025 ජූලි 14 දින රැස් වූ අමාත්‍ය මණ්ඩලය විසින් ගනු ලැබූ තීරණ ප්‍රකාශයට පත් කිරීම සඳහා කැබිනට් මාධ්‍ය ප්‍රකාශක, සෞඛ්‍ය හා ජනමාධ්‍ය ඇමැති වෛද්‍ය නලින්ද ජයතිස්ස සහ රජයේ ප්‍රවෘත්ති දෙපාර්තමේන්තුවේ අධ්‍යක්ෂ ජනරාල් එච්.එස්.කේ.ජේ. බණ්ඩාර මහත්වරුන් රජයේ ප්‍රවෘත්ති දෙපාර්තමේන්තුවේදී ඊයේ (15) පැවති මාධ්‍ය හමුවට එක් වූයේ මෙලෙසිනි.

ජාතික සයිබර් ආරක්ෂණ මූලෝපාය ක්‍රියාත්මක කිරීමට අනුමැතිය

ශ්‍රී ලංකාවේ ජාතික සයිබර් ආරක්ෂණ මූලෝපාය – 2025 – 2029 ක්‍රියාත්මක කිරීම සඳහා අනුමැතිය හිමි වී තිබේ.

ඩිජිටල් ආර්ථික ඇමැතිවරයා වශයෙන් ජනාධිපති අනුර කුමාර දිසානායක මහතා විසින් මේ යෝජනාව ඉදිරිපත් කර තිබිණි.

ශ්‍රී ලංකාවේ සයිබර් ආරක්ෂණය සම්බන්ධයෙන් වන සිවිල් ක්ෂේත්‍රයන් පමණක් ආවරණය වන පරිදි, නෛතික හා නියාමන රාමු වැඩිදියුණු කිරීම, දැනුම වැඩි කිරීම, සයිබර් ආරක්ෂණ සූදානම වැඩිදියුණු කිරීම හා ප්‍රතිචාර දැක්වීමේ හැකියාව ශක්තිමත් කිරීම සහ සහයෝගිතාව වැඩි කිරීම යන තේමා ක්ෂේත්‍ර පදනම් කරගෙන ශ්‍රී ලංකා පරිගණක හදිසි ප්‍රතිචාර සංසදය ලෝක බැංකුවේ සහාය ඇතිව මෙම මූලෝපාය කෙටුම්පත් කර ඇත.

තැලසීමියා එන්නත් ප්‍රසම්පාදනය M/s. ABC Pharma Services (Pvt) Ltd. වෙත

රක්තහීනතාවෙන් පෙළෙන රෝගීන්ගේ හෝ තැලසීමියා රෝගීන්ගේ ශරීරයෙන් අතිරික්ත යකඩ ඉවත් කිරීමට භාවිත කරනු ලබන ඩෙස්ෆෙරිඔක්සමින් මෙසිලේට් එන්නත් බීපී මිලි ග්‍රෑම් 500න් වයල් 400,000ක් සැපයීම සඳහා වන ප්‍රසම්පාදනය ශ්‍රී ලංකාවේ M/s. ABC Pharma Services (Pvt) Ltd. වෙත පිරිනැමීමට අනුමැතිය හිමි වේ.

සෞඛ්‍ය සහ ජනමාධ්‍ය ඇමැති වෛද්‍ය නලින්ද ජයතිස්ස මහතා මේ යෝජනාව ඉදිරිපත් කර තිබේ.

මල අපජල සහ මල අපද්‍රව්‍ය කළමනාකරණයට ප්‍රතිකර්ම පද්ධති

පළාත් පාලන ආයතනවලින් සිදු කරන මල අපජල සහ මල අපද්‍රව්‍ය කළමනාකරණ කටයුතු වැඩිදියුණු කිරීම සඳහා ප්‍රතිකර්ම පද්ධති ස්ථාපනය කිරීමට පරිපාලන, පළාත් සභා සහ පළාත් පාලන ඇමැති ඒ.එච්.එන්.එච්. අබේරත්න මහතා ඉදිරිපත් කළ යෝජනාවට අනුමැතිය පළ වේ.

ක්ලීන් ශ්‍රී ලංකා වැඩසටහන සඳහා වෙන් කරනු ලැබ ඇති ප්‍රතිපාදනවලින් රුපියල් මිලියන 200ක් මේ සඳහා වැය කිරීමට නියමිතය.

ද්විතීයික සත්කාර රෝහල්වල ධාරිතාව වැඩිදියුණු කෙරේ

ද්විතීයික සත්කාර රෝහල්වල ධාරිතාව වැඩිදියුණු කිරීමේ ව්‍යාපෘතියක් ක්‍රියාත්මක කිරීමට අදාළව සෞඛ්‍ය සහ ජනමාධ්‍ය ඇමැති වෛද්‍ය නලින්ද ජයතිස්ස මහතා ඉදිරිපත් කළ යෝජනාවට අනුමැතිය හිමි වේ.

මේ වැඩසටහන සඳහා ප්‍රතිඵල පාදක අය-වැය සහාය වශයෙන් අමෙරිකානු ඩොලර් මිලියන 100ක් ලබා දීමට ආසියානු සංවර්ධන බැංකුව එකඟතාව පළ කර ඇත. ඒ අනුව මෙම ව්‍යාපෘතිය 2025 සිට 2030 දක්වා ක්‍රියාත්මක කිරීමට යෝජිතය.

සාප්පු හා කාර්යාල සේවක පනත සංශෝධනයට

1954 අංක 19 දරන සාප්පු හා කාර්යාල සේවක (සේවය හා පාරිශ්‍රමික විධිමත් කිරීමේ) පනතේ නියෝග සංශෝධනය කිරීමට අනුමැතිය හිමිව තිබේ.

දැනට බලාත්මකව පවතින නියෝග යටතේ වයස අවුරුදු 18 සම්පූර්ණ වූ යම් සේවිකාවක් නේවාසික හෝටලයක පිළිගැනීමේ නිලධාරිනියක‌ගේ, කාන්තා කබා කාමර සේවිකාවකගේ, කාන්තා ඇඳුම් කාමර සේවිකාවකගේ හෝ කාන්තා වැසිකිළි සේවිකාවක‌ගේ කාර්යයෙහි පස්වරු 6.00ට පසුව සහ පෙරවරු 6.00ට පෙර සේවයෙහි නියුක්ත කරනු ලැබිය හැකිය.

එසේ වුවද, නේවාසික හෝටල් සහ අවන්හල්වල සේවයේ යෙදී සිටින ආහාර හා පාන පිළිගන්වන සේවිකාවන් සේවයේ යෙදවිය හැක්කේ රාත්‍රී 10.00 දක්වා පමණක් වන බැවින්, ඒවායේ මෙහෙයුම් කටයුතු පවත්වාගෙන යෑමේදී විවිධ ගැටලුකාරී තත්ත්වයන් උද්ගත වන බව පෙන්වාදී ඇත.

