ක්‍රීඩාව හා තාරුණ්‍යය කේන්ද්‍ර කරගනිමින් කෙටි කාලීන, මධ්‍ය කාලීන හා දිගු කාලීන ඉලක්ක ගත වැඩපිළිවෙළක් සකස් කිරීමට ක්‍රීඩා හා තරුණ කටයුතු අමාත්‍යාංශය පියවර රැසක් ගෙන ඇත.
මෙහි මූලික පියවරක් ලෙස මෙරට සෑම ප්‍රාදේශීය ලේකම් කොට්ඨාසයකටම එක් ක්‍රීඩාපිටියක් බැගින් ලක්ෂ 15 බැගින් වැයකර අංග සම්පූර්ණ ක්‍රීඩාපිටි තුන්සිය හතළිස් දෙකක් සංවර්ධනය කිරීම මාර්තු මස 2 වනදා ආරම්භ කිරීමට නියමිතය.
ජනමාධ්‍ය අමාත්‍ය කෙහෙලිය රඹුක්වැල්ල මහතාගේ ප්‍රධානත්වයෙන් හා ක්‍රීඩා හා තරුණ කටයුතු අමාත්‍ය නීතිඥ නාමල් රාජපක්ෂ මහතා, ග්‍රාමීය පාසල් ක්‍රීඩා යටිතල පහසුකම් ප්‍රවර්ධන රාජ්‍ය අමාත්‍ය තේනුක විදානගමගේ යන මහත්වරුන්ගේ සහභාගිත්වයෙන් ජනමාධ්‍ය අමාත්‍යාංශයේ දී අද (10) පැවති විශේෂ සාකච්ඡාවකදී මේ කරුණු අනාවරණය විය.
මෙරට රාජ්‍ය හා පෞද්ගලික මාධ්‍ය ආයතන ප්‍රධානීන් සමඟ මෙම සාකච්ඡාව පැවැත්විණි. ජනමාධ්‍ය අමාත්‍යංශයේ “ඇසිදිසි ෙපරමග ෙසෟභාග්‍යෙය් පුනරුදය” යටතේ සංවර්ධන පුවත් ජනගත කිරීමේ ප්‍රචාරක වැඩපිළිවෙළ යටතේ සෑම අමාත්‍යාංශයකම සංවර්ධන සැලසුම් පිළිබඳ මාධ්‍ය ආයතන ප්‍රධානීන් සමග පැවැත්වෙන සාකච්ඡා මාලාවේ දෙවන පියවර ලෙස මෙය පැවැත්විණි.
ඉතිහාසයේ බොහෝ අවස්ථාවන්වලදී මහා පරිමාණ ක්‍රීඩාව හා ගොඩනැගිලි සංවර්ධනය කිරීමට මූලිකත්වය දුන් බවත්, එහෙත්, පත් කෙරුනු නව ක්‍රීඩා කවුන්සිලයේ සාකච්ඡාවෙහි ප්‍රතිඵලයක් ලෙස, ග්‍රාමීය ක්‍රීඩා පිටි ප්‍රමිතිගත කිරීමටත්, ක්‍රීඩා පිටියන්හි ප්‍රමුඛතාවයන් හඳුනාගෙන කටයුතු කිරීමටත් අවධානය යොමුව තිබෙන බව අමාත්‍ය නාමල් රාජපක්ෂ මහතා පෙන්වා දුන්නේය.
ජාතික තලයේ ක්‍රීඩකයන් වෘත්තීමය ක්‍රීඩකයන් බවට පත් කිරීම සඳහා වන ගිවිසුම් ගතකිරීම් මේ වන විට සිදුකර ඇතැයිද, දක්ෂතාවය, ජයග්‍රහණය පදනම් කරගනිමින් ඔලිම්පික් හා ආසියානු තරග ඉලක්ක කර ක්‍රීඩකයන් පනස් එක් දෙනෙකු මේ වනව ගිවිසුම්ගත කර ඇතැයිද හෙතෙම පැවසීය.
ග්‍රාමීය ක්‍රීඩාපිටි ප්‍රමිතිගත කරමින් සෑම ප්‍රාදේශීය ලේකම් කොට්ඨාසයකම ඉදිකෙරෙන අංග සම්පූර්ණ ක්‍රීඩා පිටි මුළුමනින්ම තෝරාගනුයේ ග්‍රාමීය ප්‍රදේශ ඉලක්ක කර ගනිමින් යැයි ද අමාත්‍යරාජපක්ෂ මහතා කීය.
මෙයට අමතරව සෑම අධ්‍යාපන කලාපයකටම එක් පාසලක් තෝරා ගනිමින් පාසල් 99ක ක්‍රීඩා පිටි සංවර්ධනය කිරීමට අමාත්‍යංශය සැලසුම් කර ඇත. මේ සඳහා රුපියල් මිලියන 320 ක් වැය කිරීමට අපේක්ෂා කෙරේ.
ක්‍රියාශීලී දර‍ැ‍වෙකු පාසල තුලින් බිහි කිරීම අරමුණු කර ගනිමින් පාසල්හි ක්‍රීඩා උපකරණයන්හි අවශ්‍යතාවයන් සොයා බලමින් එම පහසුකම් ලබාදීමටත්, එක් කලාපයක එක් පාසලක් තෝරා ගනිමින් භාවිතයට ගත හැකි වන සේ විශේෂිත ක්‍රීඩා කට්ටලයන් ලබාදීමටත් සැලසුම් කර ඇත. මේ සඳහා රුපියල් මිලියන 380 ක් වැය කිරීමට අපේක්ෂා කරයි.
