ලේක්හවුස් මාධ්‍ය ඇකඩමිය ශ්‍රී ලාංකේය මුද්‍රිත මාධ්‍ය කලාවේ නව මානයක් – සම්බුද්ධාලෝක විහාරාධිපති මහාචාර්ය ඉත්තදෙමලියේ ඉන්දසර නාහිමි
ලේක්හවුස් මාධ්‍ය ඇකඩමිය සරසවි මට්ටමට ගේනවා” – ලේක්හවුස් සභාපති මහාචාර්ය හරේන්ද්‍ර කාරියවසම්
ශ්‍රී ලාංකේය මුද්‍රිත මාධ්‍ය කලාව නව මානයකට රැගෙන ගිය ලංකාවේ සීමාසහිත එක්සත් ප්‍රවෘත්ති පත්‍ර සමාගම, දැනුමෙන් සන්නද්ධ නිර්මාණශීලී මාධ්‍යවේදීන් බිහිකිරීම වෙනුවෙන් ලේක්හවුස් මාධ්‍ය ඇකඩමිය ආරම්භ කිරීම කාලෝචිත ක්‍රියාවක් බව දක්ෂිණ ලංකාවේ උප ප්‍රධාන සංඝනායක, කොටුව සම්බුද්ධාලෝක විහාරාධිපති මහාචාර්ය ඉත්තදෙමලියේ ඉන්දසර නාහිමියෝ ප්‍රකාශ කරති.
ලංකාවේ පුවත්පත් කලාවේ අති විශිෂ්ට සේවාවක් සිදුකරන ආයතනයක් බවට ලේක්හවුස් ආයතනය පත්ව තිබෙන බව පෙන්වා දෙන උන් වහන්සේ මාධ්‍ය පිළිබඳව විශේෂ වගකීමක් මෙන්ම අයිතියක් ලේක්හවුස් ආයතනයට පැවරෙන බව ද සංස්කෘතිය සහ සභ්‍යත්වය ආරක්ෂා කරමින් මාධ්‍ය හැසිර විය යුතු බවද උන්වහන්සේ පැවසූහ.
උන් වහන්සේ මේ අදහස් පළ කළේ නව පරිශ්‍රයක ස්ථාපිත කළ ලංකාවේ සීමාසහිත එක්සත් ප්‍රවෘත්ති පත්‍ර සමාගමට අයත් මාධ්‍ය ඇකඩමිය විවෘත කිරීම වෙනුවෙන් ඊයේ (19) පෙරවරුවේ පැවති උත්සවයේ අනුශාසනාවක් කරමිනි.
එහිදී වැඩිදුරටත් මහාචාර්ය ඉත්තදෙමලියේ ඉන්දසර නාහිමියෝ මෙසේද පැවසූහ.
ලේක්හවුස් ආයතනයේ මාධ්‍ය ඇකඩමිය අද නව පරිශ්‍රයක දී විවෘත කෙරෙනවා. ලේක්හවුස් ආයතනයේ මෙවැනි අංශයක් ආරම්භ වීම කාලෝචිත ක්‍රියාවක් හැටියට දකිනවා. ලේක්හවුස් ආයතනයේ නිර්මාතෘ ඩී.ආර්.විජයවර්ධන මහතා ලංකාවේ පුවත්පත් කලාවේ අති විශිෂ්ට සේවාවක් කරන ආයතනයක් බවට මේ ආයතනය පත්කර තිබෙනවා. ඒ මහතා අපේ සිංහල බෞද්ධ සංස්කෘතිය, සභ්‍යත්වය, භාෂාව හා සාහිත්‍යය ආදී අංශයන්වල සුරක්ෂිතතාව, පෝෂණය හා ඒවායේ දියුණුව සඳහා විවිධ අංශයන්ගෙන් තමන්ගේ පුවත්පත් කලාව මෙහෙයවූවා. වත්මන් මාධ්‍ය අංශය පිළිබඳව බලනවිට පුවත්පත් මහගෙදර හැටියට දැක්වෙන මේ ආයතනයට මාධ්‍ය පිළිබඳව විශේෂ වගකීමක් සහ අයිතියක් තිබෙනවා. මාධ්‍යයේ නිදහස පිළිබඳව අපි කවුරුත් අවධානය යොමු කළයුතු වෙනවා. මාධ්‍ය අපේ ලංකාවේ යම් යම් රාමුවල ක්‍රියාත්මක විය යුතුයි. අපට සංස්කෘතියක් සභ්‍යත්වයක් වගේම අපට උරුම යම් යම් ක්‍රියාවලි සම්භාරයක් තිබෙනවා.
