දේශීය ආදායම් පනත සංශෝධනය කිරීමට මුදල්, ආර්ථික හා ප්‍රතිපත්ති සංවර්ධන අැමැතිවරයා වශයෙන් අගමැති මහින්ද රාජපක්ෂ මහතා කරන ලද යෝජනාවට අැමැති මණ්ඩලයේ අනුමැතිය ලැබී ඇත. මුදල් ඇමැතිවරයා ලෙස මහින්ද රාජපක්ෂ මහතා මෙම යෝජනාව ඉදිරිපත් කරනු ලැබුවේ, සරල, විනිවිද පෙනෙන හා කාර්යක්ෂම බදු ක්‍රමයක් යළි නිර්මාණය කරන බවට ආණ්ඩුව විසින් ලබාදුන් පොරොන්දු ඉටුකිරීමේ අරමුණිනි.
නව ආණ්ඩුව බලයට පත්වීමෙන් පසුව පැවැති මුල්ම ඇමැති මණ්ඩල රැස්වීමට ආර්ථික පුනර්ජීවනය ආරම්භ කිරීම සඳහා ජනාධිපති ගෝඨාභය රාජපක්ෂ මහතා විශේෂ අැමැති මණ්ඩල පත්‍රිකාවක් ඉදිරිපත් කරන ලදී. එමඟින් පහසු බදු පරිපාලනයක් ප්‍රවර්ධනය කිරීමටත්, බදු ගෙවීම සඳහා ස්වයං අනුකූලතාවයක් හඳුන්වා දීමටත් තීරණය කැර තිබිණි.
ඒ අනුව අගමැති මහින්ද රාජපක්ෂ මහතා පසුගිය සතියේ කළ යොජනාව අැමැති මණ්ඩලය අනුමත කළ පරිදි 2017 අංක 24 දරණ දේශීය ආදායම් පනත සංශෝධනය කිරීම සඳහා දේශීය ආදායම් (සංශෝධන) පනත් කෙටුම්පත පාර්ලිමේන්තුව වෙත අනුමැතිය සඳහා ඉදිරියේදී ඉදිරිපත් කරන බව මුදල් අමාත්‍යාංශය පවසයි.
දේශීය ආදායම් පනතට ගෙන එන එම නව සංශෝධන යටතේ රඳවා ගැනීමේ බද්ද රු. 250,000 දක්වා නිදහස් කෙරේ. උපයන විට ගෙවීමේ බද්ද සඳහා වන සීමාව රු. 100,000 සිට රු. 250,000 දක්වා ඉහළ දැමීම ඇතුළු බදු සහන රැසක් 2020 ජනවාරි මස 1 වැනි දා සිට ක්‍රියාත්මක කෙරෙන බවද එම අමාත්‍යාංශය කියා සිටී.