ඒ අනුව, නේවාසික හෝටල් සහ අවන්හල්වල සේවයේ යෙදී සිටින ආහාර හා පාන පිළිගන්වන්නියන්ගේ කාර්යයන්හි නියැළෙන වයස අවුරුදු 18ට වැඩි සේවිකාවන්ට පස්වරු 6.00ට පසුව සහ පෙරවරු 6.00ට පෙර සේවයේ යෙදීමට හැකි වන පරිදි 1954 අංක 19 දරන සාප්පු හා කාර්යාල සේවක (සේවය හා පාරිශ්‍රමික විධිමත් කිරීමේ) පනත යටතේ නිකුත් කරනු ලැබ ඇති 3 වන නියෝගය සංශෝධනය කිරීමට නියමිතය. කම්කරු ඇමැති සුනිල් ජයන්ත ප්‍රනාන්දු මහතා මේ යෝජනාව ඉදිරිපත් කර තිබිණි.

2025 රාජ්‍ය සේවා (පන්දුවාර 50) ක්‍රිකට් තරඟාවලියේ "D" කාණ්ඩයේ අවසන් මහා තරඟය 2025.07.03 දින පොලිස් දෙපාර්තමේන්තු කණ්ඩායම සමඟ පැවැති අතර, එහිදී ජනමාධ්‍ය අමාත්‍යාංශ ක්‍රිකට් කණ්ඩායම අනුශූරතාව දිනාගන්නා ලදි. ශ්‍රී ලංකා රාජ්‍ය සේවා ක්‍රිකට් සංගමය විසින් වාර්ෂිකව සංවිධානය කරනු ලබන, ශ්‍රී ලංකා රාජ්‍ය සේවා ක්‍රිකට් තරඟාවලියක දී වසර තුනක් අඛණ්ඩව තමන් තරඟ කළ කාණ්ඩයේ අවසන් මහා තරඟය දක්වා පැමිණ පිළිවෙලින් රාජ්‍ය සේවා ශූරයන්, රාජ්‍ය සේවා සම-ශූරයන් හ‍ා රාජ්‍ය සේවා අනුශූරයන් ලෙස කිරුළු පැළදීම ශ්‍රි ලංකාවේ රාජ්‍ය ආයතන ක්‍රිකට් කණ්ඩ‍ායමක් ලැබු සුවිශේෂී ජයග්‍රහණයකි.

2007 වසරේ ''ටෙනිස් පන්දුවෙන්'' ආරම්භ වී, 2016 වසරේ ලෙදර් පන්දු ක්‍රිකට් කණ්ඩායමක් දක්වා දිගු ගමනක් පැමිණි ජනමාධ්‍ය අමාත්‍යාංශ ක්‍රිකට් කණ්ඩායම, ඉන් වසර 07 කට පසු එනම් 2023 වසරේ පළමු වරට "F"කාණ්ඩයේ රාජ්‍ය සේවා ක්‍රිකට් ශූරතාව, 2024 වසරේ "E"කාණ්ඩයේ රාජ්‍ය සේවා ක්‍රික‍ට් සම-ශූරතාව සහ 2025 වසරේ "D" කාණ්ඩයේ රාජ්‍ය සේවා ක්‍රිකට් අනුශූරතාව දිනා ගනිමින් බුහුමනට ලක් විය.
මෙහිදී ආරම්භක පිතිකරු හා කඩුළු රකින ක්‍රීඩක ප්‍රදීප් පෙරේරා කණ්ඩායමේ වැඩිම ලකුණු ලාභියා (ලකුණු 357) ලෙසත් , ආරම්භක පන්දු යවන ක්‍රීඩක ප්‍රසාද් නිරෝෂණ වැඩිම කඩුලු ලාභියා (කඩුළු 19) ලෙසත් ගෞරවයට පාත්‍ර විය.

මේ අනුව ජනමාධ්‍ය අමාත්‍යාංශ ක්‍රිකට් කණ්ඩායම 2026 වසරේ තවත් ඉදිරි පියවරක් තබමින් "C" කාණ්ඩ‍ය යටතේ තරඟ බිමට පිවිසීමට නියමිතය.

සුපිළිපන් රාජ්‍ය සේවයක් ගොඩනැඟීම සඳහා රජය ක්‍රියාත්මක කර ඇති වැඩපිළිවෙළට සහාය ලබා දෙන බව එක්සත් ජාතීන්ගේ සංවර්ධන වැඩසටහනේ (UNDP) නිත්‍ය නේවාසික නියෝජිත අසූසා කුබෝටා (Azusa Kubota) මහත්මිය පැවසුවාය.

අසූසා කුබෝටා (Azusa Kubota) මහත්මිය මේ බව සඳහන් කළේ ඊයේ (13) පෙරවරුවේ ජනාධිපති කාර්යාලයේදී ජනාධිපති ලේකම් ආචාර්ය නන්දික සනත් කුමානායක මහතා හමු වූ අවස්ථාවේදීය.

ඵලදායී රාජ්‍ය සේවයක් සැපයීම වෙනුවෙන් සියලුම රාජ්‍ය ආයතනවල අභ්‍යන්තර කටයුතු ඒකක (Internal Affairs Unit – IAU) පිහිටුවීමට රජය ආරම්භ කර තිබෙන වැඩපිළිවෙළ ඉදිරියට ගෙන යාම සහ කාර්ය මණ්ඩල පුහුණු කිරීම වෙනුවෙන් එක්සත් ජාතීන්ගේ සංවර්ධන වැඩසටහනේ සහාය තවදුරටත් ලබා ගැනීම යන කරුණු පිළිබඳව මෙහිදී සාකච්ඡා කෙරිණි.

රාජ්‍ය ආයතන තුළ දූෂණය වැළැක්වීම, විනිවිදභාවය සහ වගවීම සහතික කිරීම, සදාචාර සම්පන්න පාලනයක් ප්‍රවර්ධනය කිරීම, අල්ලස් හෝ දූෂණ චෝදනා විමර්ශන කොමිෂන් සභාව සමඟ සහයෝගයෙන් නීතිය බලාත්මක කිරීමට සහාය වීම මෙම ඒකක පිහිටු වීම මගින් අපේක්ෂා කෙරේ.

එසේම රාජ්‍ය නිලධාරින්ගේ සදාචාරාත්මක හැසිරිම් ප්‍රවර්ධනය කරමින් රාජ්‍ය ආයතන තුළ සුපිළිපන් සංස්කෘතියක් වර්ධනය කිරීමට වැඩසටහන් හඳුන්වා දීම පිළිබඳවද මෙහිදී සාකච්ඡා කෙරුණු අතර එම වැඩසටහන් සඳහා සහාය ලබා දීමට සූදානම් බවද අසූසා කුබෝටා මහත්මිය ජනාධිපති ලේකම්වරයා වෙත සහතික වූවාය.

එක්සත් ජාතීන්ගේ සංවර්ධන වැඩසටහනේ (UNDP) ජාත්‍යන්තර විශේෂඥ සහ ආර්ථික සහයෝගීතාව සහ සංවර්ධනය සඳහා වූ සංවිධානයේ (OECD) ඉස්තාන්බුල් දූෂණ විරෝධී ක්‍රියාකාරී සැලැස්මේ සභාපති ඩ්‍රැගෝ කොස් (Drago Kos), එක්සත් ජාතීන්ගේ සංවර්ධන වැඩසටහනේ දූෂණය පිටුදැකීම පිළිබඳ විශේෂඥ ධම්මික දසනායක යන මහත්වරු මෙම අවස්ථාවට සහභාගී වූහ.

