- මුළු රටම නැවත එකම වැඩ බිමක් කරනවා
- රුපියල රැකීමට පියවර ගත්තා
- ජන ජීවිතය සහ ව්‍යාපාර ආරක්ෂා කළා
නැවුම් උපාය මාර්ග යොදමින් රටේ ආර්ථිකය ශක්තිමත් කිරීමේ අභියෝගය භාර ගන්නා බව අගමැති මහින්ද රාජපක්ෂ මහතා ප්‍රකාශ කරයි.
අප රටට තීරණාත්මක ඉදිරි වසර කිහිපයේ ආර්ථිකය ශක්තිමත් කර ගැනීම උදෙසා රාජ්‍ය හා පෞද්ගලික අංශය එක්ව අභියෝග කළමනාකරණය කරගත යුතුව ඇතැයි පෙන්වාදෙන ඒ මහතා එම අභියෝග ඉදිරියේ, පසුබට නොවූ අප කෙඳිරි ගෑවේත් ද විපක්ෂයට චෝදනා කරමින් කාලය නාස්ති කළේ ද නැතැයි සඳහන් කරයි.
අගමැතිවරයා මේ බව සඳහන් කළේ ශ්‍රී ලංකා වාණිජ මණ්ඩලය සංවිධානය කළ ශ්‍රී ලංකා ආර්ථික සමුළුව -2020 ට අන්තර්ජාල වීඩියෝ තාක්ෂණය ඔස්සේ ඊයේ (02) එක්වෙමිනි.
ශ්‍රී ලංකා ආර්ථික සමුළුව අමතා වැඩිදුරටත් අදහස් පළකළ අගමැති මහින්ද රාජපක්ෂ මහතා,ලෝකයේ බොහෝ රටවලට වඩා හොඳින් කොවිඩ් වසංගතය ශ්‍රී ලංකාව පාලනය කර තිබෙන බව බොහෝ දෙනා පිළිගන්නවා. ඒ සමඟම, අප රටේ ආර්ථිකය ද ක්‍රමවත්ව කළමනාකරණය කරගෙන ඉදිරියට යන්නට හැකි වී තිබෙන බවත් බොහෝ දෙනා පිළිගන්නවා. එපමණක් නොව, අද වන විට අප රටෙහි වසංගතයේ පාලනය ලෝකයේ රටවල් අතරින් ඉහළම මට්ටමක පවතින අතර, ක්ෂේත්‍ර රාශියක් ඔස්සේ ආර්ථික ප්‍රගතිය ද සාර්ථක ලෙස සටහන් කර ගැනීමට අපට හැකිවී තිබෙනවා. අප රට දැන් මුහුණ පා ඇති මූලික අභියෝගය නම් ජනාධිපති ගෝඨාභය රාජපක්ෂ මහතා රටට ලබා දී ඇති පොරොන්දුව අනුව, “ජනතා-කේන්ද්‍රීය” ආර්ථික පුනර්ජීවනයක් උදාකර ගැනීමයි.
ඒ අතරම, කොවිඩ් වසංගතය ඉදිරියේ පුරෝකථනය කරන ලද දරුණු ආර්ථික අවපාතය, එම උත්සාහයට දැඩි බාධාවක් පැනවීම හැකි බව ද බොහො දෙනා අනාවැකි කොට තිබුණ ද එය අවම කර ගනිමින්, ආර්ථිකයේ පුනර්ජීවනයක් ඇතිකර ගැනීමත් අප ඉදිරියේ ඇති තවත් දැවැන්ත අභියෝගයක්. මේ අරමුණු සාක්ෂාත් කර ගැනීමට, රජය නැවුම් ක්‍රමවේද අනුගමනය කළ බව ඔබ දන්නවා. රටේ ව්‍යාපාරිකයන් රැකගැනීම සඳහා ඒ අයට “ණය විරාම” දෙන ලෙස රජය බැංකු හා මූල්‍ය ආයතනවලට උපදෙස් දුන්නා. රටේ බාහිර ගිණුම මනා ලෙස කළමනාකරණය කිරීමෙන් රුපියල රැක ගැනීමෙන්, රාජ්‍ය ණය පීඩනය අවම කරන්නට කටයුතු කළා. පවුල් දසලක්ෂ පහකට අධික ගණනකට කොවිඩ් වසංගතයට මුහුණ දීමට සෘජු මුදල් ප්‍රතිපාදන දීමෙන් ජීවන පීඩනයට සහන දෙන්නටත් අප සමත් වුණා. සුළු හා මධ්‍යම පරිමාණයේ ව්‍යාපාර කඩා නොවැටී පවත්වා ගෙන යෑම සඳහා බදු සහ පොලී සහන දුන්නා. ජලය, විදුලිය, බලපත්‍ර ගාස්තු, යනාදිය ගෙවීමට කාලය ලබා දුන්නා.
