පාසල් අධ්‍යාපනයෙන් සෞන්දර්යාත්මක විෂයන් සහ කලා විෂය ධාරා ඉවත් කිරීමට රජය කිසිදු ප්‍රතිපත්තිමය තීරණයක් ගෙන නොමැති අතර එවැනි තීරණයක් ඉදිරියේදී ගැනීමට බලාපොරොත්තුවක්ද නැතැයි කැබිනට් ප්‍රකාශක ජනමාධ්‍ය අමාත්‍ය ආචාර්ය බන්දුල ගුණවර්ධන මහතා පවසයි.
අමාත්‍යවරයා මේ බව පැවසුවේ අද (16) රජයේ ප්‍රවෘත්ති දෙපාර්තමේන්තුවේ පැවති කැබිනට් තීරණ දැනුම්දීමේ මාධ්‍ය හමුවේදී අදහස් දක්වමිනි.කලා විෂය ධාරාවන් අධ්‍යාපනය තුළ පැවතිය යුතු බවට ලෝකයම පිළිගන්නා බව අවධාරණය කළ කැබිනට් ප්‍රකාශකවරයා ඊට වඩා පුළුල් ලෙස අධ්‍යාපනයේ ප්‍රතිසංස්කරණ සාකච්ඡා කරන බව පැවසුවේය.
බටහිර රටවල ආගමික විෂයන් ඉගැනුවූයේ නැති වුවද මෙරට කිසිවිටෙක ආගමික විෂය ධාරාවන් පාසල් අධ්‍යාපනයෙන් ඉවත් නොකරන බවද, නැටුම්, සංගීතය, සෞන්දර්ය, චිත්‍ර ආදී සෞන්දර්යාත්මක විෂයන් පාසල් වලින් ඉවත් නොකරන බවද ඒවා දරුවන්ට ප්‍රාථමික හා ද්විතීයික අධ්‍යාපනයේදී අත්‍යවශ්‍ය දේවල් බවද වැඩිදුරටත් පැවසුවේය.
මෙරට 50%කට වැඩි පිරිසක් කලා අංශයේ විෂය ධාරාවන් හැදෑරීමෙන් විභාග සමත් ජීවිත අසමත් වන අතිවිශාල සංඛ්‍යාවක් නිර්මාණය වන බවද, උපාධිය දක්වා අධයාපනය අවසන් කර පැමිණි පසු දේශීයව සහ විදේශීයව ජීවනෝපායන් සලසාගත නොහැකි යැයිද ඔවුන් රක්ෂා සෙවුවද සිටින උගතුන්ට දීමට රැකියා නැතැයිද පවතින රැකියා සදහා අවශ්‍ය උගතුන් බිහිනොවන බවද අමාත්‍යවරයා පැවසුවේය.
මෙහිදී සේවා වියුක්තියේ ව්‍යූහාත්මක අසමතුළිතතාවයක් ඇතිවන බවද, එමනිසා කැරළි ඇතිවීම, තරුණයෝ විශාල ලෙස සමාජයට වෛර කිරීම ඉතිහාසයේ සිදුවූ බව සිහිපත් කළ අමාත්‍යවරයා මෙම යල් පැනගිය විභාග කේන්ද්‍රීය අධ්‍යාපන ක්‍රමයෙන් මිනිසෙකුගේ දක්ෂතා, කුසලතා, නිර්මාණාත්මක හැකියාවන් වර්ධනය කර රටට ලෝකයට සම්පතක් වන දරුවෙකු නිර්මාණය නොකිරීම නිසා තමන් හැදූ වැඩූ දෙමාපියන්ව සහ මහණ කළ ගුරු හැමුදුරුවන්ව ඝාතනය කළ පිරිසක් බිහිවූ බව සදහන් කළේය.
සමාජ වෛරයක් ඇතිවූයේ මෙරට දරු පරම්පරාවට අවශ්‍ය නිසි ජීවනෝපායක් සලසාගත හැකි යහපත් අධ්‍යාපනයක් නොමැති වීමෙන් බවද, දෙවැනි ලෝක සංග්‍රාමයෙන් වැටුණු හිරෝශිමාව නැගිටවූයේ මානව දයාවෙන් බවද සිහිපත් කළේය.
සෞන්දර්ය අධ්‍යාපනය දිගටම නොනැසී තවදුරටත් සංවර්ධනය වෙමින් පවතින බව අමාත්‍යවරයා වැඩිදුරටත් පැවසුවේය.