එමෙන්ම ක්‍රීඩා පාසල් සංවර්ධනය කිරීම යටතේ, ඒවායේ මූලික යටිතල පහසුකම්, ක්‍රීඩාංගණ, නේවාසිකාගාර, ජල පහසුකම් ආදිය ක්‍රමවත්ව ලබා දීමටත්, ඒ අනුව මේ වනවිට පාසල් පහක සංවර්ධන කටයුතු ආරම්භ කර ඇති අතර, මේ වසරේ තවත් පාසල් දොළහක් සංවර්ධනය කිරීමටත් අමාත්‍යාංශයේ අරමුණ වේ.
දිවයින පුරා පළාත් පාලන ආයතන සතුව පවතින මහජන ක්‍රීඩාංගණ දෙසීයක් පමණ මෙම වසරේ සංවර්ධනයට ලක් කිරීමට ක්‍රීඩා අමාත්‍යාංශය සැලසුම් කර ඇති අතර එම ව්‍යාපෘතිය සඳහා එක් ක්‍රීඩාංගණයකට රුපියල් මිලියන 5 බැගින් රුපියල් මිලියන දහසක් වැය කිරීමට අපේක්ෂා කෙරේ. තරුණ තරුණියන් සමාජ විරෝධී ක්‍රියා වලින් ඈත් කරමින් විනය ගරුක පිරිසක් බවට පත් කිරීම සදහා ක්‍රීඩාව යොදා ගැනීම අරමුණින් ක්‍රීඩා සමාජ සඳහා රුපියල් මිලියන 350 ක වියදමින් මෙම වසර සඳහා ක්‍රීඩා භාණ්ඩ ලබාදීමට එම අමාත්‍යාංශය සැලසුම් කර ඇත. ග්‍රාමීය හා ප්‍රාදේශීය මට්ටමේ ක්‍රීඩා තරගාවලි මේ වසරේ පැවැත්වීමට සැලසුම් කර ඇති අතර, සිංහල හා හින්දු අලුත් අවුරුදු සමය ඉලක්ක කරගනිමින් මැරතන් හා පාපැදි තරග රැසක් සංවිධානය කිරීමට සැලසුම් කර ඇත. රටේ ශ්‍රම බලකාය වන තරුණ පරපුර මානසික වශයෙන් හා අධ්‍යාත්මික කිරීමේ අරමුණින් ඒ සඳහා ක්‍රීඩාව යොදාගනිමින් ප්‍රවර්ධනය කිරීමට ‘යොවුන් සුවයට ක්‍රීඩාව’ නමින් පාසල් සිසුන්, බන්ධනාගාරගතව සිටින තරුණ පිරිස් ඉලක්ක කර ගනිමින් මෙය සංවිධානය කිරීමට තරුණ කටයුතු අමාත්‍යාංශය සැලසුම් කර තිබේ.
පොලිසිය, ක්‍රීඩා සමාජ, වෙළඳ සංගම් ඒකාබද්ධ පරිපාලන කමිටුවක් සේ සෑම ප්‍රධාන ක්‍රීඩාංගණයකටම පත් කිරීමටත් ග්‍රාමීය ක්‍රීඩාපිටියන්හි වගකීම ක්‍රීඩා සමාජවලට පැවරීමටත් ක්‍රීඩා අමාත්‍යාංශය සැලසුම් කර ඇත.
පාසල් කාලය තුළ දරුවන්ගේ විවේක කාලය වැඩි කිරීමට මේ වනවිට අධ්‍යාපන අමාත්‍යාංශයට යෝජනා කර ඇතැයිද, එමඟින් ක්‍රියාශීලී දරු පරපුරක් බිහිකිරීමට හැකිවනු ඇතැයිද ක්‍රීඩා හා තරුණ කටයුතු අමාත්‍ය නාමල් රාජපක්ෂ මහතා පැවසීය.
එමෙන්ම ප්‍රධාන පාසල් ඉලක්ක කර ගනිමින් කෝටා ක්‍රමයකට ක්‍රීඩා දක්ෂතා ඇති දරුවන් පාසල් සඳහා ඇතුළත් කිරීමේ වැඩපිළිවෙළ සකස් කිරීමට අධ්‍යාපන අමාත්‍යාංශයට යෝජනා කර ඇතැයිද මේ සඳහා පාසල් 150ක් නිර්දේශ කර ඇතැයි ද, හෙතෙම පැවසීය. ජාතික හා ජාත්‍යන්තර තරඟ ඉලක්ක කර දිගුකාලීනව දරුවන් යොමු කිරීම කාලෝචිත බවත්, වත්මන් වසංගත තත්ත්වයන් තුළ ක්‍රියාශීලී දරුවන් බිහිකිරීම කාලීන අවශ්‍යතාවයන් බවත් අමාත්‍ය නාමල් රාජපක්ෂ මහතා පැවසීය.
ජනමාධ්‍ය අමාත්‍යාංශ ලේකම් ජගත් පී. විජේවීර, ග්‍රාමීය පාසල් ක්‍රීඩා යටිතල පහසුකම් ප්‍රවර්ධන රාජ්‍ය අමාත්‍යාංශයේ ලේකම් රවීන්ද්‍ර සමරවික්‍රම යන මහත්වරුන් පිරිසක් මේ අවස්ථාව සඳහා සහභාගී විය.
