ජූලි 07 වනදාට යෙදී ඇති 131 වන ජාතික පුරාවිද්‍යා සැමරුම් උළෙල අතිගරු ජනාධිපතිතුමාගේ ප්‍රධානත්වයෙන් හා ගරු අග්‍රාමාත්‍යතුමාගේ සහභාගීත්වයෙන් පසුගිය 07 වන දා අරලියගහ මන්දිරයේදී පැවැත්විණ.
එදින සෝමාවතිය හා රිදී විහාරය පුරාවිද්‍යා පර්යේෂණ මධ්‍යස්ථාන ලෙස නම් කළ අතර, ජනාධිපතිතුමා විසින් සෝමාවතිය රජමහ විහාරාධිපති පහමුණේ ශ්‍රී සුමංගල නාහිමියන්ට හා රිදී විහාරයේ විහාරාධිපති තිබ්බටුවාවේ බුද්ධරක්ඛිත නාහිමියන්ට ඊට අදාළ සන්නස් පත්‍රය ප්‍රදානය කරන ලදී.
පුරාවිද්‍යා දෙපාර්තමේන්තුවේ නව වෙබ් අඩවිය වන www.archaeology.gov.lk අන්තර්ජාලයට එක් කිරීම ද එහිදී සිදුවිය.
එම අවස්ථාවට ජාතික උරුම, ප්‍රාසාංගික කලා හා ග්‍රාමීය කලා ශිල්පී ප්‍රවර්ධන කටයුතු රාජ්‍ය අමාත්‍ය විදුර වික්‍රමනායක, අග්‍රාමත්‍ය ලේකම් ගාමිණී සෙනරත්, බුද්ධශාසන, ආගමික හා සංස්කෘතික කටයුතු අමාත්‍යාංශයේ ලේකම් මහාචාර්ය කපිල ගුණවර්ධන, පුරාවිද්‍යා අධ්‍යක්ෂක ජන‍රාල් මහාචාර්ය අනුර මනතුංග රාජ්‍ය අමාත්‍යාංශ ලේකම් කේ.ඒ.ඩී.ආර්. නිශාන්ති මෙනෙවිය ඇතුළු පුරාවිද්‍යා දෙපාර්තමේන්තුවේ නිලධාරී මහත්ම මහත්මීහු පිරිසක් එක් ව සිටියහ.