ඖෂධ ඇතුළු වෛද්‍ය උප­ක­රණ රජ­ය­කින් රජ­ය­කට ලබා ගැනී­මේදී කට­යුතු කළ යුතු ක්‍රම­වේ­දය පිළි­බඳ ශ්‍රී ලංකාවේ තුර්කි තානා­පති සෙමි ලූට්ෆූ ටර්ගට් මහතා සහ සෞඛ්‍ය හා ජන­මාධ්‍ය ඇමැති වෛද්‍ය නලින්ද ජය­තිස්ස මහතා අතර විශේෂ සාක­ච්ඡා­වක් පසු­ගි­යදා පැවැ­ත්විණි.

සෞඛ්‍ය හා ජන­මාධ්‍ය අමා­ත්‍යාං­ශ­යේදී තුර්කි තානා­ප­ති­ව­රයා සහ ඇමැති වෛද්‍ය නලින්ද ජය­තිස්ස මහතා අතර හමුව සිදු­විය.

ජනතා විශ්වා­ස­යක් සම­ඟින් ආණ්ඩුව ලබා ගත් මැති­ව­රණ ජය­ග්‍ර­හණ පිළි­බ­ඳව මෙහිදී සිය හෘද­යාං­ගම සුබ­පැ­තුම් එක් කළ තුර්කි තානා­ප­ති­ව­රයා, මෙරට දේශ­පා­ලන, ආර්ථික, කෘෂි­කා­ර්මික, සෞඛ්‍ය, අධ්‍යා­පන, සංස්කෘ­තික, සංචා­රක, ජන­මාධ්‍ය ඇතුළු ක්ෂේත්‍ර රැසක් පිළි­බ­ඳව සාකච්ඡා කෙරිණි.

තුර්කිය සහ ශ්‍රී ලංකාව අතර පව­තින දීර්ඝ­කා­ලීන රාජ්‍ය­තා­න්ත්‍රික සබ­ඳ­තා­වන් ද සිහි­පත් කළ තානා­ප­ති­ව­රයා සෞඛ්‍ය හා ජන­මාධ්‍ය ඇමැති නලින්ද ජය­තිස්ස මහ­තාගේ පූර්ණ මැදි­හ­ත්වී­මෙන් මෙරට සෞඛ්‍ය ක්ෂේත්‍ර­යට අභි­යෝ­ග­යක්ව පව­තින ඖෂධ සහ වෛද්‍ය උප­ක­රණ, රජ­ය­කින්-රජ­ය­කට ලබා ගැනීමේ පද­නම යටතේ මෙර­ටට සපයා ගැනී­මට සැල­සුම් කර­මින් සිටින යෝජිත ක්‍රම­වේ­දය පිළි­බ­ඳව මෙහිදී ඉතා දීර්ඝ ලෙස කරුණු විම­සන ලදි. ඉදි­රි­යේදී ක්‍රියා­ත්මක කිරී­මට නිය­මිත එම වැඩ­පි­ළි­වෙළ පිළි­බඳ විශේෂ අව­ධා­න­යට ලක් කළ තානා­ප­ති­ව­රයා එම වැඩ­පි­ළි­වෙළ සාර්ථක කර ගැනී­ම­ටත්, මෙරට සෞඛ්‍ය සේවාවේ උන්න­ති­ය­ටත්, දෙරට අතර සහ­යෝ­ගි­තාව ශක්ති­මත් කිරීම වෙනු­වෙන් මෙන්ම ශ්‍රී ලංකාවේ සමාජ, ආර්ථික, දේශ­පා­ලන ඉලක්ක සපුරා ගැනී­මට අවශ්‍ය අඛණ්ඩ සහ‌යෝ­ගය ඉදි­රි­ය­ටත් ලබා­දෙන බවත් පැව­සීය.

සෞඛ්‍ය හා ජන­මාධ්‍ය ඇමැති නලින්ද ජය­තිස්ස මහතා මෙහිදී රජයේ ඉදිරි කට­යුතු සම්බ­න්ධ­යෙ­නුත්, මෙරට සෞඛ්‍ය ක්ෂේත්‍රයේ වත්මන් ක්‍රියා­කා­රී­ත්වය මෙන්ම ඉදිරි වැඩ­පි­ළි­වෙළ පිළි­බ­ඳ­වත් තානා­ප­ති­ව­රයා දැනු­ම්වත් කළ අතර, ජන­තා­වට ගුණා­ත්මක ප්‍රමි­ති­ගත ඖෂධ හිඟ­ය­කින් තොරව ලබා­දීම සඳහා ක්‍රියා­ත්මක සැල­සුම පිළි­බ­ඳව ද තානා­ප­ති­ව­රයා දැනු­ම්වත් කරන ලදි.

එමෙන්ම ජන­මාධ්‍ය ක්ෂේත්‍රය නවීන තාක්ෂ­ණික ක්‍රම­වේද ඔස්සේ ජන­තා­වට වඩාත් සමීප කර­ලීම සඳහා සැල­සුම් කර ඇති නව ක්‍රියා­දා­මය පිළි­බ­ඳව ද මෙහිදී පැහැ­දිලි කරන ලදි.

තුර්කි –ශ්‍රී ලංකා ද්විපා­ර්ශ්වික සබ­ඳතා තව තවත් ශක්ති­මත් කර­මින් තුර්කි රජය ශ්‍රී ලංකාවේ අභි­වෘ­ද්ධිය වෙනු­වෙන් දක්වන දාය­ක­ත්වය මෙහිදී සෞඛ්‍ය ඇමැ­ති­ව­ර­යාගේ පැස­සු­මට ද ලක්විය.

ඉදිරි මාස තුන තුළදී මාධ්‍ය ප්‍රති­ප­ත්තිය එළි­දැ­ක්වීම සිදු කරන බව සෞඛ්‍ය හා ජන­මාධ්‍ය ඇමැති වෛද්‍ය නලින්ද ජය­තිස්ස මහතා පාර්ලි­මේ­න්තු­වේදී ඊයේ (08) පැව­සීය. ජන­මා­ධ්‍ය­යට අදා­ළව සකස් කරන ඕනෑම ආචා­ර­ධර්ම සංග්‍ර­හ­යක්, ප්‍රති­ප­ත්ති­යක්, පන­තක් නිර්මා­ණ­යේදී ක්ෂේත්‍රයේ පුද්ග­ල­යන්ගේ පුළුල් සාක­ච්ඡා­ව­කින් අන­තු­රුව සකස් කරන බවත් ආචා­ර­ධර්ම සංග්‍ර­හ­යක් මේ වන ­විට කෙටු­ම්පත් කර­මින් පව­තින බවත් ඇමැ­ති­ව­රයා පැව­සු­වේය.

මාධ්‍ය ක්ෂේත්‍රය සම්බ­න්ධ­යෙන් ජාතික ජන බල­වේ­ගයේ අනු­රා­ධ­පුර දිස්ත්‍රික් මන්ත්‍රී මහා­චාර්ය සේන නානා­ය­ක්කාර මහතා වාචි­කව ඇසූ ප්‍රශ්න­යට පිළි­තුරු දෙමින් ඇමැ­ති­ව­රයා මේ බව කියා සිටි­යේය.

