මෙරට වාහන එකලස් කිරීමේ සහ අමතර උපාංග නිපදවීමේ කර්මාන්ත පිළිබඳ “සම්මත මෙහෙයුම් පටිපාටිය” එළි දැක්වීමේ උලෙළ කොළඹ ෂැංග්‍රිලා හෝටලයේදී ඊයේ (15) අග්‍රාමාත්‍ය මහින්ද රාජපක්ෂ මහතාගේ ප්‍රධානත්වයෙන් මහත් උත්කර්ෂවත් අන්දමින් පැවැත්විණි.
කර්මාන්ත ඇමැති විමල් වීරවංශ මහතාගේ මඟපෙන්වීම යටතේ කර්මාන්ත අමාත්‍යාංශය විසින් සකස් කරන ලද මෙරට වාහන එකලස් කිරීමේ සහ වාහන අමතර උපාංග නිෂ්පාදනය කිරීමේ කර්මාන්ත පිළිබඳ සම්මත මෙහෙයුම් පටිපාටිය (sos) මෙහිදී එළි දැක්විණි.
වාහන නිෂ්පාදන කර්මාන්ත ක්ෂේත්‍රය පමණක්් නොව මෙරට කර්මාන්ත ක්ෂේත්‍රයේ විප්ලවීය පරිවර්තනයකට ඉඩ කඩ සලසා දෙන මෙම අන්තර්ජාතික ප්‍රමිතීන්ට අනුකූලව සැකසූ සම්මත මෙහෙයුම් පටිපාටිය එළිදැක්වීමෙන් අනතුරුව විදේශවලට ගලායන රුපියල් බිලියන 1820ක මුදලක් වාර්ෂිකව රට තුළ ඉතිරි කර ගත හැකිය.
මෙහි අරමුණ මෝටර රථ එකලස් කිරීම හා මෝටර් රථ අමතර කොටස් නිපදවීම තුළින් දේශීය හා අන්තර්ජාතික මෝටර් රථ වෙළෙඳපොළ ජය ගැනීමයි.
පසුව සම්මත මෙහෙයුම් පටිපාටියේ ප්‍රකාශනය අග්‍රාමාත්‍යවරයාට කර්මාන්ත ඇමැති විමල් වීරවංශ මහතා විසින් පිළිගන්වනු ලැබිණි. මේ අවස්ථාවට කර්මාන්ත ඇමැති විමල් වීරවංශ, ප්‍රවාහන අමාත්‍ය ගාමිණී ලොකුගේ, රාජ්‍ය ඇමැති දිලුම් අමුණුගම, කර්මාන්ත අමාත්‍යාංශයේ ලේකම් අනුෂ පැල්පිට මහතා ඇතුළු උසස් නිලධාරීහු සහ සම්භාවනීය අමුත්තෝ රැසක් එක්ව සිටියහ.
