පත්‍රකලාවේදීන් සඳහා හඳුන්වාදුන් ආචාරධර්ම පද්ධතියට 2021 ඔක්තෝබර් 14 දින වසර 40ක් සපිරෙයි.
1981 ඔක්තෝබර් මස 14 දින ශ්‍රී ලංකා පුවත්පත් මණ්ඩලය විසින් මෙම ආචාරධර්ම පද්ධතිය හඳුන්වා දෙනු ලැබීය.
එය සමරනු පිණිස සෞඛ්‍ය මාර්ගෝපදේශ අනුගමනය කරමින් ශ්‍රී ලංකා පුවත්පත් මණ්ඩලය විසින් ජනමාධ්‍ය අමාත්‍ය ඩලස් අලහප්පෙරුම මහතාගේ ප්‍රධානත්වයෙන් සම්මන්ත්‍රණයක් සංවිධාන කර ඇත. සම්මන්ත්‍රණය 2021 ඔක්තෝබර් 14 දින ප.ව. 4.00 ට රජයේ ප්‍රවෘත්ති දෙපාර්තමේන්තු ශ්‍රවණාගාරයේ දී පැවැත්වේ. මීට සමගාමීව පුවත්පත් මණ්ඩල නිල වෙබ් අඩවිය වන www.slpc.lk නව මුහුණුවරකින් එළිදැක්වීම සහ සමරු මුද්දරය හා මුල් දින කවරය නිකුත් කිරීම එදින සිදු කෙරේ.
“යහපත් සමාජයක් ගොඩනැගීමෙහිලා ජනමාධ්‍ය ආචාරධර්ම ආරක්ෂා කිරීමේ වැදගත්කම” හා “ශ්‍රී ලංකා පුවත්පත් මණ්ඩලය හා එහි ආචාරධර්ම” යන මැයෙන් ජ්‍යෙෂ්ඨ මාධ්‍යවේදීන් වන වික්ටර් අයිවන් සහ ආරියනන්ද දොඹගහවත්ත යන මහත්වරු සම්මන්ත්‍රණයේ දේශන පවත්වති.
සන්නිවේදන අධ්‍යනයේ නිරත සිසු දරුවන්, සන්නිවේදන ගුරුවරුන්, විශ්වවිද්‍යාල විද්‍යාර්ථීන් සහ ජනමාධ්‍යවේදීන් මාර්ගගත ක්‍රමයට Zoom තාක්ෂණය ඔස්සේ ඊට සහභාගීවීමට නියමිතය.
