පළාත් සභා මැතිවරණය කඩිනමින් පැවැත්වීම කෙරෙහි අවධානය යොමු කර, ඒ සඳහා අවශ්‍ය නීතිමය කටයුතු සොයා බලන ලෙස අගමැති මහින්ද රාජපක්ෂ මහතා මැතිවරණ කොමිසමේ සාමාජිකයන්ට ඊයේ (11) උපදෙස් දුන්නේය. පැරැණි හෝ නව ක්‍රමයට මැතිවරණය පැවැත්වීමට හැකි ඉඩකඩ සොයා බලන ලෙසද අගමැතිවරයා මැතිවරණ කොමිසමේ සාමාජිකයන් හමුවේ පැවැසීය.
මැතිවරණ කොමිසමේ සාමාජිකයන් හා අගමැති මහින්ද රාජපක්ෂ මහතා අතර විජේරාම පිහිටි අගමැති නිල නිවෙසේ ඊයේ (11) පෙරවරුවේ පැවැති සාකච්ඡාවේදී රාජපක්ෂ මහතා මේ බව ප්‍රකාශ කළේය.
මැතිවරණය පැවැත්වීමේ ක්‍රමය වෙනස් කිරීමට අවශ්‍ය නීතිමය ප්‍රතිපාදන අමාත්‍යාංශ මට්ටමින් සිදු කළ යුතු බව මෙහිදී මැතිවරණ කොමිසමේ සාමාජිකයෝ පැවැසූහ.
ඒ හේතුවෙන් මෙවර පළාත් සභා මැතිවරණය පැරැණි ක්‍රමය ඔස්සේ පවත්වා ඉදිරියේදී අවශ්‍ය නීති සම්පාදනය කිරීමෙන් අනතුරුව නව ක්‍රමය යටතේ මැතිවරණය පැවැත්වීමට කටයුතු කිරීම වඩා පහසු බව ඔවුහු පෙන්වා දුන්හ.
දැනට පවතින මැතිවරණ නීතිවලට සංශෝධන අවශ්‍ය බව පැවැසූ මැතිවරණ කොමිසමේ සාමාජිකයන් ඒ සඳහා පාර්ලිමේන්තු තේරීම් කාරක සභාවක අවශ්‍යතාව පෙන්වා දුන්නේය.
මේ වන විටත් තමන් ඒ පිළිබඳ කතානායකවරයාගෙන් ඉල්ලීමක් කර ඇති බව අගමැතිවරයා ඊට පිළිතුරු දෙමින් ප්‍රකාශ කළේය.
මේ අවස්ථාව සඳහා මැතිවරණ කොමිෂන් සභාවේ සභාපති ජ්‍යෙෂ්ඨ නීතිඥ නිමල් ජී. පුංචිහේවා මහතා, කොමිසමේ සාමාජිකයන් සහ අගමැති අතිරේක ලේකම් චමින්ද කුලරත්න මහතා ඇතුළු නිලධාරීහු පිරිසක් එක්ව සිටියහ.
