මානව ගරුත්වයකින් තොර රටකට තිරසාර සංවර්ධනයක් කරා ගමන් කළ නොහැකි බව අගමැති මහින්ද රාජපක්ෂ මහතා පවසයි.
අගමැතිවරයා මේ බව පැවසුවේ අන්තර්ජාතික මානව හිමිකම් දිනය වෙනුවෙන් පණිවුඩයක් නිකුත් කරමිනි.
එම පණිවුඩයේ වැඩිදුරටත් මෙසේ සඳහන් වෙයි.
සෑම වසරකම දෙසැම්බර් 10 වැනි දින සමරනු ලබන අන්තර්ජාතික මානව හිමිකම් දිනය අදට යෙදී තිබේ. 1950 වර්ෂයේ දෙසැම්බර් මස 4 වැනි දින එක්සත් ජාතීන්ගේ 317 වැනි මහා මණ්ඩල රැස්වීමේ දී අන්තර්ජාතික මානව හිමිකම් දිනය විධිමත් ලෙස ස්ථාපිත විය. එක්සත් ජාතීන්ගේ මහා මණ්ඩල යෝජනා මාලාවේ 423(V) යෝජනාව ප්‍රකාරව සියලු සාමාජික රටවල් හා සංවිධාන අන්තර්ජාතික දිනයක් ලෙස එය අනුමත කෙළේය.
ඒ අනුව සෑම වසරකම දෙසැම්බර් 10 වැනි දා අන්තර්ජාතික මානව හිමිකම් දිනය සැමරේ. සියලු ජනතාවට උපතින්ම මුලික අයිතිවාසිකම්වලට ඇති අයිතිය සහ සමානාත්මතාව තහවුරු කිරීම මෙම දිනය ප්‍රකාශයට පත්කිරීමේ අරමුණයි. එසේම, ලොවපුරා මානව හිමිකම් ගැටලු පිළිබඳ දැනුවත් කිරීම, ප්‍රවර්ධනය කිරීම සහ මානව හිමිකම් තත්ත්වය වැඩි දියුණු කිරීම අන්තර්ජාතික මානව හිමිකම් දිනය සැමරීමේ අරමුණු වී තිබේ.
එක්සත් ජාතීන්ගේ සාමාජිකයකු ලෙස වර්ෂ 1955 දී ශ්‍රී ලංකාව මානව හිමිකම් ප්‍රඥප්තිය පිළිගත්තේය. රටක නීතියෙන් සහ අන්තර්ජාතික නීතිය මඟින් නෛතික අයිතිවාසිකම් ලෙස නිරතුරුව පිළිගැනෙන සදාචාරාත්මක ප්‍රතිපත්තීන් මානව හිමිකම් ලෙස අර්ථකථනය කළ හැකිය. එක්සත් ජාතීන්ගේ සංවිධානයේ අර්ථකථනය අනුව පුද්ගලයකුගේ ආගම, ජාතිය, පදිංචිය, සමේ වර්ණය, වත්කම් යනාදී කිසිවක් ඒ සඳහා බලනොපායි.
එසේම, මානව හිමිකම් තිරසාර සංවර්ධන අරමුණු වල මූලික හදවතයි. මානව ගරුත්වයකින් තොර රටකට තිරසාර සංවර්ධනයක් කරා ගමන් කළ නොහැකිය. එසේම, විශ්වීය අගයන් මත පදනම්වන මානව හිමිකම් තුළින් සමානාත්මතාව, ගෞරවය, ස්ථාවරත්වය, සහභාගීත්වය, වගවීම, ප්‍රතිපෝෂණය සහ නීතියේ ආධිපත්‍යය වැනි වැදගත් සංකල්පයන්හි වටිනාකම පුරවැසියන්ගේ අවධානයට ලක්කරනු ලබයි. මානව හිමිකම් රැක ගැනීම ඔස්සේ පුද්ගල දියුණුව සේම ලෝකයක් ලෙස එක්සත්ව ඉදිරියට යෑමට හැකිය.
එසේම, මානව අයිතිවාසිකම් දිනය හුදු දාර්ශනික කතාබහට පමණක් සීමා නොවුණු ප්‍රායෝගික භාවිතයේ වැදගත්කම හඳුනාගත් එකක් විය යුතුය. ආණ්ඩුවක් ලෙස අප ලක්වැසි ප්‍රජාවගේ මානව හිමිකම සුරක්ෂිත කළ යුතුය. අපි බලයට පත් වූ සෑම අවස්ථාවකදීම මානව හිමිකම් ආරක්ෂා කරමින් විනයානුකූලව ලක්වැසි ප්‍රජාවගේ මානව අයිතීන් ආරක්ෂා කිරීමට බැඳී සිටියෙමු. සෞභාග්‍යයේ රාජ්‍ය ප්‍රතිපත්තිය තුළින් සියලු ජනතාවගේ මානව අයිතිවාසිකම් ආරක්ෂා කරමින් රටේ හා පුරවැසියන්ගේ සුබ සිද්ධිය වෙනුවෙන් ආණ්ඩුවක් ලෙස කැපවන්නෙමු.
කොවිඩ්-19 වසංගත තත්ත්වය හමුවේ වුව ද මානව ප්‍රජාවගේ අයිතිවාසිකම් කඩ නොවන පරිදි මූලික අයිතිවාසිකම් මෙන්ම, අවශ්‍යතාවයන් වෙනුවෙන් ආණ්ඩුව කටයුතු කරන බව ඔබ දන්නා සත්‍යයකි. අයිතිවාසිකම් භුක්ති විදිනවා මෙන්ම ඒ හා බැඳුණු යුතුකම් ඉටු කිරීමටත් අප වගබලා ගත යුතුයි. ලොවක් වශයෙන් මුහුණ දී ඇති කොරෝනා වසංගතය පාලනය කර ගැනීමට මෙන්ම, රටේ අනාගත අභිවෘද්ධිය උදෙසා අයිතිවාසිකම් දිනා ගනිමින්, ඇවැසි යුතුකම ඉටුකිරීමට මෙවර මානව හිමිකම් දිනයේ දී අත්වැල් බැඳ ගැනීමට ආරධනා කරමි!.
