ශාසනික අභිවෘද්ධිය උදෙසා ජනපති ඉටුකළා වූ මහඟු මෙහෙවර මහ නා හිමිවරුන්ගේ පැසසුමට
උතුම් ති‍්‍රපිටකය ජාතික උරුමයක් බවට ප‍්‍රකාශයට පත් කළා සේම එය උතුම් ලෝක උරුමයක් බවට පත් කිරීමේ මැදිහත්වීම ද තමා ඉදිරියේ දී සිදු කරන බව ජනාධිතිතුමා පවසයි.
අති පාරිශුද්ධ ථෙරවාදී බුදු දහමේ සාරය තවත් වසර දහස් ගණනක් ආරක්ෂා කරමින් පූජනීය ති‍්‍රපිටකය ජාතික උරුමයක් බවට නිල වශයෙන් ප‍්‍රකාශයට පත් කිරීමේ ජාතික මහෝත්සවය ගෞරවනීය මහා සංඝරත්නයේ ආශිර්වාදයෙන් ජනාධිපති ගරු මෛතී‍්‍රපාල සිරිසේන මැතිතුමාගේ ප‍්‍රධානත්වයෙන් ඊයේ (05) පෙරවරුවේ මාතලේ ඓතිහාසික අලුවිහාරයේ දී පැවැත්වුණු අතර ජනාධිපතිතුමා එහිදී මේ බව ප‍්‍රකාශ කළේය.
වසර දහස් ගණනක් පුරා රැකගෙන ආ නිර්මල බුදුදහම ලෝකවාසී ජනතාවටත්, අනාගත පරපුරටත් නිවැරදි ලෙස ආරක්ෂා කොට පවත්වාගෙන යාමේ අරමුණින් මහා සංඝරත්නයේ උපදෙස් සහ මඟපෙන්වීම මත ජනාධිපති ගරු මෛතී‍්‍රපාල සිරිසේන මැතිතුමාගේ නායකත්වයෙන් මෙම පුණ්‍ය කටයුත්ත සිදු කෙරිණි.
උතුම් ති‍්‍රපිටකය ජාතික උරුමයක් බවට පත් කිරීමේ ඓතිහාසික කටයුත්තට උරදෙමින් ශාසනික අභිවෘද්ධිය උදෙසා ඉටු කළා වූ මහඟු මෙහෙවර පිළිබඳ මෙහිදී මහා සංඝරත්නයේ පූර්ණ ආශිර්වාදය, ප‍්‍රශංසාව සහ ඇගැයීම ජනාධිපතිතුමා වෙත පළ කෙරිණි.
විශේෂ අනුශාසනාවක් සිදු කළ ශ්‍යාමෝපාලි මහා නිකායේ මල්වතු මහා විහාර පාර්ශ්වයේ අනුනායක පුජ්‍ය නියංගොඩ විජිතසිරි අනුනායක ස්වාමින් වහන්සේ සඳහන් කළේ ජාතියේ, සම්බුද්ධ ශාසනයේ මෙන්ම සම්ප‍්‍රදායේ අභිවෘද්ධිය උදෙසා ජනාධිපතිතුමා ඉටුකළ මෙම උත්කෘෂ්ට කාර්යය සමස්ත මහා සංඝරත්නයේ දැඩි ප‍්‍රශංසාවට ලක් වන බවයි.
ධර්මය විකෘති කරමින් සිටින යුගයක එම බරපතළ තත්ත්වය පිළිබඳ රාජ්‍ය නායකයා ලෙස නිසි අවධානය යොමු කරමින් ජනාධිපති ගරු මෛතී‍්‍රපාල සිරිසේන මැතිතුමා ඉටුකළ මෙම කාර්යය එතුමාගේ ධූර කාලය තුළ ඉටුකළා වූ විශිෂ්ට කාර්යභාරයන් අතර ඉතා උතුම් කටයුත්තක් බව ශ‍්‍රී ලංකා අමරපුර මහා නිකායේ මහා නායක අග්ගමහා පණ්ඩිත පූජ්‍ය කොටුගොඩ ධම්මාවාස හිමිපාණන් වහන්සේ මෙහිදී ප‍්‍රකාශ කළහ.
