ශ්‍රී ලංකාවේ විශේෂ අවශ්‍යතා සහිත පුද්ගලයන්ට කිසිදු අපහසුතාවකින් තොරව ස්වකීය සුවිශේෂී අවශ්‍යතා සපුරා ගැනීම සඳහා තමන් අතර මෙන්ම බාහිර සමාජය සමඟ සම්බන්ධීකරණය පිණිස කේන්ද්‍රස්ථානයක් ස්ථාපන කිරීමට ජනමාධ්‍ය අමාත්‍යාංශය සැලසුම් කර ඇත.
මෙම කේන්ද්‍රස්ථානය රජයේ ප්‍රවෘත්ති දෙපාර්තමේන්තුවේ මධ්‍ය සංවර්ධන මධ්‍යස්ථාන ගොඩනැගිල්ලේ බිමි මහළේ ස්ථාපනය කෙරේ. විශේෂ අවශ්‍යතා සහිත තැනැත්තන්ගේ අවශ්‍යතාවන්ට අනුරූපවන පරිදි කේන්ද්‍රස්ථානය සකස් විය යුතු ආකාරය පිළිබඳව ජනමාධ්‍ය අමාත්‍ය ඩලස් අලහස්පෙරුම මහතා පසුගියදා (17) විශේෂ අවශ්‍යතා සහිත පුද්ගලයන්ගේ නියෝජිත කණ්ඩායමක් සමඟ අදහස් හුවමාරුවක නිරත විය.
විශේෂ අවශ්‍යතා සහිත පුද්ගල සංවිධාන ඒකාබද්ධ පෙරමුණේ සභාපති රසාංජලී පතිරගේ මහත්මිය ඇතුළු ශ්‍රව්‍ය, දෘශ්‍ය හා වෙනත් විශේෂ අවශ්‍යතා සහිත කිහිපදෙනෙක් ඊට සහභාගී වූහ. සහිත පුද්ගලයන්ට අවශ්‍ය පහසුකම් ඔවුන් වෙතින්ම හඳුනාගනු ලැබූ අතර ඔවුන්ට භාවිත කිරීමට හැකි පරිදි සියල්ල සංවිධානය කරන ලෙස අමාත්‍යවරයා නිලධාරීන්ට උපදෙස් දුන්නේය.
විශේෂ අවශ්‍යතා සහිත පුද්ගලයන් සඳහා පිවිසුම් මාර්ග සකස් කිරීම, සනීපාරක්ෂක පහසුකම් සැලසීම, දෘශ්‍යාබාධ සහිත පුද්ගලයන් වෙනුවෙන් පිවිසීමේ මංතීරු ඉදිකිරීම, වාහන නතර කිරීමේ පහසුකම් ආදිය කෙරෙහි අවධානය යොමු කෙරිණි.
විශේෂ අවශ්‍යතා සහිත පුද්ගලයන්ගේ යහපත පිණිස සැලසුම් කළ මේ සත්කාර්යයෙහි පෙරමුණ ගැනීම පිළිබඳව ජනමාධ්‍ය අමාත්‍යවරයාට කෘතඥතාව පළ කළ විශේෂ අවශ්‍යතා සහිත ඒකාබද්ධ පෙරමුණේ සාමාජිකයෝ ශ්‍රී ලංකාවේ විශේෂ අවශ්‍යතා සහිත ජනතාව උදෙසා සෑම රාජ්‍ය ආයතනයකම මෙබදු පහසුකම් සලසන ලෙස ඉල්ලීමක් කළහ.