ලීසිං වාරික සහ පොලී ගෙවීම් සඳහා සහන දීමට කටයුතු කළා. මේ සියලුම කටයුතු සඳහා රාජ්‍ය සේවකයන් සම්බන්ධ කර ගනිමින් ඔවුන්ගේ කාර්යක්ෂමතාව ද ඉහළ මට්ටමකට පවත්වා ගැනීමට කටයුතු කළා. රේගුව, ආදායම් බදු, සුරාබදු, ආයෝජන මණ්ඩලය, විදුලිය, ඉන්ධන, වරාය, ගුවන්තොටුපොළ, බැංකු, සමාගම් රෙජිස්ට්‍රාර් වැනි ආයතන සහ දෙපාර්තමේන්තු ඇතුළු අදාළ රජයේ ආයතන රාශියක් විසින් පෞද්ගලික ආයතනවලට දිය යුතු සේවාවන් දැවැන්ත අභියෝග මධ්‍යයේ ද දීමට රාජ්‍යය සේවය මැදිහත් වුණා. මූලික වශයෙන්, වසංගතය පාලනය කිරීම සඳහා සෞඛ්‍ය ක්ෂේත්‍රය, ත්‍රිවිධ හමුදාව, පොලිසිය සහ ග්‍රාමීය පාලන යාන්ත්‍රණය ඇතුළු සියලු රාජ්‍ය සේවකයන්ගේ දැඩි කැපවීම ඔස්සේ ඉටුවිය යුතු සියලු සේවාවන් දෙන්නටත් රජයට හැකිවුණා.
මේ සියලුම කටයුතුවල අරමුණ වූයේ ජන ජීවිතය සහ රටේ ව්‍යාපාර අඛණ්ඩව ඔසවා තැබීමයි. අප එසේ නොකළා නම්, රටේ විහිදි ඇති ව්‍යාපාර දැඩි දුෂ්කරතාවට සහ අපහසුතාවට පත්වීමට ඉඩ තිබුණා. එසේ වුවා නම්, මුළු රටේම ආර්ථිකය කඩා වැටෙන්නටත් අවදානමක් තිබුණා. ඒ හරහා, රාජ්‍ය ණය ගෙවා ගන්නට බැරි වන්නටත් ඉඩ තිබුණා.
