අයි.ටී.එන් ආයතනය මගින් එළඹෙන පෙබරවාරි 4 වැනිදා සිට නව මුහුණුවරකින් යුතු වැඩසටහන් ඉදිරිපත් කිරීමට සැලසුම් කර ඇති බවත් දේශීය චින්තනය ඉස්මතුවන ආකාරයේ විචිත්‍රාංග පෙළක් මගින් කලාකරුවන්ට අතදීම, දරුවන්ට අධ්‍යාපනික දැනුම ලබාදීම මෙන්ම සමාජය නිවැරදි දිශානතියකට ගෙනයෑමට උරදෙනු ඇති බව තොරතුරු හා සන්නිවේදන තාක්ෂණ රාජ්‍ය අමාත්‍ය ලක්ෂ්මන් යාපා අබේවර්ධන මැතිතුමා අද (21) අමාත්‍යංශ ශ්‍රවණාගාරයේදී පැවති මාධ්‍ය හමුවකදී පැවසුවේය.
මෙහිදී වැඩිදුරටත් අදහස් දැක්වූ අමාත්‍යවරයා පැවසුවේ, ‘සෞභාග්‍යයේ දැක්ම’ ප්‍රතිපත්ති ප්‍රකාශනයට අනුව අඩු ආදායම්ලාභී පවුල්වල ජීවන තත්ත්වය උසස් කරලීමේ අරමුණින් දියත් වන රැකියා ලක්ෂයක් ලබාදීමේ වැඩසටහන සඳහා අයදුම්පත් නිකුත් කිරීම මේ වනවිට ආරම්භ කර තිබෙන බවයි. සමෘද්ධිලාභී පවුල්වල සාමාජිකයින් හා සමෘද්ධි සහනාධාර නොලබන පවුල්වල සාමාජිකයින්ට මේ සඳහා දායකවීමට අවස්ථාව ලැබේ. අදාළ අයදුම්පත් ප්‍රාදේශීය ලේකම් කාර්යාලවලින් ලබාගෙන සම්පූර්ණ කර ග්‍රාම නිළධාරීවරයාගේ නිර්දේශය ලබාගෙන නැවත ප්‍රාදේශීය ලේකම් කාර්යාල වෙත ලබාදීමට හැකි අතර රැකියා ලබාගැනීමට කිසිදු දේශපාලඥයෙකුගේ අනුබලයක් අවශ්‍ය නොවන බව ද ඇමතිවරයා අවධාරණය කළේය.
සාමාන්‍ය පෙළ සමත් වයස අවුරුදු 18 – 40 අතර ඕනෑම අයෙකුට මේ සඳහා අයදුම් කළ හැකි අතර දෙපාර්තමේන්තුවක් හරහා විනිවිදභාවයකින් යුතුව රැකියා ලබාදීම සිදුවන බවත් මාස 6ක පුහුණු කාලයකින් පසු තමන් ජීවත්වන ප්‍රදේශය ආශ්‍රිතව රැකියාවක් හිමිවන බවත් පුහුණු කාලයේදී රු. 22,500 ක වැටුපක් හිමිවනු ඇති බවත් ඔහු වැඩිදුරටත් පැවසුවේය.
අභ්‍යන්තර මෙන්ම බාහිර උපාධිධාරීන්ට රැකියා ලබාදීමේ වැඩපිළිවෙල ද මේ සමගම දියත් වන සඳහන් කළ අමාත්‍යවරයා, මාධ්‍යවේදීන්ට ණය ලබාදීමේ වැඩපිළිවෙල ද එළඹෙන මාර්තු මස සිට ආරම්භ වන බවත් අමාත්‍යවරයා පෙන්වා දුන්නේය.
