"ප්‍රවාහන මහාමාර්ග හා ජනමාධ්‍ය අමාත්‍ය ආචාර්ය බන්දුල ගුණවර්ධන මහතාගේ ජන්ම දිනයට සමගාමීව සංවිධානය කෙරුණු " සතරාව දීපනී" කෘතගුණ දැක්වීමේ උළෙල ජනාධිපති රනිල් වික්‍රමසිංහ මහතාගේ ප්‍රධානත්වයෙන් අති උත්කර්ෂවත් ලෙස අද (16) කොළඹ ,බණ්ඩාරනායක,ජාත්‍යන්තර සම්මන්ත්‍රණ ශාලාවේ දී පැවැත්විණ
මේ අවස්ථාවට අග්‍රාමාත්‍ය දිනේෂ් ගුණවර්ධන මහතා ප්‍රමුඛ සම්භාවනීය ආරාධිත අමුත්තන් රැසක් එක්වූහ.
උත්සවයේ ප්‍රධාන අංගයක් ලෙස ආචාර්ය බන්දුල ගුණවර්ධනයන්ගේ දායකත්වයෙන් නිර්මාණය කළ කලා කෘති උදෙසා දායක වූ කලාකරුවන් පිරිසකට උපහාර දැක්වීම අතිගරු ජනාධිපති රනිල් වික්‍රමසිංහ මහතාගේ ප්‍රධානත්වයෙන් සිදු කෙරිණි.
මහාචාර්ය ආරියරත්න ඇතුගල, කුමාර තිරිමාදුර, සරත් කොතලාවල,ධර්මසිරි බණ්ඩාරනායක, පරාක්‍රම නිරිඇල්ල, සිරිල් වික්‍රමගේ යන ප්‍රවීණ නිර්මාණ ශිල්පීන් මෙහිදී ඇගයීමට ලක් කෙරිණි.
මහාචාර්ය ප්‍රනීත් අබේසුන්දර, ඇ ඪ් රන්ජිත් කුමාර, අරුණ ගුණරත්න, දිනුෂ කුඩාගොඩගේ යන ප්‍රවීණ මාධ්‍යවේදීන් විසින් ආචාර්ය බන්දුල ගුණවර්ධනයන්ගේ සිනමා දිවිය අළලා රචිත "සුබන්ධු සිනමා වත" කෘතිය එළිදැක්වීමද මීට සමගාමීව සිදු කෙරිණි.
අමාත්‍ය ආචාර්ය බන්දුල ගුණවර්ධන මහතාගේ සංකල්පයක් අනුව පාසල් සිසු දරු දැරියන් උදෙසා ක්‍රියාත්මක කෙරෙන ප්‍රඥා බන්දු ශිෂ්‍යත්ව වැඩසටහන යටතේ මෙවර උසස් පෙළ තාක්ෂණවේදය විෂය ධාරාව හදාරණ දූ දරුවන් 251 දෙනෙකු වෙනුවෙන් ශිෂ්‍යත්ව පිරිනැමීම අග්‍රමාත්‍ය දිනේෂ් ගුණවර්ධන මහතා, හිටපු ජනාධිපති මහින්ද රාජපක්ෂ මහතා, හිටපු ජනාධිපති මෛත්‍රීපාල සිරිසේන මහතා සහ අධ්‍යාපන අමාත්‍ය සුසිල් ප්‍රේම්ජයන්ත මහතාගේ සුරතින් සිදු කෙරිණි.
විදේශීය රාජ්‍ය තාන්ත්‍රික නිලධාරීන්, තානාපතිවරුන්, මහකොමසාරිස්වරුන්, මැති ඇමැතිවරුන් ඇතුළු පක්ෂ විපක්ෂ දේශපාලන නියෝජිතයින්, කලාකරුවන්, වෘත්තිකයින් ඇතුළු දහසකට අධික ආරාධිතයින් පිරිසක් මෙම උත්සව සදහා එක්ව සිටියහ.
