පොදු ජනතාවගේ සංවර්ධනය, ආරක්ෂාව සහ සුබසාධනය සැලසීමේ කටයුත්තේ අවංක චේතනාවෙන් නිරත වන රාජ්‍ය නිලධාරීන් එය වඩාත් සාර්ථක කර ගැනීම සඳහා නොබියව තීන්දු තීරණ ගෙන කටයුතු කරන්නැයි ජනාධිපති ගෝඨාභය රාජපක්ෂ මහතා ප්‍රකාශ කළේය. නිමාවට පත්වූ ජනාධිපතිවරණයේ දී පැහැදිලි ජනවරමක් ලබාදෙමින් මෙරට ජනතාව අපේක්ෂා කළ නිදහසේ ජීවත්වීමට සුරක්ෂිත රටක් බිහි කිරීමේ ප්‍රාර්ථනාව මේ වන විට ඉටු කොට ඇතැයි ද කී ජනාධිපතිවරයා, එළැඹ තිබෙන මොහොතේ රටේත් ජනතාවගේත් ආර්ථික දියුණුව ඇති කරලීමට ක්‍රියා කරමින් සිටින බව ද කියා සිටියේය.
රට පුරා විහි දී ඇති අබලන් ග්‍රාමීය මාර්ග කිලෝමීටර් ලක්ෂයක් සංවර්ධනය කිරීමේ ජාතික වැඩසටහන ඓතිහාසික මහනුවර පේරාදෙණිය - ගලහා - දෙල්තොට - රිකිල්ලගස්කඩ මාර්ගයෙන් සමාරම්භ කිරීමේ උත්සවය ඊයේ (19) ආරම්භ කළ අවස්ථාවට ප්‍රධාන ආරාධිතයා වශයෙන් එක්වෙමින් ජනාධිපතිවරයා මේ බව කියා සිටියේය.
ජනාධිපති ගෝඨාභය රාජපක්ෂ මහතාගේ ‘රට හදන සෞභාග්‍යයේ දැක්ම’ ප්‍රතිපත්ති ප්‍රකාශනයට අනුව මාර්ග හා මහාමාර්ග අමාත්‍යාංශය සහ මහාමාර්ග සංවර්ධන රාජ්‍ය අමාත්‍යාංශය මගින් ක්‍රියාත්මක කරන රට පුරා විහි දී ඇති අබලන් ග්‍රාමීය මාර්ග කි. මී. 100, 000 ක් සංවර්ධනය කිරීමේ ජාතික වැඩසටහන ජනාධිපති ගෝඨාභය රාජපක්ෂ මහතාගේ සහ අගමැති මහින්ද රාජපක්ෂ මහතාගේ ප්‍රධානත්වයෙන් ඊයේ (19) පෙරවරුවේ පේරාදෙණිය - ගලහ - දෙල්තොට - රිකිල්ලගස්කඩ මාර්ගයෙන් ආරම්භ කෙරිණි.
නව රජයේ ප්‍රතිපත්ති ප්‍රකාශනයට අනුව ග්‍රාමීය ජනතාවට ජාතික මහාමාර්ග පද්ධතියට ප්‍රවේශවීම සඳහා වඩාත් කාර්යක්‍ෂම පහසුකම් සැලසීම පිණිස ප්‍රධාන මාර්ග හා අධිවේගී මාර්ගවලට තදබදයෙන් තොරව ඇතුළුවිය හැකි ආකාරයට අතුරු මාර්ග කි. මී. 100, 000 ක් මෙම ව්‍යාපෘතිය යටතේ සංවර්ධනය කෙරේ.
මෙම මාර්ග ව්‍යාපෘතිය ක්‍රියාත්මක කිරීමේ පරමාර්ථ ලෙස රටේ දැනට අබලන්ව පවතින මාර්ග ජාලය කඩිනමින් වැඩිදියුණු කිරීම සහ පළාත් සභා සහ පළාත් පාලන ආයතන සතු ග්‍රාමීය මාර්ග පුළුල් කර වැඩිදියුණු කිරීමයි.
මීට අමතරව මාර්ග සංවර්ධන අධිකාරිය සතු වැඩිදියුණු කලයුතු මාර්ග පුළුල් කර වැඩිදියුණු කිරීම, මංසන්ධි වැඩිදියුණු කිරීම, විද්‍යුත් වර්ණ සංඥා පද්ධති ස්ථාපිත කිරීම, පදික මාරු, මාර්ග සංඥා, මගී උමං මාර්ග සහ මගී ගුවන් පාලම් ස්ථාපිත කිරීම නව ව්‍යාපෘතියට ඇතුලත් වේ.
මාර්ග ලක්ෂයේ ව්‍යාපෘතියේ සමාරම්භය සංකේතවත් කරමින් එල්.ඊ.ඩී තිරය විවෘත කිරීම ජනාධිපතිවරයා හා අගමැතිවරයාගේ සුරතින් සිදු කෙරිණි.
