ථෙරවාදය මෙන්ම මහායාන ඉ‍ගැන්වීම අතර කතිකාවක් ඇතිකිරීම වෙනුවෙන් ඕටානි චෝජුන් හිමිපාණන් වහන්සේ ප්‍රමුඛ කාර්ය භාරයක් ඉටුකළ බව අගමැති මහින්ද රාජපක්ෂ මහතා ප්‍රකාශ කළේය.
ක්යෝතෝහි හෝගන්ජි විහාරස්ථානයේ මහානායක ඕටානි චෝජුන් හිමිපාණන් වහන්සේට 'ශාසන රත්න' ගෞරව නාමය පුදකිරීම වෙනුවෙන් පාර්ලිමේන්තු කමිටු අංක 1 ශාලාවේදී ඊයේ (18) පැවැති උත්සවයට එක්වෙමින් අගමැති මහින්ද රාජපක්ෂ මහතා මේ බව පැවසීය. එම ගෞරව නාමය පුද කරමින් අගමැති මහින්ද රාජපක්ෂ මහතා මෙසේද අදහස් දැක්වීය.
ජපානය ශ්‍රී ලංකාව මතු නොව සමස්ත ලෝකයේම බුදු දහමේ චිරස්ථීතිය උදෙසා තම ශාසනික දිවියේ වැඩි කාලයක් කැප කළ ක්යෝතෝහි හෝගන්ජි විහාරස්ථ මහානායක ඕටාන් චෝජුන් මාහිමිපාණන් වහන්සේ වෙනුවෙන් ප්‍රණාමය පුදකිරීමේ අවස්ථාවට සහභාගිවීමට ලැබීම මා ලද භාග්‍යයක්.ශ්‍රී ලංකාවත් ජපානයත් අතර පවතින්නේ දශක ගණනක් පුරා පැවතගෙන එන ඉතා කිට්ටු සබැඳියාවක්. දෙරටටම අසීරු අවස්ථාවලදී දෙරටේ අනොන්‍ය බැඳීම වඩාත් කැපී පෙනේ. ද්විපාර්ශ්වීය රාජ්‍ය තාන්ත්‍රික සබඳතා හැරුණුකොට ශ්‍රී ලංකාවත් ජපානයත් අතර දිනෙන් දින වර්ධනය වන පුද්ගල සබඳතා විශේෂ තැනක් ගන්නවා
ඕටාන් චෝජුන් මාහිමිපාණන් වහන්සේ යනු නිතැතින්ම ශ්‍රී ලංකාවේත් ජපානයේත් වෙසෙන බෞද්ධ ප්‍රජාවන් අතර බැඳීම සනිටුහන් කරන ප්‍රතිමූර්තියක්. ජපානයේ රාජකීය පවුලට කිට්ටු ඥාතීත්වයක් ඇති උන් වහන්සේ තෝකියෝ මෙන්ම ප්‍රංශයේ සෝබෝන් විශ්ව විද්‍යාලවලින් උසස් අධ්‍යාපනය හදාරා ඇති වියත් පඬිරුවනක් වෙනවා. ජපානයේ නයෝගා විශ්ව විද්‍යාලයේ ආචාර්යවරයෙකු වශයෙන්ද කටයුතු කර ඇති උන් වහන්සේ ජපානයේ බෞද්ධ පුරෝගාමීවරයෙක් ද වෙනවා.
බුදු දහමේ ථෙරවාද මෙන්ම මහායාන ඉගැන්වීම් අතර කතිකාවක් ඇති කිරීම වෙනුවෙන් ඕටාන් චෝජූන් ස්වාමීන් වහන්සේ ප්‍රමුඛ කාර්යභාරයක් ඉටු කළා. අධ්‍යාත්මික සංවර්ධනය විදහා දක්වන භෞතික යටිතල පහසුකම් ගොඩනැංවීමෙන් බෞද්ධ බැතිමතුන්ගේ අධ්‍යාත්මික ගුණ වගාව නැංවිය හැකි බව දැඩිව විශ්වාස කළ උන් වහන්සේ එම අරමුණ වෙනුවෙන් ගන්නා ලද ක්‍රියාමාර්ග ජපානය, ශ්‍රී ලංකාව තුළ මෙන්ම ලෝකයේ වෙනත් රටවලද පැසසුමට ලක්ව තිබෙනවා. දීර්ඝ කාලයක් මුළුල්ලේ ලෝක බෞද්ධ ප්‍රජාව හා බුද්ධ ශාසනය වෙනුවෙන් සපුරාලන ලද සේවය අගය කරනු වස් ඕටාන් චෝජූන් හිමිට ශාසන රත්න ගෞරව නාමය මෙයින් පුද කරන්නේ.
උන් වහන්සේට දීර්ඝායුෂ ප්‍රාර්ථනා කරන අතරම ඉදිරි වැඩකටයුතු සියල්ල සර්වප්‍රකාරයෙන් සාර්ථක වේවායි ඕටානි චෝජුන් මාහිමිපාණන් වෙත ගෞරවයෙන් යුතුව ප්‍රාර්ථනා කර සිටිමි.
කතානායක කරූ ජයසූරිය, සභානායක ඇමැති දිනේෂ් ගුණවර්ධන , ජපන් තානාපති අකිරා සුගියාමා, ඇමැතිවරුන් වන ඩලස් අලහප්පෙරුම , තිලංග සුමතිපාල , ලසන්ත අලගියවන්න මහත්වරුන් ඇතුළු පක්ෂ විපක්ෂ පාර්ලිමේන්තු මන්ත්‍රීවරුන් සහ පාර්ලිමේන්තු නිලධාරීහුද මේ අවස්ථාවට එක්වූහ.