අද දින සිදු කරන ලද මෙම උතුම් කටයුත්ත සේම 1818 කැරැල්ලේ දී රාජද්‍රෝහින් ලෙස නම් කළ අපගේ ජාතික වීරයන් එම අපවාදයෙන් ගලවා දේශපේ‍්‍රමින් ලෙස ජාතික වීරයන්ගේ නාමාවලියට ඇතුළත් කිරීමට ජනාධිපතිතුමා ගත් පියවර මෙරට මහා සංඝරත්නයේ දැඩි ප‍්‍රශංසාවට ලක්ව තිබෙන බව ද උන්වහන්සේ පෙන්වා දුන්හ.
පුණ්‍ය මහෝත්සවය ඇමතූ ජනාධිපතිතුමා වැඩිදුරටත් සඳහන් කළේ මෙම ඓතිහාසික කටයුත්ත මගින් උතුම් ති‍්‍රපිටකය විකෘති අර්ථ විවරණයන්ගෙන් බේරාගෙන ඊට නෛතික ආරක්ෂාව සැලසීමට හැකි වන බවයි. මින් ඉදිරියට රජයේ අවසරයකින් තොරව ති‍්‍රපිටකය සංස්කරණයට, පරිවර්තනයට හෝ අනිසි කටයුතුවලට භාවිතා කිරීමට කිසිවෙකුට ඉඩක් නොලැබෙන අතර. මින්පසු ති‍්‍රපිටකය පරිවර්තනයට හා සංස්කරණයට ඉඩ ලැබෙන්නේ ප‍්‍රාමාණික විද්වත් මණ්ඩලයකට පමණක් බවත්, මේ අයුරින් රාජ්‍ය මැදිහත්වීම සිදුකළේ උතුම් ති‍්‍රපිටකයට අවැඩ සඳහා වන සියලු කටයුතු වළක්වාලීමට බවත් ජනාධිපතිතුමා සඳහන් කළේය.
ති‍්‍රපිටකය ආරක්ෂා කරන අතරම ඉර හඳ මෙන් බබළන එහි විවෘත භාවය උදෙසාත් කටයුතු කිරීම අප සතු වගකීමක් වන අතර බෞද්ධ සම්ප‍්‍රදායේ පිහිටමින් ශාස්තී‍්‍රය ලෙස බුද්ධ වචනය තේරුම් ගැනීම සඳහා කරන විමර්ශනයන්ට අනුබල දීමක් මෙමගින් සිදුවන බව ද ජනාධිපතිතුමා සඳහන් කළේය. මහා සංඝරත්නයේ අපේක්ෂාව හා අනුශාසනා පරිදි මෙම අත්‍යාවශ්‍ය තීරණයට තමා එළැඹියේ ධර්මයේ හැසිරෙන සහ බුද්ධ භාෂිතය පිළිබඳ අප‍්‍රමාණ ගෞරවාදරයකින් බව සඳහන් කළ ජනාධිපතිතුමා මෙම උතුම් පුණ්‍ය කටයුත්ත තම ධූර කාලය තුළ ඉටු කිරීමට ලැබීම තම පුණ්‍ය මහිමයක් ලෙස සලකන බව ද කියා සිටියේය.
අද පෙරවරුවේ මාතලේ ඓතිහාසික අලුවිහාරය වෙත ගිය ජනාධිපතිතුමා සමරු ඵලකය නිරාවරණය කර උතුම් ති‍්‍රපිටකය ජාතික උරුමයක් ලෙස ප‍්‍රකාශයට පත් කිරීම සනිටුහන් කළේය.
අනතුරුව පැවති උත්සව සභාවේ දී ත‍්‍රිපිටකය ජාතික උරුමයක් බවට නිල වශයෙන් ප‍්‍රකාශයට පත් කිරීමේ සන්නස් පත‍්‍රය ජනාධිපතිතුමා විසින් මහානායක හිමිවරුන් වෙත පිළිගැන්වීය.
ආලෝක විහාරාධිපති පූජ්‍ය ආචාර්ය ඉනාමලුවේ නන්දරතන හිමිපාණන් වහන්සේ විසින් විශේෂ සිහිවටන තිළිණයක් ලෙස ‘ධම්ම චක්ක ධම්ම’ සූත‍්‍රය ඇතුළත් පුස්කොළ පොත ජනාධිපතිතුමා වෙත පිළිගන්වන ලදි.
