2023 වර්ෂයේ සිදුකෙරෙන දැවැන්තම සංවර්ධන ව්‍යාපෘතිය ලෙස මහව සිට ඕමන්ත දක්වා දුම්රිය මාර්ගයේ සංවර්ධන කටයුතු ආරම්භ අනුරාධපුරය ජයශ්‍රී මහා බෝ සමිදුගේ ආශිර්වාදයත්,රුවන්වැලි මහ සෑ රඳුන්ගේ ආශිර්වාදය ලබාගැනීම සිදු විය.
ප්‍රවාහන හා මහාමාර්ග අමාත්‍යාංශය විසින් සිදු කරනු ලබන මහව සිට ඕමන්ත දක්වා උතුරු දුම්රිය මාර්ගයේ ප්‍රතිසංස්කරණ කටයුතු ආරම්භ කිරීම වෙනුවෙන් අනුරාධපුර රුවන්වැලි සෑ වෙහෙර පරිශ්‍රයේ පැවති ආගමික වතාවත් වලට ප්‍රවාහන හා ජනමාධ්‍ය අමාත්‍ය ආචාර්ය බන්දුල ගුණවර්ධන මහතා සහ ශ්‍රී ලංකාවේ ඉන්දීය මහකොමසාරිස් ගෝපාල් බාග්ලේ මහතා ඇතුළු පිරිස අනුරාධපුර රුවන්වැලි මහා සෑ චෛත්‍යරාමාධිකාරී, ශාස්ත‍්‍රපති පණ්ඩිත පූජ්‍ය ඊතල වැටුනු වැවේ ඥානතිලකාභිධාන නායක ස්වාමීන් වහන්සේ බැහැ දැක ආශීර්වාද ලබා ගත්තේ ය.
එමෙන් ම උතුරු දුම්රිය මාර්ගයේ මහව සිට ඕමන්තේ දක්වා කොටස නවීකරණය කිරීමේ අවස්ථාවට සෙත් පතා අනුරාධපුර ජය ශ්‍රී මහා බෝධි රාජයනනන්වහන්සේ අභියස ද උදැසන ආශීර්වාද පුජාවක් සිදු කළේ ය. ඉන් අනතුරුව ප්‍රවාහන අමාත්‍යවරයා, ඉන්දීය මහකොමසාරිස් ප්‍රමුඛ පිරිස අටමස්ථානාධිපති, නුවර කලාවියේ ප්‍රධාන සංඝනායක අතිපූජ්‍ය පල්ලේගම හේමරතන නාහිමි බැහැදැක ආශිර්වාද ලබාගත්තේ ය.
ඉන්දියානු ණය යෝජනා ක්‍රමය යටතේ, ඉන්දීය IRCON සමාගම මගින් ක්‍රියාත්මක කිරීමට නියමිතයි. ඒ උදෙසා සිදුකෙරෙන ආයෝජනයෙහි වටිනාකම ඇ. ඩොලර් මිලියන 91.27කි. මෙහි අනුරාධපුර සිට වව්නියාව දක්වා කි. මී.48ක කොටසක් ප්‍රතිසංස්කරණය කෙරෙන අතර මීළඟ අදියර ලෙස වව්නියාව සිට ඕමන්ත දක්වා කි. මී.13ක කොටසක් ප්‍රතිසංස්කරණය කෙරේ. ව්‍යාපෘති අවසන් කිරීමෙන් අනතුරුව පැයට කිලෝ මීටර් 100ක වේගයෙන් දුම්රිය ධාවනය කළ හැකි වන අතර, කොළඹ සිට යාපනය කන්කසන්තුරේ දක්වා දැනට දුම්රිය මගින් ගමන් කිරීමට ගතවන කාලය පැයකින් අවම කරගත හැකිවේ.
ශ්‍රී ලංකාවේ ඉන්දීය මහකොමසාරිස් ගෝපාල් බාග්ලේ මහතා ඇතුළු ඉන්දීය රාජ්‍ය තාන්ත්‍රික නිලධාරීන්,අමාත්‍ය ඩග්ලස් දේවානන්ද,රාජ්‍ය අමාත්‍යවරුන් වන සිරිපාල ගම්ලත් ෂෙහාන් සේමසිංහ යන මහත්වරුන්, පාර්ලිමේන්තු මන්ත්‍රීවරු , ඉන්දීය ඉර්කෝන් සමාගමේ ඉහළ කළමනාකරණයේ නියෝජිතවරු ඇතුළු ප්‍රාදේශීය දේශපාලන නියෝජිතයින්, ප්‍රවාහන හා මහාමාර්ග අමාත්‍යාංශයේ නිලධාරීන්, දුම්රිය සාමාන්‍යාධිකාරිතුමා ඇතුළු නිලධාරීන් සහ ප්‍රදේශවාසින් ඇතුළු පිරිසක් මේ අවස්ථාවට එක්ව සිටියහ.
