මහපොළ ශිෂ්‍යත්ව අරමුදල සියලු දෙනාගේ සහයෝගය ඇතිව රුපියල් බිලියන විස්ස දක්වා වැඩි කිරීමට තමා අපේක්ෂා කරන බව තොරතුරු හා සන්නිවේදන තාක්ෂණ, උසස් අධ්‍යාපන, තාක්ෂණ හා නවෝත්පාදන ඇමැති ආචාර්ය බන්දුල ගුණවර්ධන මහතා ප්‍රකාශ කරයි.
ඒ මහතා මේ බව සඳහන් කළේ ඊයේ (22) මහපොළ ශිෂ්‍යත්ව භාරකාර අරමුදල වෙනුවෙන් නව වෙබ් අඩවියක් හඳුන්වා දීම ජාතික විද්‍යා හා තාක්ෂණ කොමිෂන් සභාවේ පැවැති අවස්ථාවට එක්වෙමින්ය.
එහි දී වැඩිදුරටත් අදහස් දැක්වු ඇමැතිවරයා මෙසේද කීය. පසුගිය කාලසීමාවේ දී මහපොළ ශිෂ්‍යත්ව ගෙවීම් සම්බන්ධයෙන් යම් යම් අර්බුද පැවතිය ද වර්තමාන ආණ්ඩුව විසින් හිඟ වූ මුදල් සමඟ මහපොළ ශිෂ්‍යත්ව ගෙවීම් කටයුතු සාර්ථකව මේ වන විටත් සිදු කරමින් තිබෙනවා.
බිලියන 10.5 ක් වන මහපොළ ශිෂ්‍යත්ව අරමුදල බිලියන 20 දක්වා වැඩි කිරීමට ශිෂ්‍ය ප්‍රජාව ප්‍රතිලාභ ලැබූ විද්‍යාර්ථීන්, විදේශීය රටවල වෙසෙන ශ්‍රී ලාංකිකයන් මෙන්ම දෙමාපියන් ද කටයුතු කරනු ඇතැයි තමා අපේක්ෂා කරනවා.
www.mahapola.lkවෙබ් අඩවියෙන් මහපොළ ශිෂ්‍යත්ව අරමුදල පිළිබඳ සියලුම තොරතුරු අද සිට ලබා ගැනීමට හැකිවන බව පැවසු ඇමැතිවරයා විනිවිද භාවයකින් යුක්තව තොරතුරු දැන ගැනීමේ පනතටත් වඩා ඉදිරියට ගොස් මේ හරහා තොරතුරු සැපයීමට හැකිවීම ගැන මම සතුටුවෙනවා.
ජාතික විද්‍යා හා තාක්ෂණ කොමිෂන් සභාවේ පැවති මේ අවස්ථාවට උසස් අධ්‍යාපන, තාක්ෂණ සහ නවෝත්පාදන අමාත්‍යාංශයේ ලේකම් අනුර දිසානායක, මහපොළ ශිෂ්‍යත්ව අරමුදලේ අධ්‍යක්‍ෂ පරාක්‍රම බණ්ඩාර, කේෂරලාල් ගුණසේකර යන මහත්වරුන් ද සහභාගී වී සිටියහ.