මාධ්‍ය ක්ෂේත්‍ර­යට සම්බන්ධ ආය­තන, පුද්ග­ල­යන්, ප්‍රවී­ණ­යන් විසින් ජන­මාධ්‍ය ප්‍රති­ප­ත්තිය සකස් කරන අතර, ගුණා­ත්ම­ක­භා­වය ආරක්ෂා කිරීම සඳහා එහිදී අව­ධා­නය යොමු කර ඇතැයි ද මෙම ප්‍රති­ප­ත්තිය සකස් කිරීම සඳහා අවශ්‍ය පහ­සු­කම් ආණ්ඩු­වෙන් ලබා­දෙන්නේ යැයි ද ඇමැ­ති­ව­රයා කීය. ජන­මාධ්‍ය සම්බ­න්ධ­යෙන් රජයේ ප්‍රති­ප­ත්තිය වනුයේ ජන­මාධ්‍ය නියා­ම­නය නොව, ජන­මාධ්‍ය සමඟ සිදු කරන විධි­මත් සාක­ච්ඡා­ව­කින්, එක­ඟ­තා­ව­කින් කට­යුතු කිරීම යැයි ද ඇමැ­ති­ව­රයා පැව­සු­වේය.

නීති පැන­වී­මට වඩා මාධ්‍ය සමඟ සාකච්ඡා මට්ට­මින් කට­යුතු කිරී­මට ආණ්ඩුව පිය­වර ගන්නා බවත් පව­තින නීති­යට අනුව කට­යුතු නොක­රන මාධ්‍ය සම්බ­න්ධ­යෙන් නීති­මය පිය­වර ගැනී­මට කට­යුතු කරන බවත් ඇමැ­ති­ව­රයා ප්‍රකාශ කළේය. තර­ග­කාරී ලෝකය තුළ ජන­මාධ්‍ය ආය­තන සහ මාධ්‍ය­වේ­දීන් තම කාර්ය­භා­රය ගැන නිසි අව­බෝ­ධ­ය­කින් කට­යුතු කරනු ඇතැයි යන විශ්වා­සය යටතේ මෙම කට­යුතු කරන බව ද ඇමැ­ති­ව­රයා පැව­සු­වේය.

දුෂණයෙන් තොර සුපිළිපන්න රාජ්‍ය සේවයක් වෙනුවෙන් 2023 අංක 9 දරන දුෂණ විරෝධී පනත ප්‍රකාරව ජනාධිපති ලේකම් කාර්යාලය සහ අල්ලස් හෝ දුෂණ චෝදනා විමර්ශන කොමිෂන් සභාව එක්ව ආරම්භ කර ඇති " සියලු රාජ්‍ය ආයතනවල අභ්‍යන්න්තර කටයුතු ඒකක පිහිටුවීමේ නව වැඩපිළිවෙල" හා සමගාමීව සෞඛ්‍ය හා ජනමාධ්‍ය අමාත්‍යංශයේ, අංක 163, "ඇසිදිසි මැදුර", පොල්හේන්ගොඩ කොළඹ 05 ලිපිනයේ පිහිටි ජනමාධ්‍ය අංශයේ අභ්‍යන්න්තර කටයුතු ඒකක සෞඛ්‍ය හා ජනමාධ්‍ය අමාත්‍යංශයේ ලේකම් විශේෂඥ වෛද්‍ය අනිල් ජාසිංහ මහතාගේ ප්‍රධානත්වයෙන් අද (08) දින ස්ථාපනය කරන ලදී. මෙම අවස්ථාවට අතිරේක ලේකම් (පාලන) දීපා ලියනගේ, අතිරේක ලේකම් (සංවර්ධන, තොරතුරු, පර්යේෂණ හා ප්‍රතිපත්ති ) එන්.ඒ.කේ.එල්. විජේනායක, අතිරේක ලේකම් (තැපැල්) එස්.ඩී. පාඬිකෝරාල යන මහත්ම මහත්මීන් සහ ජනමාධ්‍ය අංශයේ මාණ්ඩලික නිලධාරි මහත්ම මහත්මීන් හා අනුබද්ධ ආයතන ප්‍රධානීන් ඇතුළු පිරිසක් එක්වූහ.

ඒ අනුව, සෞඛ්‍ය හා ජනමාධ්‍ය අමාත්‍යංශයේ, ජනමාධ්‍ය අංශයේ නියෝජ්‍ය අධ්‍යක්ෂ (සැලසුම්) ඊ.එම්. සිසිර ඒකනායක මහතා සුපිළිපන්න නිලධාරියා ලෙස පත්කර ඇති අතර සෞඛ්‍ය හා ජනමාධ්‍ය අමාත්‍යංශයේ, ජනමාධ්‍ය අංශයේ යම් අක්‍රමිකතාවක්, දුෂණයක් හෝ වංචාවක් ඔබ දැනුවත්ව සිදුවන්නේ නම් නාමිකව හෝ නිර්නාමිකව ඒ පිළිබඳ තොරතුරු / පැමිණිලි අමාත්‍යාංශ පරිශ්‍රයේ ස්ථානගත කොට ඇති පැමිණිලි පෙට්ටියට යොමු කිරීම මඟින් හෝ පහත ක්‍රමවේදයක් ඔස්සේ දැනුම්දිය හැකිය.

"අභ්‍යන්තර කටයුතු ඒකකය", අංක163, ඇසිදිසි මැඳුර, කිරුළපන මාවත, පොල්හේන්ගොඩ, කොළඹ 05 යන ලිපිනයට තැපැල් මාර්ගිකව යොමු කිරීම හෝ යන විද්‍යුත් තැපැල් ලිපිනය වෙත දැනුම් දීම හෝ 0112513462 අංකය වෙත ෆැක්ස් කිරීම හෝ 0112512321 (දිගුව 7004) දුරකථන අංක වෙත දැනුම් දීම සිදු කළ හැක.

ශ්‍රී ලංකාවේ රාජ්‍ය අංශය තුළ දුෂණය මැඩලීමේ ක්‍රියාවලියේ ප්‍රධාන මුලපිරීමක් ලෙස රාජ්‍ය අංශය පුරා විනිවිදභාවය, වගවීම සහ සුපිළිපන්න භාවය පෝෂණය කරන සංස්කෘතියක් නිර්මාණය කර රජයේ සේවාවන් සියලුම පුරවැසියන්ට ඵලදායි ලෙස සැපයීම සඳහා සියලුම රජයේ අමාත්‍යාංශ, දෙපාර්තමේන්තු සහ ආයතන තුළ අභ්‍යන්තර කටයුතු ඒකක (Internal Affairs Unit - IAU) පිහිටුවීමට කටයුතු කර ඇත.