විද්වත් ලිපි සංග‍්‍රහයක් ද ජනාධිපතිතුමා වෙත පිළිගැන්විණි.
මෙම ඓතිහාසික කටයුත්ත සිහිපත් කරමින් සමරු මුද්දරයක් නිකුත් කෙරුණු අතර එය මහානායක හිමිවරුන් වෙත සහ ජනාධිපතිතුමා වෙත පිළිගැන්වීම සිදු විය.
ශ්‍යාමෝපාලි මහානිකායේ අස්ගිරි මහාවිහාර පාර්ශ්වයේ මහානායක පූජ්‍ය වරකාගොඩ ඤාණරතන නායක ස්වාමින් වහන්සේ, ශ්‍යාමෝපාලි මහා නිකායේ මල්වතු මහා විහාර පාර්ශ්වයේ අනුනායක පුජ්‍ය නියංගොඩ විජිතසිරි අනුනායක ස්වාමින් වහන්සේ, ශ‍්‍රී ලංකා අමරපුර මහා නිකායේ මහා නායක අග්ගමහා පණ්ඩිත පූජ්‍ය කොටුගොඩ ධම්මාවාස මහානායක හිමිපාණන් වහන්සේ ප‍්‍රමුඛ දිවයිනේ නන්දෙසින් වැඩම කළ මහා සංඝරත්නය එක්දහස් පන්සීයකට අධික පිරිසක් ද බුද්ධ ශාසන අමාත්‍ය ගාමිණි ජයවික‍්‍රම පෙරේරා මහතා ඇතුළු මැති ඇමතිවරු, ආණ්ඩුකාරවරු, රාජ්‍ය නිලධාරින් ඇතුළු සැදැහවත් ජනතාව විශාල පිරිසක් මෙම පුණ්‍ය මහෝත්සවයට එක්ව සිටියහ.
ත‍්‍රිපිටකය ජාතික උරුමයක් බවට පත්කිරීමේ පුණ්‍ය මහෝත්සවයේ දී ජනාධිපති ගරු මෛත‍්‍රීපාල සිරිසේන මැතිතුමා විසින් සිදුකළ කතාව – 2019-01-05
අද මේ උතුම් පුණ්‍ය භූමියේ දී මුළු මහත් ලෝකවාසී බෞද්ධ ජනතාව පමණක් නොව සමස්ත ලෝක ජනතාවම ඓතිහාසික දාර්ශනික උරුමයක් සේ සලකන උතුම් ථේරවාදී දර්ශනය ඇතුළත් වූ ත‍්‍රිපිටකය ජාතික උරුමයක් බවට පත් කරන අවස්ථාව. මේ උතුම් කාර්යය රජය මගින් ඉටුකර ගැනීම සඳහා පසුගිය කාලය තුළ වන්දනීය මහා සංඝරත්නය අවස්ථා ගණනාවක දී ම අනුශාසනා කළා. උපදෙස් දුන්නා. ඉල්ලීම් කළා. අපිව දැනුවත් කළා. ඒ අනුව අපි රජය මේ සම්බන්ධයෙන් සාකච්ඡා කරලා 2018 සැප්තැම්බර් 13 වනදා අමාත්‍ය මණ්ඩල රැස්වීමට අමාත්‍ය මණ්ඩල සංදේශයක් ඉදිරිපත් කරනු ලැබුවා. මේ අමාත්‍ය මණ්ඩල සංදේශය අත්සන් කළේ මමත්, බුද්ධශාසන ඇමතිවරයාත්, එවකට සංස්කෘතික අමාත්‍යවරයා ලෙස කටයුතු කළ ආචාර්ය විජයදාස රාජපක්ෂ මහතාත් විසින්. මේ කැබිනට් සංදේශයට අපි කරුණු කිහිපයක් ඇතුළත් කළා. පූර්ණත්වයට පත් වූ ථේරවාදී ත‍්‍රිපිටකය ක‍්‍රි.පූ 03 වන සියවසයේ දී සිදුවූ මහින්දාගමනයෙන් ශ‍්‍රී ලංකාවට උරුම විය. ශතවර්ෂ ගණනාවක් ශ‍්‍රී ලාංකික භික්ෂු පරපුර විසින් මුඛ පරම්පරාවෙන් ආරාක්ෂා කරගෙන ආ ථේරවාදී ත‍්‍රිපිටකය ක‍්‍රි.පූ 01 වන සියවසේ දී වලගම්බා රජු සමයේ මාතලේ ඓතිහාසික අලුවිහාරයේ දී ග‍්‍රන්ථාරූඪ කරන ලදී.