එහි දී වැඩිදුරටත් අදහස් දැක්වූ ජනාධිපති ගෝඨාභය රාජපක්ෂ මහතා කියා සිටියේ
තම ජයග්‍රහණයෙන් පසු පළමුවෙන්ම සහභාගිවන මේ ප්‍රසිද්ධ උත්සවයට තමා දුන් පොරොන්දුවක් ඉටු කරමින් සහභාගී වීමට ලැබීම ගැනත් මහනුවර දිස්ත්‍රික්කයෙන් මේ වැඩසටහන ආරම්භ කිරීමට හැකිවීම ගැනත් සතුටු වන බවයි. මහින්ද රාජපක්ෂ මහතාගේ රජය කාලයෙත් මේ රටට විශාල සේවයක් මහා මාර්ග අමාත්‍යංශයෙන් සිදු වු බව සිහිපත් කළේය. ජනතාව තමාගෙන් ඉල්ලා සිටියේ කිසිවක් නොව ආරක්ෂිත රටක් ලබා දෙන ලෙස බවත් තමන් පසුගිය කාලයේ ආරක්ෂ අංශවලට සියලු බලතල ලබා දී තිබීමත් ඉතා හොඳ ආරක්ෂක ලේකම් වරයකු පත් කිරීමත් බුද්ධි අංශ ශක්තිමත් කර තිබීමත් තුළින් අද බියෙන් සැකෙන් තොර සුරක්ෂිත රටක් ගොඩනගා ඇති බව ද කියා සිටියේය.
තරුණ තරුණියන් මත් ද්‍රව්‍යවලින් බේරා ගැනීමට විශාල වැඩසටහනක් ඉදිරිපත් කර තිබෙන අතර මේ රටට මත් ද්‍රව්‍ය පැමිණෙන ජාලායන් හඳුනාගෙන ඒවා කඩා දැමීමට කටයුතු කර තිබෙන බව ද කියා සිටියේය.
නීතිය ස්වාධීනව කරන්න අවස්ථාව දී තිබෙන බවත් විනිසුරුවරුන් ස්වාධීනව කටයුතු කරයි කියා බලාපොරොත්තු වෙන්නේ යැයිද කියා සිටියේය. සමාජයේ සෑම ස්ථරයකම සිටින උදවිය ඉහළට ගන්නේ යැයි තමන් දුන් පොරොන්දුව අනුව සුළුතර රයක් තිබුණද මේ රටේ සෑම දුප්පත් පවුල් ලක්ෂයකට රජයේ රැකියා ලක්ෂයක් ලබා දීමට කටයුතු කළ බව ද ජනාධිපතිවරයා පෙන්වා දුන්නේය. උපාධිධාරීක්ට රැකියා පනස් දහසක් මේ මාර්තු පලමුවෙනිදා කලින් ලබා දෙන්න කටයුතු කරන බවත් එක ගමකට එක නිවසක් ලබා දීමටත් කටයුතු කර තිබෙන බව පැවසූ ජනාධිපතිවරයා ඉදිරි කාලයේ දී දුන් පොරොන්දු සියල්ල ඉටු කරන බවත් ඒවා කිරීමට ශක්තිමත් රජයක් අවශ්‍ය බව ද කියා සිටියේය. ජනතාව වෙනුවෙන් රාජ්‍ය නිලධාරීන් නොබියව තීරණ අරගෙන ජනතාව වෙනුවෙන් කටයුතු කරන්න කියා අපි ඉල්ලා සිටින බවත් අද අපේ රට ගැන ලෝකයේම විශ්වාසයක් ඇතිවී ආයෝජකයන් පැමිණෙන බව ද කියා සිටියේය. එසේම ශක්තිමත් රජයක් පිහිටුවන්න සහයෝගය ලබා දෙන ලෙසද ජනතාවගෙනක් ඉල්ලා සිටියේය.
මහා සංඝරත්නය, අන්‍යාගමික පූජකතුමන්ලා, මාර්ග හා මහාමාර්ග අමාත්‍ය ජොන්ස්ටන් ප්‍රනාන්දු, මහාමාර්ග සංවර්ධන රාජ්‍ය අමාත්‍ය ලොහාන් රත්වත්තේ, ඇමැති මහින්දානන්ද අලුත්ගමගේ, ඇමැති කෙහෙළිය රඹුක්වැල්ල, ඇමැති දිලුම් අමුණුගම, පාර්ලිමේන්තු මන්ත්‍රී අනුරාධ ජයරත්න, යන මහත්වරුන්, දේශපාලන අධිකාරියේ ආරාධිතයන්, රාජ්‍ය නිලධාරීන් ඇතුළු සම්භාවනීය අමුත්තන් රැසක් මේ අවස්ථාවට එක්ව සිටියහ.