එසේ වුනා නම්, විශාල අර්බුදයකට රට ගොදුරු වන්නටත් ඉඩ තිබුණා. එවන් තත්ත්වයක් හරහා, රැකියා ලක්ෂ ගණන් අහිමි වන්නටත්, මුළු ජනතාවම දැඩි කම්පාවකට සහ අසහනයකට පත් වන්නටත් ඉඩ තිබුණා. ආර්ථික කටයුතු කඩා වැටීම නිසා, රටේ බහුතර ජනතාව අන්ත අසරණභාවයකට පත් වෙන්නටත් අවදානමක් තිබුණා. සමහර විට, සමහරු එසේ වෙනතෙක් බලා සිටින්නටත් ඇතැයි කියා අපට සැක කරන්නටත් ඉඩ තිබෙන්නට ඇති. එහෙත්, මෙම ප්‍රශ්න සියල්ලම මධ්‍යයේ, මෙම අභියෝගවලට සෘජුවම මුහුණ දෙමින් අද වනවිට, රටේ ආර්ථීකය ස්ථායිභාවයකට පත්කර ගැනීමට අප රජයට හැකි වී තිබෙනවා. මේ බව ආර්ථික කටයුතුවල නිරත වී සිටින ඔබ සියලු දෙනාම හොඳින් අවබෝධ කරගෙන ඇතැයි ද මා සිතනවා. කෙසේ වුවත්, මෙම තත්ත්වය පිළිබඳ අප මුලික සෑහීමකට පත්වනවාත් සමඟම, මෙම අඩිතාලම මත අපේ රටේ ආර්ථිකය හා ජනජීවිතය තවදුරටත් ශක්තිමත් කරමින් ඉදිරියට යෑමට අප සෑම උත්සහයක්ම දැරිය යුතු බවත් අප මතක් කරදිය යුතුයයි සිතනවා. අප දකින ආකාරයට, තව වැඩි කලක් යන්නට පෙර, මුළු රටම නැවත වර්ධන මාර්ගයකට යොමු විය යුතුයි. මුළු රටම නැවත එකම වැඩ බිමක් බවට පත්විය යුතුයි.
අද වනවිට රුපියල් බිලියන පන් දහසකට (රු.බි.5000) අධික සාමුහික වටිනාකමක් ඇති මහ පරිමාණයේ ව්‍යාපෘති 289ක් රජයේ අමාත්‍යාංශ සහ දෙපාර්තමේන්තු විසින් ක්‍රියාත්මක වෙනවා. ඒවා නිසි වේලාවට සහ මුලින්ම යෝජිත අගයන්වලට නිම කිරීම ඉතා වැදගත්ය. (“on time” and “on budget”). එපමණක් නොව, රජයට අයත් ආයතන 400ට අධික සංඛ්‍යාවක් විවිධ සේවාවන් සහ ආර්ථික කටයුතු වල අද නිරතවී සිටිනවා. රාජ්‍ය සේවකයන් ලක්ෂ 18ක පමණ සංඛ්‍යාවක් රාජ්‍ය අංශයේ සේවය කරනවා. එසේ නම්, මෙම දැවැන්ත භෞතික සහ මිනිස් සම්පත කාර්යක්ෂමව, ජනතා හීතවාදීව සහ මුළු රටටම ශක්තියක් සහ යහපතක් වන ලෙස ක්‍රියාවේ යෙදවීම, අප රටේ දැවැන්ත ප්‍රමුඛතාවයක් ලෙස අප දකිනවා. ඒ අරමුණ ඉෂ්ට කර ගැනීම වෙනුවෙන්, ඉදිරියේ දී, ඔබ ලබාදෙන්නා වු සහයෝගය සහ කැපවීම අප උනන්දුවෙන් අපේක්ෂා කරනවා. කෘෂිකර්මය පිළිබඳවත් ඔබ වාණිජ මණ්ඩලය විශේෂ සැලකිල්ලක් දක්වන බව අප සතුටින් නිරීක්ෂණය කළා. ඕනෑම රටක ආහාර සුරක්ෂිතභාවය (Food Security) රැක ගැනීම එම රටේ ආණ්ඩුවේ විශේෂ වගකීමක් වන අතර, ඒ සඳහා ජනතාවගේ කැපවීම ද අත්‍යවශ්‍යයි.