එම ග‍්‍රන්ථ ශ‍්‍රී ලංකාවේ පැරණි ම ග‍්‍රන්ථ වන අතර ඒවා ක‍්‍රි.ව 1956 වසරේ එළැඹි 2500 වන ශ‍්‍රී සම්බුද්ධ ජයන්ති සමරුවේ විශේෂ ව්‍යාපෘතියක් වශයෙන් සංස්කරණය කොට පූර්ණ ග‍්‍රන්ථාවලියක් වශයෙන් මුද්‍රණය කරන ලදී. අතිපූජ්‍ය බලංගොඩ ආනන්ද මෛත‍්‍රී නාහිමියන්ගේ අනුශාසනය පරිදි අතිපූජ්‍ය ලබුගම ලංකානන්ද නාහිමිපාණන්ගේ ප‍්‍රධාන සම්පාදකත්වයෙන් විද්වත් ස්වාමින් වහන්සේලාගෙන් සමන්විත සම්පාදක මණ්ඩලයක් විසින් පූර්ණ වශයෙන් ලියා රජයේ නිල ප‍්‍රකාශයක් වශයෙන් මුද්‍රණය කොට ඇත. ලොව ඇති ග‍්‍රන්ථ අතරින් ශ‍්‍රී ලංකාවේ ත‍්‍රිපිටකයට ප‍්‍රමුඛස්ථානයක් හිමිවේ. ථෙරවාදී රටවල් අතර ප‍්‍රමුඛත්වයක් ගන්නා ශ‍්‍රී ලංකාවේ බෞද්ධ දර්ශනයේ මූලික කරුණු ආරක්ෂා කිරීමට කටයුතු කිරීමට අවශ්‍ය වී ඇත. ඒ සඳහා මෙය ජාතික උරුමයක් බවට පත්කරන්නට රජයේ අනුමැතිය පළකරන සංදේශය අපි එදා ඉදිරිපත් කළා. ඒ අනුව අපි අපේ මහානායක ස්වාමීන් වහන්සේලාගේ මඟ පෙන්වීම මත අද මේ උතුම් අවස්ථාවට අපි සෑම කෙනෙක්ටම සහභාගී වෙන්න ලැබිලා තිබෙනවා.
ත‍්‍රිපිටකය වසර 2000 ක ට පෙර වලගම්බා රජ දවස ග‍්‍රන්ථාරූඪ කළා. එයින් පසුව මහා සංඝරත්නයේ මූලිකත්වය, සහ මඟපෙන්වීම් ඔස්සේ මේ අති උතුම් සද්ධර්මය සංරක්ෂණය කොට තැබීමේ ඓතිහාසික කටයුත්ත ඉටු කිරීමට ලැබීම පිළිබඳව අපි ඉතාමත් සතුටු වෙනවා. ඒ වගේම මා පෞද්ගලිකව සතුටු වෙනවා ජනාධිපතිවරයා වශයෙන් මගේ ධුර කාලය තුළ මේ මහා පුණ්‍ය කටයුත්ත කරන්න ලැබීම පිළිබඳ මගේ ජීවිතයේ මා පෙර කළ පිනක් වශයෙනුයි මා මෙහිදී සඳහන් කරන්නේ.