“සුව­සැ­රිය – 1990“ ගිල­න් රථ සංඛ්‍යාව 450ක් දක්වා වත්මන් ආණ්ඩුව යටතේ ඉහළ නැංවී­මට රජය සැල­සුම් කර ඇතැයි සෞඛ්‍ය හා ජන­මාධ්‍ය ඇමැති වෛද්‍ය නලින්ද ජය­තිස්ස මහතා පැවසීය. ඉන්දීය ආධාර යටතේ මෙම ගිල­න්රථ සංඛ්‍යාව 450ක් දක්වා නුදු­රේ­දීම වැඩි කරන බවත් දැනට ගිල­න්රථ 340ක් රට පුරා සේවයේ යොදවා ඇති බවත් ඇමැ­ති­ව­රයා ප්‍රකාශ කළේය. ජාතික අන­තුරු නිවා­රණ සතිය නිමි­ත්තෙන් සෞඛ්‍ය අමා­ත්‍යාං­ශයේ පැවැති මාධ්‍ය හමු­වට එක්වෙ­මින් ඇමැ­ති­ව­රයා ඊයේ (07) මේ බව පැව­සු­වේය. මෙම ගිල­න්රථ සේවා­වට අවශ්‍ය තාක්ෂ­ණික නිල­ධා­රීන් පුහුණු කිරීමේ පාඨ­මාලා කැල­ණිය, කොළඹ, ජය­ව­ර්ධ­න­පුර විශ්ව­වි­ද්‍යා­ල­යන්ට අනු­බ­ද්ධව ආරම්භ කරන බවත් එම­ඟින් පුහු­ණුව ලැබූ දක්ෂ තාක්ෂ­ණික නිල­ධා­රීන් පිරි­සක් මෙම සේවා­වට අනු­බද්ධ කර ගත හැකි බවත් ඇමැ­ති­ව­රයා පැව­සීය. මීට අම­ත­රව ජාතික ආධු­නි­කත්ව පුහුණු කිරීමේ අධි­කා­රිය සහ උසස් පෙළ අව­සන් දරු­වන් මෙම සේවාව සඳහා පුහු­ණු­වට බඳවා ගැනී­මට ද ඉදි­රි­යේදී පිය­වර ගන්නා බව ඇමැ­ති­ව­රයා ප්‍රකාශ කළේය.

සුව­සැ­රිය සේවාව ශක්ති­මත් කිරී­මෙන් හදිසි අන­තු­රු­ව­ලට ලක් වන පුද්ග­ල­යන් හැකි ඉක්ම­නින් සුර­ක්ෂි­තව රෝහ­ල්ගත කර ප්‍රති­කාර ලබා­ දී­මට හැකි බව ද ඇමැ­ති­ව­රයා අව­ධා­ර­ණය කළේය.

ශ්‍රී ලංකාවේ පාකිස්ථාන මහ කොමසාරිස් මේජර් ජෙනරල් ෆහීම් උල් අසීස් (Major General (Retd) Faheem Ul Aziz HI (M)) මහතා ඊයේ (07) සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා සෞඛ්‍ය අමාත්‍යාංශයේ දී හමු විය.

මෙහි දී ශ්‍රී ලංකාව සහ පකිස්ථානය අතර දීර්ඝකාලීන සමාජ, ආර්ථික, අධ්‍යාපන, ක්‍රීඩා සහ දේශපාලන සබඳතා පිළිබඳවත්,  සෞඛ්‍ය, දේශීය වෛද්‍ය, සංචාරක හා වෛද්‍ය සංචාරක ක්ෂේත්‍රයන්ට අදාළ කටයුතු ඉදිරියේ දී තව තවත් වර්ධනය කර ගැනීම  පිළිබඳව දීර්ඝ වශයෙන් සාකච්ඡා කරන ලදි. එමෙන්ම දෙරටෙහි සංස්කෘතිකාංග ඇතුළත් මාධ්‍ය වැඩසටහන් හුවමාරු කර ගැනීම සහ රුපවාහිනී ක්ෂේත්‍රයේ විචිත්‍රාංග සහ ටෙලි නාට්‍ය හුවමාරු කර ගැනීමට ඇති හැකියාව පිළිබඳව ද මෙම සාකච්ඡාවේ දී පුළුල් අවධානයක් යොමු කරන ලදි.

ඉහත සියලු ක්ෂේත්‍ර තුළ පකිස්ථාන රජයේ සහාය ශ්‍රී ලංකාව‍ට නොමඳව ලබාදෙන බවට පකිස්ථාන මහ කොමසාරිස්වරයා මෙහිදී සහතික විය.

අධ්‍යාපන ක්ෂේත්‍රය තුළ දෙරට අතර පවතින සහයෝගීතාව පිළිබඳව ද මෙහි දී විශේෂ අවධානය යොමු කෙරුණු අතර, දැනට වෛද්‍ය අධ්‍යාපනය සඳහා ශ්‍රී ලාංකික සිසුන්ට පකිස්ථානයේ ශිෂ්‍යත්ව පිරිනැමීම සිදු කෙරෙන අතර, උසස් අධ්‍යාපන හා වෘත්තීය අධ්‍යාපන ක්ෂේත්‍රයේ දොරට අතර පවතින සහයෝගීතාව වර්ධනය කිරීම මෙන් ම වෘත්තීය අධ්‍යාපන ක්ෂේත්‍රයේ ශිෂ්‍යයින්ට ගුණාත්මක වෘත්තිය පුහුණුවක් ලබාදීම එහි දී අවධානය යොමු විය.

මීට අමතරව කෘෂිකර්ම සහ තොරතුරු තාක්ෂණ ක්ෂේත්‍රයන් නියෝජනය වන අවස්ථා සම්බන්ධයෙන් ද සාකච්ඡා කෙරිණි.

ශ්‍රී ලංකාව සහ පකිස්ථානය අතර ශක්තිමත් සබඳතාව මෙම හමුවේදී තවදුරටත් තහවුරු කෙරුණු අතර විවිධ ක්ෂේත්‍ර ඔස්සේ එම සබඳතා වර්ධනය කරගැනීමට ඇති හැකියාව පිළිබඳව ද දෙපාර්ශ්වයේම අවධානය මෙහි දී  යොමු විය.

මෙම අවස්ථාවට සෞඛ්‍ය හා ජනමාධ්‍ය නියෝජ්‍ය අමාත්‍ය වෛද්‍ය හංසක විඡේමුණි, සෞඛ්‍ය හා ජනමාධ්‍ය අමාත්‍යාංශයේ ලේකම් විශේෂඥ වෛද්‍ය අනිල් ජාසිංහ සහ ශ්‍රී ලංකාවේ පකිස්ථාන මහ කොමසාරිස් කාර්යාලය නියෝජනය කරමින් වෙළඳ හා ආයෝජන විෂය භාර නිලධාරීනී මහ්වාෂ් සාමි (Ms.Mahwash Sami), මාධ්‍ය හා සංස්කෘතික විෂය භාර නිලධාරී අදීල් සත්තාර් (Adeel Sattar) යන මහත්ම මහත්මීන් සහභාගි වූහ.

සෞඛ්‍ය අමා­ත්‍යාං­ශය මඟින් වාර්ෂි­කව ක්‍රියා­ත්මක කරන ජාතික අන­තුරු නිවා­රණ සතිය අදින් (07) ඇරඹේ. අද සිට 11 දා දක්වා මේ සතිය ක්‍රියා­ත්මක කරන අතර මේ වර්ෂයේ දී සම­රනු ලබන්නේ දස­ වැනි ජාතික අන­තුරු නිවා­රණ සති­යයි. මාර්ග අන­තුරු වැළැ­ක්වීමේ දිනය අදට (07) ද, සේවා ස්ථාන­යන්හි අන­තුරු වැළැ­ක්වීමේ දිනය 08 වැනි­දාට ද, නිවෙස් සහ වැඩි­හිටි නිවා­ස­ව­ලදී වන අන­තුරු වැළැ­ක්වීමේ දිනය 09 වැනි­දාට ද, දියේ ගිලී­ම්ව­ලින් වන අන­තුරු වැළැ­ක්වීමේ දිනය 10 වැනි­දාට ද, පාසල්, පෙර පාසල් සහ දිවා සුරැ­කුම් මධ්‍ය­ස්ථා­න­වල සිදු වන අන­තුරු වැළැ­ක්වීමේ දිනය 11 වැනි­දාට ද යෙදී ඇත.

