පසුගියදා සිදුවූ අවාසනාවන්ත සිදුවීම්වලින් පසු සමාජයේ විශාල හිඩැසක් හා කඩාවැටීමක් සිදුව තිබෙන නිසා ජනතාව තුළ ක්‍රමානුකූලව විශ්වාස ඇතිවන අන්දමින් කටයුතු කළ යුතුව ඇතැයි අගමැති රනිල් වික්‍රමසිංහ මහතා පවසයි.

මෙම සිද්ධියේදී, ලැබී තිබූ තොරතුරු අනුව ක්‍රියා නොකිරීම සම්බන්ධයෙන් මෙලෙස සමාජයේ විශ්වාසය බිඳ වැටීමට හේතුවී තිබෙන බවද අගමැතිවරයා පෙන්වා දෙයි.

පාසල් ආරම්භ කළ ද නගරබද පාසල්වල සිසුන්ගේ පැමිණීම වැඩිවන්නේ විශ්වාසය වැඩිවන තරමට බැවින් ක්‍රමානුකූලව එම විශ්වාසය සමාජය තුළ ගොඩනැඟිය යුතුව ඇතැයි ද අගමැති රනිල් වික්‍රමසිංහ මහතා පවසයි.

තමා අධ්‍යාපන ඇමැතිවරයාව සිටියදී 1983 ඇතිවූ කෝලාහලවලින් පසු පාසල් විවෘත කළ විට නගරබද පාසල්වල සිසුන්ගේ පැමිණීම 75%ක් හෝ 85%ක් වීමට සති දෙකක පමණ කාලයක් ගතවූ බව අගමැති රනිල් වික්‍රමසිංහ මහතා සිහිපත් කරයි.

අගමැති රනිල් වික්‍රමසිංහ මහතා මේ බව පැවැසුවේ ජාත්‍යන්තර, ජාතික සහ පළාත් මට්ටමේ ඉහළ ජයග්‍රහණ ලැබූ ජ්‍යෙෂ්ඨ ක්‍රීඩක ක්‍රීඩිකාවන් 3888 දෙනකු ක්‍රීඩා පුහුණුකරුවන් ලෙස පාසල්වල සේවයට එක්කිරීම සඳහා පත්වීම් ලිපි ප්‍රදානය කිරීම නිමිත්තෙන් අරලියගහ මන්දිරයේ 13දා පැවැති උත්සවයේදී ය.