ප‍්‍රථම ධර්ම සංගායනාවේ දී බුදුරජාණන් වහන්සේ 45 වසක් පුරා දෙසූ ධර්මය විනය, සූත‍්‍ර, අභිධර්ම යනුවෙන් පිටක තුනකට බෙදා වෙන් කර ගැනුණා. ඒ උතුම් ධර්මය වසර 2600 ක් පුරා පරිශුද්ධ ව පවතිනුයේ බුදුන් වහන්සේ ජීවමාන කාලයේ දී ම ධර්මයේ ආරක්ෂාව සඳහා යෙදු විධිමත් ක‍්‍රියාමාර්ග නිසයි. බුදුන් වහන්සේ ගේ පරිනිර්වාණයෙන් පසු ශ‍්‍රාවකයන් වහන්සේලා තම දිවි හිමියෙන් ධර්මය සුරැකීම සඳහා යොදාගත් ක‍්‍රමවත් වැඩපිළිවෙළ නිසාත් ධර්මය ආරක්ෂා වුණා. ත‍්‍රිපිටක ධර්මය ඇසීමෙන් ධාරණය කොට වනපොත් කරමින් පාරම්පරික ව ආරක්ෂා කළ ඥාන සම්භාරයක්. ත‍්‍රිපිටකය නමැති මේ මහා ආගමික හා සංස්කෘතික උරුමය මුල් බුදුදහමේ පරිපූර්ණ ස්වභාවය හඳුනාගැනීමට ඇති මූලාශ‍්‍රය බව ඔබ සැම දන්නවා.
බුද්ධ පරිනිර්වාණයෙන් අවුරුදු 236 කට පසු මෙහි වැඩම කළ අනුබුදු මිහිඳු මාහිමියන් ප‍්‍රමුඛ සංඝයා වහන්සේලා අපට දායාද කළේ, මුල් සංගායනා දෙකෙහි දී සම්මත වී, තෙවැනි සංගායනාවේ දීත් අනුමත වූ අටුවා සහිත ත‍්‍රිපිටක ධර්මය යි. කලින් කලට ත‍්‍රිපිටක ධර්මයේ පැවැත්මට යම් යම් තර්ජන එල්ල වූ බව ඉතිහාසය විමසන විට පෙනී යනවා. දොළොස් වර්ෂයක් පැවතුණු බව කියන බැමිණිතියා සාය සමයේ අප‍්‍රමාණ දුක් අනුභව කරමින් ත‍්‍රිපිටක ධර්මය මතක ශක්තියෙන් පවත්වා ගැනීමට එවක භික්‍ෂූන් වහන්සේලා දැරුවේ අප‍්‍රමාණ ප‍්‍රයත්නයක්. මේ මහා සාගත කාලයේ ඇතැම් ස්වාමීන් වහන්සේලා රට හැර යන්නට ගියා. මෙහි නතර වූ භික්‍ෂුන් වහන්සේලා නෙළුම් දඬු, කර කොළ, මී පොතු ආදිය කමින් යන්තම් ජීවිත රැක ගනිමින් ත‍්‍රිපිටකය කටපාඩමේ තබා ගැනීමට දැරූ වෙහෙස මෙතෙකැ යි කිව නොහැකි යි. කටපාඩමින් ත‍්‍රිපිටකය පවත්වාගෙන යෑමේ දී ඇති විය හැකි අනාගත හානි පිළිබඳ අත්දැකීම දුර්භික්‍ෂයේ දී අපේ මහා සංඝරත්නයට ලැබුණා. ඒ සමග ම අනාගතයේ ක‍්‍රමානුකූල ව පුද්ගල මතක ශක්තිය හීන වී යෑමේ අන්තරායයක් ඇති බව උන්වහන්සේලාට අවබෝධ වුණා. ඒ නිසා ත‍්‍රිපිටකය ග‍්‍රන්ථාරූඪ කිරීමට ශාසන භාරය දැරූ හිමිවරුන් තීරණය කළා.