මෙරට සමස්ත ජන­ග­හ­න­යෙන් 7 දෙන­කු­ගෙන් එක් අය­කුම වෛද්‍ය ප්‍රති­කාර සඳහා යොමු විය යුතු ආකා­රයේ අන­තු­ර­කට වාර්ෂි­කව පත්විය හැකි බවත් සෑම විනා­ඩි­ය­ක­ටම අවම වශ­යෙන් ශ්‍රී ලාංකි­ක­යන් 6 – 8 දෙන­කුට වෛද්‍ය ප්‍රති­කාර අවශ්‍ය වන ආකා­රයේ අන­තු­රක් විය හැකි බවත් සෞඛ්‍ය අමා­ත්‍යාං­ශය පෙන්වා දෙයි.

හදිසි අන­තුරු හේතු­වෙන් ප්‍රති­කාර සඳහා ශ්‍රී ලංකාවේ රෝහල් වෙත යොමු කෙරෙන රෝගී­න්ගෙන් වාර්ෂි­කව 2500-3000ක් පමණ මර­ණ­යට පත් වන අතර, රෝහ­ල්වල සිදු වන මර­ණ­ව­ලට හේතු­වන සාධක අතු­රින් 10 වැනි ස්ථාන­යට පත්ව ඇත්තේ හදිසි අන­තු­රුය.

ශ්‍රී ලංකාව තුළ වාර්ෂි­කව සිදු වන 145,000ක් පමණ වන සමස්ත මරණ අතු­රින් සිය­යට 8ක් හෙවත් 10,000- 12,000කගේ පමණ ජීවිත හදිසි අන­තුරු නිසා ශ්‍රී ලංකා­වට අහිමි වන බවත්, සෑම පැය තුන­ක­දීම අවම වශ­යෙන් 4 දෙන­කුගේ පමණ ජීවිත විවිධ අන­තුරු නිසා රටට අහිමි වන බවත් සෞඛ්‍ය අමා­ත්‍යාං­ශය පව­සයි.

රජයේ රෝහල්වල නේවාසිකව ප්‍රතිකාර ගනු ලබන රෝගීන්ට ගුණාත්මක, ප්‍රනීත ආහාරවේලක්, ප්‍රියතාවයක් ඇතිවන පරිදි රෝගියාට ලබා දීමේ විශේෂ වැඩපිළිවෙළක් ආරම්භ කිරීමට සෞඛ්‍ය හා ජනමාධ්‍ය අමාත්‍යාංශයේ අවධානය යොමුව ඇත. ඊට අදාළව විශේෂ සාකච්ඡාවක් පසුගිය දා සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතාගේ ප්‍රධානත්වයෙන් එම අමාත්‍යාංශයේ දී පැවැත්විණි.

මෙම විශේෂ වැඩපිළිවෙළ ආරම්භ කිරීමේ නියමු ව්‍යාපෘතිය මහරගම අපේක්ෂා රෝහල කේන්ද්‍රගත කරගෙන ආරම්භ කිරීමට ද සෞඛ්‍ය හා ජනමාධ්‍ය අමාත්‍යාංශය තීරණය කර ඇති අතර ඒ අනූව එම රෝහලේ අධ්‍යක්ෂවරයා ඇතුළුව පරිපාලනයට සහ මෙම විෂයට අදාළ නිලධාරීන්, ශ්‍රී ලංකා පෝෂණ විශේෂඥ වෛද්‍යවරුන්ගේ විද්‍යාතනයේ වෛද්‍යවරුන්, පෝෂණවේදීන්, ඇතුළු පිරිසකගේ සහභාගීත්වයෙන් මෙම හමුව පැවැත්විණි.

සෞඛ්‍ය අමාත්‍යාංශය වාර්ෂිකව අති විශාල මුදලක් රජයේ රෝහල්වල නේවාසික රෝගීන්ට ආහාර පාන ලබා දීම සදහා වැය කරන බව පෙන්වා දුන් අමාත්‍යවරයා එම මුදලට සාධාරණයක් ඉටුවන්නේ ද යන්න ගැටළු සහගත තත්ත්වයක් බව මෙහි දී පවසා සිටියේ ය.

මේ වන තෙක් රෝහලෙන් රෝගියාට ලබා දෙන ආහාර වේල පිළිබඳව රෝගියා තෘප්තිමත් ද නැද්ද යන්න පිළිබදව විමසීමක්වත් නොකරන තත්ත්වකට එම සේවාව පත්ව ඇති බව ද අවධාරණය කළ අමාත්‍යවරයා රෝහලෙන් ලබා දෙන වර්තමාන ආහාරවේල පිළිබඳවත්, එය රෝගියාට ලබා දෙන ක්‍රමයේත් වෙනසක් ඇති කළයුතු බව පැවසී ය.

ප්‍රනීත, ගුණදායක ආහාරවේලක් ප්‍රියමනාපව රෝගියාට ලබා දීමේ අවශ්‍යතාවය සහිතව මහරගම අපේක්ෂා රෝහලෙන් ආරම්භකරන මෙම නියමු ව්‍යාපෘතිය ඉදිරියේ දී මෙරට සියලු රජයේ රෝහලවල ක්‍රියාත්මක කිරීමට බලාපොරොත්තු වන බව පැවසූ අමාත්‍යවරයා අපේක්ෂා රෝහල තුළ මෙම ව්‍යාපෘතිය ආරම්භ කිරිමට පවතින ගැටළු පිළිබඳව විමසා සිටියේ ය.

මේ වන විට අපේක්ෂා රෝහල තුළ එකවර 2000 කට ආහාර පාන සැකසීම සදහා පහසුකම් සහිත නවීන මුළුතැන්ගෙයක් සකස් කර ඇති බවත්, එයට ප්‍රමාණවත් කාර්ය මණ්ඩලයක් නොමැති බව මෙහි දී අණාවරණය විය. එමෙන් ම නවීන ආකාරයට මෙම ආහාර පාන සැකසීම සහ පිළිගැන්වීමට කාර්ය මණ්ඩලයට විශේෂ පුහුණුවක් ලබා දීමේ අවශ්‍යතාවය ද මෙහි දී මතුවිය.

මුළුතැන්ගෙය, කුස්සිය හෙවත් ‘kitchen’ යන නාමය වෙනුවට එහි නම ආහාර පාන දෙපාර්තමේන්තුව (Food and Beverages Department) ලෙස වෙනස් කිරීමටත් මෙහි දී යෝජනා විය.

තනි පිඟානකට හොදි, එළවළු. මාළු, මස් යනාදිය බෙදූ ආහාර පිඟානක් වෙනුවට‍: බත්, එළවළු, මස් හෝ මාළු යනාදිය වෙන වෙන ම බෙදා තිබෙන ප්‍රියමනාප පිඟානක (Customise Plate) අදාළ ආහාර වේල රෝගියාට පිරිනැමීම මෙම ව්‍යාපෘතියේ ප්‍රධාන අංගය බවත්, එබඳු පිඟානකට බෙදූ ආහාර වේලක් දුටු සැණින් රෝගියාට ආහාර ගැනීමට රුචියක්, ප්‍රියතාවක් ඇති වන බව ද වෛද්‍යවරුන් මෙහි දී අමාත්‍යවරයාට පෙන්වා දෙන ලදී.

