ළඟම පාසල හොඳම පාසල බවට පත් කිරීමේ වැඩපිළිවෙළ ප්‍රායෝගිකව සමාජය තුළ යථාර්ථයක් බවට පත්ව නොමැති නිසා ජනප්‍රිය පාසල්වලට ළමුන් ඇතුළත් කර ගැනීමට යාමේදී මවුපියන් විශාල පීඩනයකට ලක් වන බවත් එයට පිළියමක් ලෙස නගරයෙන් බැහැරව සියලු පහසුකම්වලින් සමන්විත පාසල් ඉදිකිරීම අත්‍යවශ්‍ය කරුණක් බවට පත්ව තිබෙන බවත් ජනමාධ්‍ය ඇමැති කෙහෙලිය රඹුක්වැල්ල මහතා පවසයි.
හරිත හා සුහුරු පාසැල් සංකල්පය (Green & Smart School ) මුලික කර ගනිමින් නව තාක්ෂණික අධ්‍යාපන ක්‍රමවේදවලින් සමන්විත වූ කාන්තා විදුහලක් මහනුවර දිගන - රජවැල්ල ප්‍රදේශයේ ඉදිකිරීම සඳහා මුල්ගල් තැබීමේ උත්සවයට සහභාගි වෙමින් ඇමැතිවරයා මේ බව ප්‍රකාශ කළේය.
මධ්‍යම පළාත් අධ්‍යාපන අමාත්‍යාංශය මගින් පළමු අදියර යටතේ මේ සඳහා රුපියල් මිලියන 500ක මුදලක් වැය කිරීමට නියමිතය. වසර 2022දී මෙම පාසල විවෘත කර ළමුන් බඳවා ගැනීමට සැළසුම් කර තිබේ.
මෙහිදී වැඩිදුරටත් අදහස් දැක්වූ ඇමැතිවරයා ජනපතිවරයාගේ සෞභාග්‍යයේ ඉදිරි දැක්ම තුළ අධ්‍යාපනයට විශාල ඉඩක් ලබා දී තිබෙන බවත් මේ අාකාර පාසල් ඉදිකිරීමෙන් අදාළ වැඩපිළිවෙළ මහ පොළොව තුළ යථාර්ථයක් බවට පත්වනු ඇති බවත් ප්‍රකාශ කළේය.
මෙරට තුළ පාසල් 10156ක් පමණ තිබෙන බවත් ඉන් 370ක් ජාතික පාසල් බවත් කී ඇමැතිවරයා ජාතික පාසල් සංඛ්‍යාව 1000ක් බවට පත් කිරීමට සැළසුම් ක්‍රියාත්මක කරන තිබෙන බවද අවධාරණය කළේය.
සමස්ත පාසල් සංඛ්‍යාවෙන් ළමුන් 100ට අඩු පාසල් 3000ක් තිබෙන බවත් ළමුන් 50ට අඩු පාසල් 700ක් තිබෙන බවද ප්‍රකාශ කළේය.
උසස් පෙළ විභාගයෙන් ඒ සමාර්ථ්‍ය තුනක් ලබා ගෙනත් විශ්වවිද්‍යාලයට ඇතුළු වීමට නොහැකි දරුවන් මේ රටේ සිටින බවත් වෙනත් රටක ඔවුන් ඉපදී සිටියා නම් විශ්වවිද්‍යාලවලට ඇතුළු වී අධ්‍යාපනය ලබන බවත් කී ඇමැතිවරයා මෙම අසාධාරණය පිටු දැකීම පිණිස ළමුන් ලක්ෂයකට විශ්වවිද්‍යාල අධ්‍යාපන වරම් හිමිකර දීමේ වැඩපිළිවෙළක් පියවර කිහිපයක් ඔස්සේ රජය ක්‍රියාත්මක කරන බවද අවධාරණය කළේය.
එම වැඩසටහනට ආශිර්වාදයක් ලෙස ළමුන් 10600ක් පෙර වසරට වඩා මෙවර විශ්වවිද්‍යාලවලට ඇතුළත් කර ගැනීමට නියමිත බවද ඒ මහතා කීය. මධ්‍යම පළාත් ආණ්ඩුකාරවරයාගේ සංකල්පයට අනුව නව පාසල් ඉදිවන බවත් ඒ මහතා ඉතා ක්‍රියාශීලීව ප්‍රශ්නවලට විසඳුම් ලබා දෙන අයකු ලෙස ජනතාව පිළිගෙන තිබෙන බවත් ජනමාධ්‍ය ඇමැතිවරයා කීය.
මධ්‍යම පළාත් ආණ්ඩුකාර නීතීඥ ලලිත් යූ ගමගේ මහතා කතා කරමින් තමන් මධ්‍යම පළාත් ආණ්ඩුකාර ධුරයේ වැඩ බාරගන්නා අවස්ථාවේ පළාතේ අධ්‍යාපනය බරපතළ කඩා වැටීමකට ලක්ව තිබූ බවත් එම තත්ත්වය වෙනස්කර අධ්‍යාපන අංශයෙන් මෙරට අංක එකට මධ්‍යම පළාත පත් කිරීම සඳහා වන වැඩපිළිවෙළේ එක් පියවරක් ලෙස නව පාසල් ආරම්භ කරන බවත් පැවසුවේය.
ඒ සඳහා අවංක මහජන මුදල් ගසා නොකන රාජ්‍ය සේවකයන්ගේ සහාය හිමි වන බවද ඔහු කීවේය.
මෙම අවස්ථාවට මහනුවර දිස්ත්‍රික් සම්බන්ධීකරණ කමිටුවේ සභාපති පාර්ලිමේන්තු මන්ත්‍රී නීතීඥ වසන්ත යාපා බණ්ඩාර, කුණ්ඩසාලේ ප්‍රාදේශීය සභාවේ සභාපති රංජර අක්මීමන, මධ්‍යම පළාත් ප්‍රධාන ලේකම් ගාමිණී රාජරත්න, මධ්‍යම පළාත් ප්‍රධාන හා අධ්‍යාපන අමාත්‍යාංශ ලේකම් නන්දන ගලබොඩ, පළාත් අධ්‍යාපන අධ්‍යක්ෂ තිලක් ඒකනායක යන මහත්වරු ඇතුළු පිරිසක් සහභාගි වූහ.