මේ ඓතිහාසික මාතලේ අලුවිහාරය හෙවත් ආලෝක විහාරයේ දී ත‍්‍රිපිටකය ග‍්‍රන්ථාරූඪ කිරීම නිසා උදාර ශාසනික ප‍්‍රබෝධයක් ඇති වුණා. අතිශය ක‍්‍රමවත් ව ලියූ පරිපූර්ණ ත‍්‍රිපිටකයක් ලොවට ම උරුම වීමට මේ අලුවිහාරයේ දී සිදු කළ ත‍්‍රිපිටකය ලේඛනගත කිරීම හේතු වුණා. ස්වදේශීය අනන්‍යතාවෙන් යුත් බුදුදහමට මෙමගින් පදනම සැකැසුණා. මෙසේ ලිඛිත දායාදයක් බවට පත් වූ ත‍්‍රිපිටකය ආගමික, සංස්කෘතික මෙන් ම භෞතික වූ උරුමයක්. ඒ වගේ ම උතුම් ආධ්‍යාත්මික උරුමයක්. ත‍්‍රිපිටකය ජාතික උරුමයක් බවට නිල වශයෙන් ප‍්‍රකාශ කිරීම යනුවෙන් අර්ථවත් වන්නේ එය සිංහල ජාතියට පමණක් වන නීත්‍යනුකූල උරුමයක් කිරීම නොවෙයි. ජාතික යන වචනය ශ‍්‍රී ලාංකික යන පුළුල් අර්ථයෙනුයි අප අද වටහා ගන්නේ.
සැබැවින් ම ත‍්‍රිපිටකය අපේ ජාතික දායාදයක් වීමට පළමු එය පාලි භාෂාව ව්‍යවහාර කළ ලෝකයට අයත් වුණා. පාලි ත‍්‍රිපිටකය අග්නිදිග ආසියාවේ වෙනත් රටවලත් භාවිත වෙනවා. මේ රටේ සේවා කළ සුදු නිලධාරියකු වූ රීස් ඬේවිඩ්ස් මෙහි දී පාලිය ඉගෙන ගෙන යුරෝපයේ බුදුදහම ප‍්‍රචලිත කිරීමට කටයුතු කළා, පාලි පොත් සංගමය ආරම්භ කරමින්. එනිසා ථේරවාද ත‍්‍රිපිටකය අද අන්තර්ජාතික උරුමයක්. එය ජාතිකත්වයේ සීමාවන්ට කොටු වූ උරුමයක් නොවෙයි.
ත‍්‍රිපිටකය අද දවසේ මුළු ශ‍්‍රී ලංකාවේ ම උරුමයක් ලෙස පිළිගැනීමටත්, එ සේ සියලු ජාතීන් ගේ උරුමයක් ලෙස භේදයෙන් තොර ව සමාජගත වීමටත් අවශ්‍ය මූලික පදනම සකස් කිරීමට ත‍්‍රිපිටකය ජාතික උරුමයක් සේ ප‍්‍රකාශයට පත් කිරීම නිසා හැකි වෙනවා. ඒ සඳහා ත‍්‍රිපිටකයට නෛතික පදනමක් ලබා දීම ද මෙමගින් සිදු වෙනවා. විනයගරුක, ප‍්‍රඥාසම්පන්න සමාජයක් ගොඩනැඟීමට අපට ඇති ස්ථිරසාර ඥාන දර්ශනය ත‍්‍රිපිටකය බව වටහාගෙන ක‍්‍රියා කිරීම සඳහා අවශ්‍ය පරිසරය අප සියල්ලන් එක් ව ගොඩනැඟිය යුතු යි.
ත‍්‍රිපිටකය ලොව ඇති අති විශාල වූත් ග‍්‍රන්ථාරූඪ වූත් ඥාන සමුදාය යි. මෙරට ජනාධිපති වශයෙන් මාගේ බලතල ප‍්‍රකාර ව මේ ත‍්‍රිපිටක ධර්ම දායාදය සුවිශේෂ ජාතික උරුමයක් ලෙස ප‍්‍රකාශයට පත් කිරීමෙන් ත‍්‍රිපිටකය විකෘති අර්ථ විවරණයන් ගෙන් බේරාගැනීම සඳහා වන නෛතික ආරක්ෂාව සැලසෙනවා. අද එක් එක් පුද්ගලයන් තමන් ගේ පෞද්ගලික වාසිය උදෙසා ත‍්‍රිපිටකාගත ධර්ම කරුණු වැරැදි ලෙස වටහා ගනිමින් විකෘති කිරීම් සහිත පොත් ලියා පළ කොට තිබෙනවා. ත‍්‍රිපිටකයේ ඇතැම් පාලි ශබ්දයන්ට වැරැදි අර්ථකථන දී තිබෙනවා. ඇතැමුන් ත‍්‍රිපිටකය සරල බසින් වටහා දීමට සිතා නව සංස්කරණ ඉදිරිපත් කරන බව පෙනෙනවා. පාලි බස පිළිබඳ විශාරද අවබෝධයක් නැති අය ලවා ඇතැම් ආයතන ත‍්‍රිපිටකය සිංහලයට පරිවර්තනය කර තිබෙනවා.
