රත්මලාන විශ්වවිද්‍යාල විද්‍යායතනයේ සිසුන් මුහුණ දෙන ගැටලුවලට දින 4කින් විසඳුම් ලබා දෙන බවත් තමාගේ සහ රජයේ අරමුණ ශිෂ්‍ය මර්දනය නොවන බවත් ඕනෑම ගැටලුවක් සඳහා හොඳම විසඳුම සාකච්ඡාව බවත් අමාත්‍ය ආචාර්ය බන්දුල ගුණවර්ධන මහතා පැවසීය.
ඒ මහතා මේ බව පැවසුවේ ඊයේ (27) රත්මලාන විශ්වවිද්‍යාල විද්‍යායතනයේ ශිෂ්‍ය ශිෂ්‍යාවන් සතියකට අධික කාලයක් තිස්සේ සිදු කරගෙන යන පන්ති වර්ජනය සහ සත්‍යග්‍රහය පිළිබඳ සොයා බැලීම සඳහා එම ආයතන පරිශ්‍රයට ගොස් ශිෂ්‍ය ශිෂ්‍යාවන් සමඟ කළ සාකච්ඡාවෙන් අනතුරුවය.
එහිදී වැඩිදුරටත් කතා කළ ඇමැතිවරයා මෙසේද කීය.
මේ දරුවන් සතියක කාලයක් තිස්සේ අට්ටාලයක් ගහගෙන පන්ති වර්ජනය කරමින් උපවාස කරනවා. උපවාස කර, පන්ති වර්ජන කර, අට්ටාලවල ඉඳගෙන ප්‍රශ්න විසඳන්න බැහැ.
නමුත් ගෝඨාභය රාජපක්ෂ මහතා ආවේ මේ ගැටලු විසඳන්න. එතුමා හැමවිටම සාකච්ඡා කර ගැටලු විසඳන්න කැමතියි. දරුවන්ට බැරියර් දමා, කඳුළු ගෑස් ගසා ඒ දරුවන්ගේ ගැටලු විසඳන්න නෙමෙයි. අපිත් දරුවන්ගේ දෙමාපියන්. ඒවගේම ගුරුවරුන්. විශ්වවිද්‍යාල ජීවිතයකුත් අපටත් තිබුණා. ඒ නිසා ම සිසුන්ගේ ගැටලු දෙස වැඩිහිටියන් ලෙස බලා ඔවුන්ගේ ගැටලු විසඳන්න හිතාගෙනයි ආවේ. ළමයින්ගෙන් පළිගන්න එක මගේ ප්‍රතිපත්තිය නෙමෙයි.
විශ්වවිද්‍යාල විද්‍යායතන 300ක් රට පුරා ඇති කරන්නටත් ඊට අමතර උසස් පෙළ විභාගය අභාග්‍යයක් බවට පත් නොකර එය සමත්වන සියලු දරුවන්ට උසස් අධ්‍යාපන වරම් ලබා දීමටත් දැනට නොසලකා හැර තිබෙන උසස් අධ්‍යාපන ආයතන යාවත්කාලීන කොට ශිෂ්‍ය ගැටලු විසඳන්නටත් අවශ්‍ය සැලසුම් සමඟින් කැබිනට් මණ්ඩල අනුමැතිය ලබා ගැනීමට කටයුතු කරනවා.
මේ පිළිබඳ සාකච්ඡාකොට විසඳුමක් කරා යාමට ලබන බ්‍රහස්පතින්දා සවස 1ට සියලුම පාර්ශ්වයන් සමඟ සාකච්ඡා කරනවා. ශිෂ්‍ය නියෝජිතයන් ද ඒ සඳහා කැඳවනවා. එසේ විවෘත ව සාකච්ඡා කිරීමෙන් ගැටලු විසඳාගන්නට ඉතා ම පහසු යි. ඒ නිසා මා පිළිබඳ විශ්වාසය තබා මෙම උපවාසය නවත්වන ලෙස දරුවන්ගෙන් ඉල්ලනවා.
