දැඩි ආර්ථික පසුබෑමකට මුහුණ දීමෙන් පසු ශ්‍රී ලංකාව සතුටුදායක ආරම්භක ප්‍රකෘතිමත් භාවයක් ලබා ඇති බැවින් ශ්‍රී ලංකාවේ ආර්ථිකය ප්‍රකෘතිමත් වීම පිළිබඳ ජපානය දැඩි විශ්වාසයකින් පසු වන බව ජපානයේ විදේශ ඇමැතිනි කමිකවා යොකෝ මහත්මිය පැවැසුවාය. ඇය මේ බව ප්‍රකාශ කළේ
අගමැති දිනේෂ් ගුණවර්ධන මහතා සහ ජපානයේ විදේශ ඇමැතිනිය අතර අරලියගහ මන්දිරයේ පෙරේදා (4) පැවති හමුවේදී අදහස් දක්වමිනි.
අගමැතිවරයා මෙහිදී ජපාන රජය විසින් සම සභාපතිත්වය දරන ජාත්‍යන්තර මූල්‍ය අරමුදල, පැරිස් සමාජය සහ ඉන්දියාව, ප්‍රංශය සහ අනෙකුත් ආධාර සපයන රටවල සහය ඇතිව සිදු කෙරෙන ණය ප්‍රතිව්‍යූහගත කිරීමේ ක්‍රියාවලියේ ප්‍රගතිය සම්බන්ධයෙන් ජපාන විදේශ ඇමැතිවරිය දැනුවත් කළේය.
අඩු ආදායම්ලාභී සහ අවදානමට ලක් විය හැකි කොටස්වලට සහය වීම සහ ඔවුන්ගේ ජීවන තත්ත්වය නඟාසිටුවීම සඳහා ඇස්වැසුම වැඩසටහන ක්‍රියාත්මක කිරීම පිළිබඳවද අගමැතිවරයා මෙහිදී කරුණු පැහැදිලි කළේය.
මේ ව්‍යාපෘති අත් කරගෙන ඇති ප්‍රගතිය අගය කළ ජපාන විදේශ ඇමැතිනිය චීනය සහ පෞද්ගලික ණය දෙන්නන් සමඟද ශ්‍රී ලංකාව ප්‍රතිව්‍යූහගත කිරීමේ කටයුතු කඩිනම් කරනු ඇතැයි ජපානය අපේක්ෂා කරන බවද පැවැසුවාය.
යෝජිත අනුරාධපුර මහාවිහාර විශ්වවිද්‍යාලය ඇතුළු බෞද්ධ ආගමික මධ්‍යස්ථාන සඳහා පිරිනමන ආධාර සම්බන්ධයෙන් ජපානයට ස්තුතිය පළ කළ අගමැතිවරයා බෞද්ධ දින දර්ශනයේ වඩාත් පූජනීය කාලය වන වෙසක් මාසයේදී ජපාන ඇමැතිවරිය ශ්‍රී ලංකාවට පැමිණීම විශේෂත්වයක් බව පැවසීය.
ශ්‍රී ලංකාවේ ජපාන තානාපති මිසුකොෂි හිදෙකි, රාජ්‍ය ඇමැතිවරුන් වන තාරක බාලසූරිය, සුරේන් රාඝවන්, පියල් නිශාන්ත, පාර්ලිමේන්තු මන්ත්‍රී යදාමිණි ගුණවර්ධන, අගමැති අතිරේක ලේකම් හර්ෂ විජේවර්ධන, කොළඹ විශ්වවිද්‍යාලයේ උපකුලපති මහාචාර්ය එච්. ඩී. කරුණාරත්න මහත්වරුද මේ හමුවට එක් වූහ.
