අගමැති මහින්ද රාජපක්ෂ මහතා සහ එක්සත් ජනපද කොන්ග්‍රස් සභික අමි බෙරා, ජෝර්ජ් හෝල්ඩින් අතර හමුවක් විජයාරාම නිල නිවසේ දී පෙරේදා (15) පැවැත්විණි.
එක්සත් ජනපදය හා ශ්‍රී ලංකාව අතර ශක්තිමත් සබඳතාවක් ගොඩනඟා ගැනීමට බලාපොරොත්තු වන බව එහි දී කොන්ග්‍රස් සභික අමි බෙරා අගමැතිවරයා සමඟ සඳහන් කළේය.
එක්සත් ජනපද නියෝජිත මන්ත්‍රී මණ්ඩලයේ කැලිෆෝනියාවේ 7 වැනි කොන්ග්‍රස් දිස්ත්‍රික්කය නියෝජනය කරන අමී බෙරා, විදේශ කටයුතු කමිටුවේ සාමාජිකයකු ද වෙයි. එසේම ඔහු ආසියාව, පැසිෆික් හා න්‍යෂ්ඨික අවි ව්‍යාප්තිය වැළැක්වීම (න්‍යෂ්ථික අවිහරණය) පිළිබඳ අනුකමිටුවේ සභාපතිවරයා ලෙස ද කටයුතු කරයි.
සිය රජය රටේ ආර්ථික සංවර්ධනයට ප්‍රමුඛතාවක් දී තිබෙන හෙයින් එක්සත් ජනපද ආයෝජන රටේ ආර්ථීක සංවර්ධනය සඳහා සපයන දායකත්වය අගය කරන බව මෙහිදී අගමැති මහින්ද රාජපක්ෂ මහතා එක්සත් ජනපද කොන්ග්‍රස් සභිකයන් සමඟ සඳහන් කළේය.
ආර්ථික සම්බන්ධතා ශක්තිමත් කිරීම සඳහා මේ හමුවීම ඉතා හොද අවස්ථාවක් ලෙස සලකන බව සඳහන් කළ කොන්ග්‍රස් සභික ජෝර්ජ් හෝල්ඩින්, සිය ප්‍රාන්තය වන උතුරු කැරොලිනාවේ 2 වැනි කොන්ග්‍රස් දිස්ත්‍රික්කයේ ශ්‍රී ලංකාවේ සෘජු විදේශීය ආයෝජන මඟින් ක්‍රියාත්මක වන ව්‍යාපාර මේ වන විත් ක්‍රියාත්මක වන බව පෙන්වා දුන්නේය. කොන්ග්‍රස් සභික හෝල්ඩින් නිවාස කමිටුව, අය වැය කමිටුව සහ ආචාර ධර්ම කමිටුවේ සාමාජිකයෙකි.
දෙරටේ දැනට පවතින සහයෝගීතාවන්ට අමතරව ත්‍රස්තවාදය පිටුදැකීම, සංචාරක කර්මාන්තය හා බලශක්ති යන ක්ෂේත්‍රවල සහයෝගීතාවය පිළිබඳවත් දෙපාර්ශ්වය මේ සාකච්ඡාවේ දී අවධානය යොමු කෙරිණි.
ශ්‍රී ලංකාවේ එක්සත් ජනපද තානාපතිනි ඇලයිනා ටෙප්ලිට්ස් ද මේ අවස්ථාවට එක්වූ අතර ආසියානු කලාපය තුළ ශ්‍රී ලංකාවට හිමිව ඇති විශේෂත්වය සම්බන්ධයෙන් තානාපතිවරිය මෙහිදී අදහස් දැක්වූවාය.
ශක්තිමත්, ස්වෛරී ශ්‍රී ලංකාවක් බිහිකිරීම සඳහා සිය සහාය ලබා දෙන බව ද මෙහි දී තානාපතිවරිය ප්‍රකාශ කළාය.
ට හිටපු විදේශ ඇමැති ජී. එල්. පීරිස්, අග්‍රාමාත්‍ය ලේකම් ගාමිණී සෙනරත් සහ හිටපු මහ බැංකු අධිපති අජිත් නිවාඞ් කබ්රාල් මහත්වරු ද මේ අවස්ථාවට එක්ව සිටියහ.
ධනුෂ්ක ගොඩකුඹුර