සමාජජාල වෙබ් අඩවිවල ද්වේශසහගත ධර්ම ප‍්‍රචාරයන්ට ත‍්‍රිපිටක ධර්මය යොදා ගත් අවස්ථා අප දකිනවා. ත‍්‍රිපිටකය ජාතික උරුමයක් සේ අද දින නිල වශයෙන් ප‍්‍රකාශයට පත් කිරීම නිසා මින්පසු රජයේ අවසරයකින් තොර ව ත‍්‍රිපිටකය සංස්කරණය කිරීමට හෝ පරිවර්තනයට අනිසි කටයුතුවලට භාවිත කිරීමට කිසිවකුටත් ඉඩක් නොමැති බව අතිපූජ්‍ය සංඝරත්නය ඉදිරියේ මා සඳහන් කරනවා. ඉතිහාසයේ ඇතැම් තර්ජනාත්මක කාලවල ථේරවාද බුදුදහම රැකගත්තේ රාජ රාජ මහාමාත්‍යාදීන් විසිනුයි. ඒ අයුරින් ම මේ මොහොතේ රජයේ මැදිහත්වීම සිදුවන්නේ ත‍්‍රිපිටක ධර්මයට අවැඩ සඳහා වන සියලු කටයුතු වළක්වාලීමට යි. ත‍්‍රිපිටකය පරිවර්තනයට හා සංස්කරණයන්ට මින්පසු ඉඩ ලැබෙන්නේ ප‍්‍රාමාණික විද්වත් මණ්ඩලයකට පමණයි.
ත‍්‍රිපිටකය ආරක්ෂා කරන අතරම ඉර හඳ මෙන් බබළන එහි විවෘත භාවය උදෙසාත් කටයුතු කිරීම අප සතු වගකීමක්. බෞද්ධ සම්ප‍්‍රදායයේ පිහිටමින් ශාස්ත‍්‍රීය ලෙස බුද්ධ වචනය තේරුම් ගැනීම සඳහා කරන විමර්ශනයන්ට අනුබල දීමත් මෙමගින් සිදුවෙනවා. මහා සංඝරත්නයේ අපේක්ෂාව හා අනුශාසනා පරිදි මේ අත්‍යවශ්‍ය තීරණයට මා එළැඹුණේ ධර්මයේ හැසිරෙන කෙනකු ලෙස යි.
එ සේ ම බුද්ධ භාෂිතය පිළිබඳ අප‍්‍රමාණ ගෞරවාදරයක් පෙරදැරිවයි. ධම්මෝභවේ රක්ඛති ධම්මචාරී. අපි සැමවිටම විශ්වාස කරන්නේ එයයි. ඒ වගේම අපි සැමවිටම විශ්වාස කරන්නට ඕන අපි රජය ජාතික උරුමයක් වශයෙන් මෙම ත‍්‍රිපිටකය ප‍්‍රකාශයට පත්කළා වගේම යුනෙස්කො ආයතනය මගින් මෙය උතුම් ලෝක උරුමයක් බවට පත්කිරීම සඳහා අපි එක්සත් ජාතීන්ගේ මහලේකම්වරයාගෙන් ඉල්ලීමක් කරනවා.
මේ උතුම් කටයුත්ත සඳහා මුල සිට අද දක්වාම මෙයට අපට අනුශාසනා කළ මඟපෙන්වූ මහා සංඝරත්නයටත්, මේ සඳහා දායක වූ සියලුම දෙනාටත්, මේ කටයුතු සඳහා දායක වූ ජනාධිපති කාර්යාලය, බුද්ධශාසන අමාත්‍යාංශය, සංස්කෘතික අමාත්‍යාංශය ඇතුළු සියලුම ආයතනවලටත්, මා රජය වෙනුවෙනුත් පෞද්ගලිකවත් මාගේ ස්තුතිය පළකරනවා.
{jathumbnail off}