කොවිඩ් වසංගතයේදී අප රටක් වශයෙන් ඉගෙන ගත් එක් විශේෂ පාඩමක් නම්, ගෝලීය උවදුරක් හේතුකොටගෙන යම් කම්පනයක් සිදුවන විට, රටට අවශ්‍ය වන ආහාර එම රටේම නිෂ්පාදනය කර ගැනීම ඉතා වැදගත් බවයි. අතීතයේදී, අපට ඕනෑම බෝගයක් හෝ භාණ්ඩයක් හෝ සේවාවක් හෝ ආනයනය කළ හැකියි යන මානසිකත්වයකින් සමහර රජයන් කටයුතු කළ ආකාරය අප දුටුවා. එවැනි ප්‍රතිපත්තියක් අනුගමනය කළහොත් රටකට වියහැකි හානිය කොතරම් භයානක ද යන්න අද පැහැදිලි වී ඇතැයි, අප සිතනවා. කොවිඩ් වසංගතයෙන් අපේ රටට සිදු වු පාඩු සහ හානිවලින් මුල් තැනක් ගත් තවත් එක් ක්ෂේත්‍රයක් නම් සංචාරක ක්ෂේත්‍රයයි. ගුවන්තොටුපළ සහ වරායන් හරහා අප රටට සංචාරකයන්ට පිවිසෙන්නට අවකාශය අහිමි වූ නිසා, අප ආර්ථිකයට දැවැන්ත පහරක් එල්ල වූ බව අප දන්නවා. එයින් ජීවන උපායන් රාශියකට සැලකිය යුතු අවහිරයක් ඇති වු බවත් අප දන්නවා. එසේ වුවද, එම හානිය හා අවාසිය අවම කර ගැනීම සඳහා එම ක්ෂේත්‍රයේ නිරත වී සිටින පුද්ගලයන්ට සහ ආයතනයන්ට ණය සහ පොලී විරාමයන් දෙමින්, යම් සහනයක් දීමට රජය කටයුතු කර ඇති බවත් ඔබ දන්නවා.
ඒ ආකාරයට, මෙම සංචාරක ක්ෂේත්‍රයේ සම්පත් අාරක්ෂා කරමින්, අනාගතයේ දී මෙම ක්ෂේත්‍රය නැවත නැගී සිටුවීමට අප සූදානම් විය යුතුයි. ඒ නිසා, මේ ප්‍රශ්නය පිළිබඳවත් ඔබ සැලකිලිමත් වීම ගැන අප සතුටු වෙනවා. 2020 වසර තුළඳී අප රජයට මුහුණ දීමට සිදුවූ අභියෝගයන් ඉතා දැවැන්ත ඒවාය. එම අභියෝග තියුණු වූයේ කොවිඩ් නිසා පමණක් නොවේ. 2015 සිට 2019 දක්වා අප ආර්ථිකයේ සිදු වූ සැලකිය යුතු පසුබෑමත් එයට හේතු වූ බව අපි සියලු දෙනාම දන්නවා. එහෙත්, එම අභියෝග ඉදිරියේ, අප පසුබට වූයේ නැහැ. අප කෙඳිරි ගැවේත් නැහැ. අප විපක්ෂයට චෝදනා කරමින් කාලය නාස්ති කළෙත් නැහැ. එසේ නොකර, ජනතාව අපගෙන් බලාපොරොත්තුව වූ කාර්ය භාරයේ යෙදෙමින් අපගේ වගකීම් අප ඉෂ්ට කළා. ඒ අනුව, පසුගිය මාසයේ මැද භාගයේ දී, ජනාධිපති ගෝඨාභය රාජපක්ෂ මහතා ඉදිරිපත් කර ඇති “සෞභාග්‍යයේ දැක්ම” සැලැස්ම සාක්ෂාත් කර ගැනීමේ මූලික පියවර වශයෙන්, අප නව රජයේ පළමු අයවැය අපි ඉදිරිපත් කළා. ඒ හරහා, 2021 වෙනුවෙන් ආර්ථිකයේ සියයට 5.5 ක වර්ධනයක් ඇති කර ගැනීමටත්, සාර්ව ආර්ථික සාධක යහපත් මට්ටමකට පත්කර ගැනීමටත්, බදු ප්‍රතිපත්තිය නොවෙනස්ව පවත්වාගෙන යාමටත්, ආර්ථිකයට නව ජවයක් ලබා දීමටත්, අප අවශ්‍ය යෝජනා ඉදිරිපත් කළා.