ඒ තුළ අපි මාධ්‍ය කියන එක හැසිර වුවහොත් ඒක වඩාත්ම සදාචාරාත්මක එකක් බවට පත් වෙනවා. යම් යම් අවස්ථාවල අපට ඇහෙනවා, යම් යම් අවස්ථාවල කියනවා පූජ්‍ය ඉත්තදෙමලියේ ඉන්දසර ප්‍රකාශ කළා. ජනාධිපති රනිල් වික්‍රමසිංහ සඳහන් කළා. ඒ වගේ භාෂාවක් පාවිච්චි කරනවිට එය ළමයෙක් අහගෙන ඉන්නවා නම් මේක තමයි නිවැරැදි ක්‍රමය කියා විශ්වාස කරනවා. ඒ වගේම අපි සංස්කෘතික වශයෙන් බැලූවිට අපේ විවිධ විදිහේ හර පද්ධතීන් තිබෙනවා. කවුරු හෝ උපහාසාත්මකව යමක් පැවසූ විට ඒක මාධ්‍ය මඟින් පුළුල් ප්‍රචාරයක් ලබාදෙන්නේ නම් ඒ සම්බන්ධයෙන් විශාල හිත් රිදීමක් ඇති වෙනවා. තවත් පිරිසකගේ ඊර්ෂ්‍යාවක් ඇති වෙනවා. තවත් පිරිසකගේ සතුටට හේතුවෙනවා. නමුත් බුදුන් වහන්සේ දක්වා තිබෙන්නේ භාෂාව යන්න අපි පාවිච්චි කරන්න ඕනෑ වගේම ඒ සම්බන්ධයෙන් විවිධ ලක්ෂණ තිබෙනවා කියලයි. භාෂාවේ නිරවද්‍යතාවක් තිබෙන්න ඕනෑ. භාෂාවේ මටසිලුටු බවක් තිබෙන්න ඕනෑ. භාෂාවේ කන්කලු බවක් තිබෙන්න ඕනෑ.
භාෂාවෙන් කෙනකුගේ සිත් රිදීමක් වෙන්න නරකයි. ඒ වගේම භාෂාවෙන් බෙදීමක් වෙන්න නරකයි. එබඳු ලක්ෂණ ආරක්ෂා කිරීමක් තමයි භාෂාව පාවිච්චි කිරීමේ දී බුදුන් වහන්සේ පෙන්වා දී තිබෙන්නේ. අපටම ආවේණික වූ සංස්කෘතියක් තුළ අපටම ආවේණික වූ සභ්‍යත්වයක් තුළ අපටම ආවේණික වූ භාෂාවක් තුළ මාධ්‍යය හැසිරවීමේ දී ඒ රාමුවේ ක්‍රියාත්මක වන්නේ නම් අපේ උරුමයන් ආරක්ෂා කර ගැනීමේ අවස්ථාව ලැබෙනවා. ඒ නිසා මේ මාධ්‍ය ඇකඩමියෙන් ඒවා පිළිබඳව දැනුම්වත් කිරීම්, ඒවා පිළිබඳව යම් අවබෝධයන් ආධුනිකයන්ට ලබාදීම අපේ සංස්කෘතියට, භාෂාවට හා සභ්‍යත්වයට මහා ආරක්ෂාවක් ඒ තුළින් වෙනවා. ලේක්හවුස් ආයතනයේ නිර්මාතෘවරයාගේ ක්‍රියාකලාපය වුණේ මේවා පෝෂණය කරමින් ආරක්ෂා කිරීමයි. ලේක්හවුස් ඇකඩමිය පටන් ගත්තේ අනූෂ පැල්පිට මහතා සභාපතිවරයා වශයෙන් ඉන්න කාලයේදී. මහාචාර්ය හරේන්ද්‍ර කාරියවසම් මහතා ඒ සඳහා තවදුරටත් පහසුකම් සපයමින්, පෝෂණය කරමින් එයින් විශාල ප්‍රතිඵල ලබාගන්න අවස්ථාව ලබාදී තිබෙනවා. ඒ කටයුතු සාර්ථකව ඉටුකිරීමට ශක්තිය ලැබේවා.
