එක නීතියක් - එක රටක් යටතේ දූෂණයෙන් තොරව නිවැරැදිව ඉදිරියට යෑමට සහාය දෙන්න
යුද හමුදා 72 වැනි සංවත්සරයේදී ජනපති කියයි
ලෝක ඉතිහාසයේ කිසිදු නායකයකු මුහුණනොදුන් තත්ත්වයකට බලයට පත් වූ දා සිට මුහුණ දීමට සිදු වුව ද ජනතාව හමුවේ නිදහසට කරුණු කියන්න සූදානම් නැති බව ජනාධිපති ගෝඨාභය රාජපක්ෂ මහතා ශ්‍රී ලංකා යුද හමුදාවේ 72 වැනි සංවත්සර උලෙළට එක් වෙමින් ඊයේ (10) ප්‍රකාශ කළේය. විශාල බලාපොරොත්තු ඇතිව ජනාධිපති ධුරයට පත් කර ගත් නමුත් ඒ ආකාරයටම වැඩ නොකිරීම ගැන ජනතාවගේ සිතේ ඇති අප්‍රසාදය තමා මෙන්ම සියලු මැති ඇමැතිවරුන්ද පිළිගත යුතු බවත් රාජපක්ෂ මහතා පැවසීය.
කෙසේ නමුත් කොවිඩ් වසංගත තත්ත්වය පාලනය කොට නව සාමාන්‍ය තත්ත්වයක් යටතේ රට විවෘත කර නව ජවයකින් රට ඉදිරියට ගෙනයෑමට කටයුතු කරන බවටත් ජනාධිපතිවරයා ප්‍රතිඥා දුන්නේය.
එදා ජනතාවට පොරොන්දු වූ ආකාරයටම නව ව්‍යවස්ථාවක් ඊළඟ වසර ඇතුළත හඳුන්වා දෙන බවත් ජනතාවගේ තවත් බලාපොරොත්තුවක් වූ නව ඡන්ද ක්‍රමයත් ඉතා ඉක්මනින් රට හමුවට ඉදිරිපත් කරන බවත් ජනාධිපති රාජපක්ෂ මහතා කියා සිටියේය.
පසුගිය ජනාධිපතිවරණයේදී තමන් රට හමුවේ පැවසූ ආකාරයටම එක රටක්- එක නීතියක් යන පොරොන්දුවත් වසරක් ඇතුළත නිසැකවම ඉටු කරන බවටත් ජනාධිපතිවරයා ප්‍රතිඥා දුන්නේය.
දූෂණය නැති කිරීම විශාල අභියෝගයක් වන නමුත් කිසිදු ආකාරයකින් දූෂණයට යොමු නොවූ තමා ඒ සම්බන්ධයෙන් ආදර්ශයක් දී ඇති බවත් ඒ ආදර්ශයම දෙන්නැයි සිය ඇමැති මණ්ඩලයෙන්ද ඉල්ලීමක් කරන බවත් ජනාධිපතිවරයා ප්‍රකාශ කළේය.
ඉදිරි වසර කිහිපය තුළ මේ රට සෞභාග්‍ය කරා රැගෙන යාමට සියලුදෙනාගේම සහයෝගය ලබාදෙන ලෙසත් ජනාධිපති රාජපක්ෂ මහතා සංවත්සර උලෙළ අමතමින් වැඩිදුරටත් කියා සිටියේය.
ශ්‍රී ලංකා යුද හමුදාවේ 72 සංවත්සර උලෙළ අනුරාධපුර, සාලියපුර ගජබා රෙජිමේන්තු මූලස්ථානයේදී ඊයේ (10) පැවැත්විණි. 1949 අංක 17 දරණ යුද්ධ හමුදා පනතට අනුව ස්ථාපිත කෙරුණු ශ්‍රී ලංකා යුද හමුදාව පාබළ, ආධාරක සහ සේවා රෙජිමේන්තු 25කින් සමන්විත වේ.
සෞඛ්‍ය මාර්ගෝපදේශයන්ට යටත්ව සංවිධාන කෙරුණු යුද හමුදා සැමරුම් උලෙළට පැමිණි ජනාධිපතිවරයා සාලියපුර ගජබා රෙජිමේන්තු කඳවුරේ අභිනවයෙන් ඉදිකෙරුණු සරඹ භූමිය විවෘත කර රණවිරු අයිතියට පත් කිරීමෙන් අනතුරුව උත්තමාචාර පෙළපාලිය නිරීක්ෂණය කළේය.
සැමරුම් උළෙල ඇමතීමෙන් අනතුරුව ගජබා රෙජිමේන්තු මූලස්ථානයේ ඇති මේජර් ජෙනරාල් විජය විමලරත්න මහතාගේ පිළිරුවට පුෂ්පෝහාර දැක්වූ ජනාධිපතිවරයා රෙජිමේන්තු මූලස්ථානයේ සංචාරයක නිරත විය.
ගජබා රෙජිමේන්තු මූලස්ථානයේ නව පරිපාලන ගොඩනැඟිල්ල හා ක්‍රීඩාංගණය විවෘත කිරීම, ක්‍රීඩාගාරය සඳහා මුල්ගල තැබීම ජනාධිපතිවරයා අතින් සිදුකෙරිණි. කනිෂ්ඨ හා බලලත් නිලධාරීන්ගේ නිවස්නයන් සහ ගජබා රෙජිමේන්තුවේ ඉංජිනේරු බළකාය විසින් අලුත්වැඩියා කර, ධාවනයට එක්කළ හමුදා රථ ජනාධිපතිවරයා නිරීක්ෂණය කළේය.
ආරක්ෂක ලේකම් (විශ්‍රාමික) ජෙනරාල් කමල් ගුණරත්න, ආරක්ෂක මාණ්ඩලික ප්‍රධානී හා යුද හමුදාපති ජෙනරාල් ශවේන්ද්‍ර සිල්වා සහ යුද හමුදා ප්‍රධානීන් ඇතුළු පිරිසක් මේ අවස්ථාවට එක්ව සිටියහ.
