නවකවදයේ වින්දිතයන් බවට පත්වූවන්ට සහන සැලසීමට පත් කළ කමිටුවේ නිර්දේශ මාස තුනක් ඇතුළත තමා වෙත ලබාදිය යුතු බව අමාත්‍ය ආචාර්ය බන්දුල ගුණවර්ධන මහතා දැනුම් දී තිබේ.
එමෙන්ම විශ්වවිද්‍යාල පද්ධතියේ මෙන්ම උසස් අධ්‍යාපන ආයතනයන්හි නවකවදය නිසා 2018 වසරේ පමණක් සිසුන් 2000ක් පමණ සිය උසස් අධ්‍යාපනය හැරදමා ගොස් ඇති බවද හෙතෙම අනාවරණය කළේය. ඒ මහතා මේ බව සඳහන් කළේ ඉකුත් දා (18) ප්‍රවෘත්ති දෙපාර්තමේන්තුවේ පැවැති විශේෂ මාධ්‍ය හමුවකට එක්වෙමින්ය. එහිදී වැඩිදුරටත් කතා කළ ඇමැතිවරයා මෙසේද කීය.
මෙය ජාතික අපරාධයක් ලෙස සැලකිය හැකියි. සිසුන්ට සිදුවන කායික හා මානසික වද- හිංසා හේතුවෙන් රෝහල් ගත වී ඇති, සදහටම ආබාධිත තත්ත්වයට පත්ව ඇති සහ සියදිවි නසාගෙන ඇති සැලකිය යුතු පිරිසක් ද මේ අතර සිටිනවා.
උසස් අධ්‍යාපනය නිදහස් අධ්‍යාපනයක් ලෙස සලකන ඉතාමත් අඩු සංඛ්‍යාවක් වූ රටවල් අතුරෙන් ප්‍රමුඛස්ථානයක් ගන්නා ශ්‍රී ලංකාවේ මෙවැනි තත්ත්වයක් පැවතීම ගැන ජාතියක් වශයෙන් ලැජ්ජා විය යුතු කරුණක්.
මෙම අවාසනාවන්ත තත්ත්වයේ අතුරු ඵලයක් ලෙස මෙරට ජාතික විශ්වවිද්‍යාල පද්ධතියට සිසුන් වාර්ෂිකව 30,000ක් ඇතුළත් කර ගන්නා විට තවත් සිසුන් 20,000ක් පමණ විදේශ ගත වේ. මෙම විදේශගතවන සිසුන් 20,000 අතර දේශීය විශ්වවිද්‍යාලයකට තේරී තිබුණ ද නවක වදය වැනි කරුණු හේතුවෙන් විශ්වවිද්‍යාල ප්‍රවේශය ප්‍රතික්ෂේප කරන සිසුන් සිටී. මෙම සිසුන් විදේශගතවීම හේතුවෙන් වාර්ෂිකව රුපියල් බිලියන 50ක පමණ විදේශ විනිමයක් රටට අහිමි වෙනවා.
මේ හේතුවෙන් වින්දිතයන් වූවන්ට සහන සැලසීම රජයේ ප්‍රමුඛ යුතුකමක් ලෙස ජනාධිපති ගෝඨාභය රාජපක්ෂ මහතා ප්‍රමුඛ රජය තීරණය කර තිබේ.
ඒ අනුව අමාත්‍යවරයා ලෙස මා ඉකුත් දා (17) විශ්වවිද්‍යාල ප්‍රතිපාදන කොමිෂන් සභාවේ සභාපතිවරයාට උපදෙස් ලබා දී නවකවදයේ වින්දිතයන්ට සහන සැලසීම වෙනුවෙන් කමිටුවක් වහාම පත් කිරීමට කටයුතු කළා.
එම කමිටුව සඳහා පහත සඳහන් සාමාජිකයන් පත් කරන ලෙස ද මා වැඩිදුරටත් උපදෙස් දුන්නා.
ඒ අනුව ශ්‍රේෂ්ඨාධිකරණයේ හිටපු විනිසුරු ආචාර්ය සලීම් මර්ෂුප්, (සභාපති) ජයවර්ධනපුර විශ්වවිද්‍යාලයේ හිටපු උපකුලපති මහාචාර්ය නාරද වර්ණසූරිය, ජයවර්ධනපුර විශ්වවිද්‍යාලයේ පාලි හා බෞද්ධ අධ්‍යයන අංශයේ අංශාධිපති මහාචාර්ය මාගම්මන ප්‍රඥානන්ද හිමි, ජාතික ධර්මෝපදේශ අධ්‍යක්ෂ ආචාර්ය බෙනට් ශාන්ත ප්‍රනාන්දු පියතුමා, ඌව විශ්වවිද්‍යාලයේ හිටපු උපකුලපති ආචාර්ය චන්ද්‍රා ඇඹුල්දෙණිය, ජනාධිපති නීතිඥ ප්‍රසන්න ලාල් ද අල්විස් , විශ්වවිද්‍යාල ප්‍රතිපාදන කොමිෂන් සභාවේ උපසභාපති මහාචාර්ය ජනිතා ලියනගේ (කැඳවුම්කරු හා කමිටු ලේකම්) මහත්ම මහත්මීන්ගෙන් සැදුම්ලත්ය.
කමිටුව සිය නිර්දේශ මාස 3ක් අතුළත ඉදිරිපත් කළ යුතු අතර අදාළ නිර්දේශ අමාත්‍ය මණ්ඩලයට ඉදිරිපත් කිරීමෙන් අනතුරුව නවකවදයේ වින්දිතයන්වීම හේතුවෙන් සරසවි හැර ගොස් ඇති සිසුන්ට නැවත සරසවි වරම් ලබා දීමේ වැඩපිළිවෙළක් සකස් කෙරේ.
මෙම කමිටුව මූලික වශයෙන් ආසන්න වසර කීපයේ නවකවදය හේතුවෙන් සරසවිය හැර ගිය සිසු සිසුවියන් පිළිබඳ සලකා බැලේ. එමෙන්ම ඉතා නුදුරේදීම පුවත්පත් දැන්වීම් පළකර පැමිණිලි හා අභියාචනා කැඳවා සාක්කි විමසීම ආරම්භ කෙරේ.