ලංකාවේ සීමාසහිත එක්සත් ප්‍රවෘත්ති පත්‍ර සමාගමේ සභාපති මහාචාර්ය හරේන්ද්‍ර කාරියවසම් මහතා-
අද දවස අපට විශේෂ දවසක්. මීට වසර කිහිපයකට පෙර ලේක්හවුස් මාධ්‍ය ඇකඩමිය ඒ අවස්ථාවේ හොඳම පරිශ්‍රයක ආරම්භ කළා. මේ පරිශ්‍රයේ මීට පෙර තිබූ වාර ප්‍රකාශන වෙනත් ස්ථාන වෙත යොමු කිරීමෙන් අනතුරුව මාධ්‍ය ඇකඩමිය නව පරිශ්‍රයට ගෙන ඒමට පියවර ගත්තා. මේ කාර්යයේ දී විශාල පිරිසක් සහාය දුන්නා. ඒ සියලු දෙනාටම මගේ ගෞරවය පිරිනමනවා. මාධ්‍ය පිළිබඳ දැනුම්වත් මාධ්‍යවේදීන් සහ විචාරශීලී අර්ථවත් මාධ්‍යවේදීන් අපට අවශ්‍ය වෙනවා. කර්තෘ මණ්ඩල අධ්‍යක්ෂ ජ්‍යෙෂ්ඨ මාධ්‍යවේදී සිසිර පරණතන්ත්‍රී මහතා ද එක්තරා යුගයක පත්තරකරුවෙක් වෙනවා. ඒ යුගයට ශික්ෂණයක්, හික්මීමක් තිබෙන තමන්ගේ රැකියාව වෙනුවෙන් සුවිශේෂී කැපවීමක් කරන තරුණ මාධ්‍යවේදීන් ඉන්නවා ද කියන එක ප්‍රශ්නයක්. ඒ වගේම ඒ මාධ්‍යවේදීන් කුමන ආකාරයෙන් තමන්ගේ පෑන හසුරුවනවා ද කියන එක ප්‍රශ්නයක්. ඒ නිසා අපට අවශ්‍ය දැනුම්වත් සහ ශික්ෂණයක් ඇති අවබෝධාත්මක මාධ්‍යවේදීන් පිරිසක් බිහිකරන්නයි.
ඒක තමයි මාධ්‍ය ඇකඩමියේ අරමුණ වෙන්නේ. මාධ්‍ය ඇකඩමිය සම්පූර්ණයෙන්ම පුවත්පත් කලාවට වෙන් වෙන්නේ නැහැ. මෙය විශ්වවිද්‍යාලයක මට්ටමට ගෙනඒම තමයි අපේ අරමුණ. අපට එක දෙයක් පේනවා. ඉතා කුඩා තැනකින් පටන්ගෙන අද නව පරිශ්‍රයකට පැමිණ තිබෙනවා. සහෝදර පෞද්ගලික මාධ්‍ය ආයතනයක් අතිවිශාල මුදලක් වැයකොට දැවැන්ත මාධ්‍ය ආයතනයක් දක්වා යනවා. අපට තව කාලයක් යයි එවැනි ධනයක් වැය කරන්න. නමුත් අපට තිබෙන වටපිටාව, අපට තිබෙන ශක්තීන් සහ පදනම සමඟ සුවිශේෂී ආයතනයක් බිහිකරන්න අපට පුළුවන්. ඒ නිසා ලේක්හවුස් කාර්ය මණ්ඩලයට ලොකු අභියෝගයක් තිබෙනවා. අපට කතා කරන්න පුළුවන් හොඳ අතීතයක් තිබෙනවා. අපට ආඩම්බර වෙන්න පුළුවන් වර්තමානයක් තිබෙනවා. ඒ අතීතය සහ වර්තමානයට අංශු මාත්‍රයක හෝ නිමාවක් නොතබා දැවැන්ත අනාගතයකට ලේක්හවුස් ආයතනය ගෙනයාම ඔබ සතු අභියෝගයක් සහ ශක්තියක් වෙනවා. ඒක ඔබට පුළුවන්.
