රටක් ලෙස ගොඩනැඟීමට ශක්තිමත් ආර්ථිකයක් ඇති කිරීමට මෙවර අය-වැයෙන් මූලික පියවර තැබූ බව ජනාධිපති අනුර කුමාර දිසානායක මහතා ප්‍රකාශ කළේය.
ජනාධිපතිවරයා මේ අදහස් පළ කළේ, කොළඹ සිනමන්ඩ් ලයිෆ් හෝටලයේ ඊයේ (19) පැවති Ò2025 පශ්චාත් අය-වැය කතිකාවතට එක්වෙමිනි. ණය ප්‍රතිව්‍යුහගතකරණයෙන් ණය ගෙවීමට ගත් වසර තුනක විරාම කාලය හොඳින් උපයෝගී කර නිවැරදි ආර්ථික කළමනාකරණයකින් 2028 වන විට ණය ගෙවීමේ ශක්‍යතාවක් ඇති කිරීමට රජය අපේක්ෂා කරන බව ද ජනාධිපති අනුර දිසානායක මහතා කියා සිටියේය. බංකොලොත්භාවයට පත් වූ රටක් නැවත ගොඩනැඟීමට ලෝකයේ බොහෝ රටවලට දශකයක් ගත වී ඇති නමුත් ශ්‍රී ලංකාවට ඉන් මිදීමට දශකයට වඩා අඩු කාලයක් ගත කාලයක් ගතවේයැයි පුරෝකථනය කළ හැකි බවත් මෙහිදී ජනපතිවරයා පැවසීය.
රාජ්‍ය ආදායම දළ දේශීය නිෂ්පාදනයෙන් 15.1%ක් දක්වා වර්ධනය කිරීමට මෙවර අය-වැය මඟින් යෝජනා කර තිබෙන බවත් ප්‍රමුඛතා හඳුනාගෙන මුදල් වැය කිරීම රජයේ අපේක්ෂාව බවත් ජනාධිපතිවරයා සඳහන් කළේය. ආර්ථිකය ප්‍රසාරණය කිරීමට ආර්ථිකය ගමට තල්ලු කිරීමත්, පුරවැසියා ආර්ථිකයේ කොටස්කරුවකු කර ගැනීමටත් මෙවර අය-වැය මඟින් අවධානය යොමු කර ඇති අතර ඉන් පුරවැසියාට ප්‍රතිලාභ ලැබීමේ හැකියාව ද ඉහළ යනු ඇතැයි ජනාධිපතිවරයා අපේක්ෂා පළ කළේය. ආර්ථිකයෙන් පිටමං කළ කණ්ඩායම් නැවත ආර්ථිකයට එකතු කර ගනිමින් ගම් මට්ටමෙන් කුඩා ආර්ථික ඒකක නිර්මාණය කිරීමට වත්මන් රජය සැලසුම් කර ඇති අතර ඒ අනුව සුළු හා මධ්‍ය පරිමාණයේ ව්‍යවසායකයන් ගොඩනැඟීමේ උන්මාදයක් රටේ ඇති කිරීමට අපේක්ෂා කරන බව ද ජනාධිපතිවරයා පැවසීය. කර්මාන්තයට සහාය දීම රජයේ අරමුණ බව පෙන්වා දුන් ජනාධිපතිවරයා නිෂ්පාදන පිරිවැය අඩු කිරීමෙන් පාරිභෝගිකයාට සහන සැලසීම රජයේ ඉලක්කය බව ද කියා සිටියේය. ග්‍රාමීය දුප්පත්භාවයෙන් රට ගොඩනැඟීමට අධ්‍යාපනය සඳහා මෙවර අය-වැයෙන් වැඩිම මුදලක් වෙන් කර ඇති බව ද එමඟින් පාසල් පද්ධතියේ මානව සම්පත හා භෞතික සම්පත් ප්‍රතිව්‍යුහගත කිරීමට බලාපොරොත්තු වන බව ද ජනාධිපති අනුර කුමාර දිසානායක මහතා පැවසීය. ඒක රේඛීය අධ්‍යාපනය වෙනුවට බහු රේඛීය අධ්‍යාපනයක් ඇති කිරීම මෙමඟින් අපේක්ෂා කෙරේ.
විදුලි බිල අප අඩුකරන්න ඕනෑ.සාම්පූර්වල සෝලා බලාගාරයට අප්‍රේල්වල මුල්ගල තබන්න බලාපොරොත්තු වෙනවා.එතැන මෙගාවොට් 120ක් තිබෙනවායිද ජනපතිවරයා පැවසීය.
රාජ්‍ය වියදම් කළමනාකරණයට මෙවර අය-වැයෙන් අවධානය යොමු කර ඇති අතර රාජ්‍ය සේවාව ලබාදීමට විශාල පිරිවැයක් දැරීමට සිදුවේ. ඒ නිසා රාජ්‍ය ආයතන වියදම් සමාලෝචනය කිරීමට බලාපොරොත්තු වේ. දේශපාලන අධිකාරිය දූෂණයෙන් තොර තැනක් බවට පත් කර තිබෙන බවත්, අල්ලස් නොදෙන සංස්කෘතියක් ඇති කිරීම පුරවැසියා සතු වගකීමක් බව ද ජනාධිපතිවරයා පෙන්වා දුන්නේය. අපනයනය ඉලක්ක කරගත් ආර්ථිකයක් ඇති කිරීම සඳහා නව වෙළෙඳ ගිවිසුම් අත්සන් කිරීමට බලාපොරොත්තු වන බවත් මේ වසරේ ඉහළ අපනයන ආදායමක් අපේක්ෂා කරන බවත් ජනාධිපතිවරයා සඳහන් කළේය.
වරාය කේන්ද්‍ර කර ගත් ආර්ථිකයක් ඇති කිරීම සඳහා වත්මන් රජයේ අවධානය යොමුව ඇති අතර කාර්යක්ෂම බහලුම් හුවමාරු මධ්‍යස්ථානයක් ඇති කිරීමට ද මෙවර අය-වැය මඟින් අවධානය යොමු කර ඇත. සංචාරක කර්මාන්තය දිරි ගැන්වීමට නගර ප්‍රවර්ධන (City Brand) වැඩසටහන් ක්‍රියාත්මක කිරීමට කටයුතු කෙරෙන අතර අනුරාධපුරය, යාපහුව, යාපනය වැනි නගර ප්‍රවර්ධනය කිරීමට ද සැලසුම් කර තිබේ. රාජ්‍යතාන්ත්‍රික සේවාව රටේ ආර්ථික අවස්ථා පුළුල් කරගැනීම සඳහා යොදා ගැනීමට බලාපොරොත්තු වන බව ද ජනාධිපතිවරයා වැඩිදුරටත් සඳහන් කළේය.
