ලංගම කොන්දොස්තරවරුන්ට හා රියැදුරන්ට කෙරෙන මැර ප්‍රහාර වහා නැවැත්විය යුතු යැයි ප්‍රවාහන, මහා මාර්ග හා ජනමාධ්‍ය ඇමැති ආචාර්ය බන්දුල ගුණවර්ධන මහතා පොලිස්පතිට දැනුම් දී ඇත.
ලංකා ගමනාගමන මණ්ඩලයේ බස් රථ රියැදුරන්ට සහ කොන්දොස්තරවරුන්ට පසුගිය දින කිහිපය පුරාවට දිවයිනේ විවිධ ප්‍රදේශවල දී එල්ල කරන ලද මැර ප්‍රහාර පිළිබඳව විධිමත් පරීක්ෂණයක් සිදු කර අදාළ පුද්ගලයන් සම්බන්ධව නීතිය තදින් ක්‍රියාත්මක කරන ලෙස ප්‍රවාහන මහා මාර්ග හා ජනමාධ්‍ය ඇමැති ආචාර්ය බන්දුල ගුණවර්ධන මහතා මහජන ආරක්ෂාව පිළිබඳ ඇමැති ටිරාන් අලස් මහතා සහ පොලිස්පතිතුමා වෙත දන්වා තිබේ.
ඇමැති ආචාර්ය බන්දුල ගුණවර්ධන මහතා යොමු කරන ලද ලිපියේ මෙසේ සඳහන් වේ.
ලංගම කොන්දොස්තරවරුන්ට හා රියැදුරන්ට කෙරෙන මැර ප්‍රහාර වහා නැවැත්වීම සම්බන්ධවයි. ගෙවුණු කෙටි කාලය තුළ ප්‍රවාහන වියදම් අධික ලෙස ඉහළ යෑම නිසා දුම්රියට හා බස් රථ සඳහා වන ඉල්ලුම ශීඝ්‍රයෙන් ඉහළ ගොස් ඇත. පාසල් සිසුන්, රැකියාවන් සඳහා ගමන් කරන මගීන් වැඩි වැඩියෙන් පොදු ප්‍රවාහනයට විතැන් වීම නිසා ලංකා ගමනාගමන මණ්ඩලයට ඇති අධික ඉල්ලුම සපුරා ලීමේ අරමුණින් ඉන්දියානු ණය යෝජනා ක්‍රම යටතේ නව බස් රථ 500ක් ද අලුත්වැඩියා කරන ලද බස් රථ 400ක් ද ධාවනයේ යෙදවීමත් සමඟ පෞද්ගලික පටු ලාභ අරමුණු කර ගෙන ක්‍රියා කරන ඇතැම් කණ්ඩායම් පොදු ප්‍රවාහනය සිදු කෙරෙන මාර්ගවල ධාවනය කෙරෙන ලංගම බස් රථ රියැදුරන්ට හා කොන්දොස්තරවරුන්ට අමානුෂික මැර ප්‍රහාර එල්ල කිරීම ආරම්භ කර ඇත.
ඉකුත් දින දෙක තුළ කුරුණෑගල ගනේවත්ත මාර්ගය සහ පොලොන්නරුව ප්‍රදේශයේ සිදු කරන ලද මැර ප්‍රහාරවලින් බස් රථ රියැදුරන්ට සහ කොන්දොස්තරවරුන්ට තුවාල සිදු කිරීම සහ රෝහල්ගත කිරීම් වාර්තා වී ඇත. මෙම මැර කණ්ඩායම්වලට විරුද්ධව පැමිණිලි ඉදිරිපත් කළත් ඇතැම් පොලිස් ස්ථාන එම මැර පුද්ගලයන් අත්අඩංගුවට ගැනීම පිළිබඳ දියාරු පිළිවෙතක් අනුගමනය කිරීම හේතුවෙන් නිරායුධ ලංගම සේවකයන්, ඩිපෝ වශයෙන් රාජකරි වර්ජනය කිරීමේ තත්ත්වයක් උද්ගත වී තිබේ. ඒ හේතුවෙන් විශාල මාර්ග ප්‍රමාණයක බස් රථ ධාවනය ඇනහිටීම සිදු වන අතර, පාසල් සිසුන් ඇතුළු මගී ජනතාව විශාල පීඩාවට පත්වේ. මෙම තත්ත්වය වැළැක්වීමට නම් ඔබතුමාගේ අමාත්‍යාංශය යටතේ පවතින දිවයිනේ සියලුම පොලිස් ස්ථානවලට, කවර ආකාරයේ මැර ප්‍රහාරයක් බස් රථ සහ සේවකයන්ට එල්ල වුවත් එම ප්‍රහාරකයන් කඩිනමින් අත්අඩංගුවට ගැනීමටත්, ඒ පිළිබඳව පුළුල් විමර්ශනයක් සිදු කර යුක්තිය ඉටුකිරීම සඳහා කඩිනම් වැඩපිළිවෙළක් යෙදීමට කාරුණික වන ලෙස මෙයින් ඉල්ලා සිටිමි. ශ්‍රී ලංගම ජාතිය සතුය. රැක ගැනීම ඔබ සතුය. ලංගම පොදු දේපළක් වන බැවින් ඊට විරුද්ධව කෙරෙන තර්ජන, ගර්ජන, අලාභහානි, මැර ප්‍රහාර පොදු දේපොළ පනත යටතට අයත් වන බව මාගේ විශ්වාසයයි. එම නිසා පොදු දේපොළවලට හානි කිරීම සම්බන්ධයෙන් ඇප රහිතව බන්ධනාගාරගත කිරීමේ හැකියාව තිබියදීත් ඇතැම් පොලිස් ස්ථානාධිපතිවරුන් එසේ ක්‍රියා නොකරන්නේ නම් ඒ පිළිබඳව ඔබතුමාගේ විශේෂ අවධානය යොමු කළ යුතුය. ප්‍රවාහන අමාත්‍යාංශය වශයෙන් මැර ප්‍රහාරයක් සඳහා පෞද්ගලික බස් රථ හිමියන් හෝ ඒවායේ සේවකයන් සම්බන්ධ බවට ඔප්පු වූවොත් එකී පෞද්ගලික බස් රථ ධාවන බලපත්‍රය අහෝසි කිරීමට ක්‍රියා කරන ලෙස ජාතික ගමනාගමන කොමිසමට මා උපදෙස් ලබා දී ඇති බවට වැඩිදුරටත් දන්වා සිටිමි. ඔබතුමාගේ කාරුණික අවධානය මේ පිළිබඳව යොමු කොට, පොලිස්පතිතුමා ඇතුළු අදාළ බලධාරීන්ට මේ පිළිබඳව කඩිනමින් උපදෙස් ලබා දෙන්නේ නම් මැනවි යැයි එම ලිපියේ තවදුරටත් දක්වා ඇත
