්‍යවරයා මේ බව සඳහන් කළේය.
ඒ සඳහා අමාත්‍ය මණ්ඩල අනුමැතිය ඊයේ (06) ලැබී ඇති අතර එම යෝජනාව වැඩබලන විදේශ කටයුතු අමාත්‍ය (ආචාර්ය) හර්ෂ ද සිල්වා කැබිනට් මණ්ඩලයට ඉදිරිපත් කළේය.
පහත සඳහන් ගිවිසුම් සඳහා අමාත්‍ය මණ්ඩල අනුමැතිය ලැබී ඇත.
* සංචාරක කර්මාන්තය ආශ්‍රිත ක්‍රියාකාරකම්හි සහයෝගිතාව පිළිබඳව වන අවබෝධතා ගිවිසුම.
* පුහුණු, පර්යේෂණ හා රාජ්‍ය පරිපාලන ක්ෂේත්‍රයේ සහයෝගිතාව පිළිබඳව වන අවබෝධතා ගිවිසුම.
* ශ්‍රී ලංකා කෘෂිකර්ම පර්යේෂණ ප්‍රතිපත්ති සභාව සහ මැලේසියානු කෘෂිකර්ම පර්යේෂණ හා සංවර්ධන ආයතනය අතර වන අවබෝධතා ගිවිසුම.
* ශ්‍රී ලංකාවේ වැවිලි කර්මාන්ත අමාත්‍යාංශය සහ මැලේසියාවේ වැවිලි කර්මාන්ත හා පාරිභෝගික භාණ්ඩ අමාත්‍යාංශය අතර වන අවබෝධතා ගිවිසුම.
* සංස්කෘතික, කලා හා උරුමය පිළිබඳ ක්ෂේත්‍රයෙහි සහයෝගිතාව පිළිබඳව වන අවබෝධතා ගිවිසුම.
* තරුණ සංවර්ධන ක්ෂේත්‍රයෙහි සහයෝගිතාව පිළිබඳව වන අවබෝධතා ගිවිසුම.