එමෙන් ම මෙම ව්‍යාපෘතිය ඉදිරියේ දී රජයේ සියලුම රෝහල්වල ක්‍රියාත්මක කිරීමට නම් රෝහල්වල මුළුතැන්ගෙවල් නවීකරණයට ලක්කළ යුතු බවත් දැනට පවතින ගෑස් උඳුන වෙනුවට වාෂ්ප (steam) බලයෙන් ක්‍රියාත්මක කළ හැකි උඳුන් මෙන් ම නවීන තාක්ෂණයෙන් යුතු උපකරණ ලබා දීමේ අවශ්‍යතාවය ද මෙහි දී ඉස්මතු විය.

රෝහල්වල ආහාර පාන සැකසීමට අමුද්‍රව්‍ය ලබා දීමේ ලංසුව ලබා දෙනුයේ අවම ලංසුව තබන පුද්ගලයාට බවත්, එම අවම ලංසුව තබන තැනැත්තා රෝහලට ලබා දෙන අමුද්‍රව්‍යවල ගුණාත්මකභාවය පිළිබඳව ගැටළු සහගත තත්ත්වයන් පවතින බවත්. විශේෂයෙන් ම කුළුබඩුවල ගුණාත්මකභාවය පිළිබඳව විශේෂ අවධානයක් යොමුකළ යුතු බව නිලධාරීන්, වෛද්‍යවරුන් අමාත්‍යවරයා හමුවේ මෙහි දී පැවසී ය.

මෙහි දී මතු වූ කරුණු පිළිබඳව විශේෂ අවධානය යොමුකළ අමාත්‍යවරයා ඊට කඩිනම් විසඳුම් ලබා දී මෙම ව්‍යාපෘතිය සාර්ථක කරගැනීමට කටයුතු කරන බව අවධාරණය කළේ ය.

මෙම සාකච්ඡාව සදහා සෞඛ්‍ය හා ජනමාධ්‍ය අමාත්‍යාංශයේ අතිරේක ලේකම්වරුන් වන සුනිල් ගලගම, සාලින්ද බණ්ඩාර, සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන, මහරගම අපේක්ෂා රෝහලේ අධ්‍යක්ෂ විශේෂඥ වෛද්‍ය අරුණ ජයසේකර, ශ්‍රී ලංකා පෝෂණ විශේෂඥ වෛද්‍යවරුන්ගේ විද්‍යාතනයේ සභාපති වෛද්‍ය තිමති වික්‍රමසේකර යන මහත්ම මහත්මීන්, වෛද්‍යවරුන්, පෝෂණවේදීන් ඇතුළුව පිරිසක් සහභාගි වූහ.

ශ්‍රී ලංකා ත්‍රිපෝෂ සමාගමේ නිෂ්පාදන කටයුතු පැය 24 පුරා අඛණ්ඩව සිදු කරමින් සිය නිෂ්පාදන දිවයින පුරා බෙදාහැරීමේ කටයුතු සෞඛ්‍ය හා ජනමාධ්‍ය අමාත්‍ය නලින්ද ජයතිස්ස මහතාගේ මඟපෙන්වීම මත මේ වනවිට සාර්ථකව සිදු කෙරේ.

ඒ අනුව ත්‍රිපෝෂ නිෂ්පාදන කටයුතු අඛණ්ඩව සිදු කරමින් එම නිෂ්පාදන දිවයින පුරා බෙදාහැරීම් සිදුවන ආකාරය සහ ඉදිරි නිෂ්පාදන කටයුතු සිදු කිරිම පිළිබඳ සොයා බැලීමට සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා ඊයේ (04) කඳාන පිහිටි ත්‍රීපෝෂ සමාගමේ විශේෂ නිරීක්ෂණයක නිරත විය.

එම නිරීක්ෂණයේ දී ත්‍රීපෝෂ නිෂ්පාදන කටයුතු සහ ත්‍රිපෝෂ නිෂ්පාදන දිවයින පුරා බෙහාහැරීමේ කටයූතු ද නිරීක්ෂණය කළ සෞඛ්‍ය හා ජනමාධ්‍ය අමාත්‍යවරයා ත්‍රිපෝෂ සමාගමේ ඉදිරි සැලසුම් සහ නිෂ්පාදන අඛණ්ඩව සිදු කිරීම සදහා ගනු ලබන තීන්දු තීරණ පිළිබඳවත්, නව නිෂ්පාදන මෙන් ම අලෙවිකරණ සහ ප්‍රචාරණ කටයුතු පිළිබඳවත් නිෂ්පාදන සඳහා අමුද්‍රව්‍ය අඛණ්ඩව ලබාගැනිම ඇතුළු මූල්‍ය, ප්‍රවාහන සහ මානව සම්පත් ගැටළු පිළිබඳව ආයතන ප්‍රධානීන් සමග විශේෂ සාකච්ඡාවක ද නිරත වන ලදි. මෙහි දී දුම්රිය මාර්ගයෙන් බදුල්ල, නුවරඑළිය, මාතලේ සහ ලොරි රථ මගින් කෑගල්ල, කළුතර, කිලිනොච්චිය, කොළඹ, ගම්පහ, පුත්තලම දිස්ත්‍රික්ක සදහා ත්‍රිපෝෂ බෙදාහැරීම් කටයුතු අමාත්‍යවරයා සිය නිරීක්ෂණයට කරන ලදි.

සමාගමේ කටයුතු පවත්වාගෙන යෑමට අවශ්‍ය බඩ ඉරිඟු සපයා ගැනීම සඳහා ඍජු සහ විනිවිද භාවයෙන් යුතුව තීරණ ගෙන සැපයුම් යථාවත් කර ඇති බවත්, සමාගමේ යන්ත්‍ර සූත්‍ර පූර්ණ ධාරිතාවයෙන් පැය 24 පුරා ක්‍රියාත්මක කරමින් සෞඛ්‍ය අමාත්‍යංශයේ පිරිවිතරයන්ට අනුව අදාළ ප්‍රතිලාභීන්ට වෙත දිවයින පුරා බෙදාහැරීමේ කටයුතු ද කිසිදු බාධාවකින් තොරව සිදු කෙරෙන බව මෙහි දී ශ්‍රී ලංකා ත්‍රිපෝෂ ලිමිටඩ් හි නව සභපති අමල් අත්තනායක මහතා ඇතුළු නිලධාරීන් අමාත්‍යවරයා දැනුවත් කරන ලදි.

යන්ත්‍ර සූත්‍ර උපරිමයෙන් ක්‍රියාත්මක වීම මත අතිරික්ත නිෂ්පාදන ද දිවයින පුරා බෙදා හැරීමට කටයුතු කර ඇති බවත්, සුපෝෂ මූලික අමුද්‍රව්‍ය ලෙස ලෙස භාවිත කරමින් නිපදවන සුපෝෂ කැලරි බාර් නිෂ්පාදනය අමුද්‍රව්‍යක් ලෙස යොදා විවිධ රසයෙන් යුතු කප්කේක් නිපදවීමට ද කටයුතු යොදා ඇති බව ද සමාගම මෙහි දී පෙන්වා දෙන ලද අතර, ජා-ඇළ කපුවත්ත සුපෝෂ අලෙවි සැලෙහි එම නිෂ්පාදනය දැනටමත් අලෙවි කිරීමට කටයුතු කර ඇති බව ද ඉදිරියේ දී රට පුරා සුපෝෂ අලෙවිසැල් 100 ක් ආරම්භ කිරීමටද සැලසුම් කර තිබෙන බව ද අමාත්‍යවරයා දැනුවත් කරන ලදි.