ඒ දෙය කරන්න ඕනෑ. මේක විශ්වවිද්‍යාලයක් මට්ටමට ගෙන එනවිට සම්බන්ධීකාරකවරයකුට අමතරව හොඳ ලේඛකාධිකාරයකුත් පත්කර ගතයුතු වෙනවා. විශ්ව විද්‍යාලයක ප්‍රධාන දෙයක් තමයි හොඳ ලේඛකාධිකාරවරයෙක් සිටීම. ඒ සඳහා අත්දැකීම් සපිරි අයෙක් බඳවා ගෙන මේක විශ්වවිද්‍යාලයක මට්ටමට ගේන එක තමයි අපේ සිහිනය. මේ උත්සව සියල්ල අතීතයට එක්වුණාට මේ තුළින් බිහිවන දරුවන් අයිති වෙන්නේ අනාගතයටයි. ඒ අනාගත පරම්පරාව වෙනුවෙන් තමයි අපි මේ සියලු ආයෝජන කරන්නේ. ඒ අනුව ඔවුන් මේකෙන් ඉගෙනගෙන සමාජයේ සැරිසරන විට ලේක්හවුස් ආයතනයට එන සෑම අයකුටම සැබෑ අර්ථයක් ලැබෙනවා. ලේක්හවුස් මාධ්‍ය ඇකඩමිය සඳහා විශාල පිරිසක් සහාය දී තිබෙනවා. පසුගිය කාලයේ අපි විශාල ජයග්‍රහණ ලබා තිබෙනවා. මූල්‍ය වශයෙන් මෙන්ම ගුණාත්මක වශයෙන් ලේක්හවුස් ආයතනය ජයග්‍රහණ ලබා තිබෙනවා.
ඒ තුළින් ලේක්හවුස් ආයතනයේ මාධ්‍ය ඇකඩමිය අපි ලබාගත් ජයග්‍රහණ අතර සුවිශේෂී එකක් වේවායි මම ප්‍රාර්ථනා කරනවා. ඒ වගේම ලේක්හවුස් ආයතනයෙන් බිහිවන මාධ්‍යවේදීන් සහ විවිධ පාඨමාලාවලින් බිහිවන විවිධ උපාධිධාරීන්, ඩිප්ලෝමාධාරීන් වැනි අය මේ සමාජයට සේවය කරන දවසට මේ අවස්ථාවට සැබෑ අර්ථයක් ලැබෙනවා යැයි පැවසීය.
ලංකාවේ සීමාසහිත එක්සත් ප්‍රවෘත්ති පත්‍ර සමාගමේ සභාපති මහාචාර්ය හරේන්ද්‍ර කාරියවසම් මහතා අතින් ලේක්හවුස් මාධ්‍ය ඇකඩමියේ නව පරිශ්‍රය නිල වශයෙන් විවෘත කෙරුණු අතර අනතුරුව දක්ෂිණ ලංකාවේ උප ප්‍රධාන සංඝනායක, කොටුව සම්බුද්ධාලෝක විහාරාධිපති මහාචාර්ය ඉත්තදෙමලියේ ඉන්දසර නාහිමියෝ සෙත්පිරිත් සජ්ඣායනා කරමින් ආශිර්වාද එක් කළහ. මේ මාධ්‍ය ඇකඩමිය නව පරිශ්‍රයේ විවෘත කිරීමට සමගාමීව නව පරිශ්‍රයන්හි ස්ථාපිත කළ මිහිර, තරුණී, බුදුසරණ, සුබසෙත සහ සරසවිය වාර ප්‍රකාශනවල නව පරිශ්‍ර විවෘත කිරීම ද මෙහිදී සිදුවිණි.
ලංකාවේ සීමාසහිත එක්සත් ප්‍රවෘත්ති පත්‍ර සමාගමේ කර්තෘ මණ්ඩල අධ්‍යක්ෂ සිසිර පරණතන්ත්‍රී, මූල්‍ය අධ්‍යක්ෂ ආචාර්ය සුනිල් ජයන්ත නවරත්න, සාමාන්‍යාධිකාරී සුමිත් කොතලාවල, සමාගම් ලේකම් සුදර්ශී හේවාවසම්, නියෝජ්‍ය සාමාන්‍යාධිකාරීවරුන් වන චන්දන බණ්ඩාර (ආයතනික කටයුතු), චින්තක යාපා (දැන්වීම්), සිළුමිණ වැඩ බලන ප්‍රධාන කර්තෘ ශිරෝමී අබයසිංහ මහත්ම මහත්මීන් ඇතුළු පිරිසක් මේ අවස්ථාවට එක්ව සිටියහ.
