තිරසර ගෝලීය ඉලක්ක යටතේ 2030 වන විට ඒඩ්ස් රෝගය ලෝකයෙන් තුරන් කිරීමට ලෝක සෞඛ්‍ය සංවිධානය ගෙන යන වැඩපිළිවෙළට මානව ප්‍රජාව සහාය දැක්විය යුතු බව අගමැති මහින්ද රාජපක්ෂ මහතා ජාත්‍යන්තර ඒඩ්ස් දින පණිවිඩය නිකුත් කරමින් පවසයි.
එම නිවේදනයේ මෙසේ ද සඳහන් වෙයි.
වර්තමානයේ කොවිඩ්-19 වසංගතය හේතුවෙන් ලොවක් වශයෙන් පීඩා විඳිමින්, ඒ පිළිබඳ පමණක් අවධානය යොමු කර සිටින පසුබිමක වුවද, අද දිනට යෙදී ඇති ජාත්‍යන්තර ඒඩ්ස් දිනය කෙරෙහි අවධානය යොමු කිරීම වැදගත්ය.
1987දී ස්විට්සර්ලන්තයේ ජිනීවා නුවර ලෝක සෞඛ්‍ය සංවිධානයේ ඒඩ්ස් පිළිබඳ ගෝලීය වැඩසටහනේ මහජන තොරතුරු නිලධාරීන් දෙදෙනකු වූ ජේම්ස් ඩබ්ලිව්. බන් හා තෝමස් නෙට්ටර් වෙත පහළ වූ අදහසකට අනුව ඒඩ්ස් පිළිබඳ ගෝලීය වැඩසටහන ජාත්‍යන්තර ඒඩ්ස් දිනයක් ප්‍රකාශයට පත් කළේය.
ඒ අනුව 1988 වර්ෂයේ පටන් සෑම වසරකම දෙසැම්බර් 1 වැනිදා සැමරෙන ජාත්‍යන්තර ඒඩ්ස් දිනය, එච්.අයි.වී ආසාදනය පැතිරීම නිසා ඇතිවන ඒඩ්ස් වසංගතය පිළිබඳ දැනුවත් කිරීම වෙනුවෙන් වෙන් කර තිබේ. රාජ්‍ය හා සොඛ්‍ය බලධාරීන් විසින් ඒඩ්ස් ආශ්‍රිත මාතෘකා හා බැඳුණු කතා, සමුළු, පාගමන් සංවිධානය කරමින් ශ්‍රී ලංකාවේ ද මේ දිනය සමරති.
2020 ලෝක ඒඩ්ස් දිනයේ තේමාව වී ඇත්තේ" එච්.අයි.වී වසංගතය අවසන් කිරීම, ඔරොත්තු දීමේ හැකියාව සහ බලපෑම අවම කිරීම යන්නයි". ගෝලීය තිරසර සංවර්ධන ඉලක්ක යටතේ 2030 දී ලෝකයෙන්ම ඒඩ්ස් තුරන් කිරීම අරමුණ වී තිබේ. ඒ අනුව වසර 2025 වනවිට මෙරටින් ඒඩ්ස් රෝගය තුරන් කිරීමේ ඉලක්කයට ගමන් කරමින් සිටී. ඊට අවශ්‍ය සැලසුම් සකස් කර ඇති නමුත් සැලසුම් සකස් කළ පමණින් ඒඩ්ස් තුරන් කළ නොහැකි අතර, ඊට අවශ්‍ය ශක්තිය මානව ප්‍රජාව විසින් දිය යුතු බව සිහිපත් කරමි. එය මුළු මහත් මානව ප්‍රජාවගේම වගකීමකි. එම වගකීම ඉටු කිරීමට අප විවාදයකින් තොරව බැඳී සිටිය යුතුය. ලෝකයේ සමස්ත එච්.අයි.වී. ආසාදිතයන් මේ වන විට මිලියන 37 ඉක්මවයි. වසරකට මිලියන 1.7ක් එච්.අයි.වී. නව ආසාදිතයන් බවට පත්වන අතර ශ්‍රී ලංකාවේ එය ප්‍රතිශතයක් ලෙස සියයට එකට වඩා අඩු සංඛ්‍යාවකි.
එය එසේ වුවත් ඒඩ්ස්වලට එරෙහිව සටන් කිරීම මෙන්ම ඉන් වැළකීම අපගේ අධිෂ්ඨානය විය යුතු අතර ඒ සඳහා වගකීමෙන් කටයුතු කළ යුතුය.
දැනට එච්.අයි.වී ආසාදනය වී සිටින පුද්ගලයන් සමාජයේ වෙනස්කම්වලට ලක්නොවීමටත්, ඔවුන්ට අවශ්‍ය ප්‍රතිකාරවලට යොමු වන ලෙස දැනුම්දීමත් අප කළ යුතුය.
ඒ නිසා එච්.අයි.වී ආසාදනයට අවශ්‍ය ප්‍රතිකාර නිසි පරිදි ලබාගෙන රෝගය පාලනය කර ගැනීමටත්, ඒඩ්ස් අවදානමෙන් පසුවන සියලු දෙනාම ඒ පිළිබඳ සැලකිලිමත් වීමටත් අද දිනයේ කෙරෙන රජයේ දැනුවත් කිරීම උපයෝගී කරගන්නැයි ඉල්ලා සිටිමි.