සෞඛ්‍ය හා ජනමාධ්‍ය අමාත්‍යාංශය යටතේ පවතින ත්‍රීපෝෂ සමාගම වැහෙන්න යන සහ ඈවර කිරීමට යන සමාගමක් ලෙස මෑත කාලයේ මාධ්‍ය තුළ, දේශපාලන වේදිකාව තුළ සහ ජනතාව අතර සාකච්ඡාවට ගැනුණ බවත්, විරුද්ධවාදීන් ඒ පිළිබඳ විශාල ප්‍රචාරයක් ගෙන ගිය බව ද පැවසූ සෞඛ්‍ය හා ජනමාධ්‍ය අමාත්‍ය නලින්ද ජයතිස්ස මහතා රජය පසුගිය මාස 09 ක කාලය තුළ විවිධ පියවර අනුගමනය කරමින් ත්‍රිපෝෂ සමාගම ස්ථාවර කිරීමට කටයුතු කර ඇති බව ද පැවසී ය.

මේ වනවිට නිවැරදි දේශපාලන නායකත්වයක්, කළමණාකාරීත්වයක් යටතේ 230 පමණ වන සේවක සහභාගීත්වයෙන් ත්‍රීපෝෂ සමාගම ශක්තිමත්ව ඇති බවත්, බදු පසු ලාබය ලෙස රුපියල් මිලියන 300 කට වැඩි ප්‍රමාණයක් භාණ්ඩාගාරයට ගෙවීමට සමත් ආයතනයක් බවට ආයතනය ශක්තිමත්ව ඇති බවත්, නව්‍යකරණයට ලක් කරමින් නව නිෂ්පාදන රැසක් හඳුන්වා දෙමින් වෙළෙදපොළ තුළ රාජ්‍ය සමාගමක් තුළ ලාබ ලබන තත්ත්වයට පත්කර ඇති බව ද අමාත්‍යවරයා මෙහි දී පැවැසී ය.

පසුගිය කාලයේ බඩඉරිගු ප්‍රශ්නයක් ඇති වූ බවත්, එම ගැටළු නිරාකරණය කෙරෙමින් පවතින බවත්, මෙරට මාස 06 අවුරුදු 03 ඇතුළත දරුවන්ට, කිරිදෙන මව්වරුන් සහ ගැබිණි මාතාවන් ඉලක්ක කර සෞඛ්‍ය අමාත්‍යාංශයට අයත් ලොරි රථ මගින් ත්‍රිපෝෂ බෙ‌දාහැරීමේ කටයුතු දිවයින පුරා සිදු කෙරෙන බව ද පැවසී ය. දිස්ත්‍රික්ක 04 කට සහල් උපයෝගී කරගෙන මාස 06 අවුරුදු 03 ඇතුළත දරුවන්ට ත්‍රිපෝෂ ලබාදීමේ කටයුතු සිදු කෙරෙන බවත්, මේ වසර අවසන් වන විට මාස 06 අවුරුදු 03 ඇතුළත සියලු දරුවන්ට ත්‍රීපෝෂ ලබාදීමට හැකියාව ලැබෙන බව ද අමාත්‍යවරයා පැවසී ය.

අමාත්‍යවරයාගේ සහ අමාත්‍යාංශයේ මැදිහත්වීමෙන් මනා කළමනාකරණයක් තුළින් පැන නගින ගැටළු සඳහා විසඳුම් ලබාදෙමින් මෙම මස සිට අඛණ්ඩව ත්‍රීපෝෂලාභින්ට ත්‍රිපෝෂ ලබාදීමට හැකියාව ලැබෙන බව ද මෙහි දී සභාපති අමල් අත්තනායක මහතා අදහස් දක්වමින් පැවසී ය.

සිය ස්පේස් එක්ස් සමා­ග­මට අයත් චන්ද්‍රි­කා­ගත ස්ටාලින්ක් අන්ත­ර්ජාල සේවාව මේ වන විට ශ්‍රී ලංකාවේ ක්‍රියා­ත්මක වන බව එක්ස් සමාජ මාධ්‍ය ජාලයේ සට­හ­නක් තබ­මින් ලොව විශා­ල­තම ධන­වතා වන ඉලෝන් මස්ක් සඳ­හන් කර තිබේ.

එහි දක්වා ඇත්තේ ස්ටාලින්ක් දැන් ශ්‍රී ලංකාවේ ලබා­ගත හැකි බවයි.

පහළ පෘථිවි කක්ෂයේ චන්ද්‍රිකා විශාල සංඛ්‍යා­වක් ස්ථාන­ගත කර­මින් රැහැන් රහිත දත්ත සම්ප්‍රේ­ෂණ (Dish) ආධා­රක මඟින් සප­යනු ලබන අන්ත­ර්ජාල සේවා­වක් ලෙස වසර 2020දී ආරම්භ කරනු ලැබූ එම අන්ත­ර්ජාල සේවාව මේ වන විට රට­වල් 130කට ආසන්න ප්‍රමා­ණ­යක ව්‍යාප්ත වී ඇති අතර, භූතා­න­යට සහ ඉන්දි­යා­වට පසු දකුණු ආසි­යා­තික රටක ස්ටාලින්ක් අන්ත­ර්ජාල සේවාව ආරම්භ කළ තුන් වැනි රට ශ්‍රී ලංකාව බව විදෙස් මාධ්‍ය වාර්තා කරයි.

ලොව විශා­ල­තම චන්ද්‍රිකා සමූ­හය ක්‍රියා­ත්මක කරන්නේ ස්ටාලින්ක් ආය­ත­නය වන අතර, දැනට චන්ද්‍රිකා 6,750කට අධික ප්‍රමා­ණ­යක් කක්ෂයේ තබා ඇත.

අධි­වේගි අන්ත­ර්ජාල සම්බ­න්ධතා සහිත එම සේවාව තුළින් කිසිදු බාධා­ව­කින් තොරව අඛ­ණ්ඩව එකම වේග­ය­කින් අන්ත­ර්ජාල පහ­සු­කම් ලබා­ගත හැකි බවට සැල­කෙන ස්ටාලින්ක් අන්ත­ර්ජාල සේවාව නිශ්චිත මාසික ගාස්තු­වක් යටතේ සීමා­ව­කින් තොරව අන්ත­ර්ජා­ල­යට පිවි­සීමේ හැකි­යාව ලැබෙන බවත් එම පහ­සු­කම ලබා­ගැ­නීම සඳහා සවි කර­ගත යුතු චන්ද්‍රිකා දත්ත සම්ප්‍රේ­ෂණ ආධා­ර­ක­යක් මිල දී ගත යුතු බවත් වාර්තාවේ.

ශ්‍රී ලංකාවේ දැනට පව­තින ෆයි­බර් තාක්ෂණ අන්ත­ර්ජාල සේවාව මෙන් කිහිප ගුණ­ය­කින් මෙම අන්ත­ර්ජාල සේවාව වේග­වත් වීම නිසා හා ලෝකයේ ඕනෑම ස්ථාන­යක සිට මෙම සේවාව ලබා ගැනී­මට මෙම­ඟින් හැකි­යාව ලැබෙනු ඇතැයි විශ්වා­සය පළ කෙරේ.